MBSE Leh CBSE Piahlam Ram

¢ Lalremruata Renthlei

Ram a changkang telh telh a, Mizote paw’n kan dai zau tial tial a. Thiamna a sang a, compettition a sang a, nu leh pa te’n fate zirna tha pek kan tum.

Nu leh pa, fate tana zirna tha leh chhenfakawm zawk ngaihtuaha rilru seng mekte tan sikul tha leh zirna tha ngaihtuah a ngai thin.

Mizorama sikul kan neihte hi Mizoram Board of School Education (MBSE) emaw Central Board of School Education (CBSE) emaw hnuaia awm a ni hlawm. He’ng board pahnihte hi chu kan hrechiang viau hlawm tawhin a lang a, chuvang chuan heng kan hriatsa piah lam, IGCSE kan tih mai leh IB kan tih maite hi i han bihchiang dawn teh ang.

International School kan tihte hi a hming chu kan hre fo tawh. He’ng International School kan tihahte hian khawvel ram hrang hrangin a pawm, syllabus an zawm hlawm. Naupangte kaihhruai dan leh zirtir dan a danglam bik a, hetiang syllabus zirchhuakfe ngat hi chu pawl zat inangah, kan state board leh CBSE te nen phei chuan khaikhin chi rual an ni hauh lovang.

IGCSE chu eng nge?
International General Certificate of Secondary Education(IGCSE) hi Cambridge Certificate of International Examination (CIE) hnuaia awm a ni a. Khawvela University tha ber pawla kan neih Cambridge University hnuaia awm a ni.

IGCSE bik hi naupang kum 14-16 inkarte tana ruahman a ni. Pawl kua leh pawl sawm kan tih nen hian a inang vel ang. Kum hnih Course a ni. Sikul thenkhatah chuan pawl riat atangin an tan bawk. Subject area panga a awm a, he’ng area panga atang hian subject pakhat tal thlan a ngai. Area hrang hranga subject awm zawng zawngte belhkhawm hi 90 chuang lai a ni. Duhthlan tur a tam khawp mai. Naupangin mahni duhzawng leh tuizawng subject an thlang thei a, tin, sikul thenkhatah chuan, sikul lamin subject combination hi an siam lawk bawk.

IGCSE syllabus hi a duh duh sikulin an zawm ve ngawt thei lo. Hemi syllabus zawm thei tur hian, sikul chu CIE-in an syllabus zirtir thei sikula an ngaih a nih a ngai. Hemi tling phak tur hian sikul building mai bakah basketball court, football ground, swimming pool, library, computer lab, dinning hall etc changtlung tawk tak neih a ngai. Sikul naran tan a pawng a taka zawm ve ngawt theih a ni meuh lo. Zoram tan phei chuan a la hla deuh mai thei a ni.

IGCSE zirtirtu ni thei tur hian Cambridge International Examinations hnuaia Teachers’ Training chhuak ngei nih a ngai. CBSE emaw State Board emaw, ICSE emaw-a zirtirtu lo ni reng tawh thin tan pawh zirtir ve ngawt theih a ni chuang lo.

IGCSE Certificate :
IGCSE final exam zawhna hi Cambridge, London atangin set vek a ni. Tin, answer paper zawng zawng chu sealed thlapin, Cambridge-ah thawn thlak a ni leh a. Cambridge-ah engkim endik vek a nih hnuin, result chu puan a ni ta a. Certifcate hi Cambridge atang vekin naupangte hian an dawng thin a ni.

IGCSE kum hnih an zir hnu hian naupangte hian duhthlan tur an nei ta a. IGCSE AS Level emaw A Level emaw zawm a nih loh vek pawhin IB (International Baccalaureate) zawm a ni a. Hei hi pawl sawm pakhat leh sawm pahnih kan tih ang chi hi a ni. Kum 16-18 tana buatsaih course an ni a. Kum hnih course a ni.

IB (International Baccalaureate) : He course hi khawvel ram hrang hrang 150 chuang teh meuhvin an zawm a. Pawl sawm pakhat leh sawm pahnih course-ah chuan khawvel pumpuiah a lar ber a, a tha bera ngaih a ni mek bawk a ni.

A chunga kan tarlan tak ang hian kum hnih course a ni. Pawl sawm pakhat leh sawm pahnih ang hi a ni. IB-ah hian Core Subject pathum a awm. Heng core subject te hi naupangin an zir tel ngei ngei a ngai a. Chungte chu, Extended Essay, Theory of Knowledge leh CAS( Community Action Service) te an ni. Heng core subject bakah hian subject dangte chu chi nga (five areas)-ah then an ni a. Heng subject then nga atang hian subject khat tal naupangin a thlan ngei a ngai a ni.

Engvanga IGCSE leh IB te hi tha bik nge ?
A that bikna hi rei lo te-a sawi sen a ni lo ang. Heng course te hian CBSE leh MBSE te ang lo takin, naupangte chu an ngaihtuahna seng thei turin a buatsaih a. Byheart system kan tih maia kal theih a ni lo a, zirtirtu tan notes inpek theih a ni hek lo. Naupangte’n an ngaihtuahna an sen tak zet a ngai. In-by-heart-tir vak vak a, exam hall-a luakchhuah leh ringawt ang kha thil theih a ni lo. Naupangte puitlinna leh thiamna tak tak neih theih nan, tunah rih chuan heng course-te tluka tha hi khawvelah a awm kherin ka ring lo.

Tin, IB Course leh IGCSE Course te hi khawvela University tha ber ber Cambridge, Oxford, Yale, Harvard te mai bakah khawvela University zawng zawng deuh thaw hian an pawm avangin, direct-in heng university-te hi naupangin an zawm nghal thei a ni. CBSE, MBSE leh ICSE kan tih atang te-a heng University zawm tum ve ngawt hi chu mau tlawn hmanga van lawn tum ang deuhva khirh a ni tih kan hre theuhvin ka ring a. Kan fate hian University tha ber berah zir thei se kan ti takzet a nih chuan IGCSE leh IB Course te hi kan zirtir ngei a tha ngawt ang.

IB zir zote tan hian University za chuang teh meuhvin scholarship an pe chhuak a. Naupangin IB-a point a hmuh san leh san loh azirin scholarship hi an pechhuak thin a. A thiam thei tan phei chuan University tha ber berah mahni sum leh pai chawi ngai miah lovin a zawm theih a ni. IGCSE leh IB course zir man erawh hi a to deuh a. A to em em nachhan pawh, exam fee te, lehkhabu man te, registration man te a san mai bakah zirtirtute hlawh chena a san bik vang a ni.

Kan fate sikul kalna hian nakin hnu zelah an nunkhua a rel thui thei hle a ni tih hriain, kan fate sikul kaina mai bakah, an course lak tur thleng hian uluk takin i han thlang hlawm teh ang u. A hrechiang leh zual duh tan chuan heng websites kan tarlante hi tlawh ni ta sela : www.cie.org.uk leh www.ibo.org . Mizo tawng ngeia hrilhfiahna mamawh kan awm a nih chuan Zozam Weekly kaltlangin biakpawh theih a ni e.

Related Posts :