Monday, April 12, 2010

Pastor thih dan chhui that leh tum

Mizoram sorkar chuan Rev Chanchinmawia thih dan chhui a la tum a, "Fimkhur takin a tul ang zela ngaihtuah a ni ang," tiin chief minister-in hemi chungchang hi a sawi a ni.

Budget Session tawp ni, April ni 5-ah East Tuipui bialtu B Lalthlengliana zawhna- 'Rev Chanchinmawia thih chungchang hi sorkarin CBI chhuitir tura a ngaihtuah mek kha tunah eng nge sorkar thlen chin ni ta?' tih chu home minister R Lalzirliana chuan, "Rev Chanchinmawia thih chungchang kha sorkar hmasain CBI te a lo chhui tir tawh a, report pawh an thehlut tawh a ni," tiin a chhang a, hei hi member te'n khelho zuiin, chief minister chuan he case hi 're-open' that leh a ngai tiin a sawi a ni.

Member-te zawhbelhna chhangin home minister chuan a tul anga hmalak zel a nih tur thu a sawi a, house leader Lal Thanhawla a lo ding a, ani pawhin a tul anga hmalak zel a nih tur thu a rawn sawi ve bawk.

Lal Thanhawla chuan Rev Chanchinmawia thihna chungchang chhuitu- Special Investigation Team leh CBI te chhuina chu rintlak a tih loh thu sawiin, "SIT an ni emaw CBI an ni emaw, an chhui dan kha a pawhlah lutuk a," a ti a, "Pawhlah lo deuh hleka tih dan pawh ngaihtuah a ni," tiin a sorkarin a chhui zui dan tur an ngaihtuah niin a sawi.

Eptu pawl an nih laiin sorkarna an siam a nih chuan he thihna chungchang hi chhui an intiam tih sawiin chief minister chuan, "Amaherawhchu, sorkarah kan han lut a, thil kan han hrechiang chho a," tiin chhui that leh a buaithlak dawn hle tih an hmuchhuak ta niin a sawi a, "Re-open mah ila, CBI hnuaiah chuan a sawt dawn chuang lo a," a ti.

Rev Chanchinmawia ruang bula lo awm- tuboh leh chemte silfaitu senior police officer pawh engmah an zawt lo tiin a chhuitute a rin loh thu a sawi a, chumi hnu-ah Malkhana atangin tuboh leh chemte a bo leh tih sawiin, "An chhui dan kha a rinhlelhawm a," a ti.

Sorkar hmasa hun laiin a chhuitute hian report an thehlut tih sawiin, "He'ng report-te hi chuan keini min convince lo a, Zoram mipui tam ber a convince lo a, Kohhran a convince lo a," a ti. Amaherawhchu, "CBI director berin report hmasa kalha report thehluh chu a har ang a tih phei chuan..." tiin hmalak zui dan tur a vang hle niin a sawi thung.

Hetia house leader a din lai hian East Tuipui bialtu Pu B Lalthlengliana'n report-in an rilru a hmin loh chuan a chhui that dan a awm em tiin a rawn zawt a, "Re-open leh dan hi ngaihtuah nawn a ngai," tiin house leader chuan a lo chhang a, "Ngaihtuahnaah a thi lo a, thi mai chi pawh a ni lo," tia sawiin, "Kan hotute'n an la ngaihtuah zel a, chumi ngaihtuahna erawh sawi mai chi a ni rih lo a ni," a ti bawk.

Malkhana atangin tuboh leh chemte a bo leh tih chief minister-in a sawi hi 2008 kum chawhma lama thil thleng a ni a, April ni 26, 2008-ah PRISM te'n hemi chungchangah hian FIR an thehlut nghe nghe.

"Rev Chanchinmawia ruang bula chemte an chhar, police te'n an lak kha a bo niin kan hria a. Hemi hi chhuichianga, a tul anga dan hmanga action la turin police te kan ngenin kan beisei a. He thil hi ngawihbopui chi nia kan hriat loh avangin heti hian mipui hriat turin kan puangzar a ni," tiin PRISM chuan hemi tum hian thuchhuah an siam a ni.

Hetih lai hian ADM (J) Chawngtinthanga chuan chemte bo thu hi chanchinbu lam atangin a hre ve chauh niin a sawi thung. Chemte bona hi hetih laia ADM(J) Chawngtinthanga court a ni.

Chawngtinthanga hi police te'n Rev Chanchinmawia thihna chungchang an chhuina final report an thehluhna a ni a, police te'n bungraw pawimawh an khawmte an thehluhna a ni bawk.

October ni 1, 2007-a ama chenna Khatla Pastor quarters-a thia chhar Rev Chanchinmawia ruang bulah khan anmahni choka chemte (kitchen knife) leh chhang zaina (bread knife) te chhar a ni a, chu chemte chu a bo nia sawi a ni a, 2010 thlengin House-ah sawichhuah a la ni ta a ni.

Related Posts :



1 comment: