¢ HC Vanlalruata
Kan Chief Minister Pu Lal Thanhawla’n zu khapna dan ennawn a nih tur thu vawikhat a sawi ri a, hlauh ngah leh mifel thianghlim (a saptawng taka ‘Holier than thou halo’ -nang ai chuan ka thianghlim zawk tih inziahna thi - awrh lang lova awm thiamlo) ho chu zawng mangchhia ang maiin an bengchheng leh ta hlut mai maw! Hengho hi an taptawm hle a nih ngawt loh chuan ‘Zu Khapna Dan a hlawhtling’, ‘Khawlaiah zurui hmuh tur an tlem’ tiin an iak an iakin ka ring lova. Zu khapna dan kan hman avanga zu tam tho zia chu Aizawl khawpui-a thil hre pha chin chuan an hai lova, zurui pawh an tlem chuan loh zia leh, a man erawh chu a to thu hi thudik tak, zep theih rualloh a ni.
Zu in hi thil tha a ni e tiin tuma’n a pawng a puiin an sawi ngai lo. A faktute chuan hah a tidam a, chaw ei leh mut a titui tite chuan an sawi a ni awm e. Zu ruilo ai chuan zurui chu an harhfimlo nge nge tih pawh hi zep thu a awm lo. Damdawi atana hmang an awm tih pawh hi thudik a ni a, kan damdawi tam takah hian ‘alcohol’ a awm a, chu chuan thatna a nei chu ni ngei tur a ni. Chumi avang erawh chuan zu ruih hi thil tha a ni e, tuma’n an ti chuang lo. Vawksa pawh tam lutuk ei a tha lova, kan taksa mamawh vitamin pawh tam tak ei chu a tha chuang lo tih erawh chu khawvel pawm dan a ni mai.
Zu avangin chhungkaw tam tak an buai tih pawh a dik. Chumi rualin ruilo hai lova mirethei chanai leh mipui chanvo tur eiru char char tam tak an awm tih pawh a dik tho. Zuruih vangin lirthei chesual a tam tih a dik rualin ruilo hai lova fimkhurloh vang liau liau leh khalh thiam loh vanga chesual an kat ve nuk tho. Hemi avang hian zu kan fakmawi a ni lova, mahse, sual tinreng bul tia puh tur erawh chu a ni lo kan ti chauh zawk a ni.
Ka sawi duh zawk tak chu a dan thu hi a ni. Kum 1920 chhovah khan United States-ah pawh zu hi an lo khap chhin tawh a. An ram leh mipuiin an chhiat phah zawk tih hriain an hlip a, an ti chhin leh tawh ngai lo. Chuta an hmuhchhuah chu “Mihring ze ken ‘nature’ leh sakhaw thil emaw-a a tha duhna ‘morality’ avanga khapna dan siam hi a hlawhtling theilo” tih a ni. Meizuk leh zu in hi thil tha a ni lo, mahse khap chi a ni lova, awmze neia kalpui ‘regulate’ tur chi a ni. Meizuk khu lo hip ve tu-in cancer a vei theihna chance a san em avangin meizuk an khap lova, meizu velote bula an zuk lohna turin mipui punkhawmnaah zuk an khap a, meizukna tur hmun bik ‘smoking zone’ an siam mai a ni.
Zu rui emaw ruilo pawhin midang kut a thlak chuan a hremna dan an siam mai a, zu in khapna dan siam erawh chu hnam changkangin an ti tawhlo. Zuruiin midang tana bengchheng emaw harsatna a siam chuan ‘public nuisance’ a ni a, a hremna dan chu IPC-ah a awm. Mawilo taka khawlaia zu ruih pawh (buaina leh harsatna siamlo mahse) a hremna a awm tho. Chumi dan zawk chu kan kenkawh tur a ni. Zu khap erawh chu a hmanlai tawh a, miin an ching tawh lo.
America ram zalenna tura an thupuan ‘Declaration of Independence’ -ah khan Thomas Jafferson chuan, “Life, liberty and the pursuit of happiness” tih tawngkam a telh a. He tawngkauchheh hmingthang takin a tum zingah hian miin a duh zawng leh nuam tih zawng a um phalsak a ni tih hi an ngai pawimawh hle a ni. Zu hi dan hmanga khap a nih loh chuan a duhin an in anga a duh lovin an in lo mai ang a, zu vanga mihringpuite chanvo leh zalenna tibuaitu erawh chu hrem tur a ni mai.
Sakhaw thil emaw thil tha fir duhna ‘morality’ emaw atanga kan thlir chuan Taleban ho tihdante hi an Koran an hrilhfiah dan a ni miau a, a tha kan ti dawn em ni? Hmeichhia hmai khuh tur, hna thawh ve loh tur, lehkha pawh zir loh tur tihte hi? Kan kohhran chuan inneih hmaa mipat-hmeichhiatna hman hi tha a ti lova, chu chu a ngai pawimawh hle. Mahse, dan hmanga khap chi a ni lo. Mihring mipa leh hmeichhia hi sex hmang tura duan kan ni a, ualau taka hman erawh chu danin a khap, midang a tihbuai theih avangin. Nupa nilo hman hi khap mah ila kan khap rem lovang. Inzirtir chi zawk a ni.
Kan Bible hi ngun takin chhiar ta i la. Pathian hian khawvela thil sual leh thalo zawng zawng tihbo emaw khap emaw hi a tum a ni lo tih kan hmu chiangin a rinawm. Duh sela chuan Engkimtithei-a chuan a tibo vek mai ang chu. Mahse, a tum zawk chu chutiang sual leh thil thalo laka amah ringtute inthiarfihlim tir chu a ni. Zu kan khap a, Vairengte pelhah a in theih tho. Chutiang chuan a duh chu khap beha tihloh luih tir theih tak tak a ni lo. Emergency lai khan Sanjay Gandhi khan tihluihnaa fa nei theilova insiamtir beihpui a thlak a. India mihring tamzia leh retheihzia ngaihtuah chuan thil tha niawm tak a ni. Mahse, mimal zalenna rapbet zawnga tihluihnaa tih kha a tha lova, democratic principle kalh a ni. Thil thalo zawng zawng hi khap tur a ni lova, ‘regulate’ a inzirtirna hmanga kalpui chi zawk a ni tih hi ngaihtuah lova ‘emotion’ ringawt leh morality ringawt enzawna kan kal chuan hnam changkanglo kan nihna kan mualpho zau mai mai lek fang a ni ang.
No comments:
Post a Comment