Eng tin nge ni zel ang?

May ni 21, ni 24 leh ni 26-ahte Tripura hmar lama refugee camp atangin Mizoram sorkar chuan Tuikuk chhungkaw engemaw zat a hruai kir a, camp-ah hian Mizoram-a kir ve tur, la kir ve lo engemaw zat an la awm niin Tuikuk hruaitute chuan an sawi.

Tun tuma Mizorama hruai kirte hi nikum November ni 13 thil thleng vanga Mizoram chhuahsantute an ni; November ni 13, 2009-ah Bungthuam naupang Zarzokima (17) chu mi tu tih hriat lohte'n an that a, Tuikuk engemaw zatin Mizoram chhuahsanin Tripura an pan a nih kha.

Tripura hmar lamah hian 1997-a Mizoram chhuahsantu Tuikuk-te chu 'refugee' enkawlin India sorkarin a enkawl a, 2009-a Mizoram chhuahsantute hian anniho hi an zu fin a ni.

Tun tuma Mizoram-a lette hi Mamit District-a khaw 8-a mite an ni a, tun hnaia Mizoram tlawhtu, India ram home minister P Chidambaram chuan chhungkaw 263 tiin ministry of home affairs-ah report a pe. Tuikuk hruaitute chuan Mizoram-a la kir ve lo an la tam hle niin an sawi.

"Tun tuma Mizoram-a lette kha Mamit District-a mite vek an ni a, Kolasib District atang pawhin an tlanchhe nasa a, anni hi ruahmannaah khan an lang lo hrim hrim a. Tin, Mamit District-ah pawh Damparengpui, Tuipuibari leh Zomuantlang-a mite an tel lo bawk," tiin Mizoram Bru Displaced People's Forum (MBDPF) president Elvis Chorkhy chuan a sawi.

Tun tuma Tuikuk laklet an nih khan, a hnuhnung ber ni 26-ah Khakchang camp-a chhungkaw 10 an let lo niin MBDPF president chuan a sawi a, anni hi Thinghlun-a let tur nia sawiin, he khua hi a him lova an hriat avangin an let lo niin a sawi.

Ni 24-ah pawh let tura tih zinga mi chhungkaw 3 an let lo niin a sawi bawk. Anni hi nau an neih vanga let thei lo leh pa berin Hyderabad-ah hna a thawh avanga let duh lote niin a sawi a ni.

Mizoram Bru Displaced People's Forum (MBDPF) te hmalaknain Tuikuk-ho hi an inchhiar a, June ni 3 thlenga an chhiar chinah nikum November ni 13 hnu-a Mizoram chhuahsantu hi chhungkaw 400 chuang an inchhiar tling tawh niin MBDPF president Elvis Chorkhy chuan a sawi a ni.

"Naisingpara Camp-ah an tam ber a, chhungkaw 229 an la awm a, a member zawng chuan mi 1115 an ni. Camp danga la awm hi la 'final' chiah lo mah ila chhungkaw 200 chuang an ni a," a ti a, chuti a nih chuan mi 2000 velah pawh an inchhal hial mai thei.

An inchhiar zawh hmain, June ni 3-ah khan Mizoram sorkar atangin lehkha an dawng nia sawiin Elvis-a chuan, Tuikuk zawng zawng inchhiar turin Mizoram sorkar hian a hriattir niin a sawi a, hei vang hian a bul atangin an inchhiar tha leh dawn tih pawh a sawi.

Elvis-a sawi dan chuan inchhiarna tur form pathum Mizoram sorkar atangin an dawng a, 1997-a Tripura-a chhuk zat chhiarna tur, BNLF leh BLFM mi leh sa thinte chhiarna tur leh nikum November ni 13 hnua Mizoram chhuahsantute chhiarna turte a hrang thliah thliahin an dawng a ni.

"Form pathum hi kan hman chuan camp-a awm zawng zawng kan inchhiar dawn tihna a ni a, hun pawh a duh rei deuh ngei ang a. Chuti a nih chuan nikum November ni 13 hnua Mizoram chhuahsantu zat kan lo chhiar tawh pawh tih that leh a ngai dawn tihna a ni. Committee-in kan ngaihtuah ang a, sorkar thu kan zawm ka ring," Elvis-a chuan a ti.

"Form-ah hian 'repatriation' tih zelna atan a tul tih a inziak a," tiin Elvis-a chuan Mizoram atanga chhuk thla zat Mizoram sorkarin fel taka hriat a duh a nih an rin thu leh chumi hnua Mizorama an kirna tura hmalak zel an tum a nih a rin thu a sawi.

Hetih lai hian Tripura sorkar-in Tuikuk-ho hi a lo chhiar ve a, June ni 2 atangin an tan niin thu dawn a ni.

"November ni 13, 2009 hnua Mizoram chhuahsantu zat hriat tumin Tripura sorkar hian hma a la a, an la zo lo a, mahse hriat theih chinah chhungkaw 212 an tling tawh," thudawn chuan a ti.

1997-ah Tuikuk engemaw zatin Mizoram an chhuahsan a, Mizovin an umchhuak niin anmahni chuan an sawi. Chutih laiin Mizo lam erawhin an um lo tih sawiin, district council ngiat nan anmahni duhthu ngeiin an chhuak tih chu Mizote sawi dan a ni a, mahse, India sorkar hian Mizote sawi dan hi a awih lo niin a lang. Tuikuk-ho chu raltlan (refugee) enkawlin a enkawl a, mahni duhthu ngeia Mizoram chhuahsanah India sorkarin a ngaih lohzia lanna pawh Mizoram-a an let theihna tura thahnem an ngaihziaah hian a chiang awm e.

Tripura hmar lam-ah camp 7-ah Tuikuk-ho hi an awm a, nikum November ni 13 hnu lama Mizoram chhuahsantute chhiar tel lohvin, 1997-a Mizoram chhuahsana Tripura refugee camp-a awmte hi mi 37000 velah an inchhal.

Camp pasarih zingah Naisingpara camp a lian ber a, in 3016 a awm. A te ber chu Khakchang camp a ni a, in 240 a awm.

Mizoram-a an let leh theih nan India sorkar chuan Mizoram sorkar a nawr reng a, tunah pawh nikum November ni 13 hnu-a Mizoram chhuahsantute chu hruai kir an ni ta. An la kim lo hle niin an sawi a, 1997-a Mizoram chhuahsantute pawh an let leh theih nan hmalak a ni reng. Camp pasarih-ah khuan Mizoram atanga chhuak ni miah lo, Tripura leh Assam vela an mi leh sate'n an fin nasa hle a, tin, Mizoram chhuahsantu zat hi Mizoram sorkar sawi dan aiin an insawi danah an tam fe zel bawk. Mizoram-a lak let an nih theih nan India sorkarin hma a la reng a, eng tin ni zel ang maw?

November ni 13, 2009 hnua Mizoram chhuahsantu, tuna Mizorama hruai kirte hian a thlawnin thla 9 chhung buhfai an dawng dawn a, in sakna tur leh chhawmdawlna sum leh pa an dawng tha dawn hle.

"Mizo tlangval an that a, chumi hnu-ah Tripura an pan a, pawisa hlawhin an rawn let leh tihna a ni ber e," chanchinbumi pakhat chuan a ti a, "Chutah Mizoram-a la kir ve lo an la tam hle nia an inchhal chuan engemaw zatin an rawn belh leh dawn tihna a ni a, 1997-a Mizoram chhuahsantute nena chhiar phei chuan Mizoram atanga chhuak ni lo Tuikuk engemaw zat kan senglut ang tih a hlauhawm khawp mai," a ti bawk.


May ni 21, ni 24 leh ni 26-a Tripura atanga Mizoram-a let zat:
* Tumpanglui-ah chhungkaw 25 (mi 127)
* West Bunghmun-ah chhungkaw 11 (mi 47)
* New Eden-ah chhungkaw 43 (mi 205)
* Thinghlun-ah chhungkaw 35 (mi 107)
* K Sarali-ah chhungkaw 15 (mi 84)
* Kolalian-ah chhungkaw 87 (mi 503)
* Damdiai-ah chhungkaw 47 (mi 226)

An vaiin chhungkaw 263, mi 1,299 an ni.

Related Posts :