Puan design nan computer

¢ Vanlalremruata Tonson

Puan lo pawh computer hmangin design a ni fo alawm; mahse, Mizo thalaite talent neih thatna nia sawi thin computer thiamna chu Mizorama industry hlawhtling ber tia sawi theih puan tahnaah hian, chhawr tangkai theih a ni chungin chhawr tangkai a la ni ngai meuh lo niin a lang. Chutiang vel ngaihtuah chuan, August ni 26, 2010 chu Mizoram industry chanchinah ni chhinchhiah tlak tak a la nih ngei a rinawm.

Mizo, a bikin hmeichhiate'n an chhuan em em, "Puan- the Pride of Mizo" tia sawi hial thin siamchhuahna, puantah industry-ah computer hman tangkaina tur bul tan a ni a, industry minister S Hiato-a'n Industries Department Office-ah CAD Centre for Weavers/Artisans of Aizawl hi a hawng a ni.

Mihring awmnaah chuan puan a awm thin a, a len leh a tet emaw, a that leh that loh emaw a mawi leh mawi loh emaw te chu a mihringte changkan leh changkan loh thu-ah a innghat thin. Hnam hrang hrangin mawi an tihzawng leh duhzawngte pawh a inang lo a, puan design hian hnam hrang hrangte creative dan leh rilru sutthlek pawh a hrilh thui hle niin a ngaih theih. Khawtlang nuna hmeichhiate dinhmun pawh a tarlang thui hle. Eng hnamah pawh mipa aiin hmeichhiain an taksa an khuh nasa zawkin puan an mamawh tam zawk thin a, buaipui pawh an buaipui zawk reng a ni.

Mizote puan duhzawng leh rilru mil zawng chu, kum 20 vel liam ta thleng khan, Mizoram buai lai leh chumi hma deuha Manipur lama chho Zofate tah leh Mizorama an phurhluh a ni ber. Khatih hunlaite kha chuan khaw tinah bawmranga puan phur leh zuar hmuh tur an awm a ni ber. Mahse, Burma sipai rorelna tlanchhiatsana Mizorama lut an tam tak deuh hnuah Mizoram chu Zofate puan duhzawng siamchhuaktu state a ni ta a, tun hmaa puan chawlut thin Mizoram chu a tahtu leh thawnchhuaktu a lo ni ta zawk a ni.

Puan leh a sumdawnna lama ngaihtuahna seng peih leh a timite chuan Burma puantah khawl leh Burma atanga Mizoram lut puantah thiamte chu sumdawnna remchang tha tak an siamsak a, puantah nalh leh tha tak tak a chhuak ta a, hnam dang thlengin Mizo puan chu an duh phah ta hle a ni.

'A design hi a ni ber, a hlui zung zung a, 'idea' neih that a ngai,' tih hi he puan industry-a eizawngte sawi fo thin a ni. A hralhna (market) lamah an buai lo a, mahse, design thar tichhuak thei nih erawh a pawimawh hle tih chu an thunawn pawimawh ber pakhat a ni.

Industry unit neitute chuan an kalna apiangah puan design chu an mitmei reng a ni ber mai; puan design an hmuh behchhana desiegn thar siam chu an rilru luahtu a ni.

"Kan ngaihtuahna a chawl hman lo," tiin computer hmanga puan design-na tur August ni 26-a hawn a nih tuma kal nu pakhat chuan a sawi.

"Keini chu kan mit pawh a fing tawh alawm," tiin nui deuh chungin a sawi zui a. Puan design-ah chuan a inring tawk hle tih a thil sawi zui dan atangin a hriat theih mai a; mahse, thiamna thar lo chhuak zel hi an chhawr tangkai lo a nih chuan nakinah mi hnungah an kal ve bek bek chauh ang a, an eizawnna pawh innghahna tlak a ni zel lo ang tih a ngaihtuah pha. Ani chuan computer hmanga puan design zir chu a thei tawhin a ring lo a, a industry unit chhawmtu tur a fate erawh chu zir ngei turin a duh thung. Khami ni khan thalai an langsar hle reng a ni.

Puan industry chuan design thar an buaipui a, chutah pawh tlema changkang deuh tia sawi turte chuan milian leh hausa nute duhzawng an buaipui tlangpui. An design a nalhin an puantah a changkang a, a man pawh a to. Chutih laiin hmarchhak state hrang hranga thawnchhuah tur ngaihtuah ran chunga he industry-a inhmang an awm ve tho bawk. He industry hlawhtlinpui tawh vek vek chuan puantahna kawl ringawt pawh 50/650 leh a aia tamte pawh an nei thin a, Nagaland, Manipur leh Meghalaya-ahte tihtham fe an thawnchhuak reng a ni.

"Min batsak ringawt pawh nuai tel fe chu a ni ve," tiin puan industry-a hlawhtling tak pakhat a hming tarlan duh lo chuan a sawi.

He industry hlawhtling takin chak leh zuala hma a sawn theihna tur chu Mizoram industry department lungkham ber pakhat a ni a, IT & Electronics Wing chuan computer thiamna chhawr tangkai tir tumin hun eng emaw lai atang tawh khan kawng an lo zawng tang tang tawh a ni. Chu an kawng zawn chu a tak ram chang thei dinhmunah pawh a ding tan mek bawk.

Computer hmanga puan design hi CAD (computer aided design) tiin an sawi thin a, software hmangin puan an design ang a, an puantah tur tiat lai tein khawlin an print chhuak thin ang. Hei hian harsa taka puan design-tuten a lem an ziak hi a chhawk ang a, khawl liana an print chhuah chuan lazai mal kal dan zawng zawng chiang takin a lemah a rawn lang ang a, tahsual deuh pawh awm lovin a nih dan tur ang takin an tah thei ang a, a rawngte pawh computer hmanga thlan a nih dawn avangin a dik hle dawn a ni. Hei bakah hian mi puan design an la chhawng emaw tidanglam duh emaw a nih pawhin a lem (thlalak emaw) kha scan-in computer-ah an la lut ang a, chu chu software hmangin an duh angin awlsam takin an lo tidanglamin an lo la chhawng ve tawh mai ang.

Puan design nana computer hman tangkaina tur hi Mizoram sorkar industries department; Centre for Development of Advance Computing (CDAC), Kolkata leh India sorkara Ministry of Communication and Information Technology (MCIT) te tangkawpa hmalakna a ni a; CAD Centre for Weavers/Artisans of Aizawl tih a ni. Industry department hian an thil mamawhte lo ngaihtuah sakin MCIT-in a senso an tum ang a, CDAC hian zirtirna pein centre hi an vil zui dawn a ni.

Centre-ah hian programme pahnih kalpui a ni dawn a, CAD Centre leh Capacity Building Programme tia vuah a ni. CAD Centre-ah hian computer hmanga puan design dan mi 20 training pek an ni ang a, Capacity Building Programme-ah hian mi 40 training pek tur niin hetah hian puan design chauh bakah IT kaihhnawih thil chi hrang hrang zirtir tel tur a ni bawk.

Tichuan, Puan- the Pride of Mizo siamchhuahna kawngah Mizo thalaite talent neihna nia sawi ve fo IT (computer) chu chhawr a ni ve dawn ta a ni ber a, a ngek chauh ni lovin Mizo thalaiten IT an chhawr ve tak tak tawh dawn a ang hle.


CDAC chu eng nge ni?
India sorkara Ministry of Communication and Information Technology (MCIT) hnuaiah hian Department of Information Technology (DIT) a awm a, Centre for Development of Advanced Computing (C-DAC) chu DIT hnuaia research leh development (R&D) pawl pakhat a ni.

1988 khan USA-in an Supercomputer-te India rama lakluh a phal loh avangin CDAC hi din a ni a, a dintirh atangin Supercomputer siam chu C-DAC hian hna berah a nei ta a ni.

PARAM with 1 GF hi a din kum khan a siam nghal a, an chhuang hle nghe nghe.
Supercomputer a siam rualin C-DAC hian GIST group (Graphics and Intelligence based Script Technology) dinin Indian Language Computing Solutions a buaipui nghal bawk.

IT lama thiamna thuk leh ril zawk hi an buaipui ber a ni, tia sawi theih a ni a, hemi avang hian India-in IT leh a kaihhnawih thil chi hrang hranga hmasawnna a neih chi hrang hrangah hian C-DAC chu a sulsutu berah an inchhal fo.

Related Posts :