Monday, March 22, 2010

Lalpan thil ropui tihsak CHERAW se

March ni 13, 2010 tlai dar 3 a ni a, Lammual khat tlata pungkhawm mipuite chuan dawhsan (stage) lam an hawi thap mai.


Dawhsanah chuan art & culture minister PC Zoram Sangliana, art & culture director Boichhingpuii, tourism secretary Sairengpuii leh Guinness World Records hotu pakhat Lucia Sinigagliesi te an intlar thap mai. Chutah Lucia Sinigagliesi chua tawngrinna a'n din hnaih a, 'Vawiinah hian Mizoram chuan, khum leh huphurhawm takin, world record a siam e,' tiin a puang ta a ni. Chuta mipui thawm chu pui tak a ni!

Mizoramin 'bamboo dance'-ah world record a siam tih puan a nih hnu-ah art & culture minister PC Zoram Sangliana chu dawhsan atangin "Lalpa ropui ber rawh se" tiin a au a, mipuiin "Halleluia" tiin an lo zawm a ni.

Mipui thutna chhak lamah banner lian tha tak- 'Halleluia!! Praise the Lord" tih an rawn tar bawk. Chutah police lamin hlado chhamin tlangtlir an rawn ti. Chumi zawhah mipui chu "Lalpan thil ropui min tihsak e..." tiin an zai a, an lam dual dual mai.

Mipui chu an zai tui hle a, art & culture minister phei chu a mittui a tla hial.

"Pathianin kan hnam min hruaina hi ka lawm em a, hetianga world record kan siam thei hi ka lawm em a ni. Lalpan thil ropui min tihsak a ni," a ti.

"Pathianin Mizo hnama min siam avangin ka lawm a, lam mawi tak- Cheraw min pek avangin ka lawm bawk a, chu kan Cheraw chu khawvelin a lo hre ve ta hi ka lawm a ni," a ti bawk.

Governor pawhin ropui a ti a, chief miniater pawhin ropui a ti.

Chief minister Lal Thanhawla lawmthu hi March ni 15-ah I&PR deptt.-in an puangzar a, Mizo thalai te'n art & culture minister PC Zoram Sangliana leh Organising Committee kaihhruaina hnuaia Cheraw kana world record an siam chu ropui a tih thu tarlan a ni.

"Pathian hnena lawmthu sawi ber tur kan ni," a ti a, tunlaiin Mizo thalaite chu thatchhia a tih thu sawi fo mah se world record siam chungchangah erawh a fak a, Chapchar Kut hmanna apiangah kan thalaite chu a timawitu leh tihlawhtlingtu an ni, a ti.

"Kan thalaite talent hi kawng tinrengah cho chhuah tham a awm tih kan hria a, chuvangin, an hamthatna tur leh kawng tinrenga hma an sawn theihna turinkan sorkar hian a phak tawk ang angah chuan hma a la zel dawn a ni," a ti bawk.

Mizoram Governor hlui, union minister pawh lo ni tawh, PR Kyndiah pawhin record siam chungchangah fax hmangin lawmpuina Mizoram sorkar a thawn.

Related Posts :



No comments:

Post a Comment