'World record' leh 'Uang record' chu

Chhun dar 12-ah 'bamboo dance'-a tel turte chu kim tur, vawi thum an kan chhin ang a, dar 2-ah khawvela 'bamboo dance'-a lam tam ber record siam turin an lam tak tak ang.


Uang Record : 'Bamboo Dance'-ah pawh Chatch Them Young policy kalpui a ni a, khawvela 'bamboo dance'-a a khawngtu naupang ber kan nei ta hial mai.

Dar 12 rik hma atangin Cheraw kan-na tur hmunah chuan mipui an tam tawh hle. Dar 12-ah phei chuan Chanmari leh Sikulpuikawn inkarah an intlar put tawh. Lammual-ah phei chuan luh leh chhuah pawh hunphurhawm khawpin mipui an innek luih luih mai.

Uang Record : Khawvela 'Bamboo Dance' kantu tlem ber

Lammual-ah hian bu 156-in an kan a, kawngpui dungah bu 515-in. Kawngpuia kante hi chu bu tin incheina a hrang hret hret a, kamis var hate pawh an awm. Mahse, kamis a ni tih hriat loh theih turin a nghawng an bilh lut. Lammual-ah erawh an incheina a inang vek.

Ke lawnga kawngpuia din chu nula tan chuan a hautak a ni ang, chanchinbu hlui an chuh chul mai. An phah a, lam loh laiin rahchhanah an hmang. Kelawnga lei rah a hautak deuh avang hian mawza bun an phal reng a ni.

Uang Record : Kristianna avangin Mizo mipa te'n hma an sawn zel a, hmeichhe tih theih ang chu an ti thei ve ta zel mai

Veng leh khaw hrang hranga mi an ni a, kum lamah pawh middle school naupangte leh tu mawng beng tawhte an inpawlh nuk mai. Gelead Special School pawh an tel a, tin, Gorkha High School naupangte an tel bawk. Zaithiam lam atangin Zoramchhani, VL Neihthangi leh Melody Zothansangi te an tel. An awmna inhlat mah se music thuhmun remin an lam a, Mizo chhepchher hmanga rimawi tumtu- Chaltlang Lily Veng Drama & Cultural Club te'n lawm an hlawh hle.

Chhun dar 12 pelh hretah Cheraw chu an kan ta a, an tui nghal hle. Mipui pawhin hmuhnawm an ti ngang mai.

Uang Record : Cheraw kan tur nula pawh kan nei ta lo!

Rimawiin a zir a, tin, inau phur tham an ni bawk nen, an tui hle. Bu tin-ah hian puanzar kengtu leh a lo au phurtu tur an awm zel a, anni hian an thawh hlawk hle. Hlim takin, phur takin an kan a, an 'haw haw' hep hep mai. Chutah, a tawp dawn lamah 'haw haw' rin zual hun a awm a, chu chu a 'climax' a ni. Chu chu pui tak a ni.

An thiam tlang a, a tui lah an tui. Chawlh lai pawhin a then chuan an kan tawrh tawrh reng. Chawlh lai hian mipa thenkhat pawhin an kan a, an thiam em em mai lehnghal!

World record siam chungchangah ngaihdan a inang lo; a thenin ropui an ti a, a thenin ropui an ti lo. Mahse, world record siam hi a ropui lo a nih pawhin mi khati zatin a ruala Cheraw an kan kha chu a ropui a, a climax-a an han 'haw haw' phei chu a pui lehzual tiin a sawi theih ang.

Vawi thum tihchhin hnu-ah, chawhnu dar 2-ah Cheraw hi an kan a, minute 7 aia rei hret an lam a ni. Lam hun chhung hi minute 8 tia chhinchhiah a ni. Intihhlimnain a zui a, tlai dar 3-ah world record a nih thu puan a ni ta a ni.

Uang Record : 'Bamboo Dance'-a indaih lo ber.


Sap leh Japanese an awm nual a, India ram hmun hrang hrang atangin chanchinbumi an rawn kal bawk. Hmarchhak chanchinbu lian chin phei chu an kim hial awm e. Tlai lamah internet lamah Mizoramin record a siam thu hmuh tur a tam nghal hle reng a ni.

Uang record : 'Bamboo Dance'-a subsitute bench hmasa ber.

Ngaihdan a inang lo bawk a, titi pawh a siam. World record siam ni-a a deusawhna sms tamzia kha! 'Hetianga world record kan siam hi a ropui a nih chuan chumi khami-ah pawh siam ila' tih hawi zawngin sms an inthawn sup sup a, 'Ke bal kan tam ber ni' tih te, 'chawmhlawm state-in world record kan siam' tih te, sms uang a tam ngang mai. Khami ni kha sms-a thil engemaw deusawhna kan inthawn nasat ber ni pawh a ni mahna!

A ngaisang lo zingah thalai an tam niin a lang. Chanchinbu lama an ngaihsan loh thu chhuahtu zingah pawh thalai an tam tiin a sawi theih. Lecturer pakhat, a hming tarlan rem lo chuan, "Kan nu leh pa te chuan world record han tih hian ropui an ti tlat a, Guinness World Records hi infiamna lama world record te nen a inang tlang emaw an ti tlat a, chuvang chuan ropui an ti niin ka hria," a ti.

"Tlawmngai pawl emaw a phur deuh mi thenkhatin 'bamboo dance' world record siam tum se ka hrethiam, Sorkar meuhin a buaipui kha chu a inhmeh lo a, a zahthlak," tiin chanchinbumi pakhat chuan a sawi.

"Guinness World Records lam pawh a ruk tak chuan an nuih a za ve ngawt ang. State pakhat sorkarin anni thil tih an buaipui chiam mai hi an lawm ang a, an nuih a za thung ang," a ti bawk.

Uang Record : Art & Culture minister a tap.


Mizoramah hian thil ropui tih tur a vang a, ram leh hnam tana theihtawp han chhuahna tur tak tak pawh a awm lo tih he thil hian a lantir tih chu mi thenkhat ngaihdan a ni. Mizoram sorkar leh a mipuite hi Guinness World Record siam tuma theihtawp chhuah tawk vel an lo ni reng te pawh a ni mahna! Aw Mizoram, Lalpan thil ropui tihsak CHERAW se!

Related Posts :