World Record siam tura inpumpekna

¢ Vanlalremruata Tonson

Chhun dar 12-ah chuan ni a sa hle tawh. Mahse, Cheraw kan turte chuan chu kawngpui lum huam huam mai chu ngam siah siah tak an ni. An luah khat tlat a, lirthei pawh a tlan lo, police car, arsi pakhat intar tih chauh lo chu. Police rualin hlauh hmel fein an zui a, an veng a, a chhunga thu pakhat chu a nui deuh thaw mai, a vei lama mi chu a hawi deuh valh valh bawk.

Kawngsira Cheraw kanna tur mau inrem chu car chuan a chil darh a, a hnunga police leh a remtute chuan an khawm tha leh vel a nih kha. Police chu an lo lal awm hle mai.

Guinness Worlds Records-a chuang ve nih chu thil ropui tak a nih kher lo ang. Mahse, khatianga tamin Aizawl khawpui hna thawk thei lo leka tihbuai inhuama Cheraw an han kan tur chuan mipui a ti phawklek a, mahni thiante theuh tawiawm tura kalte avang ringawt pawh khan zahawm awm tak a nih laiin mi pawimawhte lenchhuahna tur chu a pawimawh bik hle ni ngei tur a ni. Cheraw kanna tur mau inremna lamah zel car chu a kal a, a kalna tura mau chu lo khawm sawk sawkin mite chuan lal kawng an lo kian vel a ni.

Chutianga kawng lo ken vel chu inpekna thil pawh a ni lo a, mahse, Guinness World Records-a lang tura Mizoram inpekna khati tak maia zah loh a ni khan mi a thawng ang reng.

Chanmari leh Sikulpuikawn inkarah chuan khami ni khan sumdawnna a kal thei lo a ni ber, eichawp zuarte tih loh chu.

Kawngpui- alkatara ni sain a em lum huamah chuan lam hun nghakin an awm thap a, an lam ta a nih kha. Alkatara thap hruih mai laka an ke veng turin mawza an bun far hlawm a, mawza var bunte chu a hnuai a dum huam a, suk fai leh chi a ni lo. A then chu a pawp hlawm. Paih mai loh chu tih dan tur a awm hmel tawh lo hle. Mawza bun lote pawh ni danga an tuam no hlap an ke chuan a chhiat phah dawn a ni. Mahse, Guinness World Records-ah an tel ve dawn tlat.

Khatiang ni sa hnuaia awm tura mihring khatiang zozai han chhuah dawn chuan 'sun burn' laka invenna tur cosmetics lam pawh a hek duh ngawt ang.

Lammualah chuan kawngpui angin alkatra thap hruih a awm ve lo a, vaivut chhah tak chunga lam tur a ni thung. Mahse, inpekna nasa tak a ngai ve tho. Lam te chauh ni lovin a thlirtute zinga tam tak pawh an hritlang haw ngei ang tih a rin theih. Hritlan ringawt chu a ziaawm, khatiang vaivut khu karah ei leh in insum theih reng a ni dawn si lo a, kawthalo hri a len phah lo nain a risk a sang hle. A hma ni te khan vaivut khu lutuk tur ven nan lammual kha lo chiah huh chu ni se a ziaawm tur.

Guinness World Records-a chuang tur siamnaa tel tan chuan hengte hi chu eng tham a ni lo ang. Mahse, tuipui ve lem si lo chunga lo tuar vetute kha. Chanmari leh Sikulpuikawn inkar kha 'no vehicle zone' a ni mai a; lirthei hmanga eizawngte tan hmun lun lai ber chu thil awmze nei lovah a chang. An tan chuan sorkar hian darkar engemaw zat chhung 'bandh' a puang a ni ber. Sorkar ni lote hian bandh huaihawt dawn se sorkar hi huai taka dodal tur a ni ang em? Nge sorkar thil tih dan apiang chu mipui hian ihe lova zawm mai tur?

Lirthei hmanga sumdawngte loh theih loha an inpekna chu sum chungchang a ni a; nunna leh hriselna chungchanga inpekna mawlh kha a ni world record siam chungchanga hlu chu. Aizawl Civil Hospital-ah lirthei tlan luh ngaihna a awm lo. Mamawh ngawih ngawih tan pawh damdawi in pan tum kha a tina tin chi a ni lo. Hmun danga damdawi in pan hram theite chuan an pan ang a, chu pawh ti thei lo an awm a nih chuan Aizawl khawpui chu an tan chuan damdawi in nei lo ang mai a ni ang. Chuti ni se sorkar thil tih a nih avangin damdawi in kawngpui danchah chu a la dik tho tihna nge ni ang?

Ni sa hnuaia lam tura mamawh chi hrang hrang lamna tur sum, hun leh tha sen ralte chu a lam turte anmahni duh leh chak zawng atana an inpekna a ni a, phurrit a tling kher lo ang. Chu bakah miin a tana phurrit tling tham si lova a sum midangte hman ve tura phur taka a rawn thehchhuahna a ni. Miin lamnaa bun tur secondhand mawza tha vak lo a lei khan a leitu tan a hautak lo a, a zuartu tan chuan a hlu viau si. Mizo incheina phei chu a kal phah bawk a, a tha hle pawh a tih theih ang. Lam zir nana hun an sen pawh, a world record hrim hrima chu thuhran lo ni se, hnam thil atana hun khawhral an ni a, a lawmawmah a la ngaih theih. Chuvangin mipui lam atanga chhuak emaw inpekna emaw reng reng chu a kai rual bawk a, a tha lam zawngin a sawi theih. Inhuam taka ti an nih chuan.

Guinness World Records-a chuanna tura sum senah hian mipui sen nge tam ang sorkar sen a hriat loh. Sorkar sum sen chu a hlawmin a kalchhuak pup pup ang tih a chiang a, tam hmelin a lang hma bawk. A lo dawngtute tan pawh hlawkpui tham fe a nih hmel bik thin. Thil pakhat chauh han sawi ila- official-a video coverage titute khan pawisa hlawh lo chuan an ti miah lo ang tih a chiang.

Thil chhinchhiah tlak tih leh a ber nih te hi thil chakawm a ni tih chu hnial rual a ni lo a, khawlai titi thenkhatah chuan he Cheraw kan runpui leh mau hmanga lamnaa (bamboo dance) tum khata mihring tel tam ber tum hi Guinness World Records-a Mizoram a chuan vena tur chauh ni lovin Mizote record-a Art & Culture department hotute an chuanna tur a nih thu te pawh an sawi thin bawk.

A enga pawh chu ni se Guinness World Records-a chuang tura tha thawhtu zinga tel ve tura sawmna chu sawmna dawng leh chance nei apiangin an aw dual dual mai chu a nih kha. Sorkarin Guinness World Records-a chuang tura Cheraw kan runpui buatsaih tuma vantlang hriata a puan atang khan sawisel tawk chu an awm nghal ngei a; mahse, chu chuan lam tur a hnawt tiau lo. Guinness World Records-a Cheraw kan chu thil chhe tawpkhawk emaw tul lo pawh lo ni tehreng se a lamte hian mawhphurhna an nei lo a, an hriat ber chu world record siam a ni a, chutah chuan an tel ve dawn a ni mai.

Guinness World Records-a lan chu eng tiang taka thil ropui nge a nih sawi thiam a har ang. Mi pawhin chutiang thila lan chu an duh a, sum sengin leh nunna thapin an bei thin. Mahse, Mizoramah hian inzawt thut ila Guinness World Records-a chuang 20 leh an chuan chhan sawi thei hmuh tur an awm ang emaw?

Guinness World Records chu thil ngaihsan hlawh tak, ngaihven hlawh tak tak si lo, mi ang ve nih chak vanga ngaihven tak tak theih pawh ni chiah si lo ni berin a lang. Record siam tura thawkchhuak thenkhat tan chuan Guinness World Records chu an thil hriat hleih theih loh emaw a ni ang a, world record a awm tih chu hre mah se Guinness World Records a nih leh nih loh an hre kher lo mai thei. World record a awm tih hre lo pawh an la awm tho ang.

Thenkhat erawh chuan TV programme-ah te hmuhnawm an tih pawl tak a ni ang a, an thil ngaihsan leh ropui an tih ber pawh a ni thei bawk. Mi chi hrang hrang, dinhmun inang lo tak takte chu world record siam turin an thawkchhuak a; thenkhat tan chuan world record siamtute zinga tel nih a ropui viau laiin thenkhat tan bamboo dance lian ber record chu Cheraw a nih dawn avangin a phurawm viau mai thei.

Mi chi hrang hrang, kawng hrang hranga inpumpekna avangin bamboo dance- tum khata lam an tam berna record chu Cheraw a ni a; kum tin 'bamboo dance'-a tum khata lam tam berna chu Cheraw a ni ziah mai thei. Mahse, Guinness World Records-in an lo record ngai lo a, kuminah chuan sorkarin sum tam tak sengin a record tir ta a ni. Chutah chuan tha thawha lamte chu mahni intum chawp deuh vek an ni a, sum leh pai emaw zawnga sawi dawn chuan hlawkna pakhat mah an nei lo mai ni lovin engkim an 'risk' zawk a ni- dehydration, sun burn, ke durh, a tam ang.

World record siam dawn vanga harsatna tawk leh sumdawnnaa chetchhiat phahte pawhin zangnadawmna an dawng chuang lo. Mahse, sorkar chuan hemi senso atan hian cheng nuai 50 a ruahman a, hman tak tak chu hei aia a tam rin a ni nghe nghe. Chu chu tute emaw chuan an lo hui hiau hiau mai thei thung. Hei lo liama mipuite inpumpekna!

Chulam chu thuhran ni se, Guinness World Records-a chuan tuma state pakhat sorkar meuh a chet takah chuan 'unrecorded breaking' pawh a awm nual hmel asin- Aizawl khawpuia inbual tam ber ni te, tui hman tam ber ni te, etc etc!!

Related Posts :