Sumdawnna thar din zinga 99% hi a tir lam kum 5 chhungin hlawhchhamin an tawp leh thin. Khawvel hi mi tumruhte dinchhuahna hmun a ni a, harsatna zawng zawng hi pumpelh vek sen a ni lo a, kawng awlsam ringawt hian hlawhtlinna a thlen lo fo bawk. Harsatna tawn tlang theitute hi mi hlawhtling ziktluak an ni thin.
Scientist hmingthang Thomas Edison khan electric bulb siam chhuak turin vawi 4,999 a enchhin a, a hlawhchham. A la beidawng duh lo a, vawi 5,000 a enchhinnaah chiah a hmuchhuak!
Beidawnna leh harsatna pawhin an ti zam ngai lo kha a hlawhtlinna chhan ber a ni. December, 1914 khan Edison-a laboratory chu a kangchhe vek mai a. A bungrua Dollar maktaduai 2 hu lai a chan a, a building hi concrete a nih avang leh kangmei laka him tura ngaih a nih avangin Dollar 238,000 chauhin a insure leh nghal a. Chumi zan chuan Edison-a thawhrimna zawng zawng chu meivapah a chang ta a ni.
A kan nasat vanglai a mei alh inhlap zuai zuai karah chuan Edison-a fapa Charles-a chuan thlaphang takin meikhu leh bungraw kang chhe karah chuan a pa chu a zawng a. A tawpah chuan a va hmu ta a. A samtuak var vo tawh chu thliin a chhem siau siau a, hlim hmel takin a hnathawhna hmun kang ral mek chu a lo thlir vauh vauh mai a.
Chutih laia thil thleng chu ti hian Charles-a chuan a sawi a, “Ka khawngaih lutuk chu ka rilru a na ngawih ngawih mai a. Kum 67 a ni tawh a, a thatlai hun a hmang ral tawh, a neih zawng zawng chu a kangral mek a ni si a. Chutihlai chuan min rawn hmu a, ring takin, ‘Charles, khawnge i nu hi a awm?’ a rawn ti a. A awmna ka hriat loh thu ka hrilh a, a ni chuan, ‘Va ko teh. A dam chhungin hetiang thil hi a la hmu ngai awm si lo a’ a ti zui a.”
A tuk zingah chuan Edison-a chuan a laboratory kangchhe ta chu thlir chungin, “Vanduaina leh chhiatna lo thleng hian hlutna a nei thin. Kan tihsual tak leh tih dik loh zawng zawngte kha tunah chuan a kangral ta a. A thar hlaka bul kan tan leh theih dawn avangin Pathian hnenah lawmthu ka sawi e,” a ti ta daih mai a.
A laboratory kan chhiat hnu chawlhkar thumah chuan Edison-a chuan thingrem zaithei (Phonograph/gramaphone) hi a siamchhuak ta a ni.
“Tough Times Never Last - But Tough People Do” tih lehlin a ni. - Lalthlamuana Ralte
Tuesday, June 1, 2010
Mi tumruhte an hlawhtling thin!
Subscribe to:
Post Comments (Atom)
No comments:
Post a Comment