Monday, March 8, 2010

Thawnthu hlui chu

MNF an indin a, Zoram tan zalenna an sual ta a ni. March ni 1-ah independence puan an tum a, February ni 28 zanlai dar 12 chu chet tan hun, Zero Hour atana bituk a ni. February ni 28 zanah hian Lunglei leh Champhai lamah chuan an ruahman ang ngeiin hna an tan a, Aizawl lamah erawh a tlawlh thung. Aizawla a pamtul chhan hi chiang faka sawi leh ziak a awm lo mai thei, chu'ng te chu "Zofate zinkawngah (Zalenna mei a mit tur a ni lo)" tih, zalenna puan laia MNF defence minister R Zamawia ziakah erawh fiah takin he'ng lai vel chanchin hi hmuh tur a awm.

Pic : Jet fighter-in Aizawl beihnana a hman, Khatlaa mi thenkhat chhar, an dahtha ta a ni. A mawngah 105 MM tih a inziak
"Chuvangin, chumi zana Assam Rifles-ho beih chu ka thulhpui ta a. A nghawng tur pawh a nain a zahthlak hle ang tih pawh ka ring," a ti.

"Nimahsela, mihring nunna hlutzia ngaihtuahin, a lo thlawna insen ai chuan, dawihzep nih pawh tlawma lak theihah ka ngai ta lo mai a ni. Keimah vangin Operation Jeriko - Aizawl bik chu a tlawlh ta a ni," a ti bawk.

Kha beihpui kha Operation Jeriko tih a ni a, Operation Jeriko - Aizawl/Champhai/Lunglei ti tea sawi a ni. Aizawla an tlawlh chhan hi, "Chuvangin," tih hian zawmtu sei tak a nei. A hma chiah sentence chu, "Ka han en vel a, ka han ngaihtuah vang vangin, ralthuam hman thiam leh thiam loh lam chu thu khat ni bawk mah se, a bul atanga thil ruahman dan (Plan and Scheme) zira hrechiang ve tur mi pali panga vel bak chu awma ka hriat loh avangin, chutiang chunga Assam Rifles-ho va luhchilh chu thil tihchiah-ah ka ngaihpui ta lo a ni," tih a ni.

Chumi hma lehah chuan, "...hetiang ringawt chuan mi tam tak kan thi ang a; ka la thei chuang lo a nih phei chuan a pawi thui leh zual dawn..." tih te, "Ani pawh a mangang a ni tih a hriat hle a," tih te a awm nawk mai. An inpeih lo a, hmanhmawh nak-a-laiin a thenin grenade an lo tipuak, a enga mah hmain nunna chan an awm, Mizo High School tlangah Special Force (MNF sipai) an awm emaw an tia, an lo awm lo, a ruka an thil ruahman chu Assam Rifles lamin an lo hria a, an lo inpuahchah, chutiang vel chu a ni. A ziaktuin, "Helai thu ka hriatchhuah chang hi chuan, kum 35 zet hnu lamah pawh, ka rilru a tliak hnawpin ka hre thin," a tih hian hetih lai hun manganthlak dan tur hi a sawifiah mai awm e.

"Rilru a hah kher mai. Hemi zana Assam Rifles-ho lo inralrin thuah hian, a hnu lehlam daiha report kan hmuh danin, khatih hun laia District Council CEM khan Dy Commissioner leh Assam Rifles hotute kha khami zanah khan Telephone-in a lo va bia a. A ngaihthat loh thu hrilhin, fimkhur turin thu a lo va rawn nia hriat a ni. Chu chu thudik a lo nih tak pawhin, a tih loh turah phei zawng ngaihsak chi a ni lem lovang chu," tih ziak a awm a, chhiartute'n an ngaihtuah zui ang tih a rinawm.

Zero Hour an siamfel a, hotu lawkte chauhvin an hre thung. Chu chu a dawn hnaiah puanzar an tum a, puangzar tura an inkokhawm, an hun hman dan hian thaw a ti-ipik hle. Thawnthu ziak thiam takin chhiartute rilru hneh nana thaw-ipik thlak zeta a'n chhep vel ang mai a ni. February ni 28, Pathianni tlaiah Mission Veng Kohhran Sade Sikul Hall-ah an pungkhawm a, chumi zan dar 12 chu an Zero Hour ni mah se an hmanhmawh lem lo.

"Sande Sikul Hall-ah chuan Pathian hnenah inhlanna tawngtai Malsawm Colney-a'n a hmang a, inkhawmna tan a ni a. President chuan thil nih dan leh Zero Hour siam a nih tawh thu chu a puang mai turah ka lo ngai a. Mahse, 'Chet mai a hun tawh lo'm ni?' ti lam zawngin a rawn chhawpchhuak kual ta duah a," a ti.

"Senator Lallianzuala Sailo leh Chief Justice JF Manliana te phei chuan chet mai chu la hun lo an tih thu leh District Council sorkar-na lak hmasak phawt hnua; chutiang lam thil te chu la ngaihtuah leh a that zawkzia tur thu sei ang reng takin an rawn dinpui a. Chutiang ang thu sawina hun a awm tawh lo a, sawi theih pawh a nih tawh loh avangin thian thenkhatte phei chu an chhuaktau a," a ti bawk.

"President berin thil awm dan sawifiahin leh thu pawtchat turin a hamda a hai pawp ngam ta tlat si lo a. Thil tih tur leh enfelpui tur a tam avangin ka hmanhmawh rilru tawh hle a. President-in a hriatthiam theih ngei turin mi hmuh lai ngeiin ka sana chu ka en chhen tawh a. Zan dar 10:00 a ri dawn tak ngialin ka hria a. Midangte pawh ngaichang hlei thei tawh lovin ka ding ta chawt a," tiin a ziaktu hian a sawi.

Chuta a thu sawi, he lehkhabua lang chu hei hi a ni: "Pu President, zaninah hian thu dang ngaihtuah thei dinhmunah kan ding tawh lo. Hei zan dar sawm a ri tep tawh a, tunah hian kan tlangvalte, Mizoram pumah, vai sipai bei turin an Camp hrulah zanlai dar 12:00 nghakin an bawk vek tawh. Chungte chu kohkir leh pawh tum mah ila a theih tawh loh. Kohkir lehna hun leh hmanrua pawh kan nei bawk hek lo. Hetah, Aizawlah lo thulh leh tehreng pawh ni ila, hmun dang zawng zawngah an che tho tho dawn. Chu chu tun hi kan inhrilhna hun ni mai tura ka lo ngaih laiin, thil sawt tawh chuang lo tur, thu eng engemaw kan sawi kual ta duah hlawm a. Hei darkar kan chhiar mek laiin kan hun ruat a liam mai dawn," tih a ni. "President-in, 'Chu chu a dik, thu dang nei thei kan ni tawh lo,' a rawn tih tak hram avangin kan tho nghal ta thawt hlawm a," tia zawm a ni. Chu chu Operation Jeriko-in a zui.

Related Posts :



No comments:

Post a Comment