Lung tilengtu thang van sang

HSLC 2010-a pakhatna- Benjamin Lalfakmawia chuan astronomer nih a tum a, "Arsi leh planet chungchang zirchian ka chak," tiin astronomer nih a tum chhan Zozam Weekly a hrilh.

Van lam chanchin hi ngaihnawm a ti a, zanah te hian a thlir vang vang thin. TV-ah pawh National Geographic a en ngun.

Thang van sang hian tunlaiin Mizo zirlaite lung a tileng emaw'n teh reng ni, van boruak lama eizawn tun an thahnem sawt hle. April ni 29 leh 30, 2009-ah khan Millennium Centre chungzawlah Edufest 09 huaihawt a ni a, he kutpui-ah hian hna hrang hrang zingah van sanga thlawh theihna tur lamin zirlaite a hip hle.

Edufest 09-ah hian zirlaite kawng kawhhmuh theitu agency leh zirna in hrang hrang 40 an tel a, zirlaite'n panin, an hna duhzawng zir theih dan tur te an zawt a, anni'n kawng an lo kawhhmuh thin. Pilot nih tumte leh airhostess nih tumte buaipuitute an lun hle a ni.

Academy of Aeronautic Engineering, Bangalore chuan April ni 30-ah ringawt pawh Mizo naupang, commercial pilot nih tum mi 100 vel an chhinchhiah a, an zingah hian hmeichhia pawh an awm nual. Airhostess nih tum mi 80 vel an chhinchhiah bawk. He'ng mite hian Academy of Aeronautic Engineering te hian an buaipui zui dawn a ni.

National Institute of Management Sciences (NIMS) pawh airhostess nih tum te'n an bawr hle. "Airhostess nih chak an tam lutuk, an rawn kal sup sup mai. Sikul naupang hian an chak a ni ang, sikul naupangin min rawn pan sup sup mai," tiin NIMS atanga lo kal pakhat, airhostess nih tuma inzir mek chuan khami tum khan Zozam Weekly a hrilh a ni.

"Kan uniform te hi nalh an tia, bakah airhostess te nun dan, kan lifestyle hian a hip niin ka hria. Airhostess te chu ei leh inah te, incheinaah te, thil hrang hrangah hian 'special' taka enkawl an ni a, chutiang lifestyle chu an duh niin ka hria," a ti bawk.

Pilot leh airhostess nih tumte kawng kawhhmuh theitu dangte pawh an lun a, aeronautical engineering leh aircraft maintenance engineering lam pawh zirlaite hian an bawh viau bawk.

Edufest 08-ah pawh khan hetiang lam hi zirlaite'n an lo ngaihven hle tawh bawk. Edufest 08 hi April ni 29&30, 2008-ah Millenium Centre chungzawlah vek hian neih a lo ni tawh a, chumi tum chuan airhostess leh thlawhna lamin zirlaite a hip hle.

AHA stall chuan Edufest 08-ah hian airhostess nih theih dan hrilhin an pui zui thei tih an puang a, hei hian zirlai a hip hle a ni. Hmeichhia - ft 5.2-a sang chin, pawl 12 pass chin tana thawh theih airhostess hna hi pawl 11& 12 zirlaite'n an bawr a, chutih rual chuan nula puitling, MA zo tawhte paw'n an berawn bawk.

AHA te inkhuarna piah lawkah chuan Edufest 08-ah hian Academy of Aviation Engineering, Bangalore te an inkhuar a, anni pawh hi an lun hle. A nghaktute chuan aircraft maintenance engineering zir chakte'n an bawr hle tih an sawi a, dawrtu hi an beisei aia tam an hmu tih an sawi bawk.

Chutih laiin a zir man a san deuh vangin zirlai thenkhat chuan an zuam lo tih an sawi thung. Kum 3 daih he course zir tur hian Rs 4,40,000 a ngai a ni. Pawl 12 (Science)-a 50% hmu pha chin, physics, chemistry leh mathematics late tan a zir theih a, pawl 11 leh 12 zirlaite'n an rawn nasa tih stall nghaktute chuan an sawi.

HSLC-a tithate hian science an la tlangpui a, HSLC result hnuhnung ber-a (2010) pakhatna atanga sawmna inkara telte pawhin science lak an tum hlawm. Chutih rualin tun hnaia HSLC-a pakhatna atanga sawmna inkara lang phate zingah tun tuma mite hi doctor nih tum an tam ber tum a ni awm e. Tun hnaiah, a khawvel huap pawhin engineering lam a lun hle a, Mizo zirlai zingah pawh engineer nih tum an tam niin a lang. Zozam Weekly-in tun hnai HSLC-a pakhatna atanga sawmna inkara lang Mizo zirlaite a kawm tawhah pawh engineer nih tum an tam zel a, information technology khawvelah hian computer engineer nih a chakawm te pawh a ni mai thei. Medical doctor nih tum hi HSLC-a tithate zingah, Mizo zingah chuan an tam thin a, amaherawhchu, tun hnaiah chuan engineering lama kal tum an tam niin a lang. HSLC result hnuhnung bera pakhatna atanga sawmna inkara lang Mizo zirlai zingah khan kum dang ang lo takin medical doctor nih tum an tam tiin a sawi theih awm e.

HSLC result hnuhnung berah khan pakhatna atanga sawmna inkarah Mizo zirlai 8 an lang a, chu'ng zinga palite chuan doctor nih an tum. Doctor emaw nurse emaw nih tum pakhat a awm bawk a, doctor nih emaw civil service lama kal tum emaw pakhat a awm bawk. Doctor nih tum hrim hrim chu 6 an ni tihna a ni. Pakhatnain astronomer nih a tum a, IAS officer nih tum pakhat a awm. Tum dang ang lo takin engineer nih tum an awm lo!

HSLC-a tithate chawimawi an ni
March ni 8-ah khan MZP te'n Vanapa Hall-ah HSLC result hnuhnung bera titha, Mizo zirlaite an chawimawi a, chawimawina dawngtu naupang 8 zingah 1 chauh sorkar sikul naupang a awm.

Education minister Lalsawta, he huna khuallian chuan HSLC result-ah sorkar sikul aiin private sikulin an titha zawk tih sawiin, "Sorkar hian kan duh angin kan la ti thei lo khawp mai," tiin tan an lak thu leh a hautak thu a sawi a, education secretary, director charge latu K Riachho pawhin sorkar sikul-ah zirlai aia zirtirtu tam zawkna a awm tih sawiin, insiamthat tul a tih thu a sawi.

Chawimawina dawng zingah Mizo High School naupang pakhat a tel ve tih sawiin, ani chauh hi sorkar sikul naupang a ni tih vawi hnih vawi thum a sawi nawn a, Mizoram budget-ah education deptt.-in sum engemaw zat an chang chunga sorkar sikulin private sikul an tluk lo thin chu dik lo a tih thu a sawi a, sorkar sikul zirtirtu 21414 Mizoramah an awm tih sawiin, "Kan mawhphurhna kan tlin tawk loh avangin in fail a, pawi kan ti," a ti.

Sorkar sikul-a mahni fate luhtirtu nu leh pate hi 'a thei chin chuan an fate sorkar sikul atangin an senghawi a, kan tlin ve loh avangin keini hian sorkar sikul-ah kan dah a, an titha pha ve ta si lo' tiin vui ta se chhan ngaihna hriat a har tur thu minister chuan a sawi.

"Tha nia kan hriat chu, dodalna nasa tak karah pawh kan ti dawn," tiin tanlak an tum thu a sawi a, "Kan thawhpuite ngei leh politics-a kan thiante ngei pawhin min kawk dawn a ni; a kawh pawh min kawk tawh mai thei," tiin a chhunzawm a ni.

Khualzahawm, education secretary K Riachho pawhin sorkar sikul dinhmun sawiin, zirtirtu nei lo leh indaih lo sikul an tam laiin naupang aia zirtirtu tam zawkna te pawh a awm niin a sawi a, zirtirtu semrual an tum thu leh a buaithlak dan te sawiin, tunah pawh zirtirtu 1000 chuang, thingtlang atanga Aizawla luh dil an awm tih a sawi. Mi pawimawh tak tak, zahawm tak takin an sawipui thin tih sawiin, "Nawrna nasa tak karah tunah hian kan thawk mek a ni," tiin an hmalakna chungchang a sawi bawk.

MZP president VL Krosshnehzova pawhin sorkar sikul-ah zirtirtu indaih lohna a tam thu leh chu chu private sikul-a lut pha ve lote'n an tawrh thu a sawi a, "Kan zirtirtute an awmna turah an awm tha duh lo hi hahthlak kan ti," a ti. "Hmasawnna hian miretheite fairel bel thleng ve se kan duh," tiin a chhunzawm a ni.

HSLC result hnuhnung bera pakhatna, Benjamin Lalfakmawia chuan mobile phone, TV leh computer te zirlai tibuai khawpa buaipui lo turin a zirlaite a fuih.

Benjamin-a hian thu tawi a sawi a, kum tluana a tan mar pat reng thu sawiin, tlai sikul bakah dar 4 atanga dar 5 vel thlengin home work a ti a, zanriah eikham zan dar 7 atanga dar 10 vel thleng lehkha a zir thin a, zing dar 4:30 velah thovin darkar 3 vel lehkha a zir leh thin tih a sawi. Kar tawp chawlh leh sikul chawlh lai pawhin lehkha a zir char char tih a sawi bawk.

Related Posts :