Damdawi In Tukverh Chu

Pa pahnih natna khirh tak vei hi damdawi in pindan pakhatah an awm dun a. Pakhat zawk chu a chuap a tui tling an siak reng avangin chawhnu lamah darkar khat chhung khuma a thut chhuah an phalsak a. Chu pa chu tukverh bula mu a ni a. Pakhat zawk erawh chu tho chhuak thei ziazang a ni lo a, a taksa a chak loh em avangin khumah a mu reng thung. An pahnih chuan rei tak tak chhung an titi dun thin a, an nupui fanaute chanchin bakah, an inchhung khur chanchin te, an hnathawh thin te, sipaia an tan lai chanchin te, chawlh an hman thin dan te an inhrilh a, hlim takin an inkawm thin a.

Tlai lam a lo nih chuan khum bula mu zawk chu a tho a, a khuma thu chungin tukverh a hawng a, pawn lam chu a thlir a, a thil hmuh te chu khuma bawksawp reng a thianpa chu a hrilh mawlh mawlh thin a. Khuma mu zawk pawh chuan chu darkar khat chhung chu nuam ti takin a lo hmang ve a, an pindan pawn lam khawvel mawi taka thil thleng te chuan a nun ngui tak chu a tiharh ve sawng sawng thin a ni.

Tukverh atang chuan huan mawi tak mai leh chuta dil awm chu chiang takin a lang thei a. Chu dilah chuan varak leh vatawkte chu nuam ti takin an cheng a, naupang hoin lawng lem te an khalh a, hlim takin an infiam a. A bul vel a pangpar mawi tak tak, rawng chi hrang hranga par karah chuan nula tlangval inngaizawngte pawh inkai chungin, insi rialin an leng vel a. Chu hmun atang chuan khawpui chhunga inchhawng sang tak takte pawh a hmuh theih nghe nghe bawk. Chu'ng thilte chu chipchiar taka a hrilh mawlh mawlh lai chuan damlo pakhat zawk chuan a lo ngaithla dauh dauh a, a maimitchhing a, an pindan pawn lam khawvelah chuan suangtuahnain a lo cheng ve thin a ni.

Tlai khat chu khua a lum hle a, tukverh bula thu chuan sipai lam a hmuh thu a thianpa chu a hrilh a. Khuma mu zawk chuan an pen thawm leh an rimawi te chu a hre pha ve lo na a, a thianpa sawi apiang chu a lo suangtuah a, a mitthla chuan sipai rual rimawi rema mawi taka pen thup thup chu chiang takin a lo hmu ve tho a ni.

Hun leh ni a liam zel a. Tuk khat chu, an inbualna tur tui khaisak tura lo lut nurse chuan tukverh bula mu zawk chu a va en chiang a, a lo thi reng tawh mai a. Zanah a mutthilh laiin hahdam takin a chatthla a lo ni a. Hrehawm a ti hle a, damdawi ina thawkte a pun a, a ruang chu an la chhuak ta a.

Damlo pakhat zawk khuma mu reng chuan inthlahrung ang reng takin nurse hnenah chuan a thianpa mutna tukverh bulah chuan insawn a dil a. Nurse pawh chuan an pahnih inkawmngeih zia leh a dinhmun tur a hriatthiampui em avangin a phalsak a, a hnem mawlh mawlh a, a chhuahsan ta a.

Amah chauha chu pindan khawhar taka a awm hnu chuan a inngaihtuah a, harsa tak chungin a khuma a kiu nghatin a inbeng kang a. Pawnlam khawvel chanchin hrilhtu a neih tawh dawn loh avangin amah ngei chuan hmuh ve a tum a, na ti tak chungin a bei hram hram a, rei fe hnuah chuan a inlet thei ta a. Tukverh atang chuan phur em emin pawn lam chu a han thlir a. Mahse, a hmaah chuan bang sang tak mai a lo awm a, engmah a hmuh theih reng reng loh mai chu niin.

Nurse hnenah chuan a thianpa thi ta khan eng vanga tukverh a hawi chhuah apianga thil hlimawm tak tak a hmuh thu hrilh ziah nge a nih a, chutianga sawi tur chuan engin nge mawlh ang le, tiin a lo zawt chawt mai a. Nurse chuan dam thlapa chhangin a thianpa kha mitdel a nih thu leh chu bang pawh chu a hmuh ngai reng reng loh tur thu a hrilh a. "I rilru ngui tur tihharh thin kha a duh em alawm," a ti ta a. n

(The Hospital Window tih lehlin a ni, a ziaktu hriat loh - Lalthlamuana Ralte)

Related Posts :