Nupui Neih Hnua Mipa Danglamna

Nupui neih hnua mipate danglam dan tlem a zawng i'n tarlang teh ang. Mipa khawsa zia leh awmdan kan tarlan atang hian hmeichhia te'n eng ang beiseina nge i chhungah an put tih i hriatthiam theihna a nih beisei chungin, heng thu te hi kan sawi dawn a ni.

1. Mipa hi nupui an neih hma chuan mahni awmna room leh mahni taksa ngei pawh invawngfaiin thianghlim takin an khawsa tlangpui a. Nupui an neih hnu erawh chuan thianghlim tak leh felfai takin an khawsa em em tawh lo. Nupui an neih vanga thatchhe ta thut chu an ni lo a, nupuiten thil hnawk leh bal vel an thenfai phah a, na vak lova an phun leh ang rite hi ngaihthlak nuam an ti ve hrim hrim a, chu chu hlimna chi khatah an ngai ve tlat.

2. Mipa hi nupui an neih hma chuan an hritlang awm na leh an nawm loh pawhin ngawi rengin an tuar hram hram thin a, an tawrh theih loh tawpah damdawi in an pan chauh thin. Nupui an neih hnu chuan hritlang/awm na/lu na hlekah pawh nupuite an hrilh vat tawh thin. Nupui an neih hnuah an pangchang ta thut a ni lo a, hmeichhiain anmahni ngaihsak a, thlaphang taka an phar vel leh han duat vel hi nuam an ti ve hrim hrim a, chu chu hlimna chi khatah an ngai.

3. Mipa hian nupui an neih hma chuan mahni chauhva chawei hi pawi an ti hran lo a, an bulah midang thu tur pawhin an phut hran lo. Nupui an neih hnu chuan nupuite an ril a tam emaw tam lo emaw, nupuite nena eidun kher kher hi an ngaina. A chhan nia lang chu naupangin chaw an han ei tuam tuam a, puitlingin ennawm kan ti ang hian, an nupui te'n min en ve se an duh vang a ni chawk. Chu chu hlimna pakhatah an ngai leh bawk .

4. Mipa hian nupui an neih hma chuan an hah thu leh an chauh thute an sawi an sawi duh lem lo. Nupui an neih hnu chuan an hah vak loh leh ho mai maiah pawh an chauh thu leh an thisen tlem thu an sawi fo ta thin a nih hi. A chhan ni bera lang chu, hmeichhe kut nem nuam taka han hmeh leh han zut vel an chak vang a ni duh hle. Chu pawh chu hlimna pakhatah an ngai leh tho.

5. Mipa hian nupui an neih hma chuan hmeichhe rinawm lo chu nupui atan an duh loh thu an sawi chhen thin. Nupui an neih hnu chuan a hun leh a hmun a zirin remchanna lei dan an thiam a, a chang chuan nupuite dawt var han hrilh mai tur pawhin an chil per an ui lem lo. Chu pawh chu nuam tih zawng tak a ni tlat.

6. Mipa hian nupui an neih hma chuan hmeichhe mittui tla an hre thiam rih lo a, an tah pawhin thlem ngaihna hre lovin an phi chung a, a eng ber nge tih hmasak tur an hre lo. Nupui an neih hnu chuan hmangaihna avangin an rilru te a hliam a ni tih an hre ve a, an tah pawhin an mamawh ber hmangaih thu hrilha duat taka chawi leh pawm an ngai tih an lo hrethiam a, chu chuan hlimna a thlen thin tih an lo hre chiang ta chauh thin a ni.

Related Posts :