Tuesday, June 1, 2010

HIV/AIDS vangin mi 168 thi tawh

Mizoram State AIDS Control Society te'n a chhinchhiah danin October 1990 atanga March 2010, kum 10 chhungin Mizoramah HIV/AIDS vangin mi 168 an thi tawh.

Kum 10 chhung hian mi 1,02,974-in HIV/AIDS an vei leh vei loh hriat nan thisen an test tawh a, chu'ng zingah chuan HIV positive 4,381 hmuhchhuah niin, AIDS case 414 a awm a, HIV/AIDS leh a kaihhnawiha thi 168 an awm tawh a ni.

May ni 24-ah khan Mizorama HIV/AIDS leh a kaihhnawih avanga tuar mek leh nunna chante tuarpuina leh sunna hun- Mizoram Candle Light Memorial Service chu a tum 5-na atan Vanapa Hall-ah hman a ni a, he hunah hian HIV/AIDS lama Mizoram dinhmun hi sawichhuah a ni.

He hunah hian parliamentary secretary Lal Thanzara chu khuallian a ni a, MSACS project director Dr Eric Zomawia chu khualzahawm a ni.

Khuallian chuan Mizoramah hetianga hun hman a ngai ta chu lungchhiatthlak a ti niin a sawi a, "Kan rama HIV kai tam zawk chu thalai an ni a, chu chuan kan ram hma lam hun turah ngaihtuahna a tithui hle a ni," a ti.

HIV-in thalaite a run mek dan chu ngaihthah theih a ni lo, a ti a, Kohhran leh tlawmngai pawl hrang hrangte pheikhai ruala ke pen tlang turin a sawm.

HIV/AIDS tuar mekte harsatna hre reng tur leh an tana hma la zel turin kalkhawmte a sawm bawk.

Khualzahawm Dr Eric Zomawia chuan HIV positive-te enkawlna ART Center, Champhai leh Lunglei-ah din thar a nih thu leh district tinah heti lama hmalak zel a nih thu a sawi.

5th Mizoram Candle Light Memorial Service 2010 hi World Vision India, Positive Network of Mizoram (PNM) leh Mizoram People Living With HIV / AIDS (MPLAS) te huaihawt a ni a, Mizoram State AIDS Control Society (MSACS) lamin senso an tum a ni.

Kumina Candle Light Service thupui chu- ‘Many Lights for Human Rights’ tih a ni. PNM leh MPLAS hruaitute'n thu an sawi.

Related Posts :



No comments:

Post a Comment