Tuesday, June 1, 2010

Mizoram University hna lak dan a dik em?

Mizoram University-in zirtirtu lak a tum a, chumi atana tehkhawng chu zirlai pawl te'n duh lovin hmang lo turin an ngen a, university hotute'n zirlai pawlte ngenna hi an tihlawhtling lo. He'ng vel hi tunlai titi lar a ni.

Mizoram University (MZU) hotute hian zirtirtu hna dilte chu matric atanga MA/MSc/MCom thlenga first division-a an pass leh pass loh an lo en a, first division-a tling vek lote dilna chu an lo hnawl a ni. Chu chu zirlai pawl lamin an pawm thei lo a, May ni 18-ah Mizo Students' Union (MSU) te chuan MZU VC (vice chancellor) Prof AK Rai-a lim an hal ta nghe nghe.

MSU te hian ni 19 tlai dar 3 hmaa a nihna bansan tur leh Mizoram chhuahsan turin VC hi an ti a, registrar pawh a nihna bansan turin an ngen bawk. Mahse, VC leh registrar te hian an nihna an bansan lo a, interview pawh MZP lam inrawlh hma chuan neih zel a ni. May ni 20 tlai lamah MZP te hi MZU hotute nen an inkawm a, a tuka interview neih tur chu thulh a ni ta a ni. Heta thulh tihah hian 'cancel' ni lovin 'postpone' a ni.

MZU zirtirtu tur hi lak a la ni dawn chauh a, May ni 18-20 chhunga interview neih kha a thawh khatna ang deuh a ni. Interview dang neih a la ni zel dawn a, MZP lam chuan chutah chuan an tehkhawng ngai kha an hman tawh loh an beisei a, thlir reng an tum bawk. MSU lam chu he thu buatsaih lai thleng hian an dinna ngaiah an la ding a, VC pawh Mizoram chhuahsan turin an la ti. Anni hian interview neih tawh pawh thiah an phut bawk.

Thu inchuh a awm ta a, MZU hotute lam tan an awm, zirlai pawl lam tan an awm bawk. MZU chhungah ngei pawh ngaihdan a inang lo. Mizoram University Teachers Association-in VC leh registrar an tan thu puang mah se an member zingah VC leh registrar tan lo an tam hle a, hetiang an pawlin thuchhuah an siam avanga lungawi lova insawh insawh, tih theih vak nei chuang lo te pawh an awm!

"Kan university hi central university a nih avangin India ram pum pui atangin hna a dil theih a, chuvangin hnam dang kan dal thei lo. Mahse, mark chungchangah hian hnam dangho hian hmu teuh teuh mah se eng ‘quality’ nge an neih tih kan chhut tel a ngai. Mizote zir tamna- MZU, NEHU, Delhi University, JNU (Delhi), Kolkata leh Hyderabad te hi Mark inpek tawk tawkna hmun a ni lo vek tih hi hriat a tha. Hetiang a nih avang hian interview tura koh tur an thlannaah matric atanga MA/MSc thleng mark an en chuan Vaiho chu kan pha lo nasa viau ang," tiin MZU zirtirtu pakhat chuan Zozam Weekly a hrilh. "Lecturer/Asst Professor ni tur chuan Master Degree leh NET neih a ngai a, chu zawng chu a ni ngai chu. An tlin leh tlin loh chu thuhran a ni. Tun tumah hian Mizo engemaw zat chu an dilna hnawl a ni a, interview-ah an aia thiam an awm avangin tling lo se thuhran, an dilna hnawl a ni a dik lo lai chu a ni. Ko se, a tling tling tling rawh se," a ti bawk.

"Thiamna inang rau rauvah kan university tan vai aiin Mizo kan tha zawk a, thahnem kan ngai zawk a, kan ram leh hnam ta a nih avangin University tan pawh theihtawp kan chhuah nge nge. Kan ta angin kan en a, rilru nghet tak pu chungin kan thawk tlangpui. Hnamdang an nih avanga mi thil hrechiang loten thiam zawk tura an dah ngawt hi thil dik lo hulhual a ni. Zirlaiin hei hi chu an hre khawp ang. Engtinnge mahni hlawh ringawt chhut thin (pawisa chauh damchhan) vaiho hian kan ram leh hnam tan thahnem an ngaih ang? Hei hi chhut tel a tha khawp mai," tiin lecturer dang pakhat chuan a sawi.

"Central University a nih avangin hnam dang thawh kan phal lo ngawt thei lo. Tin, education-ah chuan hnam zawnga chhut lovin a thiam thiam leh a tha tha lak mai tur. Chutah chuan ngaihtuah ngai ta chu- Mizoram University-a vai rawn thawkte hian thawh hlen an tum tak tak lo, hna dang zawn pahin an rawn thawk mai mai a, hna dang an hmuh veleh an chhuak leh daih zel. Duh hun hunah hna lak a theih ngawt si loh a, naupangin an tuar thin. Tin, hna dang hmua haw ve ta lote pawhin chawlh an la vak vak a, an ramah an awm daih zel. Kan VC zirchhuahna Banaras Hindu University atanga zirchhuak an tam sawt hle a, anni pawh hi chawlh lain an haw daih zel. Chu chu hriat a tul khawp mai. Zirnaah hnam kan en tur a ni lo ngei a, tin, hnam dang mithiam ber berte hi rawn thawk se kan university hian hma a sawn phah ang tih pawh a chiang, chutiang chu kan duh vek ngei ang. Amaherawhchu, 'zirnaah hnam en loh tur' tih chang chawia hnam dang tha lo lak chiam chiam a hlauhawm a, tute emawin chutiang tih an duh avang chuan 'kan university hi central university a ni a, hnam dang kan dang thei lo... Mizo chauh lak a theih loh...' te an ti kual a, chu chu kan mithiamte paw'n an lo awih ta thin a ni ber mai," a ti bawk.

"Mizo chauh lak kan phut reng reng lo; hei hi hriatsual palh a ni a, chutianga min puh lui chu an awm bawk a. Advertisement-ah master degree leh NET nei tih a ni a, chutiang nei Mizote chu interview atan koh ni ve rawh se kan ti mai a ni. An tlin loh leh an tling lo a ni mai. An tlinna turin kan bei reng reng lo a, Mizote lehkhazirna hmun tlangpuiah mark an ren theihzia te ngaihtuahin, interview atan em pawh a ram leilung fate ni chunga an ko lo hi mak kan ti a, chu chu kan sawisel lai chu a ni," tiin MZP president VL Krosshnehzova chuan a sawi.

May ni 19-ah khan MZU PRO (public relations officer) chuan thuchhuah siamin, interview tura koh tur chin thliarnaah dik takin dan zawm a ni tiin an sawi a, "Tuna kan buaina tak ber hi chu hemi dan kal pel hian Mizo candidate-te a bika ko tura ngenna siam a ni a. Mizote a bika koh theihna dan a awm loh avangin MZU chuan a theih chin chinah, siam rem dan awm thei apiangah chuan Mizote a tam thei ang bera koh an nih theih nan hmalak zel a ni a. Nimahsela Mizo diltu zawng zawngte an vaia koh an nih theih loh avanga lungawi lohna kal chho zelah chuan tun dinhmun hi thlen a ni ta a ni," a ti.

Hemi chungchangah hian MZP president chuan, "Tuman Mizote a bika ko turin an ngen lo ang; Mizote min duhsak bik tur pawhin tuman an ngiat lo a, Mizote min thlauthla bik hi kan sawisel mai a ni. Chu chu siamtha turin kan ngen a ni zawk," tiin Zozam Weekly a hrilh.

Mizoram University dinchhan, objective-a a inziah dan chu- "...a ram mite abika ei leh bar leh ram leh hnam a hmasawnna lamah leh an lehkha thiamna, an rilru leh hnam nunphung lama abika ngaihsak tur an ni..." tih a ni (…to pay special attention to the improvement of the social and economic conditions and welfare of the people of that State, their intellectual, academic and cultural development.) tih a ni.

Related Posts :



2 comments:

  1. Hnamdang thiam zok turah kan ngai anih chuan a hawizua loh thlak hle ani ang.Zirtietu tur ngatah phei chuan Mizo ka thlanga mahse a qualify in a tling tok tur ani ang..
    Mizo te hi analysing skill te,thinking skill(critical thinking) ah te hian hnamdangte hian min tluklo em2 ani tih kan hriat angai ta..
    ..Vanneihthlak takin ka zirna university ah chuan Mizoram a kan zir dan leh ngaihdan ang lo takin MARK hi secondary ani tlat mai..kan zirtirtute ngaih poamoh ber chu skills and knowledge ani..Kan education system hi siamthat angaia hman atang toh khan,chuvangchu ania hnam tlemte mithiam tlemte(state dang chhutin) nisi hna hmulo kan tam tak em2 nachhan...
    Tin,examination oriented mark hmu sang2 tia kan inel leh kan chhut tlat avang hian..chumi chuan kan university norms poh alo nghong ta ani ka ti lo thei lo...tichuan tunah mahni ek kan ei poh nilovin kan bar ta ngong2 ani ber in ka hria..

    ReplyDelete
  2. Need To Increase Your ClickBank Banner Traffic And Commissions?

    Bannerizer makes it easy for you to promote ClickBank products using banners, simply go to Bannerizer, and grab the banner codes for your picked ClickBank products or use the Universal ClickBank Banner Rotator Tool to promote all of the available ClickBank products.

    ReplyDelete