Sonia Mania, Sawhchiar Mania

Sonia Gandhi hian 2003 inthlan dawn khan Mizoram a rawn tlawh a, khatih hunlai kha sorkar laipuia BJP kaihhruai NDA a sawrkar lai a ni. Champhai a tlawh a, chumi hnuah Aizawl sipai lammualah public meeting neih a tum a, phalna pek a ni ta lo a nih kha.

Chumi hnuah Mizoram a lo chuang chhuak leh a, 2008 inthlan dawn hnaiah a lo kal. "Political campaign-a lo kal ka ni lo, Mizoramin harsatna in tawk tih ka hria a, chumi a hmuna en tura lo kal ka ni," tiin Mautam vanga harsatna kan tawh en tura lo kal niin a insawi a ni.

2010 a ni a, Central-ah UPA an sorkar a, Mizoram-ah Congress an sorkar bawk. Chu mai a ni lo, Sonia Gandhi chu India rama hmeichhe thil-ti-thei ber a ni a, khawvel huap pawha hmeichhe thil-ti-thei zinga a sang pawl a ni.

Mizoram a rawn tlawh a, a pasal thi ta Rajiv Gandhi hminga Stadium sak lungphum a rawn phum a ni.

Sonia kha lehlanga lo kal a ni a, Mizoram-ah darkar 2 vel bak a awm hman lo.

Mualpuia Rajiv Gandhi Stadium tur chu a khat mup a, Sonia thlen hma atang tawhin zaithiam zai ngaihthlak tur a awm a, mipui an tam a, khuk lah a khu! Sorkar thuchhuak a awm; kha ni kha inrinni a ni, 'holiday' a ni.

Mahse, sorkar hnathawkte chu Mualpuia Rajiv Gandhi Sports Stadium hawnna a tel tura hriattir an ni.

Chu hriattirna chuan zawm a hlawh lem lo, sorar official liante chu an kal hlawm a, sorkar hnathawk tam zawk an kal lo.

Kal a tul an ti lo a, sorkar thuchhuak chu an bawhchhe mai. Bawhchhiat tur chi thuchhuak pawh a ni mahna!

Sorkar hnathawk pakhat chuan, “A mak em alawm. Sorkar chawlh a ni a, sorkar hnuaia thawk chu kan ni nameuh mai,” tia sawiin, “Mahse, an ti lutuk deuh ni chuan ka hria” a ti.

“Department pakhat hnuaia thil hawn tur hmuhpui leh hriatpui tura sorkar hnathawk zawng zawng huam tir vek kha a ‘over’ thlak,” a ti mauh.

Sorkar hnathawk, a hming tarlan rem lo chuan, “Khatiang kha chu sorkar hian thlen tir tawh lo se a tha ang,” a ti.

“A thu hrimah Congress party kum 125 lawmna nena neih kawp a ni a, sorkar hnathawkte hi party tana thawk kan ni lo, sorkar tana thawk kan ni a. Mipui chu sorkar siam a ni a, party tih vela inham buai phal lo burtu chu sorkar zawk a ni. Conduct rules kan nei vek alawm,” a ti bawk.

“Sonia Gandhi lo kal dawn vanga mipui tam loh hlauhna avang a nih pawhin a hriatthiam theih chuang loh,” a ti.

“Sonia chu MP pakhat a ni a. Union minister pawh a ni lo, MP dang lo kal leh sela, tikhan buai vak vak zel ila a ngaihna a awm lo hrim hrim. Mizoram pawhin Lok Sabha MP kan nei a, sorkar hmalakna hawnna hun an hman apiangin sorkar hnathawk zawng zawng kal vek tur ti zel ila a ngaihna a awm nang,” a ti bawk.

Sonia hmuh atan tun hnai lawka neih tur Bamboo Dance World Record-a show tur 'Cheraw' entir a ni.

Cheraw entir tur pawhin YMA branch hrang hrangte kohkhawm an ni a, Mualpui field sirah Sonia hmuh laiin an lam.

Kha ni kha ni dangdai a ni. 'Sawhchiar fest' a ni hawt a. Vawk 20 lai talh nia sawi a ni a, mipui 4000 vel ei tur ruahman a ni.

Sawhchiar chu police lamin an buatsaih a, mipuiin an ei mup mup bawk. Sawhchiar pir chhan ber chu Congress kum 125 tlin lawmna nge Rajiv Gandhi Stadium hawn lawmna ni zawk? Nge nia CM Lal Thanhawla court case hnehna lawmna sawhchiar zawk?

A enga pawh chu ni se Police rualin ruai an siam mup mup a, sorkar thu leh hla leh thupek chu a ni phawt a, party thil tiha ruaipui an siamsak emaw party-in an hmang emaw a nih chuan dan tlawhchhan an nei em ang chu maw?

Tum khata sawhchiar pir hnem ber tum pawh a ni mai thei a, World record kan uar ta sa sa, tum khata sawhchiar pir world record pawh ni fahmiang!

Sonia erawh a hlim tih a hriat a, a thutna atangin a tho kang fo. Thu a sawi a, a sawi rei lem lo.

Zai ngaihthlak a ni a, zaithiam pahnih Rebecca Saimawii leh Mami Varte an zai a. Sonia lung an dum zo lo!

Rebecca Saimawii’n ‘Made In India’ a sa a, Mizo hla a ni lo, vai hla a ni a, sa thiam leh zawm thiam pawh an awm lo.

Chumi hnuah Mai Varte zai ve lehin, ‘I am alive’ a sa leh daih a, chu pawh sap hla a ni a, Italian nu, Indian-a in-baptist tawh chuan ngaihnawm a ti lem lo tih a hriat.

Lawmna inkhawm a tawp dawn a, mahse, ngai teh, Sonia Gandhi chuan hla ngaihthlak leh a duh. Chief minister Lal Thanhawla meuh hrilhin chief minister chuan Sonia-i'n hla a la ngaihthlak leh duh thu a sawi.

Vai hla a ngaithla duh lo, sap hla a ngaithla duh lo, Mizo hla a ni a ngaihthlak duh ni. Mami Varte chuan ‘Veng dun zel ang’ a sa leh ta a ni.

Sonia puala function neihnaa zai tur thlan kha a fuh lo a ni lo. An hla sak tur enpui a nih leh nih loh hriat a ni lo. Thil chiang tak erawh Sonia Gandhi khan hnam dang hla ai chuan Mizo hla ngei a ni a ngaihthlak duh zawk ni.

Tih lawm tum luat vangin 'Made In India' kan hlui nge, 'I am alive' kan hlui zawk! A enga pawh chu nise ‘Vawng dun zel ang’ khan Sonia Gandhi kha a hneh zawk a ni ngei ang.

Hnam lam an entir a, hmuhnawm a ti a, a tho kang awk awk. Mizo hla an hlui dawn emaw a tih laiin a beisei loh a hmu a, chumi hnuah a beisei Mizo hla a ngen pawh a ni mahna!

Sonia chuan, “Mizorama remna leh muanna a awm theihnana theih tawp chhuahtu Rajiv Gandhi hminga Sports Complex ruahman a ni hi a lawmawm. He state mawi, mipui te, culture leh history hausa takte hi a ngaihsakzia ka hria a ni. A kaihhruaina leh tumruhna vangin Mizo Peace Accord chu kum 24 kal ta khan neih theih a ni a. Lalthanhawla’n remna leh muanna a awm theihnana mahni inphatsana a thawh pawh in hre theuh e,” a ti.

Infiamna chungchang pawh sawiin, "Infiamna hi Mizo thalaite ropui taka an chet theihna a ni. Sports discipline hrang hrang hockey, football, wrestling, boxing leh archery-ah te hming in chher tawh a. He Sports Complex hian ropuina nasa zawk a thlen ka ring a, a bikin sikul naupang te'n he complex hi an hman tangkai ka beisei a. Talent naupan laia hriat hma leh enkawl chuan rah tha a chhuah ngei thin," a ti.

Congress party-in thuneihna an chan avanga lawmthu sawiin, “Mizoram mipuite Assembly leh Parliamentary election-a Congress in sorkar tir avangin lawmthu ka hrilh duh che u a. In mi rinna avangin kan lawm a, tunah chuan sorkar inrelbawlna tha, langtlang leh awmze nei, sorkar in duh ang thlen thei pek che u hi kan tih tur a ni,” a ti bawk.

“Congress sorkar in tichak zual zel a, Village Council inthlanah 80% majority kan nei thei a. Hei hian awmzia a nei hle a, a chhan chu khaw tinah leh chenna hmun tinah mipuite nen min hnuh hnaih tlat vang a ni. Chu’ng hmunahte chuan thalaite hamthatnan te, hmeichhia leh Mizo society-a mi tinreng tan kan thawk thei dawn a ni,” a ti.

“Thutiam kan nei a, chu chu rinhlelhawm ni lo rawh se, tihhlawhtlin kan tum a ni. Agriculture, horticulture, floriculture te hlawk zawka siam a ni emaw zirna leh hriselna tih that a ni emaw, New Land Use Policy kalpui a ni emaw, infrastructure leh connectivity siam a ni emaw, Congress party-in hetah leh central-ah tih tak zetin a hlawhtlin theihnan a thawk dawn a ni,” a ti bawk.

Lal Thanhawla sorkar fakin, “Lal Thanhawla kaihhruai sorkar chuan policies, programmes leh projects tam tak manifesto-a tarlante a kalpui mek. New Land Use Policy mai ni lo, Aizawl khawpui tihhmasawnna tur te, kawngpui tha leh power supply leh tuilakte thlengin kalpui mek a ni,” a ti.

“Chief Minsiter leh a thawhpuite chuan zirna lam siamthat tumin theihtawp an chhuah tih ka hria a. Nikum khan Education Reforms Commission din a ni tih ka hria a. Mizorama medical, engineering leh professional institution a awm theihnan ngenna a awm reng tih ka hria, he thilah hian ka thlawpna in hmu e,” a ti.

Tun hnaia Union Budget pharh takah khan Mizoram tan bik kum nga chhunga hman turin Rs 8,800 crore pek a ni tiin a sawi bawk.

"Mizorama lo kal hi ka tan chuan hun hlimawm a ni reng thin. Mizoram-ah hian Rajivji nen kum engemaw zat kal ta khan kan lo kal tawh a, ka hriatrengnaah hian kha'ng hunte kha a la thar hle reng a ni. Helai hmun ka lo kal apiang hian Mizo mipuite talent neih thatzia leh hun harsaah pawh in thawhrim dan ka hmuhte hian min tilawm a, ka ngaisang thin a, Mizoram state ang hian kan ram hi dinhmun tha-ah a dintir a ni, a ti bawk.

Related Posts :