Val Upa kan mamawh

2008 kum tawpah kan inthlang a, sorkar thar kan nei ta a nih kha.

Chu sorkar kaihhruaina chuan kum khat kan hmang zo ta; a kum hnihna kan hmang mek.

Kan sorkar hrawn mek hnuaiah hian inhnialna leh thu inchuh kan nei ngun malh malh hle. Inhnialin bul kan tan a, kan la chhunzawm ta reng ti hial pawhin sawi ila a dik thei awm e.

Kan sorkar thar hnuaiah hian zu khap chungchangin kan inhnial nghal a, Sairang thlenga rel luhtir chungchangin kan chhunzawm a nih kha.

Builum mipuite harsatnain kan inhnial chhunzawm a, chutah taxi intlan chhawk chungchangah kan inhnial leh. Taxi intlan chhawk chungchanga kan inhnial lai hian Vairengte Police Station chungchangah ngaihdan a hrang leh. Tichuan, taxi intlan chhawk leh Vaireng mipui chungchangah a rualin kan inhnial ta luih luih mai a nih kha. He'ng thil pahnih chungchangah hian kan inhnial rei ang reng fu a, tin, zu chungchanga inhnialna phei chu a nung kum tluan ni hialin a lang.

Tichuan, taxi pute an intlan chhawk a, Vairengte mipui thawm pawh a dai a, kum tawp a lo hnai ta. No Vehicle Zone chungchangah kan inhnial leh ta luih luih a, tin, halpuah chungchangin a rawn zui nghal vat bawk.

Chutiang chuan kum kan hmang liam a, kum thar kan chuangkai ta. Thawm dang a lo ri leh a, 'Bamboo Dance' chungchangah kan inhnial leh ta luai luai mai. 'Bamboo Dance' kan chinfel hma hmain thawm dang a lo rih leh; Zoram Ni chungchang- March ni 5, 1966-a Mizoram-a thil thleng chungchang kha. Kan inhnial leh luih luih mai a nih hi.

Chutianga thil hrang hranga kan inhnial lai chuan NLUP chungchangah kan inhnial deuh reng bawk.

Hetia kan inhnialna hrang hrang hi ngun taka kan chhut chuan, sorkar lam bultan a ni deuh zel. A ni vek kan ti ngam lo a nih paw'n 'a ni deuh zel' ti chuan kan sawi thei ang. Tin, an bultan a nih loh pawhin a vaw 'hot'-tu an ni fo a, kan ram hruaitute thu phuhchhuah chu a boruak tinungtu a ni fo mai.

Engpawhnise, inhnial chu mihring zia a ni a, mi hnam pawh an inhnial ve nasa. Keini pawh, mihring awmkhawm kan ni a, kan inhnial ang chu. Ngaihdan inan thup thup thu a awm hlei nem.

Amaherawhchu, mi hnam chuan inhnial nikhuaah hian, ngaihdan thuhmun loh vanga thu an han inchuh chang te hian thu lai latu an nei thin. Analyst emaw, critic emaw, sawkhaw hruaitu emaw, ram hruaitu emaw, media lam emaw, university emaw, mi langsar lem lo te pawh an ni thei, mipuiin thu an inchuh chang hian thu lai latu, thudik puangtu, mipuite rin hlawh tak an awm thin. Keini pawn kan pi leh pute hun lai chuan chutiang chu kan nei thin. Lal leh khawnbawl upa te, val upa te, pasaltha te. Khawvel thara kan luh hnu hian, ngaihsan tlak kan lo nei ta lo a, chutianga thu lai la thei leh mipuite thudik hrilh thei chu kan nei ta lo a ni mai thei. Chu chu society nghing awm dan te pawh a ni thei.

Kan ram hruaitute pawh hian inti khauh fein an duh dan an kaltlangpui a, an ngaihdan pawm lote chu mawl ti fein, tawngkam mawi lo leh dengkhawng fe fein an bei hrep thin. Ngaihtuah chian chuan kan inrelbawl dan leh khawtlang leh ram-a kan khawsakho dan hi a ho ngawt mai!

Tuna kan inhnialna- 'Bamboo Dance' chungchangah pawh hian thu laitu thei emaw, a chalrem thei emaw an la rawn lang lo, chutiang tur kan nei lo a ni mahna.

Related Posts :