Monday, March 22, 2010

I-League-ah Mizo Tan Chanchin Lawmawm

¢ Hmingsanga

I-League season pawh a hmawr bawk a hnai ta. Chanchin ngaihnawm hriat tur a tam a, result mak deuh deuh hriat tur a awm.

Chak zawk tura rinte an chak lo a, chak lo zawk tura ngaihte an chak lawi si. Tunlaia I-League chanchina ngaihnawm tak pakhat chu Shillong Lajong leh Sporting Club de Goa te inkhelh tumin Lajong player Zohmingliana Ralte chu man of the match atan thlan a ni hi a ni.

I-League khelh tirh lam khan Mama (S Malsawmtluanga) chu Man of the Match atan thlan a lo ni tawh a, Tuaitea pawhin Mohun Bagan-a a khelh laiin hetiang chawimawina hi a lo dawng ve tawh bawk. Tun hnaiah Zotea chu hi Man of the Match atana thlan a ni leh ta hi a lawmawm hle.

Ramhlun South tlangval Zohmingliana Ralte hi Mohun Bagan Football Academy atanga inzirchhuak a ni. Chumi hnuah Mizoramah rawn chuangchhuakin, Mizoram Police-ah te a'n khel ve ren rawn hman a. Shillong club Arhima-ah a khel leh a, chumi hnuah Shillong Lajong hi a zawm ta a ni.

Mizo footballer hmun danga khelte hi a tlangpuiin midfielder emaw an ni deuh zel a, tun hnaiah defender leh goalkeeper te pawh kan nei ve ta nual. Chu'ng zingah chuan Zotea hi defender tha leh rintlak tak a ni ta a ni.

Shillong Lajong-a khel, inhliam vanga khel tam lo Rohminga pawh a hliam te a dam ta bawk a, tunah chuan first XI-ah a awm deuh chawt tawh a, hman ni deuh khan Shillong Lajong hian East Bengal an hneh a, hemi tum hian Samson Ramengmawia chu captain a ni nghe nghe.

Lawma leh Thuama pawh an khel reular ta hle a, tunlaiah chuan an chakna leh an innghahna an ni ta zel hi thil lawmawm tak a ni.

JCT-a khel, Lalchhuanmawia pawh tunlai hian a khel ngun ve ta hle a, Mohun Bagan-a khel Lalramluaha pawh I-League-ah a khel tam lo mah se Kolkata league-ah chuan an player hman rim ber pawl a ni leh ta.

East Bengal-ah Beikhokhei leh Beirona te an regular viau. Ni dang ang bawkin Churchill Brothers-ah Robert-a la regular zel a, Fela leh Didika pawh an khel ve deuh reng e.

Mama chu Chirag United-ah a khel hnem a, Tuaitea te an reh deuh a, Pune FC-ah Jeje a khel nual a, Rozama erawh chuti takin a khel tam lo.

Mizo footballer state pawna khelte chanchin lawmawm lam hriat tur a tam a, a lawmawm hle.

Related Posts :



No comments:

Post a Comment