Airtel Mizo Music Awards board tifel ta

Airtel Mizo Music Awards-a nomination siam tur leh award dawngtu thlang tur board chu din fel a ni ta a, awards buatsaihtu member pangate bakah music lama mi pawimawih leh hriat hlawh tak tak mi 11-te board (judge) atan hian thlan fel an ni.

Awards board member-te hi kar leh hian inhmukhawmin awards nomination an buaipui \an dawn a ni.

Board member-ah hian Rebecca Saimawii, Vanhlupuii, C.Luri, PB Lianhminga, R. Lalremruata (Parema), OPA (Tribal Power), Romawia (Synod music instructor), David Z Hmar (Dreamhunter), Zothanmawia (Mystic), Marokima (Music Plus) leh Hmingpuia (Albatross) te an awm dawn a ni.

Board member-te hian award nomination siamin awards dawng tur hi an thlang leh ang.

Airtel Mizo Music Awards nomination-ah hian October 2010 leh September 2011 inkara record tihchhuahte telh theih a ni dawn a, nomination list hi tih fel hunah a hranpaa show neia puan leh tura ruahman a ni.

Airtel Mizo Music Awards hi October ni 20 zana sem tur a ni a, award-te hi category 10-ah sem a ni ang.

Awards buatsaihtu te leh Airtel hian kumin chhung zawng thawhhona tur an siam fel a, awards hi kum tina sem chhunzawm tum a nih avangin kum dangah pawh Airtel nena thawhho zel theih an inbeisei thu organiser-te chuan an sawi bawk.

Airtel Mizo Music Awards hi a vawi khatna tur a ni a, kumin hian category 10- Best Artist, Song of the Year (Gospel), Song of the Year (Lengzem), Best Music Video, Best Album (Gospel), Best Album (Lengzem), Best New Artist, Critics' Choice Award, Peoples' Choice Award leh Best Beat Group-ah te award hi sem a ni dawn a, category hi kum dangah chuan a pung chho hret hret ang.

Related Posts :