Beihrual a lo thleng leh ta

Kum 10 vel liam taah kha September issue tir lamah Aizawl chanchinbu thenkhatin, "Kan ti nek nek a, 'ber' thla kan lo thleng leh ta der mei," tih an ziak thin. 'Ber' thla hian Mizo nunah 'rau' a nei a ni mai thei.

'Ber' thla hmasa- September chu "Beihrual thla" a ni a, Mizo Kristiante tan a pawimawh a, kum tir atangin hemi atan hian Kohhran pawh an inbuatsaihin an inhmakhua thin.

Beihrual thla hi 1918 June thla atanga hman a ni a, Kohhran-in Beihrual programme a hlawkpuina hi sawi sen a ni lo ang, nakin lawkah thangtharte'n research hmangin an la zir hial mai thei. Beihrual thla lo chhuah san tawi tein i'n thlirho teh ang.

1894-ah Mizoram-in Chanchin tha a dawng a, a hnu lawk- 1906-ah harhna tum khatna a thleng a nih kh. 1913-ah harhna tum hnihna a thleng leh a, ringtu an pung chak hle. Mahse, harhna chu a lo reh a, ringtute an lo harh lo deuh deuh a. Kohhran pawh a lo ngui ta deuh a ni awm e. Khawvel lama let leh ta te pawh an awm. "Pathian thu awih leh aichhia chuan thal an hua a nia,” tiin ring lote'n an chhaih nawmnah thin.

Chung lai chuan Mizoram Hmar chan hi Khasi Synod hnuaia Presbytery pakhat a ni a, kum khatah vawi hnih- March leh October-ah Inkhawmpui an nei thin. March ni 15-18, 1918 Presbytery Inkhawmpui, 'Aijal'-a neih chuan tiang hian an rel ta a:

"Kristian Beihrual-na hi June, 1918 a hian lo awm tan turin kan ruat a. Thla chawhma lam chu mahni Kohhran ho tan a, in tih chak na tur leh in tih thianghlimna leh in tih ngah lawk na atan kan hmang theuh ang a, tin, thla chawhnu lam chu ringlo te tan a hman tur ani ang, mi hruai hram turin. Tin, Kohhran tin in an thawh-zia dan theuh tur an ngaihtuah ang," tiin.

Beihrual-ah chuan ringtute'n ring lote veiin Pathian thu an hril a, a hlawk hle. Khaw hrang hrangah Beihrual vanga hming pe thar mi 344 an awm.

June 1918-ah hlawhtling taka an hman avangin October 1918-a Champhai Hmunhmeltha khuaa Presbytery chuan, “Beihrualna hi awm leh sela kan ti tlang a, kum 1919 September a ni ang, a tih dan tur chu hmana mi ang bawk khan a ni ang," tiin an rel a, 1919 chu harhna tum thumna thlen kum a ni ta nghe nghe.

1918-ah June thlaah an hmang a, 1919 leh 1920-ah September-ah, 1921-ah January-ah ,1922-1924 chhungin April-ah, 1925 atangin mumal takin September thlaah an hmang ta nia hriat a ni.

Presbyterian Kohhran bakah Kohhran dang pawhin Beihrual hi an hmang ta zel a, kum chawhnu lam- Krismas rim nam tan hun a ni bawk nen, September chu Mizo Kristiante tan hun pawimawh a lo ni ta.

Related Posts :