Thla tin agarbatti kuang tone 50 lei dawn

Mizoram Bamboo Development Agency leh India rama Agarbatti siamtu lian ber M/s N Ranga Rao & Sons, Mysore chuan August ni 27-ah thawhhona thuthlung an ziak a, inremna ang chuan thla tin M/s N Ranga Rao & Sons te hian Mizoram atangin Agarbati kuang tone 50 vel an lei ang.

Thawhhona thuthlung (MoU) hi MS Suresh, chief operating officer, N Ranga Rao & Sons, Mysore leh Shurbir Singh, executive director, Bamboo Development Agency, industries deptt. director ni bawk te'n an ziak a ni.

Suresh-a chuan agarbati kuang sample te a en nghal a, a quality chu an duh ang tak a nih thu a sawi.

Industries commissioner RL Rinawma chuan MoU ziahfel a ni chu lawmawm a tih thu a sawi a, Mizoram sorkarin eizawnna nghet nei lote khaichhuahna atana NLUP a duan mekah hian, he MoU chu hmanraw tangkai tak a nih theih a beisei thu a sawi. He MoU kaltlanga thingtlang economy nasa taka tihdanglam (revolutionize) a nih theih thu a sawi bawk.

M/s N Ranga Rao & Sons hian cycle brand hmingin agarbatti an siamchhuak a, an agarbatti siamna atan hian Mizoram atanga square agarbatti stick siamchhuahte leisakna tur leh a tul anga training pawh an rawn pekna turin he inremna hi siam a ni.

Agarbatti stick-a company nena thawhhona turah hian RL Rinawma, commissioner & secretary, industries department cum executive chairman, Bamboo Development Agency leh Shurbir Singh, director of industries cum executive director, Bamboo Development Agency te'n thahnemngai takin hma an la a ni.

Bamboo Development Agency hotute chuan Mizoram hi India rama mau nei tam berte zinga mi kan ni a, amaherawhchu kan mau neihte kan ram ei leh bar dinhmun siamthatna atan kan la hmang meuh lo, tiin an sawi.

Kan ram mau te tangkai zawka kan hman theihna atan Mizoram sorkar, industries department hnuaiah Bamboo Development Agency (BDA) din a ni a, BDA hian Mizorama mau hman tangkai a nih theihna atan theihtawpin hma a la a, mau hmanga industry dinte a remchan anga puiin an thilsiam, an hralhna tur kawng pawh a zawn sak bawk thin. Tuna India No. 1 nena inremna an siam hma hian India No. 2 company - ITC Ltd, Chennai nen inremna siam a lo ni tawh a, anni hnenah phei hi chuan Mizorama agarbatti stick siamchhuahsa engemaw zat hralhchhuah a ni tawh nghe nghe niin thudawn chuan a sawi.

Mizoram sorkarin eizawnna nghet nei lote khaichhuahna atana NLUP a kalpui mekah hian agarbatti stick siamna din duhte tan a thlan theih turin trade pakhatah telh a ni. He trade thlangtute hian an thil siamchhuah hi BDA kaltlangin heng company-ah te hian an hralh sak dawn a ni.

Agarbattii stick siam chhuah bakah hian, Bamboo Development Agency chuan, Mizoram hmun hrang hrang pakua-ah chipping unit an din a, zawh fel tep an ni tawh. Heng unit atanga siamchhuah mau chips te chu paper mill-ah te hralh chhuah tura hmalak a ni.

Related Posts :