Ram hruaitute leh mipui

Khatia Monica Lewinsky laka a pasal a'n uire kha, Bill Clinton-a nupui Hillary Clinton khan na a ti khawp a, a lehkhabu - "Living History"-ah pawh hemi chungchang hi a ziak uar hle; "As his wife, I wanted to wring Bill's neck," ti hialin a ziak a nih kha.

"A nupui ka nihna atanga ka ngaihtuah chuan Bill-a ring kha thuai nawk mai ka duh," tihna a ni awm e.

Mahse, chu thu chu tiang hian a zawm a; "But he was not only my husband, he was also my President," tiin.

Amah uiresantu a pasal chu thuai nawk mai a duh a, mahse, "Mahse, ka pasal mai a ni lo, ka President pawh a ni si a," a ti ta a ni. Ram hruaitu a zahzia leh a rinzia hi!

Chu chu USA-a mipuiin ram hruaitute an en dan a ni. Bush-a'n Iraq run a tum lai khan a ram mipui tam takin an khatia chet kha an duh lo a, an duh loh thu pawh an aupui nasa. Mahse, Bush-a thutlukna pawm lotute khan Bush-a kha an hmusit lo a, mawl pawh an ti chuang lo niin a lang. Eng tianga nasa paw'n a thutlukna an pawm lohzia aupui mah se a tawpah chuan Bush-a kha "ka president a ni" an ti thei tho tih a lang zel ti ila, zaah za chu a dik lo ang, mahse, a tlangpuia lak chuan chutiang chu an dinhmun a ni.

Chutiang chu ram dang dinhmun pawh a ni a, an hruaitute an zahin an ring ngam hle. Chutih rual chuan an hruaitute hi rintlak leh ngaihsan tlak ni lo se chutin an ring tawk ngawt lo ang tih pawh a chiang.

Mizoramah pawh mahni ram hruaitute zah tura inhrilhna lam chhiar tur leh ngaihthlak tur kan nei nual a, hetiang lam hi kan uar viau nghe nghe. A thahnemngai zual phei chuan fiamthu thawh nana ram hruaitute hman thlengin an pawm lo a, chutiang chu ram hruaitu zah lohnaah an ngai hial.

Ram hruaitute'na zah an hlawhna ram hi en ila, chutiang a ni thung lo. US ngei pawh khu fiamthu thawh nana mahni ram hruaitute hmang nasa an ni a, a thu chauh ni lo a cartoon zawng thlengin an hruaitute an sawisa nasa hle a nih khu. Chutianga tite chuan an ram hruaitute an zah a, keini- ram hruaitute fiamthu thawh nana hman pawh phal mang lo ramah hian ram hruaitute'n zah an hlawh lo fe zawk. "Ka thenawmpa mai a ni lo, ka minister pawh a ni," tih te chu kan hlat viauvin a rinawm.

Dik chiah chuan, ram hruaitute fiamthu thawh nana hman remti lo society mah ni ila, kan ram hruaitute hi TV-a an rawn lan hian kan nuih a za tlangpui tiin a sawi theih ang. Tuman fiamthu lo thawh lo mah se kan lo nui ringawt zel tiin sawi ila kan sawi sual tampui lo ang.

Chuti a nih chuan Mizo mipuite hi kan la hniam hle tihna em ni ang? Ni lo, chutiang ngawt a ni bik lo ang, kan ram hruaitu hi zah tlakin an awm lo tihna a ni ang. US mipuite khuan an hruaitute khu, zah tlak an ni lul lo chung chungin an zah der hram hram a ni lo, zah tlak an nih avangin an zah tak tak a, an zah mai ni lovin zui tlakah an ngai a ni. An sum leh pai pawh an kawltir ngam hial ang tih tur khawp a ni!

Kan ramah erawh chutiang a ni lo, hawihhawm chhuahin kan inzah der hram hram a, mipui hmaah pawh 'Pu chumi khami zahawm tak' tih hram hram a ngai thin. Mipui nawlpuiin kan zui lo a, anmahni zuitute pawh hi sum leh therhlo beisei vanga zuitu an ni ber mai thei.

Vawiina thalaite hian chief minister pahnih an hria, Pu Hawla leh Pu Zorama. An ngaisangin kan hria em? An zah em? Zui tlakah an ngai em? Ngaihsan hlawh lo ram hruaitu an awm chuan 'morality' a nghawng ang a, tumah hi kan inring tak tak lo ang a, kan chhe ngawt ang.

Related Posts :