Lengpuiah 'risk'-in Air India thlawhna a tum

Mizorama airport awmchhun- Lengpui Airport chuan kum 10 hmel a lo hmu ve ta reng mai. Congress sorkar hmasain zawh hman loh hlauva an sorkar tawp lama hmanhmawh engphiara an siam Lengpui Airport hi a tangkaizia chu mipuiin an hria ang.

India ram airport za chuang zet zingah tlang chunga airport siam hi pathum a awm. Chu'ngte chu hmanni lawka chetsualna rapthlak thlenna Mangalore airport, Kozikhode leh Lengpui Airport te hi a ni.Khawvel khawi hmunah pawh an tih dan pangngaiin airport hi tihchangtluna tihchangkan zel tur a nih laiin Lengpui Airport erawh hi chuan hma sawn lovin ngai a awh rei ta viau mai. Kum 10 zet a tling ve tawh chung pawhin kan thu hriat tam ber chu 'flight cancel' tih vel a la ni ta reng a nih hi. Khua a chhiat dek dek tawh chuan zin mite chu 'flight cancel' hlauvin an thaw dep dep reng a la ni ber mai.

Pathianni- June ni 6-a Lengpui Airport-a thil thleng pawh kha a hlauhawmin a 'risky' ngang mai. Khawvelin thlawhna tum dan tur a tih- lei lam atanga thlawhna tum tur nena uluk taka kawng inkawhhmuhna khawl Very High Frequency Omni-Diretional Range (VOR) chu a chhia a, tih dan hlui leh hlauhawm em em, pilot-in ama mita a hmuh dan ang angin Air India thlawhna IC 211 chu a a rawn tum tawp mai a nih kha.

Thlawhnaa chuangte leh mipui lamin a hlauhawmzia an hriat lem loh avangin lungmuang takin an tum a, a vanneihthlak zaw phian!

He thlawhna hi chhun dar 12:00-a tum tur a ni a, Lengpui zawn a thlenin lei lam atanga lo kaihhruaina khawl a chhia a ni tih an hre chauh!

"Vawi hnih vel a kual hnu-ah Imphal lamah a thlawk tlang ta ringawt a, ni thum lai tum thei lova an awm tawh avangin tum ngei a tulin an hre si. Imphal-ah khawl siam chhung an lo ding khawmuang a, mahse, tlai dar 3:00-ah chuan an khawl chu siamthat mai rual a ni lo tih an hriat tak avangin pilot hian a passsenger te chu 'risk' a lakpui ta a ni," thudawn chuan a ti.

"He khawl hi a chhiat palh hlauh daha a thlakna tur pawh an dah a. Mahse, chu pawh chu a lo chhe tel si. Engvanga chhia nge tih an hre mai lo. Engpawhnise, a 'standby' khawl lehzel a chhia tih an hre mai lo hian he airport enkawl dan a tarlang chiang hle a ni," thudawn chuan a ti bawk.

Zozam Weekly-in thu a dawn danin he khawl hi hun rei tak atang khan siamthat a ngai tih hriat a ni tawh a, mahse, Airport Authority of India lam chuan an ngaihthah niin sawi a ni.

Wing Commander J Lalhmingliana, sorkar term hmasa lama Civil Aviation director lo ni tawh chuan: “siamthat tura tih a ni a, mahse vawiin thlengin an lo la siam lo a nih chu maw le,” tiin Zozam Weekly a hrilh.

Lengpui Airport-ah hian Instrumental Landing system (ISL) an tih mai chu hun rei tak atang khan dah tura ruahman a ni a, khawchhiat chang pawhin he ILS hmang hian thlawhna tumtir theih tawh tur-a ngaih a ni. Mahse, chutiang a la ni si lo!

Tunah hian Mizoram sorkar chuan ILS hi a bun fel vek tawh. Hawn-a hman nghal mai theih turin an enchhin vek tawh bawk. Mahse, a hawn lam hi Director General of Civil Aiviation lam thuneihna a ni.
Airport thuneitute chuan: "Hawn theih turin engkim peihfel a ni tawh tih hi DGCA hi kan hrilh tawh a, mahse an la rawn hawng mai si lo a, chuvangin kan la hmang thei lo a ni," an ti thung.

Thlawhna te chi, mi 40 chuang phur thei chi hian airport-a tum turin mit lawnga metre 3500 vel hma lam an hmuh theih (visibility) a ngai. Hei vang hian thlawhna te chi hi chuan chhum zing leh khawchhiat vanga tum loh an nei tlem deuh reng a ni. Thlawhna lian chi, mi 100 chuang phur thei chi hi chuan tum turin mit lawnga metre 5000 (visibility) an hmuh theih a ngai. Chuvangin khawchhiat leh chhum zin avanga tum theih loh an nei zing hle.

Thlawhna liana Aizawl rawn pana in thlen tum em em Kolkata lama thlawh kir leh daih chang a tam hle. Kingfisher hian thlawhna te chi chauh an service tir avang hian cancel an nei tlem. Air India hian thlawhna te chu kaltir tho mah se a tam zawk thlawhna liana an kal avang hian cancel a tam a, mipui phunna leh demna pawh a ri ring hle.

Kar kalta chhunga ni 3 lai an tum loh hnu pawha thlawhna te chi tum tura ruahmanna an nei mumal lo chu mipui phunna ber pakhat a ni.

Thlawhna a tum loh thin avang hian tuartu an tam thei hle. Damlo na tak tak, rang taka phai lam pan ngai, mahse 'flight cancel' vanga tangkhang tam tak an awm thin. Phai lama officer zin, hna tul tak tak te chu Kolkata-a cham tlat a ngaih phah chang a tam a. Hetianga an cham hian office hna-in a tuar a, a tawpa tuartu chu mipui tho an ni thin.

"Phai lama lehkha zir tur zirlai tam takin admission an chan phah tawh. Engpawhnise, he thlawhna tumhmun hi tihchangtlun ve zel loh chuan kan tum loh deuhin chhiatna rapthlak te hi kan la tawng ve burh ang tih a hlauhawm khawp mai," thlawhnaa chuang thin pakhat chuan a ti.

Related Posts :