Kan zingah JF-a

1979-ah a thi a, a taksa liam tawh mah se a kutchhuak erawh a la nung reng.

Mizo zingah JF Laldailova hre lo an awm ang em? Literature-a tui lo pawhin a dictionary vang talin an hre awm e. Mizo literature-ah a hmahruaitu zinga mi, a sulsutu zinga a thawh hlawk ber pakhat a ni a, literature pawnah pawh huan siam lama a kut a kalzia te, thenrual kawm a thiamzia leh a TB natna a vei laia a tawrhchhelzia te, tawtawrawt ham a thiamzia thlengin a sawi tur a awm a, a hming hi a dai lo ang.

1979-ah daih tawh khan a thi a, mahse, vawiin thlengin Mizo literature-ah pa chan a la chang ta zel a nih hi. A kutchhuakin hlut a la hlawh reng a, a bikin amah hmu phate zingah phei chuan JF-a hming a rik-a phu suau thin an la tam khawp ang. A kutchhuak thenkhat khungkhawmna lehkhabu chhuak mai tur pawh hian nghahhlelh a hlawh khawp mai.

"German ral run leh thu ngaihnawm dangte" tih, JF Laldailova kutchhuak thenkhat khungkhawmna chu June ni 8-ah tlangzarh a ni dawn.

He lehkhabu hi phek 175-a chhah a ni a, JF Laldailova kutchhuak ngau ngau bakah JF Laldailova chanchinte a tel.

A bu hming tumtu pakhat- 'German ral run' tih hi Indopui Pakhatna-a German ral bei tura Mizo tlangvalte thawhchhuah chanchin a ni.

German ral run tura thawkchhuak zinga pakhat, Vawmphunga'n an zin chanchin hi JF-a a hrilh a, JF-a chuan ngaihnawm takin a ziak ta a ni.

'Thu ngaihnawm dangte' tihah hian JF-a thawnthu tawi lehlin pahnih a awm; 'Vur ram thlaler femah' (On the adge of nowhere) tih, 1969-a a lehlin leh thawnthu phuah thiam Peter Cheney-a kutchhuak- 'Cocktail Party' tih a lehlinte a ni.

He'ng JF-a kutchhuakte hi khawi khawi emaw atangin, harsa takin Mafaa Hauhnar-in a haichhuak a, Zolife Publication te'n a buin an khawrpum ta a ni.

"JF-a kutchhuakte hi Zofate tan a hlu reng a, a hlutna hi kan hriat belh zel dawn pawh a ni mai thei. Chuvangin bo-a pil mai turin ani kutchhuak hi phal chi a ni lo a, hetia a bu-a kan han khawrpum thei ta hi a lawmawm khawp mai," Mafaa chuan a ti.

"Mizo literature tana JF-a thawhhlawkzia chu tlang hriat a ni a, a kutchhuak eng pawh hi a hlu vek ti ila dawt kan sawi a rinawm loh. Kan phak ang tawka a kutchhuakte vawnthat hi kan tum ve a, hei hi Zofate tan tulin kan hria a ni," tiin Zolife editor Remruata Varte pawhin a sawi.

"German ral run leh thu ngaihnawm dangte" hi hi JF-a dahsang em emtu L Keivom-in a tlangzarh ang.

Related Posts :