¢ M Lalmanzuala
Aikal lâk hi kan sawi fo tawh thin leh kan hriat theuh angin DAN KALH a ni a. A chhan chu eng pawh ni se dan kalh a nih avangin sawi mawi chi a ni lo a, tih bo tur a ni. He tihphung dik lo leh tha lo tak mai hi kan hnamin rinawmna kan tlakchhamzia tilang chiangtu tak pakhat a ni a; sual do tura huaisenna kan tlakchhamzia lant$rtu a ni bawk.
He tihphung tha lo tak, kan hnam nun tihmelhem taktu hian hun rei tak min chenchilh tawh chungin kan Sawrkar thuneitute zingah mumal taka tibo emaw, siamtha tur emaw-a tan la an la awm ngai lo a, a mak hle a ni. Sawrkar tharah Education Minister, Pu Lalsawta’n aikal late’n an aikalte bana an hna zawm turin thu a han pe nghal a, a fakawm em em a; tute pawhin a hlawhtlin nana kan theih ang anga kan thlawp a phu a ni.
Aikal la tam berte hi chuan an hlawh hmun thuma thena hmun khat vel pe-in aikal an la a; hmun thuma thena hmun hnih vel chu engmah thawk lo-in an la tawp mai a ni. Chu achhapah sumdawnna lama inhmangin an hlawh let engemaw zat an thawk chhuak thei lehnghal.
Thenkhat chu an chhungkaw khawsakna hmun, pasal/nupui/fate avanga kalsan harsa tih vanga thingtlang lam emaw-a an thawhna hmun tura kal lo-a aikal la an ni.
Hengte hi chu mahni tanghma um vanga dan kalha thil ti an ni a, tu tan mah ngaihhnathiam chi an ni lo.
Thenkhat dangte erawh chu hrisel loh leh damlohna khirhkhan tak neih vanga mahni hna thawk thei lo a, aikal la an ni. Heng mite hi chuan mi tam tak hriatthiam leh lainat an hlawh hle a ni. Amaherawhchu, heng mite pawh hian dan an bawhchhiat tho avangin ngaihhnathiam chi an ni lo.
Damlohna khirhkhan neih avanga hnathawk thei lote, an harsatna chu dan ding laiin a sutkian theih bik a nih chuan Sawrkarin chutiang mite tanpui theihna tur dan duang chhuak se. Chu chu thil harsa a nih chuan anmahni chhawmdawl thei tur, an fate zinga mi tu emaw, an aiawh emaw, “Compassonate Appointment” emaw-a Sawrkar hna dang an thawh theih dan zawn sak ni se tih dan phung tha tak a ni ang. ‘Attached’-a awmte pawh damloh leh chhungkaw harsatna tak tak avanga ‘attached’ an nih chuan, ‘attach’-a an awmna hmuna pension/promotion/transfer avanga an awm theihna hna ruak a awm veleh chutiang hna ruaka dah ngheh mai ni se, a remchangin a fuh ang.
Hetianga harsatna lian tak neite phenah hian harsatna neih chu sawi loh hlawkna uma thuneitu leh thil titheitute behchhan tur neih vanga aikal la an lo awm fur thin hian tun dinhmun tha lo takah hian min thlen ta a ni. Heng avang leh hetiang kalphung nena inkungkaih tho, transfer/posting mumal lo leh awmze nei lo lutuk te leh thil dang dang hian Education Department chu, ‘Lal Isua lokal leh hma chuan chinfel theih loh’ ti-a sawi hlawh hial khawpin a lo titawp ta a ni.
A thuhrima Aikal lak leh Attached-a awmte hi dan kalh leh thil dik lo an nih laiin hetiang tih ch$ng mite zingah hian Kohhran leh Tlawmngai Pawla inhmang langsar tak tak an awm fo thin a; IAS nupui pakhat pawhin aikal a la ngei ni-a hriat a ni. Heng mite hian Kohhran te, Tlawmngai Pawl te, IAS te an ti zahawm lo a. Hun leh hmun pawimawha thusawi hun chang thin te, khuallian ni thin te, ram pum huapa chawimawina dawng te an nih ch^ng a awm bawk thin avangin mipui mimir tan pawh thil dik leh dik lo, ngaihsantlak leh tlak lohte thliarhran a harsat phah thin a ni.
Education Department hi kan zirlai/thalaite khua leh tui tha leh rinawm, hruaitu tling leh fel chherchhuaktu tur an nih avanga an pawimawhzia chu hre tlang vek kan ni a. Siamthat a mamawh a. Siamtha tura mumal taka Pu Sawta’n tan a han lak hi a hlawhtlin a pawimawh tak meuh a. Aikal late leh aikala an lakte hian hemi chungchanga Department thuchhuah hi, anmahni leh kan ram leh hnam siamthat nana a pawimawhzia hria-in zawm ngei se, a duhawm a ni.
Education Department hi a tihmasatu an ni ang chu, aikal lak thu-ah hian sawi hlawh ber an ni fo mai. Mahse, anni mai lo pawh aikal la leh attached-a awmte hi Department tinah hian an awm ti ila kan sawi sual kher lo ang. Pu Rozika (IA&AS rtd) thusawi pakhat, “Mizoram tluka corruption kairualna hi hmun dang a awm lo,” dikzia hi kan hriat belh zel a ni ber mai.
Kan hriatphak chinah chuan State dangah(Manipur erawh ???) hetiang ti ve hi an awm lo. Hetiang tih leh nih hi “za-a za Kristian, Thlarau Thianghlim Harhna-ina a chenchilh reng, khawvel ram danga Missionary hnathawk tura Pathian ruat, tlawmngaihna kengkawhtu” hnam nih nen a inhmeh lo hulhual a ni.
Corruption hi a zung nen lama kan phawi a, kan pho ro dawn a nih chuan, heng baka phawia phoro hmasak tur hi a awm chuang lo. Chuvangin Department tin hian Education Department tih ang hian aikal lak leh attached-a awm tihbo nan a rang thei ang berin thu chhuah ve se. Chief Minister hian chutianga Department tinin tan an lak theih nan ‘instruction’ chhuah nghe nghe se, a tangkai ngeiin a rinawm.
Chutianga thuchhuaha tan lak a nih chuan, Chief Minister/Minister/Parliamentary Secretary leh Sawrkar Officer liante’n, ‘Ani hi chu ka chu mi, ka kha mi,’ ti-a hum tum nei miah lo-in dan leh thupek chu mar pata kenkawh ni se, a hlawhtling ngei ang.
Civilized Society-ah chuan Rule of Law a lal ber avangin, President, Prime Minister, Governor, Chief Minister te pawh dan hnuaia awm vek an ni a. Dan kalh leh dan pawna induhsakna emaw, inlainata inhriatthiamna emaw nei thei kan awm lo a ni. Hetiang hrethiama inkaihhruai nana hmang theite chu hnam changkang an ni a; hetiang hrethiam lo-a, dan kalh zawnga kal hram thinte chu hnam mawl an ni tih kan hriat pawh a hun viau tawh a ni.
No comments:
Post a Comment