Lo hal hun a tawp, mi 7 kanghlum

Mizoram sorkarin lo hal hun atana a ruat chu March 10, 2010 khan a tawp ta. Lo, leipui, huan hal leh a kaihhnawihah hriat theih chinah mi 7 an kanghlum tawh.

Aizawl-a Fire & Emergency Service te pawh 2010 chhung hian ram kang, hnawmhnawk paihna kang leh in bul hnai huan kang thelhin vawi 50 dawn an thawkchhuak tawh.

Mizoram sorkar chuan February thla chhunga lo hal vek tur tiin thupek a chhuah a, February ni 3-a Fire Prevention Week a hawnnaah chief minister Lal Thanhawla chuan hetianga thu an tihtlukna chhan chu, Zoram hmun hrang hrangah lo vah hun inrual thin lo mah se a tlangpuia lakin February thla chhung ngei hian lo leh leipui hal tur nei zawng zawngte chuan hal vek hman se, chu chuan thal khawro lutuk avanga kangmei chhuah palh a ven theih zawk beisei vang niin a sawi.

Sorkar thupek hi sawiseltu an awm nual a, March ni 15 thleng tala sawn tura ngena thuchhuah siam te pawh an awm.

Lengpui leh a chhehvel khuate phei chu a dar nen lama bituk sak an ni a, thlawhna thlawkchhuak leh tum tibuai lo turin, February ni 25 tlai dar 3 hmaa lo hal vek tura tih an ni. Mahse, February ni 25-ah hian ruah a sur ta si a, an lo hal pawh a nan mit ta a nih kha.

February ni 25-a ruah a sur avang hian lo hal chu thil theih loh tluk a lo ni ta a, sorkar pawhin March ni 10 thleng hun a pawtsei ta a ni.

March ni 10 chu a liam ta a, loneitute pawhin a theih ang angin lo an hal. Mahse, nunna chan an awm nual a, mahni hnathawhna hmuna hetia an thi hi a vanduai thlak mai ni lovin a rapthlak ti hial pawhin a sawi theih ang.

Kumina lo hal leh ram kang vanga vanduaina tawk, nunna chante hi hriat theih chinah mi 7 an ni.

February ni 7-ah khan Saiha Council Veng thlanmualbul ram kangah helai bul hnaia huan enkawla awm, K Chala (60) chu a kanghlum a, a ni hi kumin chhunga hetiang thila nunna chan hmasa ber nia hriat a ni.

February ni 23-ah Lunglei leh Haulawng inkar Zotuitlang khuaa ram kang tur veng mi pathum chu meiin manin an zinga mi Vanmalsawma (15) chuan hliam na tak a tuar a, hemi tum hian thi an awm lo hlauh.

February ni 27 khan Bawlte khuaa mi, Darmawii (43) chu a leipui halna bulah thi-a chhar a ni. A taksa a kang nasa hle.

March 2-ah khan Lunglei Luangmual-a 2nd Bn MAP awmna bulah Zachuaii (67) chu a leipui halnaah meiin a man a, a tukah Lunglei Civil Hospital-ah a hliam tuar loin a thi.

March ni 9-ah Lungpho khuaa mi, Hualkhuma (69) chu a lo halnaah na takin a kang a, Aizawl Civil Hospital panpui a nih laiin a hliam tuar loin a thi.

March ni 10-ah Theiriat, Lunglei-ah khawtlang intiam rualin lo an hal a, lo halnaa kal unau pahnih- Lalbiaknunga (45) leh Lalrinchhana (30), Kapthanga (L) fate chu an vau sirah an ruang kang chhe tak hmuh a ni.

March ni 8 (Thawhtanni) atangin Kawnpui ram a kang a, kar khat chuang a kang hial. Kang thelhnaa inhliam pakhat chu March ni 13 (Inrinni) zanah a hliam tuar lovin Presbyterian Hospital, Durtlang-ah a thi.

Ram kang hian zau 15 vel a tuam hman a, chenna in thenkhat pawh a man kai hman a ni.

HT Lalremtluanga (52), Tlanzauva (L) fapa, Kawnpui Vengthar-a mi chu an chenna in thlang kang an venna lamah mei hian a man a, Kawnpui PHC-ah hruai nghal niin, doctor a awm loh avangin Presbyterian Hospital panpui a ni a, Inrinni zan dar 8 vel khan a hliam tuar loin a thi ta a ni. A taksa pum pui zaa 90 vel a kang nia hriat a ni.

Chenna in a man tur hi an veng a, mei hi a chak ta hle a, midang chu an insaseng a, ani hi a upa deuh tawh nen, a insaseng ve hman ta lo nia sawi a ni.

Ramkang hian Kawnpui ram hmun thuma thena hmun hnih vel chu a tuam hman nia hriat a ni.

Related Posts :