Zawlkhawpui senmei chan ni theihnghilh lo ang u

¢ Lalthlamuana Ralte

IAF (Indian Airforce) indo thlawhnate'n Aizawl leh Mizoram khaw thenkhat an beih hnu lawk, April 1966-ah khan Assam Assembly House-ah Cherrapunji bialtu MLA Stanley DD Nichols Roy chuan Mizoram buai thu sawi chhuakin, sorkar chet dan na takin a sawisel a, "Heti em ema nasaa sipai chakna hmanga helna tihreh tum hi thil hlauhawm tawp a ni," a ti.

Hei hian helna tireh tura Assam leh India sorkar chet dan rapthlakzia a tarlang a, khatih laia hun thim tak tawng mektu Mizo mipuite'n an hriat lohin thlavang hauhtu kan lo nei reng kha a lawmawm tak zet a, thuneitute'n an thu leh hla barah khawn lo mah se Mizote tan chuan Assam MLA thenkhatte kha chu an lo hlu ngawt mai.

Rambuai tirh te-a Mizoram rawn tlawhtu Stanley DD Nichols Roy, MLA chuan hleihluak taka sipai leh ralthuam hman a nih avanga a dem thu a sawichhuak a, March ni 5 leh ni 6-ah Air force te'n bomb an thlak a, puakrang (machine gun) hmanga an kah chiam thu te a sawi bawk. Hetihlai pawh hian Air Force-hoin Aizawl leh khaw thenkhat beihna atana an hman kha bomb a nih leh nih loh chungchangah inhnialna a awm.

Assam Pradesh Congress Committee president, Assam Chief Minister ni bawk thusawi chhang letin Mizoram dinhmun mit ngeia hmutu Nichols Roy, MLA chuan, Assembly House-ah ti hian a sawi a, "Ka pu, chief minister khan bomb hman a ni lo tiin a sawi a. Thlawhna an hman kha chu indo thlawhna ngei a ni. Chu'ng thlawhna atanga thil an thlak te chu a puak a, thil a tichhia a, he ram leh hnam tana mi rinawm tak takte'n an thih phah a, an thil neih hlu tak takte an chan phah bawk asin. Aizawl beihnaa sipai chakna hleihluak taka hmana Air Force hial rawih mai hi a uchuak mah mah ka ti. Tunge khua leh tui rinmawm ni-a tunge rinawm lo, tunge MNF ni-a tunge Mizo Union tan, tunge Mizo District-a rorel lai party mi tih inthliar hran theih loh vangin maw. Heng zawng zawng ai hian hleihluak taka Air Force chet dan leh bomb an thlak hi a rapthlak. Bomb ngei a ni kan tih hi keini chuan kan hmu a, a fiahna pawh kan nei, chu'ng chu sipaiin Mizo District-ah hian an hmang a ni." Mi tam takin in leh lo leh an thil hlu tak tak bakah nunna hial an chan phah lai a sawi nep tumtute chu he Kristian politician fel tak, Aizawla YMCA rawn dintu ni bawk hian na takin a sawisel a ni.

IAF-in Aizawla bomb a thlak tum hian in a kang nasa hle a, bomb mai duh tawk loin hniam takah thlawkin machine gun an kap zawih zawih bawk a. Mizo Union hruaitu Ch. Saprawnga chuan a lehkhabu "Ka Zin Kawng"-ah heti hian a ziak: "Tahrik ni 5 (March 5,1966) zing dar 10 velah chuan thlawhna chak ber chi a vir lut ta a, a duh lai lai a rawn kap ta chiam mai a. In tam fe a kap alh a. Khatla dawr phei pawh a kang ral vek a, hmun tam takah bomb an thlak bawk a....khawpui laili leh hausa lai ber chu a kang ta mup mup mai a. Concrete in pahnih/pathum tih loh chu a kang ral vek a ni. A tuk chawlhni zing dar 7-ah chuan thlawhna pali an lo thlawk leh a, Aizawl khaw chhung an duh lai lai an kap a, an bomb bawk a. Duh tawk an ngah hnuah an thlawk haw ta a. An thawm ri a reh fel ta tihah chuan thlawhna chi dang pali an lo thleng ve leh a, duh tawkin an han bei ve leh a, chumi an liam chauh a, thlawhna chi dang pali an lo thlawk leh a, duh tawk bawkin an bei leh a, chutiangin mihring pawh dimdawi miah loin an han bei leh si a, a mak hle a ni."

Aizawla chengte tan himna a awm lo a, an darh chum chum a, khawpui chhung kang ut thual mai chuan lung a tichhe hle a ni. Indopui pahnihna laia German indo thlawhnaten Warsaw khawpuia bomb an thlak chiam a, in chim chhe rem rum leh kang ut thual kara mipui mangan zia an hrilhfak pawh kha hemi tuma Aizawla chengte chan nen hian khaikhin tham a tling awm e.

Ch. Saprawnga chuan March ni 8-a an tlanchiatna hmun Durtlang atanga Aizawla an kal thu heti hian a ziak: "Dawrpui phei biak in piah lam zawng zawng chu a lo kang fai deuh vek a. Pu Buangthanga leh Pu Lalhmingthanga leh Pu Liantluanga te concrete building chauh a lo ding a. Ni sa em em hnuaiah meikhu kara Dawrpui phei kang vap dum huam mai han hmuh chuan thinlung a zing chuai mai a. Khawvel thil engmah hian hlutna a nei tawh lo," tiin.

Chaltuahkhuma, ex-MDC pawhin "History of Mizoram" tih lehkhabuah Aizawl bomb chungchang ti hian a ziak a: "...fighter-in Aizawl a rawn bei chiam mai a, Bara Bazar leh Khatla Bazar te chu a kap alh ta hluah hluah mai a, Aizawl mipui nunau chu thingtlang khaw lamah an tlanchhe chhuak ta hum hum mai a, tichuan a ram buai chuan an buai chu a ni tan ta," tiin.

Aizawl bakah hian IAF hian Hnahlan, Sangau leh Khawzawl pawh an bei. Helna tireh tura sipai an lo chhuak kha thil awm lo a ni lo, a nih dan tur zawk a ni. Mahse, hel leh hel lo thliar hrang lova pawisawi lote nena vaihma veka ralthuam an chelek mai kha thil rapthlak tawp a tling a, hmanlai hun mihring mawl laia thleng awm tak kan ramah a thleng hi a vanduaithlak tak zet a ni. |henkhatin thil kal tawh hriat reng tul lo tiin, 'ngaidam ila, i theihnghilh ang u' an ti thin. A duh chuan ngaidam se, a duh chuan theihnghilh mai se. Mizo hnam aia tute emaw ngai pawimawh zawk tan chuan Mizo mipui tawrhna rapthlak tak hi theihnghilh a har lo mai thei, mahse hnam dang aia Mizo hnam hmangaihtu leh dah pawimawh thin tan chuan Mizoram tana hun thim ber intanna March ni 5,1966-a indo thlawhna hmanga Aizawla chengte beih chungchang hi theihnghilh chi rual a ni lo.

Rambuai tirh laia Assam leh India sorkar chet dan kha tunlai hun hi chu ni se khawvelin a dem ngei ang. Mipui tawrh dan han en khan human rights bawhchhiatna rapthlak ber pawl a tling a, mahse, kha tawrhna chungchang khawvel hriata puangzar tur leh thlavang hautu awm ta lo chu mipuiin an sepui ruah tuar ngawt ngawt mai a ni. Buai tirh laia rawn tlawhtu Shillong bialtu MLA Hoover Hynniewta chuan Mizoram buai chungchang Assam Assembly House-a an sawiho tumin tihian a sawi: "Mi tam tak dik lo taka man an ni a, an mannaah chuan Defence of India Rules hman a ni em, tih ka zawt a, 'Hman a nih loh' thu min hrilh...He House hi thil pawi tak hrilh duh ka nei, chu chu Mizo Hills a venghimtu sipai (security forces) awm te hi tithlabartu (Insecurity forces) an ni zawk...chu chu sorkar laipui policy a ni a, state sorkar policy pawh a ni. Home Minister (G.L. Nanda) khan "Nuai chimit rawh u" (Crush them) tiin a lo sawi tawh...home minister-in armed forces ho hnenah MNF-ho nuai chimit tura a ti a nih chuan a awm. Mahse...kan hmuh angin 'Nuai chimit rawh u' tih policy (the crush them policy) chu sipaihoin tha takin an zawm a, MNF ni loin Mizo Hills-a cheng pawisawi lo leh chhantu nei lo India khua leh tuite chungah an thlentir ta a ni," tiin.

History theihnghilh tura inzirtir hi finvar lohna chi khat a ni mai thei, hnam dangin an ching lo khawp mai. Chuvangin, March ni 5 hi he hnam hian hre reng se, he ni-ah hian 1966-a thil rapthlak tak lo thleng kha hrechhuak leh thin ila, hnam rilru pu thar leh ila, kan tawrhna atang khan rilru thar puin i tho chhuak leh ang u.

Related Posts :