Comedian Search an tan ta

Comedian Search Sesion 4 chu September ni 7-ah an \an a, a telte'n fiamthu an thiam hle niin a huaihawttute chuan an sawi.

Ni 7-ah hian Selection Round an nei a, ni 11 zanah LPS-ah a chhuak ang. October ni 15 thlenga neih tur, fiamthu thiamte inelnaah hian mi 70 chuang an inel dawn ta a ni.
Selection Round-ah hian mi 40 chuang an tling a, kum hmasa lama lo tel tawhte kha Selection Round-a an tel ve a ngaih loh avangin First Round an lut sa a, chutiang chu 30 vel an awm.

"Tun \um hi contestant kan ngah ber \um a ni a, an inrual tlan ber \um pawh a ni mai thei," chief organiser, H Rotluanga, Zephyr Mapuia tia hriat lar chuan a ti.
"Selection Round-ah pawh kan chhangchhe lo. A round tir ber a ni chungin an fiamthu a \ha thei hle a, Final Round atana awhawm tak tak an ni nghal nawk mai. Mittui tla phungin kan nui," a ti bawk.

Comedian Search Seasion 4 hi Season 3 judge Rosiamngheta, Aizawl Municipal Council councillor ni ta Rosiamngheta'n a hawng a, fiamthu hlutna leh fiamthu thiamte ngaihsanawmzia a sawi.

Rosiamngheta hi councillor a nih tak avangin a tel ta lo a, a aiah B Lalthlengliana, Thangkura tia hriat lar a tel.

Comedian Search nghakhlel fe fe an tam hle nia sawiin Mapuia chuan, "Kum tluanin min zawt a, min nawr bawk a," a ti.

"A mak lutuk; kum a thar hian ti leh dawn tawh turah min ngai tawp niin ka hria. 'Eng tikah nge in tih leh dawn?' tia min zawt hi an awm reng a, nghakhlel taka min zawt hi an awm deuh reng," a ti bawk.

"Kan rin phak bakin Comedian Search hi a hlawhtling a, kan lawm khawp mai. Mizoram chhung bakah ram pawn, foreign thlengin an en a, foreign a\anga min rawn zawt nawlh nawlh pawh an awm fo mai. Keini show ve mai mai heti taka mipuiin min hlutpui hi kan lawm khawp mai," Mapuia chuan a ti.

Judge thar, Thangkura tia hriat lar, B Lalthlengliana chuan a phur thu a sawi a, "Mizo fiamthuin hma a sawn theih nana a theih ang anga tha thawh ve hi ka duh a ni," a ti.

"Comedian Search hi ka ngaihlu a, Comedian Search vang hian tukverh tharah kan dak tih hi ka ngaihdan a ni," a ti bawk.

Judge dang pakhat, Mafaa Hauhnar pawhin Comedian Search nghakhleltute'n ti leh thuai thuai turin an ngen reng reng niin a sawi a, "Kan tih leh hun tur min zawt an awm reng a, ti leh thuai thuai tura min ngen an awm reng bawk a. Mizote hian fiamthu kan ngaina a, kan mamawh bawk niin ka hria," a ti.

"Mizo fiamthu chawisan hi kan tum a, kan phak ang tawk tawkin chumi atan chuan kan bei a, mipui thlawpna kan mamawh a, kan phu lohvin min thlawp \ha niin kan hria," a ti bawk.

Related Posts :