Mizo Poetry nge Mizo hla?

"Poetry han tih chuan, a saka sak mi ni lo, a thluk nei lo, hla thu mawi tak tak hmanga kawng kal fel tak neia uluk taka miin an rilrua khatliam an ziahchhuah/phuahchhuah hi niin tunlai thangthar mithiam leh fim fir fet zawka zirchiang duhte chuan an ngai niin a lang a; chutih laiin mi tam tak chuan hla tawh phawt chu poetry ni vekah an ngai mai bawk. He ngaihdan inang lo hi tunlai Zofate thinlungah a riah reng avangin sawi rema pawh mar a tul ta hle," tiin ziakmi Thuamtea Khawlhring chuan a sawi.

May ni 27-ah I&PR Auditorium-ah Govt T Roman College leh Mizo Language & Literature Teachers Academy te'n Mizo hla chungchang zirho (Seminar on Mizo Poetry) hun an huaihawt a, poetry leh hla thliarhran chungchang hi an zinga thenkhat chuan an tuipui hle.

Paper buatsaihtu pakhat Thuamtea Khawlhring chuan: "Poetry kan tih hi mithahnemngaite'n 'hlahril' tiin emaw 'hla chham mi' tiin emaw an dah thin a, a tha ve tho mai. Amaherawhchu, thinlunga poetry tihin a kawh taka hi a phawk chiah lo deuh em aw tih ngaihtuahna a awm thei," tiin a ngaihdan a sawi.

"'Hla thluk nei, a sak mi tawh phawt chu poetry a ni lo e' tia kan hnawl dawn a nih chuan, Mizo hlaphuah dan kalphung pangngai hmanga hla tha tak tak kan phuahte hi poetry huang atanga hnawl thlak vek an ngai dawn tihna a ni a. 'Hla tawh phawt chu poetry a ni vek e' kan ti dawn a nih pawhin, hla kawng bo leh baw lawl te te nena poetry huanga kan khung vek a ngai bawk ang. Helai thil hi kan sawi fel vat loh chuan, hla/poetry kan zir fimna kawngah harsatna kan tawk chho zel dawn tihna a ni a, chu chu kan Mizo literature tan thil pawi tak mai a ni ang," a ti bawk.

"Thlir dan thar a tulna chhan nia lang chu- Zo tawnga poetry/poem hrilhfiah dan inkhairual lo leh ngaihdan hrang a awm fo vang a ni," tiin paper buatsaihtu dang Lalrammawia Ngente pawhin poetry leh hla chungchangah thlir dan thar neih tul a tih thu a sawi.

Paper buatsaihtu dang, Sangzuala pawhin: "A tlangpui thuin Mizovin 'poetry' kan hriat dan ber chu 'hla' hi a ni tawp mai a, a awmze tluangtlamg berah chuan dik pawh a dik chiah reng a. A nihna takah chuan 'poetry' han tih mai hian hla zawng zawng hi a huap thei vek mai a, nimahsela chuti ang a nih tho reng lai chuan khawthlang lama 'poetry' leh 'poem' an han tiha keini neih ve lampui, a saka sak chi an phawrh tel ve ta thin lo hian min tibuai niin a lang ta ber mai," tiin poetry leh hla chungchang hi a sawi.

"Hnampuihovin poetry peng pakhat, chu-ah mah chuan poetry ziarang keng lo bera an ngaih chu keini rilrua lian ber; 'hla tak tak' lungleng taka kan lo sak hluah hluah thin chu a ni tlat mai a, he laiah mai te hian kan teh fuh thei lo mai mai niin a lang e. Chuvangin he lai thilah hi chuan buai thui vak lovin 'hla' zawng zawng hi poetry a ni tih hria ila, hnam puiho nen kan ngaih pawimawh zawng a inang lo tih laiah hian chiang ila, a tawk khawp maiin a lang e," a ti bawk.

Paper buatsaihtu dang pakhat, B Lalthangliana chuan Mizo hla hmasa ber chungchangah ngaihdan thar a rawn vawrh a, "Ruahpui sur bum bumin van rial a ko ve" tih hla, Run kam vel leh Than tlang vela pi leh pute chen laia phuah chu Mizo hla hmasa ber nia a hriat thu a sawi. He hla hi 1250-1400 vela phuah a nih a rin thu a sawi a ni.

B Lalthangliana hian pi leh pute chu hla lamah fakin, "An hla phuah, kum zabi 20-na hma lama chhuakte pawh hi a lo tha ve hle e kan ti a ni," tiin 'Kum zabi 20-na hma lama Mizo hla tobul leh a than dan' tih a sawi a, chumi dawtah Thuamtea Khawlhring-in 1900-1950 chhunga Mizo poetry chungchang paper a pharh a, "Kum zabi 20-na rawn inherchhuak hian Mizote tan Lal Awithangpa a rawn herchhuahpui tiin kan sawi thei awm e," tiin 1900 hnu lama Mizo hla-in hma a sawn dan a sawi.

Ani hian 1907-a Zawngin khua atanga Puma zai a rawn lar dan leh 1917 hnu lama Kaihlek hla a lar dan te a sawi a, chumi dawtah Hrawva sawiin, pi pu zai leh Kristian hla thar zulzuia hlaphuahtu tiin Hrawva hi a sawi a, "Ani hi awmze thar neia Mizo poetry lo chai hmasa bertu a nih em loh pawhin, a hmasa berte zingah chuan a tel chiang mai," tiin a fak. Zosapthara hla a lo lan thu a sawi bawk.

"Kum 1900-1950 chhung hi Mizote tan chuan hla thar tha tak tak tam tham tak lo chhuah vanglai a ni a, kan hla phuahtu hming langsar ber berte rawn chawrchhuah hun a ni bawk," Thuamtea chuan a ti.

Lalrammawia Ngente-in 1950 hnu lam a thlir ve leh a, "Kum zabi 20-na chanve hnu lam, kum 1950 achin tun thlengin 'poetry' hian hmasawnna nasa tak a chang chho mek zel a ni tiin a sawi theih ang. A hma lam pawhin poetry/pom ang hi chhuak mah se he hun chhung ang em ema poetry a chhuah tam leh hma a sawn dan hi sawi thiam pawh har khawp a ni," a ti.

1950 hnu lamah hian lehkhabu-ah poetry hmuh tur a tam ve ta hle tih a sawi a, "Poetry phuah dan hmang (technique) leh a chi hrang (genre) leh rhyme scheme hrang hranga phuah an ching ve tan ta bawk," tiin Mizo poet-te hmasawn dan a sawi.

A tawp berah Sangzuala'n 'Mizo poetry awmze neia zir leh kalpui dan' tih thupui hmangin paper a pharh a, ani hian poetry leh hla thliarfel chungchang sawiin, "... zirna huang atan hian hla thluk nei leh nei lo pawh thliar lem lovin, fakna hla chen hian kan la telh burh dawn nge, khawthlangho tih dan dung kan thul ve dawn tih hi zawhna lianpui, mi pahnih khat ngaihdana chhan fihlim mai chi ni si lo, ngunthluk taka ngaihtuahho ngai chu a ni ta a ni," a ti.

Related Posts :