Silver Hawk-in ramri an zawhchhuak Around Mizoram International Boundary Trekking Expedition

¢ PB Lalrammawia

Silver Hawk Youth Adventure Club, Republic Veng-a mite chuan Mizoram leh Burma inrina (international boundary) Km 460-a thui leh Mizoram leh Bangladesh inrina Km 459-a thui kein an zawh chhuak a, he hnehna hi May ni 27-ah khan Reiek tlangchhipah an lawm a, chutah chuan ka thianpa nen kan tel ve a.


He hnehna lawmna hun chawhnu dar 1 atanga hman tan tur hi a hun takah kan nang hman dawn lo tih kan hria a, mahse tel ve ngei kan duh a, phur takin tha thlah lovin Reiek lam panin kan tlan ve ngar ngar a. Reiek kan thleng a, lirthei tlan thlen theihna- Mizo typical village bulah motor kan dah a, kein Reiek tlangchhip chu kan pan ve ta a.

Ka thianpa Dr Beia chu kea kal thang vak lo a nih avangin ka ngaihtuah rilru hle a, mahse tlang han lawn vel chu nuam a tih zawng tak mai a lo ni hlauh a. Mi mahin Km 916 zeta thui an zawhchhuak a, engahnge kilometre hnih lek chu kan zawh chhuah loh bik ang, tiin kan incho phur chawp a, muangchangin kan kal a. Titi paha kal kan ni a, hah hre hman lovin minute 30 velah Reiek tlangchhip chu kan chuangchhuak ve ta hlawl a.

Reiek tlangchhip kan han chuangchhuak chu thianpa daktawra chuan nuam a tih thu a sawi a sawi ta mai a, kea ka kalpui tak vak avanga ka lo inthlahrun rilrukna chu a reh huai huai a. Kan hawn lamah phei chuan a inchhir loh thu a sawi hial a. Kei chuan, "Operation Theatre-a nitin hun hman ngawr ngawr ringawt pawh hi a ni lo, daktawr-ho pawh hian outing-na hun hi insiam ve thin rawh u," ka han ti ve ngial a. Silver Hawk hnehna lawmna ni kha engemawti zawng takin keini pahnih tan pawh kan hnehna ni hlimawm tak a ni tel a, Silver Hawk hnehna kan lawmpui rualin anmahni avanga kan expedition kha hlimawm tak a ni bawk a ni.

Silver Hawk Youth Adventure Club Leader Lalhmachhuana chuan min lo chiauau vat a, programme chu chawhnu dar 3 velah kan tan ta a ni.

He huna khuallian K Liantlinga, MLA, Aizawl South-I bialtu chuan a bial chhunga Silver Hawk Youth Adventure Club hmalakna chu fakawm a tih thu a sawi a, thenawm ram pahnih nena Mizoram inrina chin an zawh chhuak chu hnehna ropui a nih thu a sawi.

"Hnehna changtute hian vawiin hian Mizoram tan mel lung an phun a ni," a ti a, Reiek tlangchhipa hnehna lawmna huaihawt a ni chu Adventure Club tan a inhmeh hlea a hriat thu a sawi bawk.

MLA chuan, "Adventure pawimawhna hi Mizoramah kan la hre tawk lo; state dangah chuan thalaite tan exposure tha an pe a, hnathawh nan, eizawn nan an hmang thei tawh. Kan ramah chuan Sports & Youth Services lamin adventure duh angin an la kalpui lo a, hlamchhiah a ni hi a pawi hle," a ti.

"Sports Direcorate hian anmahni huang chhung zim teah chauh hma la lovin school-ah te pawh adventure club din se, state level atangin district level-ah inzarpharhin sorkar hian hma lak ve hi a hun tawh a ni," bialtu MLA chuan a ti bawk.

Tourism leh adventure inlaichinna chu sorkarin a la hre tawk lo tih sawiin, "Ram dangah chuan tourist-te kaihruai turin adventure club te an ruai thin a, thalaite tan eizawnna an siamsak thin," a ti.

Bialtu MLA hian SHY Adventure Club tanpui nan hian cheng singhnih a hlan a, a bial chhungah thalaite phochhuahna lam hawia hma lak zel a nih tur thu a sawi a ni.

He hnehna ni lawmna hun kaihruaitu Lalhmachhuana, club leader chuan adventure pawimawhna sawiin intihhlimna satliah a ni lo, a ti a; Tourism leh Disaster Management lamah sorkar hian adventure club te hi hmang tangkai thiam ve tawh se a duh thu a sawi bawk.

F.Vanlalhriata, SHYAC secretary chuan report pein Trekking an neih chhungin harsatna lian tham an tawk lo tih a sawi a, report a pek dan tlangpui chu hetiang hi a ni:

He 'Around Mizoram International Boundary Trekking Expedition' hi Phase thumah then a ni a, Phase I-na chu April ni 18, 2006 khan tanin Mizoram leh Burma ramri chu Mimbung atanga zawh tanin ni 12 chhungin Km 226-a thui an zawh chhuak a, Khuangthing-ah an tawp a.

Phase II-na chu May ni 22, 2007 khan Lungkawlh atangin an zawh tan leh a, ni 14 chhung thangin June ni 4, 2007 khan Lawngtlaiah an tawp a, Km 234-a thui an zawh.

Phase III-na hi Bangladesh ramri lamah January ni 15, 2010 khan Tuipuibari II atangin an zawh tan leh a, ni 21 chhung an thang a, February ni 4, 2010 khan Phura an thleng a, hemi tum hian Km 456-a thui an zawh.

Ramri chin hi ni 48 chhungin an zawhchhuak a, Aizawl atanga chhuaka Aizawla lo let leh nan a vaiin ni 51 an hmang a ni.

Ramri an zawh chhung hian chawhrualin nitin Km 23.49 kal ang an ni a, ni khata an kal thui ber chu Km 55 (Futsuri to Parva) niin an kal tawi ber chu Km 7 (Iva Lui to Vaphai) a ni.



Silver Hawk Youth Adventure Club:
A din kum - 12th June 2003
Member nih dan: Tupawh mipa/hmeichhia kum 14 chin chunglam
Membership fee - Rs. 50/-. Annual fee - 20
Activities neih tawh - 43
A thil tum te:
1) Khawtlang, Ram leh Hnam tana hmantlak ni tura thalaite chher chhuah
2) Thil tha tih leh Dikna kawnga rinawm leh huaisen
3) Hun vawn dik leh hman that
4) Mizo tlawmngaihna Chawisan a chhawm nun
5) Kristian nundan tha chawisan
6) Hnam inpumkhatna atana theih tawp chhuah
7) Adventure Sports a theih ang kawng kawnga chawisan.

Club Team
Leader : Pu. Lalramchhuana (Ramchhuana)
Dy. Leader : Pu. David Zohmangaiha (Zohmaa)
Quarter Master : Pu. Ramnienga (Paenga)
Medical Incharge : Tv. Zosangpuia (Mapuia)
Property Incharge : Pu. R. Malsawmtluanga (Mala)
Recorder : Tv. F. Vanlalhriata (Hriata)

Team members:
J.K. Lalmuanpuia (Jk-a)
Isak Lalthafamkima (Kima)
Rosangliana Fanai (Rosanga)
P.C. Ramhlunsanga (Lalmama)
Vanlalduata (Mapuia)
Mawiluizela (Mawia)
C. Lalliankima (Maliana)
Zoremtluanga (Mapuia)

Related Posts :