Kristian ramah NLUP

Chief minister Lal Thanhawla chuan Kristian ramah (Mizoram) NLUP enchhin a ni dawn niin a sawi leh a, a hlawhtlin chuan state dangah an ti ve dawn niin a sawi.

Serchhip District tana NLUP Workshop chu August ni 27 leh 28-ah khan Serchhip DC Conference Hall-ah neih a ni a, bialtu MLA, chief minister Lal Thanhawla, a hawnnaa khuallian chuan, "NLUP chu sorkar laipuia mithiam rual te pawhin tha an tih thu leh India rama Kristian state awm chhun Mizoram-ah enchhin a, an hlawhtlinpui chuan ram puma state dangte hman ve tura an ruahman thu a sawifiah a," tiin a sawi tih Mizoram sorkar thuchhuah chuan a tarlang.

"India ram pum hmuh leh entawn tlak tura kan hlawhtlinpui ngei a pawimawh hle a ni," chief minister chuan a ti.

"Kristian kan nih ang taka Pathian duh dan anga kan nun a tul tak zet a ni," a ti a, sorkarin retheite dawmkan chu thupuiah a neih reng dawn nia sawiin, anmahni chhawmdawl nana eizawnna hmanrua sorkarin a pekte pawh thenkhat chuan an lo hralh ru duh zel a, hrema man te an ngai leh thin chu a pawi tak zet a ni, a ti. NLUP pawh miretheite chhanchhuah nana hmalakna a nih laiin a dawngtu mi rinawm lote chuan jail bang zut nan an hmang mai ang tih a hlauhthawn thu a sawi bawk.

"Rinawmna, taimakna leh dikna nena kan thawh phawt chuan hlawhtlinpui ngei tur a ni a, hnam pawh chimralin kan awm lo ang," a ti.

Chief minister hian NLUP hi Kristian ramah enchhin a ni phawt dawn ni awmin a sawi fo a, titi pawh a siam deuh nghe nghe.

July ni 15-ah khan Vanapa Hall-ah Aizawl District Congress Committee hruaitu tur thlannaah chief minister hian NLUP chungchang hi a sawi a, sorkar laipuiin a pawm tak thu hi sawiin, "India ram pumah hman an duh a, mahse 'Mizoramah hmang chhin phawt ang' an ti ta a ni," a ti.

"Mizoram chu Kristian ram a ni a, Kristian ramah chuan prime minister-in hman chhin a duh a ni," a ti bawk. "Kan hlawhchham chuan Lal Isua kan timualpho ang tih a hlauhawm," a ti nghe nghe.

NLUP hi India sorkar hotute'n tha an ti hle niin a sawi a, "NLUP hi Pathian lamtang programme a ni a," tia sawiin, India rama sorkar hnathawk lal ber cabinet secretary pawhin NLUP chungchang sawi turin meeting vawi 2/3 a ko niin a sawi.

Related Posts :