Hnam Chhantu an pung

Tawng tuallengah chuan 'Zo' tih chu 'thing' tihna. Duhlian tawng thiam loh hi Mizoramah a zahthlak loh a, sap tawng thiam loh erawh thil zahthlak a ni. Vai tawng thiam chakna pawh a pung chak hle. Vanapa aiin 'Vandemataram' a lar a, Ropuiliani hre lovin lehkhathiam a nih theih laiin Rani Lakhsmibai hre lo chuan engmah a nih theih loh hial ang. 'Zo' hian chhan a ngai reng a, tun hnaiah erawh 'Zo' chhantu hi an pung niin a lang.

Mizo kutchhuak leh Mizo thil hrang hrangin hlut a hlawh sawt hle a, hetiang lam buaipuitute pawh an lawm hle.

"Mizo kutchhuak kan ngaisang sawt hle a, heti lamah hian hma kan sawn khawp mai, chu chu exhibition kan neih tawhte atanga chhut hian huai takin ka sawi ngam," tiin Hnam Chhantu Pawl hotupa Ramhmangaiha chuan a sawi.

March ni 15-ah khan Vanapa Hall bathlarah Hnam Chhantu Pawl huaihawt- Traditional Festival chu State Planning Board vice chairman Lalkhama'n a hawng a, mipuiin an hlut hle. Khumbeu, Mizo puan, pangpar, ipte chei, Mizo thilsiam hrang hrang phochhuah a ni a, a hawn ni-ah hian tlawhtu an thahnem nghal hle a ni.

Hnam Chhantu Pawl hian 1994 atang khan Mizo kutchhuak chawisan tumin an lo bei tawh a, an thil tawn atanga chhutin, tun hnaiah mipuiin Mizo kutchhuak an hlut hle tih an hotupa chuan a sawi ngam a, thalaiin an ngaihlu hle tiin a sawi.

"Eizawnna te a lo har a, sorkar hna beisei chi a ni tawh lo ti hialin a sawi theih ang. Chuvang chuan thalaiin hetiang lam hi eizawnnan pawh a hman theih ang tih ringin an bawh ta a ni. Tin, Mizo kutchhuak ngaihsanna hi tun hnaiah a lian hrim hrim a, 'Zo' kan buaipui sawt hle, kan thalai te'n 'Zo' hi an buaipui a, mahni hnam kutchhuak leh culture ngaihsanna chang kan hre sawt hle a ni," a ti.

"Mahni kutchhuak leh mahni hnam thil kan ngaihlu sawt hle tih hi ka chiang khawp mai. A bikin thalaite'n Mizo thil ngaihhlutna chang tun hnaiah an hre thar a, hei hi eng tik atanga intan nge chu ka hre lo, mahse, engemaw lai atang khan kan thalaite hian Mizo thil an ngaisang a ni. 'Zo' tuipui an pung a ni ber a, chu chu mahni hnam incheina leh culture ngaihhlutnaah te a lo lang a ni," a ti bawk.

"Sawi thiam pawh a har a, 'Zo' hi tun hnaiah a piang hrim hrim a, hnam 'wave' a awm, kan harh thar," tiin Hnam Chhantu Pawl president R Ramhmangaiha chuan Zozam Weekly a hrilh.

"Mipui kan harh sawt khawp mai," a ti a, chutih laiin, "Sorkar erawh an harh har khawp mai," a ti thung.

MNF sorkar lai khan foreign atangin Mizo kutchhuak hrang hrang thawn turin cheng vaibelchhe 1 chuang man order an hmu a, mahse, an pawlin an tlin loh avangin sorkar an bel a, sorkarin a lo pui thei lo niin a sawi.

Congress sorkarah pawh hetiang lama an beihnaah an la hlawhchham tih a sawi bawk.

Hnam Chhantu Pawl hian hmunphiah an buaipui a, ram pawna an thawnchhuah tawhte chuan hlut a hlawh thin hle. NLUP hnuaiah hmunphiah hi khung ve turin an ngen a, an ngenna chu tihhlawhtlin a ni ta lo a ni.

Mizo kutchhuak chawilar tuma an beih tauh tauhnaah a la inchhir ngai lo tih sawiin Hnam Chhantu Pawl president chuan, a mang erawh a ang reng tih a sawi.

"Mizo thil leh Mizo kutchhuak hi hnam dangin an duh tih kan chiang si a, engmah kan ti thei tak tak si lo. Sorkar chhut harh a har bawk si a, chuvang chuan ka mangang reng," a ti.

1986 atanga Mizo puan tah tawh- CT Handloom and Handicraft neitunu pawhin tun hnaiah Mizo incheinain ngaihhlut a hlawh hle tih Zozam Weekly a hrilh.

"A chhan han sawi fak tur chu ka hre lo a, mahse, Mizo incheina hian hlut a hlawh sawt khawp mai, tun hnaiah hian mipuiin an hlut a, thalaite hian an ngaihlu sawt khawp mai," a ti.

"Puan kan tah tirh lam, 1986 leh 1990 inkarah te kha chuan hlut a hlawh lo. Mipui hian an hlut deuh deuh a, tun hnaiah hian an hlut zual," a ti bawk.

Mizo incheina leh Mizo puante hi hnam dangin mawi an ti a, an lei loh pawhin hmuhnawm an ti thei hle niin a sawi.

Ani hi rambuai laia puan tah tawh a ni a, hnam dang pawh Mizo puan a tahsak hnem tawh hle. Vai miliante hian Mizo puan hi mawi an ti thei hle niin a sawi a ni.

Thil chhinchhiah tlak ang reng deuh mai chu nula leh tlangvalin Mizo thilsiam ngei ngaihzawng te pek an ching hi a ni awm e. Mizo puanchei hmanga cheimawi ipte te, Mizo siam pangpar khawina te, key-chain te leh thil dang dang an inpe thin. Tunlaia an uar ber chu Mizo siam mombati hi a ni mai thei.

Mombati hi chi hrang hrang a awm a, a lian leh a te bakah a zum pet chi te, a bial deuh kerh chi te, tin, a rawng lamah pawh rawng chi hrang hrang a awm a, hrui mawi hmanga cheimawi te pawh a awm. Hetiang hi nula leh tlangval inngaizawngin an in-present nasa hle a, a siamtute pawhin thalaiin an lei nasat thu an sawi.

Related Posts :