Hraite, khawnge i chun leh zua?

Damdawi inah chuan a piang ve ngei a, mahse, doctor leh nurse tel lovin a piang. A nu leh pa hriat a ni lo a, amah hringtu nu hian tihhlum tumin a rek emaw tih theih turin a nghawng vel a khuar deuh nghe nghe.

A kawm thlalak : Khawlaia naupang hmuh fuh thlalak a ni. Home naupang an ni lo

Chhartu nei lo he naute hi February ni 20, 2009-ah khan Aizawl Civil Hospital velah chhar a ni.

He naute hi Civil Hospital Casualty-a inthiarna pindanah damlo awmpuitu pakhatin a chhar a ni.

He naute pian lai vel hian Casualty-a thawkte chu mitthi an neih avangin an buai hle a, chutia an buai nuai nuai lai chuan naute tap ri hriain damlo awmpuitu hian inthiarna pindanah hian naute chu a chhar ta a ni.

"Buara-in a lo intuam a, buara han tihah pawh buara bal tak a ni a, latrine kawngka bula ketahna atana kan chhawp kha niin ka hria," tiin nurse pakhat chuan a sawi.

Hermon Children’s Home naupangte chaw ei lai

An han ngaihtuah letin Casualty-a thawkte leh damlote chuan an buai nuai nuai lai khan hmeichhe pakhat, inthiarnaa lut an awm tih chu an hre thei a, chu nu chuan hmanhmawh deuhin Casualty a chhuahsan niin an sawi. A hmutu thenkhat chuan chu nu chu a mawng velah thisen a kai deuh nuai niin an sawi a, track kekawr a ha niin an sawi. Mahse, Casualty vela damlo awm veah a hun lai chuan an lo ngai hlawm a ni.

He naute hi hmeichhia niin Kg. 2.450-a rit a ni a, an chhar lai hi chhun dar 2.30 vel a ni.

Naute hi an chhar lai hian a lo vawt vek tawh a, warmer hmangin an tilum nghal a ni. A pian a tha niin damdawi ina thawkte chuan an sawi a, a nghawng leh beng vela khuar deuh hlek awm chu rehhlum tuma khawihna ni theia an rin thu an sawi bawk.

"A khuar hi chutianga khuar deuh kawk a ni lo a, na taka khawihna a ni lo mai thei. Mahse, naute piang hlim tan chuan na tur chu a ni tho a," tiin nurse pakhat chuan a sawi.

Social Welfare deptt. lamin he naute hi an vil nghal a, ni 60 chhunga a nu leh pa hriatchhuah a nih loh chuan an hnen atang hian dan hmanga lak (adopt) theih a ni ang.

Central Jail-ah naupang

Social Welfare deptt. hian naute leh naupang, an nu leh pa te'na an kalsan hi an lo tuamhlawm tawh thin a, mahse, naute piang hlim erawh an la tawng ngai lo niin thawktute chuan an sawi.

Civil Hospital pawhin nu leh pa te duh loh naute hi an tawng tawh thin a, mahse, nimina naute dinhmun ang chi hi chu an la tawng ngai lo nia hriat a ni.

Mahni fate enkawl thei lo leh kalsan duh a awm theih mauh mai! Chutiangah chuan hetianga inkalsan tawp lo hian anmahni bepawp thin se an duh thu Social Welfare deptt. hnuaia Adoption Cell-a thawkte chuan an sawi.

Mizoramah seilenna tlak loh chhungkua
Mizoramah seilenna tlak loh chhungkua a tam a, hei vang hian fahrah leh nu leh pa kar lova naupang khawsa an tam hle tih home hrang hrang dinhmun zirchiangtute chuan an sawi.

Human Rights & Law Network bultuma home hrang hrang zirchiangtute chuan nu leh pa kar lova khawsa naupangte dinhmun hi a tha lo hle nia sawiin, ngaihsak an hlawh lo a, an puitlin huna an thawh tur leh khawsak zel dan tur ngaihtuah puitu pawh an awm lo niin an sawi a ni.

"Career guidance lama hmalakna a awm lo a, home pakhatah phei chuan an pian ni te pawh phuahchawp mai mai a ni. Naupangte hi an fai lo a, rualbanlo an tam bawk. Natna hlauhawm veite pawh naupang dang nen an khawsaho mai mai a ni," tiin zirchiannaa tel Lucy L Pautu chuan a sawi.

He zirchianna hi January ni 16, 2008-ah tan a ni a, March ni 3, 2008 review meeting neih a ni. Mi 4-in an hma a, Aizawl, Seling, Kolasib, Saitual, Serchhip, Lunglei leh Saiha-ah te kalin home 27 an tlawh a ni.

Thutak Nunpuitu Team (TNT) te hmun erawh an tlawh na a, an naupangte chanchin kimchang, an pian leh murna leh an nu leh pate dinhmun engmah hriat a nih loh avangin 'assesment' laknaah telh a ni lo.

TNT naupangte chhiar telin heng home 27-ah hian naupang 1126 an awm a, chung zinga naupang 29 chu mi anglo an ni. Naupang 19 chu mipat hmeichhiatna lama khuaikhem hnu an ni a, rilru lama harsatna nei (him lova inhria leh thil dang dang) pawh 61 an awm.

TNT naupangte chhiar tel lovin naupang 805-te dinhmun zirchian a ni a, chuta a lan dan chuan - home-a awm naupang 380 chu an nu leh pate an la dam. Home-ah hian fahrah/hnuchham ni lo, nu leh pa la nei ngei naupang 380 an awm tihna a nih chu!

Nu leh pa inthen kara mi 379 an awm a, nu leh pate'n an enkawl theih loh naupang 126 an awm bawk. Home hrang hranga naupang engemaw zat chu seilenna tlak loh chhungkuaa piang an nih avang chauha home-a awm an ni!

Paina a thihsan naupang 236 leh nuina a thihsan 218 an awm a, hei hi chu vanduaina lam a ni.

Naupang 805 zinga 273 chu nu leh pa zu inmi kara piang an ni a, naupang 74 chu nu leh pa rilru lama harsatna nei kara piang an ni. Pianphunga rualban lo emaw, natna avang emawa ramtuileilo nu leh pa kara piang 74 an awm a, nu emaw, pa emaw AIDS vei kara mi naupang 9 an awm bawk.

Lucy L Pautu chuan home-a naupangte dinhmun sawiin, "Chhungkaw pangngai lo tak tak a tam tih a lang a, retheihna leh chhungkaw inenkawlna a that loh vanga home-a dah ngai an tam. Tam tak chu an nu leh pate an inthen a, an nu te emaw, an pa te emawin an uiresan pawh an tam," a ti. Naupang an kawm zinga 276 chu home atanga an chhuah hnu pawha hawna tur nei lo tur an ni nghe nghe.

Naupang enkawlna home te chu social worker leh psychologist 1 emaw tal nei tura phut an ni na a, Seventh Day Adventist te ta Poor Children Home leh social welfare deptt. ta Friend of Children te chauhvin chutiang chu an nei.

Naupangte hian an puitlin huna nih tum te pawh an nei ve a, IAS officer, doctor nih tum te pawh an awm. Driver nih tum an awm nual bawk. Hermon Children Home naupangte erawhin puanthui thiam nih an tum fur a, hei hi puanthui an inzirtir vangah zirchianna beitute chuan an ngai.

Home pakhatah chuan hming pangngailo inphuahsak an ching a, Hall Liani te, 2003 Khawmpui Liani te, Khuangchera te, Neuva te an ni nawk mai. Naupang pakhat pawhin matric-ah Mazuali tiin a hming a ziak! HR&LN hotute chuan hetianga naupang hming phuah a ni thin hi pawi an ti hle.

He zirchiannaah hian Mizoramah seilenna tlak loh chhungkua a tam tih a lang a, Mizoramah mahni fa enkawl thei lo nu leh pa an tam hle niin Child Welfare Committee member-te chuan an sawi ve bawk.

Dan pangngaiah chuan naupang humhalh leh venhim ngai chungthu ngaihtuahin CWC hi kartina thukhawm tura tih a ni a, mahse, naupang venhim leh humhalh ngai an tam em avangin chawlhkar khat chhunga vawi khat aia tam thutkhawm chang an ngah hle a ni.

September 2005 atanga hna thawk tan CWC hian naupang venhim leh humhalh ngai case engemaw zat an dawng tawh a, case ngaihtuah loh pakhat mah an nei lo nia hriat a ni. An case ngaihtuah tam ber chu mahni fa enkawl theih loh vanga home-a dah duh chungchang a ni.

Naupang venhim leh humhalh chungchanga dan hman Juvenile Justice (Care and Protection of Children) Act chuan CWC kaltlang lova home-a naupang dahluh leh lakchhuah a phal lo a, hemi chungchanga CWC-in thuchhuah a lo siam tawh chu home enkawltute pawhin an zawm tha hle niin committee member te chuan an sawi. CWC kaltlang lovin home enkawltute'n naupang an lak theih tak loh avangin CWC-ah naupang home-a dah diltu an pung ta hluai mai! Chung naupang home-a dah diltu zawng zawng deuhthaw chu nu leh pa inthen niin, nu leh pa thihsan vanga fahrah tak tak chu an awm meuh lo zawk niin CWC hruaitute chuan an sawi.

"Heti hrim hrim a nih chuan TNT dang tam tak siam a ngai dawn a. Fahrah lo pui fahrah anga children's home-a dah hi kan ram leh hnam hian a mualpho pui zui zel ang," CWC chairman Lalengruali Sailo chuan a ti.

CWC member, child rights tlangaupuitu Lalruatfela Nu pawhin: "Home-a naupang dah hi naupang chunga mawhphurtu nu leh pate hian a that lohzia kan hre lo a, hostel ang lekah kan ngai a ni," a ti.

A sawi zelnaah Lalruatfela Nu chuan: "Naupangte hi mihring chanve ang lekah kan ngai a, nupa inthen vang emaw, chhungkaw harsat vang emawa home-a naupang dah kan tum zel hi ransa ang lekah naupang te kan ngai tihna a ni," a ti a, naupangte chu mihring famkim, chhungkaw neih pawh an right, ran ang maia home-a daha, duh hun huna lakchhuah tur an nih loh thu a sawi.

"Tin, institution tih tlema inchhungkhura naupang seilentir hi khawvel leh India pawhin a ngaih pawimawh tawh avangin children institution pawh miin an finance tha duh tawh lova, home-a naupangte hian an tuar tih a ni hial tawh a, home tihtlem hi tih makmawh a ni," a ti bawk.

CWC member dang pakhat pawhin: "Tihian home-a dah min rawn dil a, rawn ngaihsak leh buaipui zui intiam pawhin an rawn ngaihsak leh ngai lo tlangpui a, mahse, midang hnena falak atana pek theih tura surrender chu an phal leh si lo," tia sawiin, "Kum an lo tlin hunah tuna home-a awm zozaite hi society-ah eng tin nge an awm ang?" a ti.

Home-a awmte hi chu naupang vannei tiin an la sawi theih ve lehchhawng ang, jail-a mite nena khaikhin chuan!

Nu thenkhat chu tan ina tang turin dan-in an chungah a rel a, mahse, fa pawm te an ni thin si. Nu baihvai tak tak te an ni nawk a, tan ina an tan laia an fate dahna tur pawh nei lo, chhung leh khat pawh nei tak tak lote an ni hlawm. A then phei chu, an fate an la nau lutuk a, nu kalsan chi an ni lo hrim hrim bawk. Chutiang avang chuan jail-ah naupang an lut fo a, Mizorama jail lian ber - Central Jail-ah te hian naupang an awm deuh reng! Jail chhunga naupang an han hmuh hi chuan, mihring inti pa chi takte pawh an rilru a hnim fo!

Hetianga jail-a mahni fate hruailut thinte hi zu zuar an ni tlangpui. Funte hnih/khat lek vanga man an ni tlangpui a, mahse, naute/naupang te'n jail an luh phah thin si!

Fahrahte tan Dan
Mizoramah fahrah an pun chak lutuk avangin fahrah leh naupang baihvaite buaipuitu social welfare deptt. hnuaia committee hrang hrangte chuan fahrah leh naupang baihvai enkawl chungchangah hmalak thar dan tur ngaihtuahin naupang enkawltu nei lo leh baihvaite enkawlna home chungchanga dan hman mek - Juvenile Justice Rules leh Orphanages and Other Charitable Homes (Supervision and Control) Rules te tihdanglam an duh a, chutiang tur chuan hmalak a ni.

Home-ah naupang dahluh a nih hian a dahluttu chuan a zing thei ang bera tlawh, rules thar atana duan chuan a phut a; a kum zawna naupang hi tlawh a nih loha, a chhan ziaka report a awm lo emaw, a chhana sawi chu thuneitute'n pawm tlakah an ngai lo emaw a nih chuan naupang chu hauhtu nei loah (abandoned) ngaih a ni ang a, Child Welfare Committee-ah thlen a nih hnuin dan anga falak (adopt) tura pekchhuah theih tura tih a ni.

Naupangte hi dah an nihna home a zirin an awm theih chin kum bithliah chu zawm ngei ngei a ngai dawn a, kum bithliah aia upa an nih huna lakchhuah an nih loh chuan home neitute hian Child Welfare Committee-ah hriattir tur niin, anni hian naupang awm dan tur chu an lo rel dawn a ni.

Home-a awm naupangte chu home enkawltute mawhphurhna hnuaia awm niin vanduai thila an thih pawhin home thuneitute chuan naupang chhungte hriattirin tha an tih tlan angin vui tur a ni ang a, naupang chhungte an hmu zo lo a nih erawh chuan tha an tih angin home thuneitute hian an vui ang.

Home atangin naupang a bo a nih chuan special juvenile police unit/police station-ah FIR thehluh tur a ni a, theihtawp chhuaha zawn a nih hnua hmuh a nih loh chuan naupang bo dan leh zawn a nih dan kimchang Child Welfare Committee-ah emaw, social welfare deptt.-ah emaw report thehluh tur a ni.

Naupang hi home thuneitute phalna leh remtihna lo chuan lakchhuah mai mai theih a ni dawn lo a, a dahluttu ni lova midangin an la chhuak dawn a nih chuan an inlaichinna tichiang theitu leh hriatpuina lehkha, VC, YMA leh MHIP te atangin an nei tur a ni. Home thuneitute'n lakchhuah an lo phal lo a nih chuan Child Welfare Committee emaw Social Welfare Department-ah thlen theih a ni ang.

Home-a dah luh tur naupang chu thil hmanhmawh thlak a awm a nih loh chuan zirchian phawt tur a ni bawk.

Naupangte retheihna Mizoram
India ram naupangte chu an rethei hle a, tihduhdahna an tawk fo thin. Mizoram naupangte chu chutiang tihduhdahna (abuse) tuar nasa berte zinga mi niin a sang ber Assam dawttu a ni.

Mizoram naupang 84.64% vel chu kut tuar (physically abuse) tawh an ni a, a sang ber chu Assam niin, naupang 84.65%-in physically abuse an tuar tawh a ni.

Physical abuse-ah hian kum 15-18 Mizoram chu a sang ber a, hetiang rual 35.43% vel hian physical abuse lo tawk tawhin Assam-in a dawt. Kum 13-14-ah hian Uttar Pradesh chu a sang ber a 37.42% velin physical abuse an tawk a, Mizoramah chuan 30.74% velin an tawk.

Thil chhinchhiah tlak ang reng tak chu naupangah pawh puitling anga ngaih ni dawn tan kum 13-14 leh puitling anga ngaih kum 15-18 hoah hian physical abuse-ah Mizoram chu a sang viau nain naupang tak tak hoah chuan a ziaawm hle. Kum 5-12-ah hian physical abuse tawk tlemna ber niin 33.83% velin an tawk a ni.

Mipa naupangin physical abuse hi hmeichhe naupang aiin an tawk nasa zawk deuh a, mahse, a inthlau lo hle. Mipa naupang 86.14% velin an tawk a, hmeichhe naupangah chuan 83.01% vel an ni.

Mizorama mipa naupang te'n physical abuse an tawh tam ber chu an chhungte atangin a ni a; 61.97% velin an chhungte atangin physical abuse hi an tawk a ni. Chhungte atanga physical abuse tawk mipa naupang hi Goa-ah an tam ber a, 80% vel niin Andhra Pradesh (72.73%), Delhi (64.29%), Mizoram (61.97%) leh Madhya Pradesh (61.54%) te'n an dawt a ni.

Hmeichhe naupangah chuan chhungte atanga physical abuse tawk hi 38.03% vel an ni.

Chhungte atanga physical abuse tawkah hian naupang deuh tak tak kum 5-12 an tam ber a, 46.48% vel an ni a, kum 13-14-ah 11.27% vel niin kum 15-18-ah 42.25% vel an ni.

Sikula naupang hrem – corporal punishment chungchangah Mizoram chu a sang ber- Assam dawttu a ni. Mizoram sikul naupang 90.86% vel chu hleihluaka taka hrem lo tawk tawh an ni a, Assam-ah chuan 99.56% vel an ni. Uttar Pradesh (81.59%), Maharashtra (75.90%) leh Delhi (69.11%) te hi naupang hrem nasa state dangte chu an ni.

Corporal punishment hi Mizoramah mipa naupang aiin hmeichhe naupangin an tawk nasa tlat bawk. State tam zawkah chuan hmeichhe naupang aiin mipa naupang hian corporal punishment an tawk nasa zawk a; Assam, Bihar leh Kerala te hi hmeichhe naupangin corporal punishment an tawh nasat zawkna a ni.

Pawl sang deuh leh hniam deuhah pawh naupang te'n corporal punishment an tawh dan a dang lam lo hle a, kum 5-12 zinga 33.71% velin corporal punishment hi tawk ang an ni a, kum 13-14-ah 33.71% leh 15-18-ah 32.59% velin tawk ang an ni.

Naupang hian anmahni enkawltute atangin abuse an tawk nasa hle bawk. Naupang dan kalha khawsate enkawltu police te leh naupang khawngaihthlakte awmna – home etc enkawltute atanga physical abuse tawk naupang chu 70% vel an ni a. Uttar Pradesh (92.04%) leh Assam-ah (90.20%) te chu a sang zual an ni.

Hmeichhiate hian naupang enkawltute atangin duat an hlawh deuh ni ngei tur a ni. Naupang enkawltute atanga physical abuse an tawh 85.71% vel chu mipa naupang a nih laiin hmeichhe naupang tawh chu 14.29% vel chauh a ni thung. Mipa naupang hetianga physical abuse tawk hi India ram pumah an tam ber nghe nghe a ni.

Enkawltu mumal nei lo street children tia an sawite hian physical abuse an tawk nasa a, Mizoramah hian hetiang naupang kum 5-12 zinga 91.67% vel chuan physical abuse an tawk a ni. Goa (79.41%), Assam (78.77%), Uttar Pradesh (78.13%), Bihar (77.85%) leh Gujarat (70.80%) te hi a sanna dang an ni a. Mahse, Mizoram bik zirchianna chu innghahna tlak lutuka ngaih a ni chiah lo.

Naupang khuaikhem chungchangah hian hmeichhia aiin mipain khuaikhem an tawk nasa zawk. Naupang khuaikhen sexual abuse hian mipathmeichhiatna thila naupang khawih (sexual assault), zahmawh naupang khal tir, naupang zahmawhen sak emaw naupang zahmawh en tir emaw leh saruaka an thlalakte a huam a ni. Mipa naupang 59.96% velin an tawh laiin hmeichhe naupangah chuan 40.04% vel an ni.

Khuaikhem chungchangah hian a nasa bika ngaih – severe forms of sexual abuse tia sawi zirchiangtute hian an nei a. Hetiangah hian Mizoram chu nasa lutuk lo tia ngaih theih a ni ang, 16.20% velin servere forms of sexual abuse hi an lo tawk tawh a ni. Assam-ah chuan hei 57.27% vel niin a sang ber a, Delhi (41%), Andhra Pradesh (33.87%) leh Bihar (33.27%) te chu a sang dang an ni. Goa a hniam ber a, 2.38% vel niin Uttar Pradesh (5.98%) leh Gujarat (7.34%) te'n an dawt.

Mizoram mipa naupangah hian severe forms of sexual abuse tawk chu 20.28% vel an ni a, hmeichhe naupangah chuan 11.76% vel an ni.

Andhra Pradesh-ah hian mipa naupang aiin hmeichhe naupang ten severe forms of sexual abuse an tawk nasa zawk a, hmeichhe naupang hetiang tawk nasa zawkah chuan hmeichhia te'n an tawh nasat berna niin hmeichhe naupang te nawhchi zawrh luih tir vang niin zirchiangtute chuan an ngai. Severe forms of sexual abuse tawk hrim hrimah chuan Assam-ah hian hmeichhe naupang 51.19% velin an tawk a, mahse, mipa naupang bikah pawh 62.55% vel a la ni tho a ni.

Zirchiangtute hian other forms of sexual abuse tih an nei bawk a. Hetiang hi Mizoram naupang 54.75% velin an lo tawk tawh a ni. Severe forms of sexual abuse tia a sawite nen hian a danglam hran lova, a nasa lo deuh zawk chauh a ni.

Mizoramah hian hetiang lo tawk tawh 63.45% vel mipa naupang an awm a, hmeichhe naupang 45.32% vel an awm bawk.

Assam bawk chu hetiangah hian a sang ber an ni a, 86.26%% vel niin Andhra Pradesh (72.83%), Delhi (72.26%) leh Bihar (67.64%) te chu a sang dang an ni. A hniam ber Rajasthan 29.36% vel a ni thung.

Sexual assault hian mipathmeichhiatna hmanpui emaw oral sex emawa kawk a, Mizoram chu a zia pawl tak a ni; 1.37% velin hetiang hi an tawk chauh. Delhi (14.77%), Andhra Pradesh (13.67 %), Assam (11.78%) leh Bihar (10.34%) te an sang thung. Mizoramah chuan sexual assault tawk zingah hian kum 13-14 an tam ber a 69.23% vel an ni a, 30.77% kum 5-12 an ni.

Naupang zahmawh leh zahmawh rawngkai taksa (private part) khawih tir hi Mizoramah 10% chuang hret an awm a. Assam (43%), Delhi (26.61%) leh Bihar (23.74%) te hi a sanna an ni. Goa (1.61%), Uttar Pradesh (2.53%) leh Gujarat (3.95%) ahte an hniam thung.

Naupang an private part en sak hi Mizoramah 5% chuang hret an ni a. A tam ber chu kum 15-18 niin hetiang lo tawk tawh zinga 60.29% an ni. Assam (46%), Delhi (26.22%) leh Bihar (19.38%) an ni.

Saruaka thlalak sakah hian Mizoram naupangte chu an him angreng hle a, 1.28% vel chauhin hetiang hi an tawk a ni. Andhra Pradesh, Assam, Bihar leh Delhi te a sanna an ni.

Heng kan sawi taka tel lo sexual abuse-a ngaih theih dang a la awm a. Fawhluih (forceful kissing), zinna mipathmeichhiatna thila inkhawih (sexual advances during travel situation), puipunna hmuna mipathmeichhiatna thila inkhawih (exual advances during marriage situation), naupang private part enluih tir leh naupang zahmawh milem (pornograpy) entir te pawh zirchiangtute chuan an zir a ni.

Forceful kissing-ah hian Mizoram chu a sang ber a, zirchiangtute zawhna chhang hmeichhe naupang 86.18% chuan hetiang hi an lo tawng tawh niin an sawi. Gujarat (79.81%) leh Madhya Pradesh (79.10%) te hi an sang bawk.

Sexual advances during travel situation hi Mizoram tleirawl (kum 15-18) te hian an tawk nasa a, India ramah a sanna ber niin 57.58% velin an tawk a ni. Kerala (54.22%) leh Assam (47.52%) te a sanna an ni a, Uttar Pradesh (16.34%) fleh Bihar (23.61%) te a hniamna an ni.

Sexual advances during marriage situation pawh Mizoram tleirawlte chu a tawk nas an ni a, kum 15-18 inkarah hian 45% velin an tawk a ni Kerala (52.22%) leh Assam (48.37%) te Mizoram aiin an nasa zawk a. Hmeichhia bikah Madhya Pradesh an sang fal a, Mizoram erawh chu a inang deuh reng thung.

Private part entir hi Mizoram tleirawlk leh rawlthar (kum 15-18) te'n India ramah an tawk nasa ber a, 60.85% velin an tawk a, Kerala (52.23%) -in a dawt.

Pornography inentirah hian Mizoramchu a sanna pawl a ni a, Assam (64.72%) leh Andhra Pradesh (54.66%) te an dawt a ni.

Naupang an rilru tihnual thei tur zawnga tih – emotional abuse-ah hian Mizoram naupangte chu a zia awm pawl tak an ni a; 33.23% velin emotional abuse hi an tawk a ni. Rajasthan (32.36%) zia awm berin Mizoram leh Goa (33.66%) te'n an dawt a ni.

Zirchianna hi Ministry of Women and Child Development Government of India bultuma Study onChild Abuse: India 2007-in a hmuhchhuah dan a ni. Prayas, Save the Child leh Unicef te tangkawpin an zirchianna hi an nei a ni.

Nauchhiatna ram?
Aizawl Civil Hospital pengah tleirawl pahnih an inbe malh malh a, nakinah chuan a mipa zawk chu a kal ta nalh mai. A en rengtu tan chuan an innawr an innawr hnu-ah pakhat chu a kal ta a ni tih a rin hriat theih. Tih hreh deuh an nei a, an innawr a ni ngei ang.

Kawng thlang lamah chuan damdawi dawr a intlar phei pat a, chu tleirawl te chuan damdawi dawr lam chu a pan a ni.

nau pai loh nana invenna damdawi chi khat

Rei lo teah amah nghaktu tleirawl (nula) lam pan chuan a let leh a, an inen a, an nui var var mai. Naupai lo tura invenna an nei ta! An thawveng huai ngei ang.

He mite pahnih ang hi midang pawh an tam mai. Aizawlah hian tleirawl leh nula/tlangvalte zingah nau pai loh nana invenna damdawiin hralh a tla hle niin a lang.

Damdawi zuar tamna, Aizawl hmun laili-a mi, Hospital Road-a damdawi dawr hrang hrangte chu Zozam Weekly-in a bepawp a, nau pai lo tura invenna damdawiin hralh a tla hle tih a hriat theih.

Tunlai hian nau pai loh nana invenna damdawi chi khat, lar chak tak mai a awm a, chutiang damdawi chu a ni hralh tla chu!

He damdawi* hi Sikkim lam atanga Mizoram-a lakluh a ni a, mipat hmeichhiatna hman hnu darkar 72 chhunga ei tur a ni. Tichuan, an rai lo ang!

A pangah chuan: "It can prevent an unplanned pregnancy," tih a inziak a, STD (Sexually Transmitted Diseases) laka a ven loh loh thu te leh rai tawh tan chuan awmzia a awm loh thu te a chuang bawk. Chu damdawi chu Aizawl nula/tlangvalte hian an lo mamawh hle niin a lang!

Zozam Weekly chuan damdawi dawr 12 a bepawp a, dawr 2 chuan an zawrh ngai loh thu an sawi. A dangte chuan hralh a kal thu an sawi vek. A zuar ngai lo dawr pahnihte pawh hian miin an zawt nasa tih an sawi tho.

A zuarte sawi atanga a lan dan chuan - he damdawi hi pawmlai nei lo, nula leh tlangvalin an lei nasa a, tleirawl te te, hmel en pawha la naupang tih hriat ngawih ngawihte'n an lei viau bawk. A leitute zingah nu leh pa chu awm ve bawk mah se, an awm pheuh pheuh chauh.

"Thalaiin an duh khawp mai, nula leh tlangvalin an hmang nasa. Tleirawl te te pawhin an rawn lei a, mahse, an hmel ena nupui pasal nei lo tih hriat theih ang chi hi chu kan pe lo ve tawp mai," damdawi zuar pakhat chuan a ti.

"Hralh a nuam khawp mai. Zep thu a cheng lo a, nupa ni loin an hmang nasa tih chu a chiang khawp mai. Dawr dang ka sawisak thei lo a, keini-ah hi chuan nu leh pain an rawn lei ngai lo," damdawi zuar pakhat chuan a lo ti ve bawk.

"Tleirawl te te pawhin an rawn lei, a then phei chu sikul form ha te an nia... Nu leh pa lamin an lei vak lo," tiin damdawi zuar hlun tak pakhat chuan a sawi.

Tarlan tawh angin, a zuar ve lo dawr pahnihte pawhin miin an zawt nasa tih an sawi a, nula/tlangval leh tleirawl lamin an zawt nasa tih an sawi reng a ni.

He damdawi zuar, Zozam Weekly-in a biakpawhte chuan hmeichhia aiin mipain an lei nasa zawk tih an sawi vek.

"Nupui la nei lo, mipain an rawn lei tlangpui. Hmeichhia hian an rawn lei ve tho a, mahse, an tam lo. An zak a ni ang te kan tia, an bialpa te'n an rawn lei thin a ni ang te kan ti mai mai..." tiin a zuar pakhat chuan a sawi.

"Hmeichhia hi chuan an rawn zawt ve zeuh zeuh chauh... mipa deuh zelin an rawn lei," tiin damdawi zuar pakhat pawhin a sawi a, midang pawhin chutiang lam hawi chuan an sawi vek.

A ngaiin an lei nasa a, a leitute hi a tlangpuiin a hmang tawhte an ni deuh zel nia an hriat thu an sawi hlawm. Chutih rual chuan 'mithar' pawhin an lei reng tho niin an sawi bawk. A hmang tawh te'n an zawngchhang a, a hre thar an awm reng bawk niin a lang.

Kumtluanin he damdawi hi hralh a kal tih an sawi vek a, dawr thenkhat (dawr 10 zinga a tam zawk) chuan December leh January-ah hralh a kal zual niin an sawi bawk. Amaherawhchu, he damdawi hi Mizorama a rawn thlenna a la rei lo a, nikum April vela rawn thleng chauh a ni. Chuvangin, December leh January hi vawi khat chiah a la paltlang.

A zuar thenkhat chuan thim hlim leh zan lamah hralh a kal zual niin an sawi bawk.

A zuar damdawi dawr 10-te hian he damdawi hi hralh a tla hle tih an sawi vek a, chutih rual chuan nau pai lo tura invenna damdawi dang pawh hralh a tla tho tih an sawi vek bawk. Amaherawh chu, tunlaiah chuan "he damdawi" tluka hralh tla erawh a awm lo niin an sawi hlawm.

Nau pai lo tura invenna damdawiin hralh a tlak viau rual hian nau tihtlak (abortion) pawh Aizawlah hian a harsa lo hle. Nau titla hi a zat chhinchhiah a ni lo a, 'a hluar' ti emaw, 'a hluar lo' ti emawa huai taka mipui hmaa sawi ngam a ni lo. Amaherawhchu hemi chungchanga biakpawh doctor-te chuan nau tihtlak hi a hluar an rin thu an sawi hlawm. Huai tak chuan an sawi ngam chuang lo.

Doctor pakhat, gynaecologist (hmeichhe specialist) chuan tun hma chuan nau tihtlak hi a tih thin thu a sawi a, a pianthar hnuah erawh a tih ngai tawh loh thu sawiin, a tih thin lai chuan a lun hle tih a sawi.

"Midangah eng nge ka hre lo a, kei chu min pan nasa. Mahse, khatiang ka tih lai khan ka hlim ngai lo. Pawisaah hlawk mah se ka hlim ngai lo. Pathian zara ka pianthar hnu hi chuan ka sim hmak a, damdawi mum chawh ringawt pawh ka duh tawh lo. Vanram kai duh chuan hetiang tih hi a theih loh," chu doctor chuan a ti.

Nau titla tura amah pantute zingah an nu te'na an kalpui an tam tih sawiin, "A hrilh ngamte chu an nu te'n an rawn kalpui mai. Mahse, chutiang chu an tam lo," tiin Zozam Weekly a hrilh.

"A ruka rawn kal an tam a, nu leh pa hrilh ngam lo chu tam zawk tak an ni! Mipa kalpui an tam a, mipa kalpui loh hi an tam lo," a ti bawk.

"Krismas result an rawn ti mai thin," tiin fiamthu titakin a sawi a, "A tam ber chu chutiang chu an ni," a ti bawk.

Gynaecologist pakhat chuan amah pantute zingah kum 18-25 mi an tam bera a hriat thu a sawi a, kum 18 hnuai lam pawh an awm nia sawiin, "Kum 14 mi lek lek te pawh an awm mawle!" a ti.

Doctor zingah hian hetiang ti duh leh ti duh lo an awm a, tun hnaiah hetiang ti duh lo hi an pung hle nia hriat a ni. Aizawl Civil Hospital-a gynaecologist pakhat chuan: "Abortion duh lo hi kan pung, Civil-a mite phei hi chu a duh lo vek kan ni ang," tiin a sawi nghe nghe.

Amaherawhchu, gynaecologist zingah a ti duh lo an pung a nih pawhin abortion a hluar lo tihna a ni ngawt thei lo ang; a ti duhte an hlawk ting tihna a ni thei!

Nu leh naute tana thil tha beiseina avangin nau hi tihtlak theih a ni a, hei erawh nau neih duh loh thil a ni lo. Mizoramah pawh damdawi in-ah ngei chutiang chu an ti thin.

India sorkar chuan hetiang atan hian Medical Termination of Pregnancy (MTP) Act, 1971 a nei a, 2002-ah herrem (ammend) a ni. He dan hian nu leh naute hmakhaw ngaiin nau tihtlak hi a phal a, kar 20-a upa naute thleng a huam a ni.

Naute chu piang ta se, nu hriselnain a tuar dawn a nih chuan he dan hian nau tihtlak a phal a, nau paitu chu rilru kim lo a nih chuan tihtlak a phal bawk. Naute nu leh pate chuan eizawnna an nei lo a nih te, upat hnua rai te, insiam/indang - mahse, rai ta tho te, chhang zing lutuk te, nautein a mamawh tawk hnute tui dawn tur a nei dawn lo a nih te, fa ngah lutuk te, pawngsual vanga rai te, chhan hrang hrang avangin he dan hian nau tihtlak hi a phal a ni. Chutiang chu India ram pumah kalpui a ni a, Aizawl Civil Hospital-ah ngei pawh hian kalpui a ni. Nuin AIDS a vei a, naute chu rawn piang se AIDS vei sa a nih dawn avanga tihtlak te pawh an awm.

MTP Act, 1971 hmang hian 2008 chhung khan Aizawl Civil Hospital-ah vawi 47 nau tihtlak a ni.

MTP Act hmanga 2008 chhunga Aizawl Civil
Hospital-a nau tihtlak zat:
January - 3
February - 4
March - 6
April - 5
May - 3
June - 1
July - 6
August - 6
September - 3
October - 3
November - 3
December - 4
A vaiin - 47

Read more...

Kut pui kan ur, ning zu chiar nghian e

¢ Lalhruaitluanga Chawngte

Chu in tawp tak maia lamte chu an va han hlim tak em!


Mipa pathumte chu phur em em hian an su nghawng nghawng a, an thian pakhat erawhin meilum a ai, nui ruh ruh chungin a thiante chu a thlir a, an hmelah chuan rilru hmun khat an pu tih a hmuh theih.

Boney M-ho sak - 'By the rivers of Babylon' tih kha tape recorder chhe tawh tak mai hmangin an 'play' a, patling than kin tawh pathumte chuan lam an thai sauh sauh mai. Kei chu kawngka bulah ka ding a, chu inah chuan a duh apiang an lutin an chhuak thin bawk a, kei pawh chu mikhual enin min en lem lo. Min hmu a, min be hlei lo. 2008 thlah liam paha 2009 lawm tumin tu dang ngai lovin an lam a, zu rim a nam huam huam mai bawk. Puanzar phenah an lut sek a, an rawn chhuah leh chuan an phur sauh zel. Puanzar chhung kha an bedroom a nih ka ring a, chutah chuan zu an dahtha a nih ka ring bawk.

Mi an rawn lut a, an chhuak leh a, an insul pel nawk nawk hlawm. An vai mai chuan an phur em em mai a, zu an rui vek bawk. Chutia hmuhnawm ti taka ka thlir lai chuan nula pakhat hi a rawn kal a, pindan chhungah pawha lut lovin ka piah lawkah chuan 'peh teh' a rawn pet tet ta mawlh mawlh mai. Lampui an lo tum a, mahse, an hlawhchham. "Ka ning!" a ti vin thak a, ban pakhat bulah chuan dingin patling pathumte lam lai chu a thlir ve ta zawk a ni.

Chu nu chu ka va pan chat a:

"Vawiin lamah Aizawl lam atangin mi an rawn kal nasa em?"

"Kal nasa e, tunlai te chu kan inhralh ve hun ber alawm."

Ka be zui zel a, ka zawhna min chhan dan atang chuan he hmun - Rangvamual-ah hian Aizawl tlangval te'n kumhlui thlah zana in tur zu an lo lei nasa hle a ni tih ka hre thei. Mahse, kan inbiak laklawh laiin kan bul maiah hian pa pakhat a rawn luak a, kan inkawm zui thei ta lo. Nula chuan thinrim zetin tui a suak a, patling luak chu a tifai a, tin, chu pa chu tui dehna lamah a nawr phei ta nawk nawk mai a ni.

Patling pathumte bawk chuan ka mit an la a, chuti taka tuia lam chu thil hmuhnawm a tling ve reng reng mai, lam thiam lo teh mah se!

Chutia Rangvamual pa pathumte'n hlim em ema kumhlui thlah zan an hmang lai ka thlir lai chuan eng engemaw ka ngaihtuah a, chanchinbumi pakhat - Vanlalremruata Tonson tawngkam te pawh ka rilru-ah chuan a lo lang; "Khawpuiah pawh, thingtlangah pawh, Krismas leh kumthar kan hmuahnaa thil pawimawh em em mai chu zu hi a ni," tih kha.

Rangvamual pana kan chhuah dawn khan thian thenkhat kan tawk hlawm, zu lei tur ngaihtuahin an phe suau suau mai. Ka thian pakhat chuan McDowell No 1 um khat Rs 800-in a lei a, lawm em ema a kuah haw lam nen Bazar-ah kan intawk a nih kha. Chutiang zu chu Silchar-ah Rs 125 velin an zuar thin niin ka hria a, chutiang a nih laia Aizawla Rs 800 zeta han lei mai chu to ka ti hle.

A thenin a sen chi an ngaihtuah a, a thenin 'local' an ngaihtuah a, chutiang chuan kutpui erin Mizo tlangval an phe suau suau mai ni ta berin ka hria e ka ti. December thla tir atang tawh khan mi engemaw zatin vai rama zin dan tur an ngaihtuah a, a sen chi la tur ngau ngauva zin te pawh ka hria. Sorkar department thenkhat chuan petrol man tur thawhkhawmin Silchar leh Dholai velah zu la turin motor an tir a, a thenin Lengpui Airport kaltlangin an rawn phur haw zut zut bawk. Sipai lal hmelhriat neite chu pa vanneiah ngaih an ni a, an thiante'n an tlawn laih laih thin!

A thenin chutianga phai lam atanga zu an lakluh laiin a then chuan khawtual zu an lo lamkhawm a, Aizawl chawmtu Rangvamual leh Phunchawng te pawh a lun lehzual hle. Aizawl atangin zu lei tur an an rawn thleng zut zut mai.

Chutiang te ka ngaihtuah lai chuan uniform ha mi 10 rual hi an rawn tlan thla a, an ri khup khup mai. Ka dinna in bulah chuan an tlanlut a, hawkdak thilah kei pawh chu ka tlanlut ve ta a ni.

Zu - saranga thun te, tuithawl-a (gallon) mi te an lo khaichhuak zut zut a, mi mawl ber tan pawh a man theitute'n zu an man a ni tih chu hai rual a ni lo. A mantute chuan zu thuhrukna hmun chu an hre ngang mai, an zawngkual hran lo, an rinna hmun an pan a, a lo dik chat chat zel. Chutianga hmun hrang hrang an dap hnu-ah chuan choka-ah chuan hnuk ti-ulh tham zu an chhek ta hnur mai. A mantute chu lukhum sen khum leh lukhum hring khum te an ni a, mahse, lukhum sen khumte chuan lukhum hring khum-ho kutah chuah an dah ta a ni.

A neitunu chu a zam lo hle a, hetiang a vawi khat tawnna a ni lo tih a chiang hle. A mantute chu a chhaih a, "Min man ngun bik lutuk..." te a ti!

Nau hnute pek pahin a mantute zawhna chu a chhang a, a dik chiah - zawhna chhan pahin nau hnute a pe a ni lo, nau hnute pek pahin zawhna a chhang vel mai mai!

A kawr chu sang takah a hlim a, 'bra' te hreng hek lo, a awm chu thingfanghma kung ang mai a ni! Hmeichhe awmbawr hi thil hmuhnawm takah ka lo ngai thin a, mahse, hmasawn tum hauh lo hmeichhe awmbawr erawh chuti takin a lo hmuhnawm loh!

Lukhum hring khum-ho chuan zu chu an thiarchhuak ta a, a neitunu erawh an hruai lo. "Kan buai mai mai... indaih loh nak a laia..." tia an inhrilh sep sep ri kha ka hre reng.

Zu zuarnu fate - naupang pahnih hian zu te chu an lo thiarpui a, ka luh tirh atanga mak ka tih chu naupanghoin police/excise an hlau lo em em mai kha a ni. Chhungkaw pangngai inah khatiang khan police emaw, excise emaw tlanlut khup khup se naupang chu sawi loh puitling te pawh an thlabar hle awm si a.

Midang an chhuah fel hnu-ah chuan a neitunu chu ka'n bia a...

"Min man awm lo em mai..."

"Engatinge?"

"Min man lo ang ka tih chuan min man lo ang, chu chu a ni mai..."

"A nih leh an la man ngai lo che em ni?"

"Hmanah, a rei tawh, ka zawrh tirhah min man tawh, ka zei lo lutuk a, mahse, a hnuah chuan tih dan ka hre tawh a, ka zu an man pawhin min man tel ngai lo..."

Khawiah pawh thiam thil hi chu a lo awm a nih dawn hi!

Midang an rawn lut a, a thenin an rawn hnem, a thenin zu an rawn lei. Man bang a lo la awm nual ni tur a ni, a neitunu fate chuan khawi khawi atang emaw hian zu an rawn khaichhuak mawlh mawlh mai. A upa zawk chu kum 11-mi a ni a, a naupang zawk chu kum 6-mi a ni. Pakhat erawh zu buaipui rual a la ni lo, a nu'n hnute a pe mek. An kum inthlauh dan atang chuan naupang pathumte chu pa thuhmun laka mi an ni lo ang tih a rin theih. Zu mantute khan zu chauh man lovin a neitu man tel ta se, naupang pathumte chu jail-a tang thei ang.

'Seilenna tlak loh chhungkua hi kan ngah awm mange' tia ngaihtuah chungin ka chhuahsan ve ta a ni.

Patling pathumte kha an lo la lam reng a, ka nep zo lo, ka lut leh ta rawih mai. Meilum ai-a kha ka'n zawt chiang a, pathlawi thah, in pakhat luahho an lo ni a!

Read more...

Mizoram State Health Care Scam Chiahpuam Version 2.0

Mizoram State Health Care Scheme sum cheng vaibelchhe 10 Bajaj Allianz-a dah chungchangah official pahnih an insawifiah.

Health Deptt.-a thawk Biakthansangi leh Finance Secretary te chuan an hriatpuina ni lova an hminga pawisa dah niin an sawi.

Health Minister hlui R. Tlanghmingthanga sawi dan leh official pahnihte sawi dan hi a inang lo hle.

R. Tlanghmingthanga chuan LPS-in an kawmnaah, ‘He sum 50 crore hi State Plan-ah dah a ni a, chu chu rilru dam tak leh ngaihtha taka kan dahna chhan chu ADB-in min rawn pe leh dawn a, 50 crore hi tih beiseinaa dah kan ni a, chumi chu ADB khan pawisa min la rawn pek hma si khan kha pawisa 50 crore keimahni pawisa ni si kan lo manage dan turah khan a rawn inrawlh nasa em em a ni, a ti.

“A rawn inrawlh danah chuan Government Deptt.-in a lo manage an remti lo. Reliable insurance company in an manage tur a ni. A tih dan pawh inthiamlo ang a, engmah connection leh Health te chu hetah India ram pumah hospital hi hrang hrang te an lo neia chungah chuan associate leh lo hriat leh an lo tihthan tam tak a awm a, chung chu Mizoram sorkara board pakhata member pali nga sawm pawh lo ni se chinchang hre reng reng lovin a manage khan a buai dawn tih hi an ngaihdan a ni a,” tiin, “Chuvang chuan commitment leh MoU sign thlapin anni experienced leh lo tithangte insurance company katlang lo chuan lo ti suh u, an tih advice na avangin keimah ni hian timai ila kan deptt. leh kan board hian manage mai ila tia mange mai kan duh laiin ADB mitmei venna avang leh anmahni direction-in Insurance company-ah khan kan ti ta mai a ni,” tiin MSHCS pawisa 10 crore lai Bajaj Allianz a an dah dan a sawi

Vawiin thlengin ADB chuan Mizoram sorkar puihna tur loan-in emaw tanpuina emaw a la pe ta chuang lo.

Minister hlui chuan a thua intiam ni lovin ‘ziak vekin’ an intiam tiin a sawi.

An intiam ang ngeiin an sign ta vek a, a ti bawk a. Mahse, tuna a lan danah chuan Official thenkhatte chuan an hriatpui tak tak lo niin an sawi thung a ni.

A fate hming hman a nih chungchangah pawh, “Ka fate an nih avangin midang aiin an ring a ni mai thei,” a ti a, “Kan official te pawh an fate an zawnga mahse an lo awm remchang hlawm si lova chuvang chu a niin ka hria,” a ti bawk.

Hetihlai hian a hming lang ve Finance Secretary Lalthansanga chuan, “Tunlaiin chanchinbu leh media hrang hrangah Mizoram State Health Care Society (MSHCS) sum Bajaj Allianz-a dah (invest) chungchang a lo lang thin a. He thilah hian kan nupa hmingte a lo lan tak avangin thil awm dan sawifiah ngaiin ka hre ta a. Hetiang hi thil awm dan chu a ni e, a ti.

Tahrik ni 26.8.2008 khan MSHCS hnuaia Governing Body Meeting neih a ni a. He Meeting-ah hian MHSCS sum Bajaj Allianz-ah dah tura rel thluk a ni. He meeting-ah hian hna dang tulna vangin ka telve lo. Hemi hnu hian Bajaj Allianz-a Insurance Consultant pakhat chu lokalin Governing Body Members-te leh an chhungten MSHCS sum Bajaj Allianz-a invest na turah hming sign vek a tul thu a rawn sawi a. Ni engemaw zah hnuah Insurance Consultant hian a aiawh rawn tirin midang zawng zawngin an sign tawh thu leh keimah chauh min nghak tawh a ni tih rawn sawiin form a rawn keng nghal a. Governing Body Meeting thutlukna hriatpuina ni mai tur anga ngaiin kan lo sign ta mai a. Hetianga Insurance policy-a kan mimal hminga sum tam tak dahna tur a ni tih kan hre lova, min hrilh bawk hek lo.

Tichuan hetiang boruak a lo awm a, kan nupa hmingte a lo lan takah chuan MSHCS lamin Policy documents an kawl atangin, kan nupa hmingin Rs 25 lakhs ve ve Bajaj Allianz New Unit Gain Pension Plus (single premium) ah sum dah a ni tih kan hre ta a. Hei hian min barakhaih hle a ni.

He policy documents-a a lan dan chuan kan eizawnna nia lo inziak chu ‘SUPPLIER’ tih a lo ni ve ve a. Kan Annual Income pawh kei Rs 60,44,296/- leh ka nupui Rs 62,80,242/- tia ziak a lo ni. Keini nupa hi sorkar hnathawk kan ni ve ve a, Supplier pawh kan ni lova, sum hetiang zat zat kan la lut bawk hek lo. Kan sum lakluh zat tihchiannan Chartere Acountant Certificate siam chawp a lo ni a, kan chenna hmun leh kan kumtih fiahnan Driving License te pawh a lem siam chawp a lo ni bawk tih kan han hre lehta zel a. Ka nupui Lalhmangaihi Ralte hian Driving License a nei lo mai ni lovin, a dil pawh a la dil chhin ngai hek lo. Kan Mobile Phone number pawh phuah chawpin, number dik lo ve ve an lo ziak lut bawk. Insurance Consultant hian ka nupui hi kum kua lai inhria nia document-a a ziah pawh hi ka nupui hian tun thlengin amah hi a la hre lo.

A chunga kan han sawi tak ang khian he thilah hian thil dik lo tam tak leh kan signature-te hial pawh a lem an lo hmang a ni tih hmuhchhuah a ni. Chuvangin, Bajaj Allianz-ah Rs 25 lakhs ve ve kan nupa hminga dah a ni tih hi kan hriatpui loha thil kal niin engti kawng mahin hlawkna sum emaw therhlo emaw dawn kan nei lo, tiin a sawi a ni.

Dr. Biakthansangi pawhin Bajaj Allianz-a sum dah chungchanga a inhnamhnawih loh thu chu April 15, 2009 khan Chief Secretary hnenah a thlen.

A lehkhathehluha a landan chuan Mizoram Health Care Society General Body meeting in Bajaj Allianz hnena sum dah a remtih hnu lawkah Bajaj Allianz agent chuan General Body meeting a telte signature pek a ngai tiin Dr. Biakthansangi hi a pan a, he Bajaj Allianz agent hian meeting-a member dang zawng zawng signature pawh thu hriatpuitu atan a lak vek tawh thu a hrilh a, chuvangin hriatpuitu anga ngaiin ‘blank form’ ah a hming a ziakta a ni.

Pawisa hi a hminga dah a nih ve tur thu eng hawi zawng maha hriattirna a dawn loh thu sawiin Dr. Biakthansangi chuan he policy neitu anga a hming lo lang ve chu a hriatpui lo a, a hming sign-na chu GB meeting thurel hriatpuitu a nihna a sign ve chauh a nih thu a sawi.

Dr. Biakthansangi chuan a lehkhaah hian a hmingacheng nuai 80 a pung awma policy number 0115607581 hnuaia dah a nih thu hi April 3, 2009 khan a hriat chhuah ve chauh thu te, he thilah hian hlawkna engmah a tel loh thute a tarlang a. Bajaj Allianz-a a hminga sum an dah luhnaah hian phone number lem an ziah thu te, a eizawnna pawh a dik lo an phuahchawp thu leh he form-ah hian ama hming sign ang tak ama sign n si lo pathum a lan thute a sawi lang.

December 13, 2008 a policy intiamna a a signature lo awm ve chu ama sign a ni lo a, hemi ni hian khawiah mah a hming sign loh thu a tarlang a, Bajaj Allianz-ahhian a hminga sum an dah luh hi a hriatpui loh thu Chief Secretary hnenah hian a thlen a ni.

Bajaj Allianz a Health Care pawisa dah hi sawi tawh angin kum thum chhung lak chhuah theih loh tura ngaih a ni.

Official pakhat pawhin engmah a hre tak tak lo nia sawiin, “Bajaj Allianz company te hi an thatchhe deuh a ni. A tirah pawh khan a nih tur ang thlapin kal sela chuan tihian kan buai lo tur” a ti thung.

Official thenkhat chuan Health Care sum Bajaj Allianz-a dahna atan an hming hman a ni chu an hre chiang lo tih sawi a awm a, hetihlai hian Investment Bank-te hian pawisa invest turte chu pawisa an dah dawna an tih ngei ngei tur bithliah engemaw zat an nei.

Bajaj Allianz insurance titurte chuan Policy form mahni ngeiin fill-up a ngai a, Proposal Form mahni ngeiin tih a ngai bawk a. Photo Copy neih a ngai a, Identity lanna neih a ngai a, Medical fitness lanna neih a ngai a, Kum lanna certificate neih a ngai a, Address kimchang tarlan a ngaih bakah Signature tarlan a ngai
bawk.

Biakthansangi leh Lalthansanga te chuan a signature an hman chu ama ziah a ni lo tih a sawi a, chutiang a nih chuan inbumna dik tak a ni.

Biakthansangi vekin Pawisa hi a hminga dah a nih ve tur thu eng hawi zawng maha hriattirna a dawn loh thu a sawi a. He policy neitu anga a hming lo lang ve chu a hriatpui lo a, a hming sign-na chu GB meeting thurel hriatpuitu a nihna a sign ve chauh a nih thu a sawi bawk a.

Phone number dik lo dah tihte bakah driving license lem thlenga hman a ni hian Bajaj Allianz a Health Care sum dahah hian thil felhlel deuh a awm niin a lang.

Hemi vang hian em ni Health Care Care Scheme CEO Dr. Sangzuala hriatpuina a 10 crore hi dah a nih rualin Dr. Sangzuala vekin Bajaj Allianz te lehkhathawn leh thunga Insurance Policy atan Health Care Scheme pawisa chu hman a nih theihnan permission pek a nih loh thu sawi leh a, dan lo taka inbumna ang hiala a ngaih thu leh intiam kamna awm lova pe let leh tura a ngenna chhan ni.

Minister hlui R. Tlanghmingthanga thu sawi leh Official pahnih insawifiahna mai bakah Health Care CEO Sangzuala bakah Bajaj Allianz hotute thu leh hlahi a inmil lo deuh vek a, hei hian Health Care pawisa chungchang hi ngaihven a hlawhphah.

Vbch 10 lai mai chu mi hrang hrang 17 lai mai hminga dah a ni a. Chutah pawh a dah dan a la in anglo nuai bawk.

Policy pakhat zawk Fortune Plus hnuaiah mi 12 hminga dah a ni a, chu chu Minister hlui Pu Tlanghmingthanga vua leh vangte anni a, ‘New Unit Gain Easy pension Plus SP’ hnuaiah midang ho chu dah anni leh daih a.

Sorkar Official te chu ‘single premium’ anga dahsak annih laiin Pu Tlanghmingthanga chhung leh khatte erawh ‘Annual premium’ anga dahsak anni thung bawk.

Vbch 10 teh meuh kha Governing Body a telte hming thenkhat chauh hminga dah a ni a, Governing Body-ah member 11 an awm a. Minister hlui R. Tlanghmingthanga sawi angin Chief Minister hlui Zoramthanga hiunga dah duh a ni a, mahse, amah telin an upat tawh aangin dah theihloh pawh lo nise a chhung leh khatte hming tel lovin a ah theih tho.

Governing Body member zingah Law&Judicial Deptt, Rural Development leh UD&PA secretary te Director Health Services te bakah NGO atangin YMA leh MHIP president te pawh an awm tho a, Official te nupui te thlenga an tel leh daih tho si chu thil mak tih loh rual a ni lo.

Read more...

Burma sipaite hlemhlet vanga Mizoramin a tawrh theih dan

¢ Vanlalremruata Tonson

"Sipai ho maw? An dawih lutuk, Meitei helhoin an kap ang tih an hlau," tiin Mizoram hmarchhak kil tleirawl pakhat chuan a sawi.

Chu tleirawl chuan, "An duty nasa mai," a ti zui a, a sawi zel a, "Hman niah pawh an camp bulah mi pakhatin mobile phone-in thla a la vak vak a, an mansak daih… An ti," a ti leh.

Tleirawl chu Mimbung khaw mi, Aizawl-a zin a ni a, a thusawi chu thu tak a nih leh nih loh chu thuhran ni se khi khuaah khi chuan thuthang zawng a awm a ni.

"Ngopa-ah pawh Meitei helhovin kal an tum a ni awm a, khawchhung mite chuan an hre lo a, mahse, zanah sipai-hoin an lo veng nasa tih an sawi," tiin sorkar hnathawk pakhat chuan a sawi bawk.

Meitei hel chu Burma sipai an ni lo a, Mizoram hel an ni hek lo. Mahse, kum 10 chuang liam taah khan Vaitin-ah MAP-ho an lo kap tawh a, chumi hnu lawkah chuan Tippaimukh, Manipur lama awm Mizo hnahthlak Hmar-ho chu an thuhnuaia dah tumin an bei zui chiam a, 2006 vel kha chuan Hmar khua engemaw zatah rawng taka chein hmeichhiate an pawngsual a nih kha. Mizoramah pawh an rawn raltlan nghe nghe. A tawpah India sipaiin beihpui thlakin an umchhuak.

India rama an beh dan a dik lo a, inbumna leh innawr luihna hmangin India hian a awp lui a ni tih ngaihdan changchawia India ram atanga talchhuaha independent tum Meitei hel pawl hrang hrangte chuan an ram luahchin zim te chu duh khawp lovin an chhehvelah behchhan tur thiam takin an dap reng tih chu thuthar a ni lo. Tipaimukh vela bu khuar an tum lai pawhin a ram neitute chu thiam takin an tlawn thin nia sawi a ni.

Chu mai a ni lo, Meitei hel-ho chuan Burma ramah kua hreuh an tum a, sipai roreltute'n an tih duh loh public welfare te an buaipui a, damloh nikhuaah an inenkawlna an ngaihtuahpui a, a changin buhfai thlengin an chhawp nia sawi te pawh news report-ah hmuh tur a lo awm tawh thin bawk.

India sorkar chuan Burma ram hausakna chhawr a duh a, China-in thu a nei lutuk ang a, India tan a tha lo ang tih a hlau bawk. Tun hma zawnga Burma ramah hian democracy sorkar a ding tur a ni ti ngat ngat thin khan thawk khat lai atang khan a dinhmun a sawhsawn a, kawng hrang hrangah thurualpuiin infrastructure development-ah te a pui nghe nghe. Chutianga a puihna avang chuan Burma sipai roreltute chuan an ramah hian India sorkar laka hel-ho chu an tawm an phal tur a ni lo, tiin a kar ve bawk. Burma sipai roreltute chuan an ngai pawimawh lem hlei lo a, India sorkar lahin a ngai pawimawh nge ngai pawimawh lo tih a ngaihsak zui hek lo.

Burma sipai-ho hmang hian Meitei hel-ho chuan ralthuam an tawlh thin tih chu thuruk a nih pawhin tuma hriat loh a ni hran lo. India Vice President MH Ansari-a'n Aizawl a rawn tlawh tum khan hemi chungchang hi Burma ramah democracy a awm theih nana Mizoram atanga beitute chuan an lo thlen tawh. Sipai motor-in ralthuam a phur a, a tlang leh purh mai thin nia sawi a ni. Chutah chuan Burma ram economy chhe taka sipai hlawh tha lem lo hlawha thawkte hian hlawkna an tel lo ang tih rin ngaihna a awm lo.

Burma sipai ber an thurualpui tawh chuan Mizoram ramri depah bu an khuar ta a, chumi ngai thei lo Zomi Reunification Army (ZRA) chuan February thla khan Haichin khuaa awm Meitei hel-ho chu an kap chiam mai a nih kha. Khawchhung mite chu chhuak turin an ti a, chawhma dar 10 atangin chawhnu lam thlengin an inkap nia sawi a ni.

Khua chu an chhuahsan a, ram erawh an chhuahsan lo a ni ang. "Haichin ramngaw hnuaiah camp an nei," tih chu Burma ramri hrul Mizorama cheng khaw thenkhat titi a ni.

Haichin ramngawa bu an khuar chuan Mizoram khawchhak lam ramri hrula security hmun pawimawh pahnih - Hnahlan leh Mimbunga Assam Rifles awmte chu kah nuam tawk lek a ni dawn a, sipai-ho chu tleirawl te chuan an dawih emaw lo ti mah se thil awm lo a ni lo.

Mahse, Meitei hel chuan Manipur south district chu an tum hmasak ber tur chu a ni lo thei lo ang. Chu pawh ni se, Haichin atang chuan Manipur south district-a khaw lian ve deuh, Mizoram ramri hrula awm Sinzawl chu kea kal pawhin beih phak a ni tawh. India ramri hrul Burma lama bu an khuar ngheh chuan ZRA-ho chu kar lovah an intih thuneihna hmun atangin an nek chhuak ang. Tichuan, tuna Aizawl leh Churachandpur inkalpawhna kawngpui Guite Road chu Meitei hel kutah a awm dawn a ni.

Guite Road an kuta a awm chuan Tipaimukh bial a him rei tak tak thei lo ang tih a chiang a, an sual viau a, India sipaiin beihpui an thlak leh te a nih ringawt loh chuan India rama Zo hnahthlakte khawpui pawimawh pahnih inkalpawhna chu Meitei hel pawl kutah a awm dawn tihna a ni.

Assam Rifles camp pawimawh pahnih beih a nih chuan Mizoram a ralmuang tihin awmzia a nei lo ang a, Vaitin thil thleng nena a danglamna tur chu MAP leh AR a ni mai ang.

Mizoramah hian kut an thlak emaw thlak lo emaw Burma leh Manipur-a an chet nat viau chuan kum nga vel a kal leh ang a, Mizoram hian 'refuse to recognise refugee' a ngah leh dawn a ni mai.

Mihring 'organised' loh engemaw zat an rawn tla lut ang a, Mizoram stability an rawn su dawt dawt ang a, India sorkarin a ngaihsak loh rah chu Mizoram mipuite hian tuarin a mualphopui leh ang. Mangang rawn tlalut lainat leh lainat lem lo Mizoram mipui zingah an awm leh ang a, a boruak kal zel dan tur chu politics-in a hril zel ang chu.

Hel pawl chu an awm mai mai lo. Manipur chanchinbuten an tarlan dan chuan April ni 15 khan Meitei hel pawl nia rin ralthuam tha tawk tak keng mi 80-100 vel chu Churachandpur Police Station atanga Km 45 vela hlaa awm Suangdai, Singngat sub-division-ah an lut a, khuaa mi chengte kut an thlak a, panga - Chinsuan (50) s/o Khupzadou, Vungsonpau @ Soson (20) s/o Khamsuan, Chinlam (30) s/o Onzahau, Gousiam (30) s/o (late) Chinsuan leh Chinsuanmung (20) s/o N Vungzaneng te chuan hliam an tuar.

April ni 15 khan hel pawl nia sawite chu Suangdai khaw lo zauah an lut a, naupang pakhat kum 10 mi Lamlianlal, a ni nena feh chu an hruai chhuak a. Mahse, a ni feh hawin a vahpa chu chhunah khan a haw tawh tih a rawn sawi si a, khaw mipuite chu naupang zawng turin an inko khawm ta a ni.

Naupang zawng tura inkokhawmte chu kawngpuiah an kalkhawm a, chutih lai tak chuan ralthuam kengte chuan an va hual a, kut pawh an thlak nual a, pathum chuan hliam an tuar nghe nghe.

Mi bo zawng tura an inkokhawm khan biak in chowkidar Chinsuan chu khaw daia awm New Testament Baptist Church biak ina no lam turin an tir a, chutih lai chuan ralthuam kengho chu biak inah an lo awm a, ani hlaua tlanchhia chu umin kut an thlak zui ta a ni.

Ralthuam keng leh helho an indawr vel lai hian an mi zawn tur chu biak inah ralthuam kengte chuan an kawl tih an thu an dawng a, mipuite chuan biak in lam an pan ve nghal a, naupang pawh chu ralthuam kengte chuan an lo pe ve mai niin chanchinbute chuan an tarlang.

Suangdai khua hi in 60 vel niin ralthuam kengho hian an mi sawisakte chu an duh duhin an puh a, kuta an thlak niin khuaa chengte chuan an sawi.

Hliam tuar zinga pakhat Vungsonpau chuan ralthuam kenghoin an hual khan ani leh midang pakhat an hruai hrang a, Meitei tawnga biain ZRA-ho awm leh awm loh an zawt a, an awm loh thuin a chhang a, zirlai a nih thu a sawi hnuah sap tawngin an be leh niin a sawi. Hemi hnuah hian mi pali velin an khawih rawn a, nikhaw hre loin a awm zui ta a ni.

A harh chhuah leh chuan amah khawihtute chu an lo awm tawh lo a, chumi zan chu Suangdai ho thlamah riakin a tuk zing lam dar 3 velah Suangdoh khua a lut niin a sawi.

Churachandpur Disrtict Hospital-ah enkawl a ni. Ralthuam kenghoin an sawisak ve tho Chinsuanmung pawh Churachandpur panpui niin district hospital-ah enkawl a ni bawk.

Khuaa chengte chuan ralthuam kengho chu Meitei hel ni turah an ngai a, Zo hnahthlak hnam peng thenkhat tawng hria chu an awm na a, Meitei tawng, sap tawng leh Kawl tawngte an hmang deuh ber niin an sawi.

Thil thleng chungchangah hian Zomi Human Rights Foundation tia invuahte chuan committee dina thil awmzia chhuifiah tul an tih thu sawiin thil thleng hi an dem tak a ni thuchhuah siamin an tarlang a, chu chu April ni 20 kha a ni.

Internation convention hrang hrang palzutna a ni tia sawiin human rights chungchang dante chu ngaih pawimawh ni se an duh thu an sawi.

Burma sipaite ber an thurualpui theih chuan Meitei helho chuan Zo hnahthlakte chenna bial Chin state-ah bu an khuar thei ang a, Manipur leh Mizoram an duh lam lam an hawi thei ang a, Mizoram pawn lama Zo hnahthlak chenna hmun pawimawh tak pahnihte chu an thuhnuaiah an dah dawn tihna a ni.

Chu chu Mizoram chuan a lo dawl ve leh a ngai lo thei lo ang. Ramri hrul thuthang chuan tunah pawh hian Burma-a Phaisat khuaa chengte chu Meitei hel ho chuan Burma sipai nena tangkawpin pawisa peka resettle an tum ni awmin an sawi lehnghal.

Thutak lo ni ta se, Burma ram buai nge an pan ang a, Mizoram ralmuang?

Read more...

Mizoram leh MP thlan

¢ Lalremruata Renthlei

Mizoramin hian Lok Sabha MP hi tum 10 a thlang tawh a, tum khat erawh chuhtu awm loin Lalduhoma a tling thung.

Kum 1972 atang khan Mizoram hian ama pualin MP a nei tan a, vawiin thlengin Mizoramin MP a neih theih zat chu pakhat chauh a la ni.

Kuminah MP thlan neih a ni a, canidate pali awmin result erawh hriat a la ni lo.

Kumina MP thlan hi thawm reh deuh berte zinga mi a ni ngei ang. Nikumah inthlanpui a awm vang nge kumina MP inthlanah boruak a reh hle a, mi tam tak chuan rorel lai Congress party-in chakna an chan an ring a, hei vang hian boruak a reh hleah a ngaih theih.

A tum khatna atan Electronic Voting Machine chu MP thlanah hman a ni. Nikuma MLA thlanna neihah khan EVM hian opposition te rinhlelh a hlawh hle a, political party thenkhat chuan thuchhuah hial siamin EVM an rinhlelh thu an sawi nghe nghe.

Kumina Lok Sabha MP thlannaah EVM buai vanga harsatna thleng erawh a awm zeuh thung.

Phunchawng polling station leh hmun thenkhatah vote thlak hma, mob-poll neih laiin, EVM ri thei lo a awm a, mahse, EVM danga thlak nghal niin vote thlak a khaihlak lo hlauh.

Mamit-IV polling station booth-IV-ah vote thlakna khawl battery that loh vangin a hun takah tan theih a ni lo a, vote thlakna khawla candidate-te hming dah dik tawk loh vangin harsatna lian tham vak lo a thleng bawk a, rei lo te hnuah siamthat a ni.

Tlangkhangah EVM vattery a lo awm lo a, Mamit atangin battery thawn nghal nhgal a ni a, Khawlailungah EVM thlak a ni bawk.

MP thlan tluang taka neih zawh a ni a, Mizoram mai ni lo India ram hmun hrang hrangah Phase-I hi neih a ni. North East state-te hi hel tamna hmun a nih vangin inthlanna muanawm taka neih a nih theihnan venhimna pawh uluk taka neih a ni. Mahse, buaina chhuak a awm lem lo.

Mizoram erawhin venhimna lamah buaipui em em a hlawh lo a, Mizoram sorkar hnuaia mi ni loah chuan venhimna lamah hian CRPF chauh hman a ni a, chu pawh Mizorama awmsate chauh hman a ni. MP thlana venhimna lama insenso tlem berna state zinga mi a ni pha hial.

Mizoramin Lok Sabha MP a neih hmasak ber chu Sangliana niin Mizo Union hmingin kum 1972 khan MP-ah hian thlantlin a ni.

Chumi hnuah kum 1977 khan Dr R Rothuama chu PC ticket-a thlantlin leh a ni a, Dr R Rothuama bawk hi kum 1980 khan Independent-a thlantlin leh a ni a, Mizo zinga MP term tum hnih chelh hmasa ber a ni.

Kum 1984 khan Lalduhoma chu Congress party aiawhin MP atana thlantlin a ni a, ani hi chuhtu awm lova MP tling awm chhun a ni.

Kum 1991 khan Dr C Silvera chu Congress party ticket-a thlantlin a ni a, amah vek hi kum 1996 khan MP atana thlantlin nawn leh niin a term hnihnaah phei chuan Central-ah dinhmun sang tak changin Minister nihna hial a chang a, health minister a ni hial a, Mizo zingah central-a minister hmasa ber leh a awmchhun a ni.

1998-ah MP thlan a ni leh a, chutah chuan Dr H Lallungmuana chu independent candidate niin thlantlin a ni a, mahse, central politics chiri buai vangin kum khat chauh a ni hman thung. Kum 1999-ah inthlanna neih leh niin, chutah chuan Independent candidate tho Vanlalzawma chu thlan tlin a ni.

Vanlalzawma hi kum 2004 MP thlanah thlantlin leh a ni.

April ni 16-a Lok Sabha MP thlannaah hian Mizoramah chuan thawm a reh hle a, vote pawh a tlachhe hle. Vote hi za zela 50.93 chauh a tla a ni.

Election buaipuitute'n a tirah Mizorama vote tla zat hi za zela 49.68 tiin an chhutchhuak a, mahse, inthlan buaipuia hmun hrang hranga zinte Aizawla an hawkhawm hnuah, April ni 20-ah khan an report te an han enho a, 50.93% zawk a lo ni tiin an chhutchhuak ta a ni.

District hrang hranga vote tla zat
Mamit District 46.14%
Kolasib District 45.89%
Aizawl District 48.43%
Champhai District 53.32%
Serchhip District 53.27%
Lunglei District 54.38%
Lawngtlai District 57.27%
Saiha District 53.10%

Read more...

Tanky hlui vanduai mankhawng

¢ Vanlalremruata Tonson

Tanky hlui a ni a, PHE department siam ni mah se phe ta chu a ni tawh lo. Vanduai Tyson Lalremkima tan erawh mankhawng a ni a, Aizawl Civil Hospital ortho ward-ah che thei loin a leh phah ta reng a ni.

Chungkaw ei zawngtu ber, nitin a rem rem thawka inhlawh \hin a, a lainattute chuan sorkarah zangnadawmna dil turin an ti a, mahse, a siamtute ber ta ni tawh lo va an enkawl tawh loh a nih avangin zangnadawmna chu khawiah ber hian dil tur an la chiang bik lo. Danah chuan torts (civil wrong) ni awm tak a ni a, Tyson-a te chhungkua erawh chuan an pan tur hnai ber nia an hriat police an pan a, ani chuan hma an lakpui mek.

"Police-te chuan theihtawp kan chhuahpui ang che chu min ti a, vawiin hi lo kal leh tura an insawi ni a ni a, an la rawn lang rih lo. Inthlan te a ni a, an buai ve bawk a," tiin Lalhmunsiami, Tyson-a nu chuan a sawi.

"Hmanah pawh transformer \ha taka hungah naupang pakhat a lut a, zangnadawmna an pe a, tuna keini vanduaina chu a kawngkharte pawh sawi hleka nghing dur dur thei, mahse, ngaihsak si loh hi a ni a, min pek ve theih mai min beiseipui ve deuh a ni… Tunah hian a ke chu engmah hre lo leh che thei loin a awm a, chhungkaw eizawngtu ber a ni si a, \anpuina te kan hmuh theih hlauh chuan kan tan a \angkai dawn em a," a ti bawk.

April ni 13 zan dar 8.30 vel a ni a, Tyson Lalremkima (18) s/o Lianmawia chu a \hiante nen Dinthar thlanmual bula PHE tanky hlui ruak bulah an inkawm a. Zung tura a kal chu tanky hlui chhunga a awm laiin a chung tlain a hnunga delh a, ramtuileilo chang thei dinhmunah a ding mek a ni.

Tanky ruak chhungah hian a bul hnaia awmte chu an awm fo a, an inkawm a, a changin carrom board te pawh an pen \hin.

"Mi pawh an awm fo a, mahse, ani hi a vanduai a, a delh ta chu a ni ber a…," tiin Lalhmunsiami chuan tanky hlui chu rinawm tawh vak lo mah se a chhunga awm hlauhawm turin tun hma chuan a awm ngai lo niin a sawi.

Tyson-a delhtu a lian hle niin Lalhmunsiami chuan a sawi a, "Thlangra tiat lai a ni ang," tiin Tyson-a nu chuan amaha a talchhuah mai thei loh avangin a \hianten an chawisawn sak nghe nghe niin a sawi.

Tanky hlui hi PHE-in an hman loh hnua Dinthar VC te'n a bang lehlam an vuak \hiah leh dawr atana an luahtir a ni. Dawr atana an luah chu power and electricity department lamin lachhawngin, VC te'n a bang lehlam an vuak \hiah bak an vuak \hiah belh a, chumi chhungah chuan transformer dah an tum nia a hriat thu Lalhmunsiami chuan a sawi.

An vuak \hiahna chu a rei tawh a, hman lohin an dah reng niin a sawi bawk.

PHE tanky hlui a nih avangin Lalhmunsiami te hian a tirah PHE department lam an dawr nghal a, an vanduai chungchang hi an hnenah an thlen a, anni hian a hmuna an en hnuah an enkawl tawh loh leh VC kuta an hlan tawh a nih thu an lo hrilh a ni.

VC lam chuan power and electricity deptt.-in transformer dah nana hman an tum mek a nih thu an hrilh leh a, power and electricity department lamah chuan thu an la thlen rih lo niin Lalhmunsiami chuan a sawi.

VC te chuan Tyson-a'n vanduaina a tawh hnuah tanky hlui chu vuak \hiah mai an rawt a, mahse, police lamin he thil thleng chhui nana an mamawh dawn avangin an la vaw \hiat rih ta lo a ni.

Read more...

Lehkhabu tangkai - "Tleirawlte Him Nan"

¢ Lalthlamuana Ralte

Thangthar lo chhuak apiangte nin hi kum upa zia pakhat chu a ni e reng reng a, chu harsatna chu hnam tin zingah a thleng vek a tih theih awm e. IT leh media hmasawnna chak takin a hrut mek tunlai thangtharte leh kum upa zawkte inkar phei chu a kak zau tak zet a, a zau tial tial dawn ni pawhin a lang. Nu leh pate'n an fate nunphung leh mizia an hrethiam lo tial tial a, an hmuh phak loh china an khawsak dan phei chu an rin phak bakin a nasa fo thin. Mahse, kan hnam hmabak hi tuna thangtharte kutah hian a awm miau avangin nun kawng dika tleirawlte hruai hi tihmakmawh a ni. Chutiang atana inzirtirna lehkhabu chu April ni 22 atangin lei theiha zawrhchhuah a ni ta.

Mizo chhungkaw tam berin tleirawlte suahsualna chi hrang hrang - ruihhlo, mipat hmeichhiatna, tharum thawhna, rukruk, etc., in a chimbuai mek lai hian a tunge mawhphura engti zawnga hmalak tur nge tih hi chhuichiana inzirtir a tul tak zet tawh a ni. Mi thahnemngai engemaw zat, heti lama hma la an awm tawh a, chung zinga a sulsutu pakhat V Vanlalruati chuan a lehkhabu pathumna - "Tleirawlte Him nan" tih chu MHIP inkhawmpui denchhenin zawrhchhuah a ni ta a, he lehkhabu hian chhungkaw tam takah a tha zawngin nghawng a nei ngei tura ngaih a ni.

Hun harsa tak maia cheng kan ni tawh tih hi phat rual a ni lo a, nu leh pa aiin naupangho an hawizau tawh zawk a, thangthar apiang an fing zawk zel ta bawk. Thil thar chi hrang hrang a lo chhuak a, hmasawnna hmingpu an nih miau avangin rei lo teah ram pum a dengchhuak a. Kan inrin lawk tak tak hmaa min rawn chim leh thin avangin chu'ngte chuan a tha zawng leh a chhe zawngin kan hnam nun a nghawng nasa hle a nih hi. Hetiang karah hian rilru la nghet lo thalaite hian ven an ngai zual hle.

He lehkhabu tangkai tak tur ziaktu Maruati hian kum tam tak chhung naupang leh tleirawl/rawltharte a lo buaipuiin an harsatnaah a lo tanpui tawh thin a. Khawtlanga kum naupang zawkte dinhmun rei tak chhung lo zirbing tawh a nih avangin a thuziak pawh hi a tak tha hle reng a ni.

Maruati chuan: "He lehkhabu hi ka ziahna chhan ber chu tleirawlte zinga sualna lo sang zel karah hian nu leh pate hian an hrethiam tawh lo lutuk a. Eng 'issue'-in nge an fate hi rawn runa rawn tibuai thin tih hi nu leh pate hian an hriat theihna turin he lehkhabu hi ka ziak a ni," tiin a sawi.

He lehkhabu hi tleirawlte tana ziak a nih chiah loh thu leh nu leh pa leh tleirawl enkawltute chhiar tur liau liau a nih thu a sawi bawk.

A ziaktu V Vanlalruati hian Mizorama naupangte harsatna chungchang hi kum 8 vel zet a buaipui tawh a, a hmingchherna ber pakhat pawh naupang chunga hleilen leh kumtling lo pawngsual chungchangah a ni. Hetihlai hian mi tam takin amah (Maruati) an hriatna chu Hindu pawl thenkhatin Mizorama hmalak an tum lai vel laia a thiante nena hma an lakna kha a ni ngei ang.

Maruati hian hmun hrang hrangah seminar leh workshop-ah te zirtirna a pe thin a, Mizoram pawn lam thlengin chutianga thusawina tur chu hmachhawp a nei mek a ni. Kum 2001 vel atang khan naupang chumchiap atanga tleirawlte harsatna leh tawrhna lam a buaipui tawh a, tun hnai atang khan naupang zawkte hlamchhiah chuang lovin tleirawlte harsatna hi a tuipui zual ta a, helamah hian nasa takin a inhmang mek a ni.

'Tleirawlte Him nan' tih lehkhabuah hian tunlai tleirawlte zem buaitu thil chi hrang tarlan a ni a, fanaute enkawlna kawnga nu leh pate mawhphurhna leh an tih turte chiang takin Pi Maruati hian a ziak a ni. Kan society-a inhnialna reh thei lo zu chungchang pawh tarlan a ni a, tleirawlte nun a tihchhiat dan te, zu laka tleirawlte venhim dan tur te pawh tarlan a ni.

"Hmeichhe tleirawl leh kum naupang zingah grape wine in tam vang leh zu in vanga pawngsual sawi tur an awm zeuh zeuh, hei hi an inpuite'n tum nei rana an inpui vang pawh a ni mahna," tiin a ziak.

Ruihhlo ngaite dinhmun pawh chipchiar takin a tarlang a, mi tam tak ngaihtuah lem loh, ruihhlo ngai zingah hian unau zingah mi lai an tam ber niin a ziak.

"Nu leh pate hi an fate enkawlna chungchangah inlungrual a tul em em a ni. Kum 12 chin hnuai lamah zirtirtu tha leh kaihhruaina tha a tul zual. Kum 13 atanga 18 inkar hi enkawl hautak lai tak an ni," Maruati chuan a ti. Ruihhlo laka fate an him theihna tura nu leh paten an kaihhruai dan tur a ziak bawk.

He lehkhabu hi pawisawi tur zawnga ziak a ni lo a, a ngaihnawm tur zawnga thluk a ni lem lo bawk. A nihna takah chuan nu pakhat, thahnemngai takin kum engemaw zat chhunga a tawnhriat atanga nu leh pate tangkaipui theih tur thil a fawmkhawm leh a ngaihtuahna chhungril ber luahtu tleirawl rualte venhimna tur thu tha tinreng ziakna bu a ni.

Read more...

Hnam rohlu tiriraltu hmasawnna a manhla lo : A&C minister

Indian National Trust for Art and Cultural Heritage (INTACH), Mizoram Chapter chuan khawvel pum huapa UNO member te'n an serh thin - World Heritage Day chu April 18, Inrinni khan an hmang.

I&PR Conference Hall-ah sawmbikte pualin World Heritage Day hi hman a ni a, PC Zoramsangliana, art and culture minister chu khuallian a ni.

PC Zoramsangliana chuan thu sawiin, Mizo hnam rohlu, khawih theih leh khawih theih lohte humhalh leh vawnghim tura INTACH hmalakna chu lawmawm a tih thu a sawi a, “Ram hmasawnna a pawimawh em em rualin Mizo hnam boralna tur leh hnam rohlu riralna tur a nih chuan eng hmasawnna mah a manhla lo," a ti.

"Mizoram hmun hrang hranga building hlui pawimawh tak tak engemaw zatte chu hnam rohlu an ni," tia sawiin, heng heritage building te humhalh tul a tih thu a sawi.

"Mizo hnam chanchina chuang hmun pawimawh tak takte pawh chhinchhiaha vawnghim turin theihtawp chhuah a tul a ni," a ti bawk.

Hnam rohlu vawnhim kawngah hian India sorkar pawh a thil phal hle nia sawiin, INTACH member-te chu sorkar tawiawma a sulsutua tang tur leh amah finchhuah thin turin a ngen.

Kum 2020-a India ramin khawvela ram changkang berte zinga mi ni tura tan a lakna kawngah Mizoram chu a dawnthlenga tang tura inbuatsaih a pawimawh rualin ram leh hnam himna hi Mizote ngaihtuahnaah lian ber zel se a duh thu a sawi bawk.

He hun kaihruaitu Rohmingthanga, IAS (Retd), Co-Convener, INTACH Mizoram Chapter chuan ram leh hnam hmun hlun leh thil hlu tam tak tihchhiat mek a nih thu leh humhalh a pawimawhzia a sawi.

Report petu, INTACH secretary Thanseia chuan 'kan hnam rohlu, hmunhlun leh pawimawh te, hnam hausakna nunphung tha leh chin dan tha (Tangible & Intangible) te, thu leh hlate thlengin kan hloh tam tawhin tihchhiat tam tak a awm tawh' tiin a sawi.

"A dang din thar leh chi a nih loh avangin hnam rohlu te humhalha venhim a tul avangin he pawl hi din a ni," tiin an pawl din chhan a sawi bawk.

"Mizoram Chapter hian a din tirh atangin theih ang angin art & culture deptt. nen tanghovin hma a la a. Zirlaite zingah awareness campaign neih thin a ni a, football tournament leh seminar te pawh huaihawt thin a ni," Thanseia chuan a ti a, Heritage Zones thubuai tam tak chinfel tawh niin thubuai engemaw zat tihfel loh a la awm niin a sawi bawk.

INTACH ngenna leh rawtna angin Mizoram sorkar chuan thil hlui humhalhna dan - Mizoram Ancient Monuments and Archeological Sites and Remains Act, 2001 leh Rules 2003 a siam chu hman mek a nih thu sawiin secretary chuan, "He dan hmang hian hmun 47 lai sorkar venhim leh enkawl a ni. Kumin INTACH kum 25-na denchhen hian heng hmun 47-te hi kumin chhunga tlawhchhuah vek tum a ni a. Hei bakah hian Mizo la deh dan, tah hnang lam, bel vuak dan chipchiar te pawh record mek a ni a, kumin chhunga peihfel tum a ni," a ti bawk.

INTACH Silver Jubilee Year chungchang sawitu Rin Sanga, IAS (Rtd), chairman, Sub-Committee chuan heritage pawimawhna sawiin, "Mizo min nihtirtu ber pakhat a ni," a ti.

"Heng kan rochunte vawn that, venhim leh humhalh hi mi tin tih tur a ni a, helamah hian kan la ngawngin benharh kan la ngai hle," a ti bawk.

"Silver Jubilee Year lawmna atana siam Calendar of Events-ah, tourism deptt nena tangkawpa state chhunga tour huaihawt te, October/November thlaa Crafts Mela neih te, state capital-a heritage humhalhna lama thawk thate leh sikul naupangte hetiang lama tel thinte hnena heritage award hlan te, heritage building emaw hmun emaw siamthat/tihfai project, Silver Jubilee Year chhunga zawh hman ngei tur siam te, State Capital-a Heritage Run buatsaih te a tel a ni," a ti bawk. INTACH Silver Jubilee Year denchhen hian Mizoram Chapter chuan tunhnai khan heritage tour an huaihawt a, Zawlpala leh Tualvungi Thlan Tlang leh hmun pawimawh dang an tlawh a ni.

World Heritage Day leh Silver Jubilee lawmna inkhawmah hian Mizo hnam nun leh hmun pawimawh te tarlanga lemziak te pho chhuah a ni a, Mizo rimawi tum thiam Lawrence Lalnithanga’n Lemlawi, Tuiumdar leh Bengbung tumin kalkhawm te a awi bawk.

He inkhawmah hian member te'n an pawl hmalakna tura an ngaih pawimawh te sawiin rawtna an neihte ngaihthlak ho a ni.

Read more...

HLAUH NGAH!

¢ HC Vanlalruata

Tlangval pakhat hi sipai tan tumin a intlar ve a. Sipai latu (recruiting officer) chuan a chanchin a ziah chu chhiar sakin “I pa hi sipai a ni thin a, ral ramah indonaah a thi a ni maw?” tiin a zawt a. Chu tlangval chuan, “Aw, ka pu. Ka pu, ka pa pa pawh sipai a ni a, ralramah a thi a; chumi pa leh pawh chu Indopui pahnihnaah khan a thi tawh bawk,” a ti a. Sipai officer chuan, “Chutianga i pa, i pu leh i pu pu leh pawh sipai thin, ralrama thi vek an nih chuan sipai tan i hlau lovem ni?” tiin a zawt ta a.

Chu tlangval chuan, “Ka pu nang i pa a la dam em?” a ti a. Officer chuan, “Dam tawh love, mahse ani chu indonaa ram palailenga thi lovin khumah a nupui leh a fate’n kan dawm hlum a lawm,” tiin a chhang a. Tlangval chuan, “A nih leh i pu leh i pu pu lehte chu?” tiin a zawt leh a. Officer chuan, “Anni pawh khumah vek, chhungte’n an dawm chungin an thi maw le,” a ti leh a. Chutah chuan tlangval chuan, “Chuti a nih chuan ka pu nang pawh khum chu i hlau lo’m ni? I pa leh i pute ho thihna a ni si a?” tiin a zawt let a ni.

Tunhnai lawkah Kolasib District MJA chuan Bairabi atanga Sairang thleng rel kawng siam an duhloh thu leh he hna kal mek hi titawp se an duh thu resolution meuh siamin an puang a. An duhloh chhan chu khawpui hnaiha rel a lo luh chuan hnamdang an lo lut tam lutuk ang a, min chim ral mai ang tih an hlau niin a lang.

Hlauh kan ngah avang hian hmasawnna kawng hi kan tiping ta fo mai a. Kan rilru zim leh tet luat vang a ni fo thin. Mi dawihzep leh hlauh ngah lutuk chu hmasawn theilo an ni fo. Thlawhtheihnaa chuan hlau tlat chuan khua leh ram a hmu zau thei lova, motor-a chuan hlau phei chuan a hmu zim leh zual ang. Khawlaia chetsual palh leh lirtheiin a su palh ang tih hlau phei chuan hna pawh a thawk theilo ang a, in luma a tawm reng a tul ang.

Thil tha kan duhna kawngah pawh hian a hmasawn lo zawnga kal hi a awm a. Hmasawnna hian thil tha tam tak a thlen rualin thil thalo a keng tel ve thin a. Mihring tana pawi tak tak tur inven erawh chu kan tih tur a nih rualin thil thalo hlauh luat avanga hmasawn theih loh ngawt chu a dik thei ngai lovang.

Rel kawng a lo luh avanga chimral tur kan nih chuan Inner Line Permit ngaih ve thona Himachal Pradesh, tlangram ni chunga rel kawngin a chhun chek chukte khu chimral an ni daih tawh ang. Bangladesh leh Assam inkarah rel kawng a awm kan hrelo, chuti chung chuan Bangladesh atanga pem lut tam lutuk avangin Assam an buai em em a, an district tam tak tun hmaa Hindu tam zawknaah Muslim an tam zawk fe tawh. Hetianga an awmna chhan hi chu sorkar leh an kalphungah ramdangmi lo lut ngaimawh tawk lohna a awm vang zawk a ni.

Mizote hi chimral kan nih chuan ILP hlih vang emaw, rel kawng kan siam emaw vang ni lovin keimahni mawh a ni ang. Tunah pawh hian ramdangmi leh India rama hnamdang nuai khat vel kan ramah hian awm nia chhut a ni a. Hengho an awm chhan chu hnathawh tur leh eizawnna an hmuh vang a ni a. Hna hrehawm deuh kan thawh peihloh vanga kan mamawh phuhru tura lo lut an ni. Keimahni’n an thawh ai hi thawk vek ila chuan an lo lut lo mai ang. Tunhma pawhin Mizo zinga B.Sc kan neih tlem avangin School-a Science subject zirtir turin India chhim atangin an lo kal teuh mai a. Tunah chuan science subject la thei kan tam ve tawh avangin an awm tawh mang lo a ni. Shorthand lam zir chhuak kan tlem avangin hnamdang stenographer kan nei teuh thin bawk.

Chutiang zel chu a ni. Sumdawnna kawngah kan ram hruaitute’n eiruk an duh vang ni maw Pathianni-a Sunday School-a an thutpui thinte nilo hnamdang supplier hnena hna an pek tam thin avangin vai supplier kan ngah a, kan ram sum an hawn thla teuh teuh thin. Hemi kawngah hian kan ram hruaitute pawh a tul chuan kan ben harh a ngai ang a, keini pawh kan inenlet a tul ang. Kan tih ve theih-ah chuan keini ngeiin tih tum ila dik leh tha takin ti thin bawk ila, hnamdang lo lut tur danna a ni ang.

Rel kawng a ni emaw hmasawnna kawng dang dangah pawh inhumhalh dan a awm vek a. Hlauh ngah lutuk avanga hmasawnna dal ai chuan inhumhalhna dan neih thata kenkawh that hi a tha zawk a. Hmasawnna dal thei zawng leh hlauhna lantir hi chanchinbumi kalkhawm tihtur a ni em tih pawh inenlet a tul ka ring.

Read more...

Book of the Year chu

An pawl din ni chu April ni 23 a ni a, chu chu thu leh hlaa khawvel awi tleitu William Shakespeare-a piancham a ni, chuvanga he ni-a din hi a ni nghe nghe. MAL tia hriat an ni a, an hming pum chu Mizo Academy of Letters tih a ni.

1989 atang khan kum khat chhunga Mizo tawnga lehkhabu chhuak zinga tha ber an thlang thin a, April ni 23-ah chu chawimawina chu a dawngtu hnenah an hlan thin.

Mizo Academy Of Letters Executive Council Meetting vawi 39-na, Hrangbana College-a September ni 5, 1989 tlai dar 3-a neihah "Kum khat chhunga lehkhabu chhuak, Zo tawnga ziahte hlutpui dan kawng kan ngaihtuah a. Kum 1989 January - December thlenga chhuakah tan ni sela. Buatsaih dan tur chipchiar zawk chu Meeting leh hunah ngaihtuah a ni ang," tiin an rel a ni.

2008 chhunga lehkhabu tha ber pawh an thlang fel tawh a, April ni 23-ah chu lehkhabu ziaktu hnenah chuan chawimawina an hlan ang.

Chawimawina dawngtu hnenah hian tangkafai leh thuziak (citation) an hlan thin a, chu chawimawina chu tun tumah hian "Chun chawi loh" tih ziaktu Lalhriata hnenah hlan a ni dawn a ni.

Tehfung (criteria) hrang hrang hmangin lehkhabu hi an teh a, an tehfung hman thinte chu -

a) Originality and creativity (Mark 40): A ziaktu irawm chhuak, a suangtuahna a that leh that loh leh mi tih dan zui lova ama tih dan phung thlirna.
Emaw
Critical analysis: A thil chhui dan leh a hrilhfiah dan enna.

b) Language (Mark 30): i) Mizo tawng dik. ii) |awngkauchheh mawi leh tha. iii) Mizo tawng ziak dan dik. iv) Thu ril leh awmze nei.

c) General impression : i) A kawm leh a bu pianhmang. ii) A thu inrem dan. iii) A chhut dik leh fiah. iv) Mi a lem dan.

Lehkhabu lakkhawm atangin a tha zual - Top 20 an thlangchhuak phawt a, chuta tang chuan Top 10 thlang lehin, chumi hnuah Top 3 an thlang leh a, Top 3 chu an khalhfal hnuah Book of The Year tur chu an thlangchhuak ta thin a ni.

Top 10 atanga Top 3 tur hi Executive Council Meeting-ah rawt a ni a, EC Meeting-in a pawm hnuah Top 3 chu tlangzarh a ni a, Top 3 zinga pakhat chu Book of the year 2008 atan Executive Council Meeting-ah Book of the Year Committee chuan a rawt leh thin. EC Meeting-in a lo ngaihtuah hnuah Book Of The Year tur chu an thlang ta thin a ni.

Book of the year thlangtu tur committee an din thin a, kuminah hian Lal Rinawma chu chairman a ni. K Lalremruata chu secretary a ni a, Dr Rualkhuma Colney, KC Vannghaka leh Lalsawmliana te chu member an ni. Committee hi Book of the year thlan fel a nih thlengin vawi 5 an thukhawm.

Kuminah hian Mizo tawng lehkhabu 134 an khawnkhawm a, chuta tang chuan Book of the Year hi an thlan a ni. Book of the year thlan nan hian lehkhabu pawm theih chin bithliah a ni a, hetiangin: Mizo tawnga chhut, lehlin ni lo, phek 50 aia tlem lo, chhut nawn ni lo, cyclostyle-a chhut ni lo, khawl chhut ngei a ni tur a ni.

"Lehkhabu 134-te kha kan han thliar kan han thliar a, Top 20-ah, chuta tangin Top 10-ah, chuta tangin Top 3 kan han thlang leh a. Top 3-te phei hi chu kan chai nasa khawp mai a, tichuan 'Chun chawi loh' tih hi kan thlang ta a ni," tiin Book of the Year Sub Committee secretary K Lalremruata chuan Zozam Weekly a hrilh.

"He lehkhabu hian kan hringnunah sualnain bu a khuar thukzia te, sualin mihringte a khawih chhiat theihzia te, sual chu thup hlen theih a nih lohzia te, chiang takin min hrilh a ni. Sual kawng zawh ve miah lote pawhin chutiang sual chu an tawrh theihzia te min hrilh a, tun tuma kan hmuh phak chinah chuan tha berah kan ngai," a ti bawk.

"A tawngkam a tluangin tawngkam tha pangngai a ni," a ti bawk.

Thuziak, April ni 23-a Book of the Year chawimawina dawngtu Lalhriatna hnena hlan turah chuan tiang hian an ziak:

"He lehkhabu hian mihring ze inthup a hai lang a, sualin mihring a khawih chhiat theih dan leh sual chu mualphopui a nih leh nge nge thin thu te, sual kawng zawh pawizia leh pawisawi lote pawhin an tawrh theih thu tawngkam mawi leh tluang takin a sawi a.

"Chuvangin, “Book of the year - 2008” atan Mizo Academy of Letters chuan a thlang a ni," tiin.

"Chun chawi loh" tih hi novel a ni.

Read more...

Pa Vakvai

Khua chu a vawt vin tak mai a, biak in chhehvela mite chu an inthuam lum hle.

Pathianni a ni a, inkhawm turin mite chuan biak in chu an pan sang sang mai. A bul velah chuan motor dahna tur pawh a awm tawh lo. Mite chu an inbia a, phur takin biak in chhungah chuan an lut hlawm. Kei pawh chuan ka car chu ka hung rem sawk sawk a, biak in lam pan chuan ka kal hlawk hlawk a.

Chutia biak in chhunga luh ka tum lai chuan, biak in hungna pal sirah hian pa pakhat, tawp deuh mai ka va hmu hlawl mai.

Chu pa chu a mu zangthal a, a muhil niin ka hria. Kawrchung fual hnek hnuk, thler hrup tawh mai a ha a, lukhum a khum avangin a hmel erawh ka hmu thei lo. A pheikhawk chu a hlui tawh ngang mai, kum 30 tal chu a bun tawh ngei ang. A tawt em em mai lehnghal a, a hmawr te chu a kaw huau mai. A pheikhawk chhipah chuan a kezungtang a rawn lawr fur mai.

Chenna in pawh nei lo, pa vakvai a ni ang a, tihian pawnah a khawsa ve tawp a nih ka ring.

Biak in-ah chuan lutin midangte hnenah chuan pawnah pa pakhat a awm thu ka'n sawi a, chu pa ngaihven tur chuan kan chhuak ta a ni.

Kan va pan hnai a, tumah chuan tunge a nih kan hre lo. |an a hun ta, kan luhsan ta a ni.
Inkhawm kan tan ta. Thuhriltu chu kan nghak thap a, rei lo teah thuhriltu tur chu a rawn lut ta hnak hnak mai.

Pa vakvai kha a ang lutuk. A lu lah chu a khuh tlat a.

Kan inhrilhru sep sep a, mak kan ti hlawm hle.

Tlar hma lam chu a pan zel a, pulpit a thleng ta. A kawrchung a phelh a, tin, a lukhum chu a'n phelh leh a, ka phu chiang kher mai.

Pulpit-ah chuan thuhriltu chu a ding ta...pa vakvai kha a ni!

Mipui chu kan reh thap mai.

Thuhriltupa chuan a Bible a phawrh a, a hmaah chuan a'n nghat dat a.

"Unaute duh takte u, vawiinah hian eng thu nge sawi ka tum tih chu hrilh in ngai tawh lo ang tih ka ring. Mi reng reng in teh neuh neuha in kher neuh neuh chuan in hmangaih thei lo. Chutianga in tih chuan hmangaih turin hun in nei lo ang."

('The Lesson of the Homeless Man' tih lehlin a ni. A ziaktu hriat a ni lo.)

Read more...

MLTP Act Zirna

¢ KL Liana

Mahni phak ang tawka dan zir leh hriat hi a tul a, Mizoramin kan dan neih, Zu Khapna Dan MLTP Act an tih hi zirho ila thain ka hre deuh a. Tunlai hian sawi a hlawh thar leh riau a. Tin, hmanah khan Mizo tawngin an letling a, kan hre viau hlawm mai thei e. Mahse i han zir thar leh dawn reng reng teh ang u.

Mizoram hi kum1972, January ni 21, Zirtawpni khan U.T. kan ni a. A kum leh khan Mizoram Excise Act, 1973 chu siam a ni ta a. Kum 10-na chiah 1983 khan Mizoram Excise Rules an tih chu siam ni lehin Mizoram Excise Act an tih nen chuan Khuangchawi thla ni 10,1984 khan hman a ni ta a ni. Hemi hma hi chuan zu hi Bawrhsapin Cr.P.C. an tih mai chang 144-na tlawhchhana hmangin a khap ve thin a. An mante chu IPC an tih chang 188-na anga thubuai siamsak a ni thin. Mahse Excise Act awm hnu kha chuan he dan hi hman a lo ni ta. Febraury 1986 khan Mizoram chu State a lo ni a. State kan nih hnu chuan Excise Act leh Rules hmang khan Zu sen chi, Indian Made Foreign Liquor, IMFL an tih mai chu mumal nei takin sawrkarin a zawrh a phal a nih nghe nghe kha.

Khatia IMFL, Sap zu ti mai ila, an han zuar tir kha chu nula e, la lo e pawh sawi loin a lei turin mi Bethel vanglai ang mai khan an intlar put put mai a, zu zuarte an lun kher mai. Mahse kum a lo vei meuh kha chuan zu dawr siamte kha an lun tawh hauh lo. A leite pawhin ngawi rengin an va lei a, lehkhain an tuam a, in lamah an hawn mai a. Khati khawpa zu a tam si khan, phai lama zu a tama rui hmuh tur erawh an awm lo ang khuan zu rui khawlaiah hmuh tur an vangin, kan Police-te pawhin man tur an nei meuh lo a nih nghe nghe kha. Veng keltil deuha tlangval huihphai deuh lo pai chhe chhe erawh an bo lem lo. Mahse le, kohhran lam khan zu khap turin sawrkar chu an nawr ta a, sawrkar pawhin kohhran thu chu zahin a khap ta a, a nawrtu kohhran erawh chuan zu avanga an man leh hremte meuh pawh a phuar ve lem lo va. Hindu-ten kan kohhranin a duh lo, tiin bawng vulh leh talh, sa ei khap tur erawh chuan sawrkar a nawr ve lo thung a, Mosolman pawhin an kohhran thurin kalh a nih avangin vawk khap a nawr lo hlauh a, tun thlengin vawk thau kan hmawm hmek hmek a ni.

Mahse Sap zu zuarte khan tam tak an la hralh loh kha an lo nei si a. Chungte chu tihralna hun sawrkarin thla khat emaw vel a pe a. Khatia zu khap tur a nih hnu, a la bang tihralna hun an han hawng leh ta kha chu, an zawrh tirh ang mai khan a chuhin an inchuh leh ta luih luih mai. Tichuan kum 1995 khan Zu khap Burna dan, The Mizoram Liqour Total Prohibition Act, an tih chu siam a ni ta a. A kum leh 1996 khan The Mizoram Liquor Total Prohibition Rules an tih chu siamin, Zu Khap Burna Dan chu February ni 20, 1997 atangin vawiin thlengin hman a lo ni ta. Kum 13 chu a lo ni ta reng mai. He Dan ang hian zu chu remin awm lo nise chuan kan Police leh Excise lamte pawhin man tur an hre miah lo tur a ni ngei mai. Mahse ni tin mai hian man tur erawh an la nei ta reng thung a, a rêm lem lo chu a ni chêk ang e.

Tin, a chunga Rules ang khian Doctor-ten an chawh chuan Sap zu kha damdawi atan phalna neiten an in thiang a. Sipai bangte pawhin chutiang bawk chuan an la thei bawk a. Mahse miin damdawi atan ngeih ve hlein inhre rilru deuh pawh ni ang sela, emaw mi damdawi in khelh khelh kha lo it ru vein dil ta sela, Mizo tlawmngaihnain lo pe ta sela, phalna neia in a petu leh phalna nei ve lo intu kha mana hrem theih an ni ta thung. A awmzia chu phalna nei kha chuan a damdawi a nih avangin tumah pe loin, awt hle mahse, a in khelh khan dan reng reng a bawhchhe lo tihna a ni. Mahse phalna nei ve lo chuan phalna nei ang thoin a tan damdawi atan thain hriain phalna nei aimah khan ngeih zawk pawhin lo inhre hial pawh ni ang sela, a in ve vaih chuan dan bawhchhia a ni thung. Tichuan kan Mizoram State Dan bik a nih avangin Vairengte pelh erawh chuan a boruak a dang hle. Heta sual, dan bawhchhiatna ni si kha khu lamah chuan phal a niin, dan bawhchhiatna a ni ve lo.

Pawngsual, rukruk etc. angte hi chu India ram pumah sual a ni ve vek a, Vairengte chhak lama sual a ni ngawt lo, hrem theih a ni. India ram mai pawh ni loin, khawvelah hian sual a tling thung. He dan hman a nih kum sawm erh awrh chhung hian mi an manin thubuai siamsak an tam tawh hle a, an la man mek a, an man zel dawn bawk a ni. Dan hi a lal a, tumah dan chunga leng an awm lo, tih a ni thin. Dan mitah chuan mi zawng zawng an intluk tlang vek bawk. Chumi awmzia chu dan hi kan zahin kan zawm tur a ni. Mahse kei ka hriat tlem avang pawh a ni ang e, ka lo hmuh leh hriat dan ang chuan Zu khapna dan hi mi hausa leh mi lian, mi zahkai leh khawsa theite chuan an zawm tha tlangpui niin ka hria.

A bawhchhetute chu ka han hmuh thuak dan chuan rethei berh te te, khawngaihthlak ang reng lawi si, hmeithai pasal sun, fate la te si, mi in luah, luah man pawh pe hlei thei lo te, an pasalten nupui dang an neihsan faten nu bel lawi si rethei fate pawh sikul kaltir tha thei mang lo te leh mi harsate an ni tlangpui a angin ka hre thung. Chu pawh chu nia ka hriat chhan pawh miin dawt min hrilh ka hriat sual ka sawi chhawn sual palh vang ni hran bik em em loin, kan dan sawi bawhchhetu nia an puh an man an kaih kawi dum dumte ka hmuh thinte atanga ngaihdan siam mai ka ni e, Ka daw loin ka inhria.

Khang rethei berh tak tak zu khapna dan bawhchhetu an man jail bang zutte kha erawh chuan eiruk khapna dan, Prevention of Corruption Act an tih mai hi chu an bawhchhe ve ngai lo thung niin ka hmu bawk. He eirukna dan bawhchhetute erawh hi chu a tlangpuiin mi lian leh Officer an ni deuh ber a angin ka hmu thung a, zu khapna dan bawhchhetu lung ina khung an tam ang chuan eirukna dan bawhchetute erawh jail bang zut an tam lo niin ka ngai bawk. A danglamna leh pakhat chu zu khapna dan bawhchhetute chu kohhranin phuar lem mah suh se, biak in lamah an inthlahrungin an inkhawm ve a nih pawhin tlar hma lam an chuh lem lo va. Eirukna dan bawhchhetute erawh chuan tlar hnung lam an pan lo niin ka hre deuh bawk, ka hre sual pawh a ni mahna.

Engpawh chu nise, MLTP Act chu kum sawm zen zawn kan hmang ta, a hlawhtlin leh tlin loh lam ka sawi lo va, ka hre bawk lo. Hei erawh ka hria, ni tin thla tin kum tin man tur erawh zu hi a la awm tam mai, tih hi. Vairengte chhak lama hman a ni emaw ni lo emaw, dan hi kan zahin kan zawm tur a ni a, chu chu khua leh tuiten kan bat a ni. MLTP Act pawh hi phalna neite lo chuan kan zawm vek tur a ni a, phalna neite pawhin an phalnain a sawi ang kha an zawm bawk tur a ni. MLTP Act chang ni loin, eiruk khapna dan, PC Act thleng hian kan zawm tur a ni a, dan a lalna apiangah zalenna a awm thin si a.

Read more...

Hmasawnna Tura Sorkar Scheme-te Chhunfin

¢ KT Pakhuangte

Hmasawnna ruhrel siamna tura pawimawh chu sorkar kut leh ke (Department leh a thawktute) chak taka siam leh mipui hnena thuneihna tam zawk pek hi a ni a. Tun maia kan tih theih, Department hrang hrang te hmalakna inhriatpui tawna, \anho tlan a, thawhhona \ha tak an neih hi ramin a mamawh chu a ni. Mizorama-a kan Department neih te hi zep nak emaw thawk ho hlei thei lo, initsik ru \ham an ni deuh fur a, an hmalaknate pawh hi an inpui tawn hreh fu zel niin a lang.

Entirna pakhat chauh han tarlang ila : Khaw pakhat (a hming chu sawi lo mai ila) Integrated Watershed Development Programme (Hariyali) project kan Evaluate-naah chuan chu khua chu IWDP (Hariyali) Project in a khuh a, National Watershed Development Project in Rainfed Area (NWDPRA) pawhin a khuh bawk a. PIA (IWDP) hnenah rawtna ka thlen a, min chhannaah chuan “Hmanah, PIA (NWDPRA) hnenah ka leng a, ‘Hawh u, hma in la ve tho si a, he khua atana in Pawisa neih zat min hrilh ula, keini pawhin kan hrilh ve ang che u; tichuan kan hmalakna turah hian i tang ho ang u’ kan va ti a. An duh miah lo” zu ti thlawt a!

He khuain a mamawh chu, a pakhatnaah chuan MIPUI EI LEH BAR ZAWNNA TUR a ni a, chutah chuan huan nghet siam turin Leileh theihna hmun chu Accelerated Irrigation Benefit Programme (Minor Irrigation Deptt. enkawl) in hma la se, Agriulture Deptt. nen lut rual se, Bial tlang siam leh siam rem ngai siam rem nise, Thlai chi te pein, a thlawhna turin National Rural Employment Guarantee Scheme (RD Deptt. enkawl) hman ni bawk se. Leilet neituten hun awl an neih chuan National Bomboo Mission leh a kaihhnawih (Forest Deptt, enkawl) in NGAW SIAM tir se. TLANG RAM LO NEITUTE chu Huan nghet an neih ngeina turin NREGS hnuaiah Lo vah tir nise, Terrace siam pawh an thei nghal a. Thlaichi hi Horticulture Mission (Horticulture Deptt. enkawl) leh Agriculture Deptt. ten pe se, a thlawhna tur lah NREGS hnuaiah a tih theih bawk si. A dawtah chuan TUI a ni a, chu chu PHE lamin Rajiv Gandhi National Drinking Water Mission (PHE Dept. enkawl) hnuaiah pek theih a ni a, a zavaia senso an theih loh pawhin IWDP, NWDPRA leh NREGS hnuaiah thawh ho theih a ni.

A dawt lehah chuan, THIANGHLIMNA a ni a, Total Sanitation Campaign (PHE Deptt. enkawh tho) hmangin a thawh theih a. A dawt lehah chuan chu khuain a mamawh em em, ZIRNA a ni a, Sharva Shiksa Abhyan & RMSA (Education Deptt. enkawl) hnuaiah tih theih vek a ni. INBIAKPAWHNA tha zawk pawh Universal Service Obligation fund (Telecom Deptt. enkawl) hnuaiah pek theih a ni a, ENG nise Rajiv Gandhi Grameen Vidyutikaran Yojana (P & E Deptt. enkawl) hnuaiah pek tur a ni a. KAWNGPUI nise, Pradhan Mantri Gram Sadak Yojana (PWD enkawl) hnuaiah pek mai tur a ni. In leh lo neilote tana tanpuina tur pawh Indira Awaas Yojana (R.D Deptt. enkawl) hnuaiah a awm fo.

Hei mai bakah DONER Ministry leh NEC atangin khuain a mamawh tur HMASAWNNA RUHREL a siam theih teuh bawk a. Ministry of Panchayati Raj leh Ministry of Minorities tanpuina dawng pha District-te tan phei chuan Theih Loh Engmah A Awm Meuh Lo. Ka sawi bak scheme chi hrang hrang hi Central sorkar hnuai atanga kan Pawisa dawn hman tangkai theihna a ni mai a, State sorkarin a tum ve tur (25% or 10% a thenah phei chuan a ngai lo) hi tha taka a pek theih phawt chuan harsatna a awmin a lang lo. Khuain hmasawnna tura a mamawh chu sorkar atang chuan kan nei vek niin a lang; mahse, Department te an tangho thei lo!

New Land Use Policy tha tak, miretheite khaichhuaktu tur kan nei dawn hlauh lehnghal a, mithiamte'n an ngaihtuahna an seng a, tha zawk leh felfai zawkin an rawn ti ngei turah ngai ta ila. Kan mithiamte hian Department-te hmalakna khaikhawm thei tura thawhho dan tur ruangam tha tak an siam thiam hle a ngai dawn a ni.

Read more...

VUN MAM LEH NALH

¢ Debbie Chawngthu

Tleirawl chhuah nalh duh lai taka hmai bawl leh arngeng han neih hi chu a lungchhiatthlak duh khawp mai. Tleirawl chhuah tan tirh hian kan hormone level pawh a sang a, vun mawm hun lai anih avangin hmai te pawh a lo bawl thin. Vun mawm hian kan vun kua a hnawh ping a, hmai a lo bawl ta thin a. Chuvangin, nikhatah vawithum tal hmai tihfai/phih thin tur a ni. Tunlaiah chuan hmai leh vun enkawlna chi hrang hrang a tam tawh hle a, a peih tan chuan heng inenkawlna chi hrang hrang hmanga kan vun enkawl kan peih phawt chuan rah tha a chhuah ngei ang.

Arngeng lo awm tur venna atana tha ber chu hmai tihfai hi a ni a. Amaherawhchu, hmai nuai nasat leh ro vek tur khawpa phih/tihfai zin erawh a tul lem lo. Hmai phih reng rengin nuai nasat loh tur a ni a, kan nuai nasat chuan oil gland kan ti chhe thei tih hriat reng a tha. Tin, hmai mawm mai bakah luphut hian hmai bawl mai bakah hnungzang bawl thlengin a siam thei a, luphut i nei anih chuan luphut nei tana siam shampoo hmang thin ang che. Arngeng hi tleirawl chhuah mai bakah kum 30 tlin thleng pawhin a awm thei a, hlauhthawn tur a ni lo. Tin,birth control pills ei vang te, vun tihfai tawk loh vang te, rilru hah vang te leh cream/lotion hman ngeih loh vang te pawhin a awm thei a ni. Vun mam leh nalh neih duh chuan a tam thei ang ber tui in hi a tha ber a ni. Kum upa tawh tana cream inhnawih tur an siam te hi kum la naupang tan chuan hman loh hram a tha. Vun mawm nei tan chuan thil dang vak hman kual a ngai lova, moisturiser erawh hi chu engang vun pawhin kan mamawh avangin hman ve reng zawk tur a ni. Mahse, vun mawm sa tan chuan moisturiser mawm lutuk erawh a tha chuang lo a, moisturiser vun mawm tana siam pawh a awm tho avangin chutiang chu thlan thiam a tha. Kum 30 pel tawh leh vun ro nei chunga arngeng i nei reng anih chuan antibiotics ei la, a dose dik takin ei ang che. Vun mam leh nalh nei tur chuan mut tam a tha a, a lo berah darkar riat tal mut tum ang che. Make-up hmang thin i nih pawhin i mut dawn chuan phihfai ngei ngei ang che.

Arngeng chauh ni lo, vun natna chi hrang hrang a tam hle a, chung zinga a thenkhatte chu han tarlang ila:

1) Whiteheads:Whiteheads hi arngeng ni chiah lo, a hmur var tho si a ni a, Mizo zingah a hluar bik hle. Vun atanga mawm lo chhuak tur, lo chhuak zo si lo te hi kan vun kuaah an bet ta a, deh awlsam tak niin vun a ti hmelhem ve thei hle a ni. Whiteheads tih tlem nan chuan toner hi a tha hle a, hmai phih zawha hman tur a ni. Thlai leh thei ei tam mai bakah tui in tam tur a ni a, mahnia deh chhuak mai lovin a thiam te chauh khawih tir tur a ni. Langsar vak lovin lo awm pawh nise khawih sual palh chuan arngeng lian pui puiah a chang thei a, fimkhur tluk a awm lo. Zing thawhhlimah tuilum sertui sawr in hi a tha hle a, thisen a tihfai avangin hmaia whiteheads awm tur pawh a veng thei a ni.

2) Mit Hnuai Val:Mit hnuai dum/val hi mut tlem vang te, taksa hah vang te, rilru hah vang te, ei leh in dik tawk loh vang te leh taksaa tui tlem vang te pawhin a awm thei a. Mit vun hi a pan mai bakah a ro bik a, chuvangin nuai bawrh bawrh te hi a haw bik em em a ni. Tin, mit hnuaia hnawih tur chi hrang hrang a rawn chhuak hnem tawh hle a, olive oil a dim thei ang bera massage pawh hi a tha khawp mai. Face mask i hmang thin anih chuan i mit bulah hnawih lo hram ang che. Fanghma/alu zailepa mit khuh te pawh hi a tha khawp mai.

3) Pangti Chawr:Hei hi hmaiah leh kutah a awm duh bik a,mi thiamte chuan natna hrik vuna lut vanga awm anih an ring. Heng pangti chawr te hi mahnia pawngpaw hleh loh tur a ni a, skin specialist kan tih mai bakah heng vun natna lam kaihhnawih
sclerotherapy te hi hriat chian a tha.

4) Vun Kaw Zau:Vun kaw zau hi a tlangpuiin vun mawmin an nei thin. Vun kaw zau i nei anih chuan face wash pangngai i hmang anih loh chuan medicated soap hmang thin la, sandalwood soap te pawh hi a tha khawp mai. Tin, i hmai tifai ngun bawk ang che. Vun mawm tana siam toner hmang thin bawk ang che.

Read more...