Synod-in 'Nunu' leh 'Papa' thunun dawn

Mizoram Synod chuan mipa leh mipa leh hmeichhia leh hmeichhia inneite a thunun dawn.

Mizoram Synod hnuaia rorelna sang ber dawttu- Synod Executive Committee 229-na, June 3-a neih zawh tak chuan mipa leh mipa leh hmeichhia leh hmeichhia inkawp, nupa anga khawsate chu an inneih chhung thunun a rel a ni.

Synod Executive Committee-in mahni anpui kawp, nupa anga khawsate chungchang a ngaihtuah hma hian December ni 10, 2009-a Synod inkhawmpui lian chuan hemi chungchang hi a lo ngaihtuah tawh a, Synod Nupa Dan bu, bung 5, chang 7, b-naa- "Mipa leh mipa, hmeichhia leh hmeichhia nupa anga khawsate chu uirena suala tlu an ni a, thunun tur an ni," tih chu a tawk tawh lo tiin agenda puluttute chuan an sawi a ni. Sawiho a nih hnuah Synod Executive Committee ngaihtuah tur hian an dah ta a ni.

Synod khawmpui-in an kut-a a dah angin Synod Executive Committee chuan hemi chungchang hi an rel ta a, 'thunun tur' tih laia a thunun dan leh a hun chhung tur an rel a ni. Nupa anga an inkawp chhung chu thunun turin a titlu ta a ni.

"Inkawp lo chi inkawp hi Kohhranin a pawm lo a, tunlaiah media lamah mipa leh mipa emaw hmeichhia leh hmeichhia emaw inkawpte chanchin a lan ngun tak deuh avang hian thiang ta-a ngaihna a awm niin a lang a, court emaw sorkar emaw pawhin pawm mah se Kohhran kan ni a, inneihna hi mipa leh hmeichhe inkara mi tur a ni a, chu chu Bible-in min zirtir dan pawh a ni," tiin Synod hruaitu pakhat, SEC thutkhawma tel chuan a sawi.

Synod Social Front chuan 2009 khan mipa leh mipa leh hmeichhia leh hmeichhe inkawp, nupa anga khawsate hi a lo chhuichiang tawh a, Mizoram puma Presbyterian kohhran 900 velte hnenah an huamchhungah hetiang mi, Presbyerian Kohhran member ni kher lo te pawh zawngchhuak turin an ngen a ni. Kohhran 100 chuang hretin he ngenna hi chhangin report an thehlut a, chuta a lan dan chuan mipa leh mipa leh hmeichhia leh hmeichhia, nupa anga khawsa hi hmeichhia tuak 32 leh mipa tuak khat an awm a ni.

Kohhran zawng zawng hian thehlut se hei aia a tam ngei an rin thu Synod Social Front hotu pakhat chuan a sawi.

Synod Social Front hian tuai leh patilte hnenah hian rawngbawl ni se tiin an lo rel tawh a, hemi tihlawhtling tur hian auxiliary committee-in a pawmpui phawt a ngai a, rawngbawlna kalpui dan tur pawh rel tur a la ni, tiin thudawn chuan a sawi.

Zirchiangtu pakhat chuan an hriat theih chinah Mizoram-ah hian mahni anpui kawp ching, nupa anga khawsa kher lo pawh 200 chuang an awm niin a sawi a ni.

Mizoram Baptist Kohhran te pawhin kumin March 13-a inkhawmpui lian an neihah mipa leh mipa leh hmeichhia leh hmeichhia inkawpte chungchang hi an lo sawiho tawh a, an Kohhran chhunga hetiang mi awmte chu khauh takin an chungah thununna lek ni se tiin an rawt a ni.

Indian Penal Code-a mahni anpui kawptute hremna dan Section 377-naa awm, kum 150 vel zet tihdanglam loha hman tawh phet zawngin nikum khan Delhi High Court chuan, mahni anpui kawp hi dan bawhchhiatna leh mihring nunphung kalh a ni lo, tiin thuthlukna a siam a. Hei hian sakhaw hrang hrang, a bikin Kristian sakhaw rinna thui taka a kalh avangin Mizoram Kohhran Hruaitute Committee pawhin he thutlukna hi an dodal thu sorkar laipui hotute hnenah an thlen nghe nghe a. Union Law minister chuan he dan awmsa hi siam danglam tumna a awm loh thu sawiin, siam danglam a nih hmain sakhaw hrang hrang hruaitute an rawn hmasak ngei tur thu a lo sawi tawh bawk a ni.

Related Posts :