Hei le Globalization chu

NPS Border Business Forum, Kolkata buatsaih '1st International Border Trade Expo' (The Best of Asia Expo) chu April ni 10 khan Lammual-ah chief minister Lal Thanhawla'n a hawng.

Lal Thanhawla chuan thu sawiin, Mizoram chu India rama state ralmuang ber kan ni chungin leh industrial friendly policy nei ni mah ila, hmun kilkhawr ber leh inkalpawhna leh hmasawnna ruhrel duhthusam a awm loh avangin 'investors' an lo luh hreh phah thin a ni, a ti.

Zokhawthar-a Land Customs building hawn hunah leh Kaladan Multi Modal Transport Project peih hunah chuan lui, tuipui leh khawmualpui atanga inkalpawhin Asia chhimchhak ram te nen insumdawntawnna tha tak neih theih a beisei thu a sawi.

Lunglei-ah airport siam belh a nih dawn bakah Aizawl dai maiah rel lu luhtir tum a nih avangin Mizoram chu investment neihna hmun tha a ni tiin, khawvel ramdang mite chu investment uar turin a sawm a ni.

ASEAN ramte nena insumdawn tawnna tha zawk neih theih nana India sorkarin Look East Policy a kalpui chu Mizoram-in a thlawp hle tih a sawi bawk.

Trade & Commerce minister Lalrinliana Sailo chuan chief minister kaihhruainain Mizoram chu 'South East Asia Business Huts'-ah siam tum a ni tiin, kum 15 kal ta atangin ramri-a insumdawntawnna atan hma lak a nih tawh thu a sawi bawk.

Expo hian April 18 thleng a awh dawn; handloom, electronics, foot wears, cosmetics, jewelleries, apparels, medicines, flowers etc. te phochhuah a ni.

He expo hi Kolkata-a Nirvana Pilgrims Society bultum, Mizoram Entrepreneurship Network (MEN) te buatsaih a ni. Tun hnai khan Bhutan, Nagaland leh Manipur-ah neih a ni tawh. India ram hmun hrang hrang atang bakah India ram pawn atangin an rawn tel.

'1st International Border Trade Expo' hi 'The Best of Asia Expo' ti ngata vuah a ni a, a ropui bawk a ni ang, inpho zingah Mizo an lang meuh lo. Hei hi mi thenkhat chuan, "Mizo kan tel pha lo," tiin an sawi.

Zozam Weekly-in April ni 12-a he hmun a tlawh lai hian Mizo dawr pathum a awm ve a, pakhat phei chu mi pathumin an inluah tawm a ni. Hnam Chhantu chu tel ve tura sawm an ni a, mahse, an tel duh lo.

"Hetiang hi kan hnam tan tha kan ti rih lo," tiin Hnam Chhantu hotupa Ramhmangaiha chuan Zozam Weekly a hrilh.

"Stall pakhat luah man hi Rs 35000 a ni a, ni 10 atanga ni 18 thleng hian chutiang zat hmuh let hi Mizo tan chuan huphurhawm tak a ni," a ti a, "Hetianga ram dang sumdawng kan rama sumdawntir hi tun dinhmunah chuan kan hnam hian a la tlin lo," a ti bawk.

"Kan hnam dinhmun hi kan hriat a tul a, khawvel hnam ropuite el tur-a inhawn huau hi kan la tlin lo. Chu chu tlawm-a lak chi pawh a ni lo, khawvel hmun dangah pawh hnam mawl leh naupangin hnam ropui an hneh ngai lo. Chutiang vang chuan hnam naupang engemaw zatin an lo tuar tawh a, kan hnam hian kan tuar ve ang tih a hlauhawm khawp mai," tiin a ngaihdan a sawi.

"Hnam Chhantu thilsiam ang hi Thailand leh Turkey te'n a aia tha zawk, mawi zawkin an siam thei ang. Anni chuan generation tam tak an lo thawk tawh a, thiam tur an ni. Keini hnam chuan kawng engkim deuh thaw-ah hian bul kan tan chauh a, lo ropui tawhte nena inel turin kan la inpeih lo. Kan dinhmun angah hian mi hnam pawh an ding ve tho. Tunlai khawvela kan hriat tur chu- globalization hian hnam mawl leh rethei zawkte a nekchep nasa hle tih hi a ni," a ti bawk.

"Ram dang sumdawng an rawn luh chuan, a ram neitu sumdawng an nekchek nghal ang. Chu chu inchimralna kawng a ni thei. Ram dang sumdawng leh hnam dang hrim hrim rawn lut pawh ni se min tihchhiat theih lohna tura kan inbuatsaih a tul. Chutiang tura inbuatsaih pawh awm lova inti hawi zau deuhva globalization lo duh viau te a awm thei. Tin, tuna kan dinhmun en hian globalization el pha lo nih hi nep leh dawih intihna chi a ni lo a, inti huai taka globalization el pha emaw intih ngawt chi pawh a ni lo, kan dinhmun kan hriatchian a ngai. Kan la naupanzia te hi hriat a ngai," a ti bawk.

Economics lecturer pakhat, a hming tarlan duh lo chuan '1st International Border Trade Expo' hi a tlawh ve a, "Globalization-in ram hnufuala chengte a nek dan a lang chiang," tiin a ngaihdan Zozam Weekly a hrilh.

"Ram hausa zawkte'n ram retheite hi an 'consumer' atan an duh a, thiam takin an rilru an hneh a, tichuan an hriat loh laiin ram retheite an hneh thin. Ram rethei tan sumdawnna lamah ram hausa hneh thu a awm lo. Kan ramah Multi National Company an rawn luh rual rualin kan 'local product'-in a tuar nghal ang. Chu chu globalization vanga thleng thin chu a ni. Lammual-ah pawh ka kal ve ngei a, a ropui tak zet mai. Mahse, he thil ropui takah hian hnam dang an inzuar a, a ram neitute hmel hmuh tur chu pahnih khat emaw lek a awm. Tihian nuam ti takin kan lo dawr a, kan pawisa an ak haw teuh ang. Mipuiin hlawkna tel tur kan nei lo," lecturer chuan a ti.

Related Posts :