Loneitute mangang authawm

¢ PB Lalrammawia

February ni 25, 2010 tlai lam dar 3 vel khan Aizawl leh a chhehvelah ruah a sur chiam a, Aizawl district bawrhsapin thupek a chhuah anga hemi ni tlai dar 3 hnu lama lo hal tura thupek dawngtu Lengpui Airport chheh vel khuaa loneitu thenkhat chuan sorkar thupek angin tlai lam dar 3-ah lo an hal a, mahse ruahsurin lo hal tam tak a nan hman avangin lo hal a kang zo hman lo a, loneitute an hrilhhai hle a ni.

Lo hal khuin thlawhtheihna thlawk tur a tihbuai hlauhthawn vanga Lengpui Airport leh a chhehvel khuaa loneitute tana Mizoram sorkarin lo hal hun a bituk chu loneitute chuan an ngaithiam lo tih an sawi.

Lo hal hun bituk chungchangah Lengte khuaa thingtlang loneitu pakhat chuan sorkar ruahmanna chu mak a tih thu a sawi a, "Sorkar thupek a ni miau a, kan hlau a, kan zawm lo ngam si lo a. Ruah a sur hma khan khua a dur a, ruah a sur hman kan hlauh avangin tlai lam dar 3 rik hma deuhvin kan hal a, a kang zo hman awrh a ni," a ti.

Lengte khuaah hian chhungkaw 125 vel an awm a, thingtlang lo neia eizawngtu chu chhungkaw 100 vel an nih thu VCP Pu Ramhluna chuan a sawi. Ruah sur ni February ni 25-a lo hal hman pathum zinga pakhat chu ruahsur avangin a kang zo hman lo niin a sawi a; loneitu dangte chuan tlai dar thum an nghah avangin lo hi an hal hman lo a ni.

"Sorkarin lo hal hun min bituksak ang hian tha takin lo hi hal hman pawh ni ila, thenkhat chuan lo an vah tlai avangin chap a ro tha hman dawn lo a, lo a kang tha hman dawn lo hrim hrim," tiin Lengte khaw pa Pu Lalngaihawma chuan a sawi.

"Lo hal hun tur hi hre hma thei ila chuan lo pawh kan vat hma ve thei. Kum dang aia lo hal hun hi tih hma a nih tur thu inhrilh lawk si lova lo hal hun bituk ringawt hi kan ngai thiam lo. Loneitute hi sorkar hian min rawn bawk hek lo, min hmusit hle a ni," a ti.

Lo hal hunah tha takin lo hi hal hman pawh ni se, buh tuh hun chu April thla chawhma lam a nih daih avangin buh tuh hmain hlo vawi hnih thlawh a ngai dawn niin loneitute chuan an sawi.

"Lo hal hun leh buhchi thlak hun a kar a zau lutuk chuan lei a char vek hman dawn a, buh a to tha thei chuang lo ang. Hetianga kan kal chuan 'tam hruai' a ni ringawt," tiin Lengte khaw pa chuan hemi chungchang hi a sawi a ni.

"Lo hal khuin thlawhtheihna thlawk a tibuai ang tih kan hlau a nih chuan Lengpui Airport chhehvela khuate eizawnna hi min her danglamsak a ngai tihna a ni," Lengte pa pakhat chuan a ti.

"NLUP hmang pawh hian hma lak theih nghal a ni ang," a ti bawk.

Lengte khuaah hian NLUP dawng tur chhungkaw 30 an awm niin thudawn chuan a sawi.

Lengte khaw bul Nghalchawm VCP C Vanlalrova chuan, "Hetianga thil a awm dawn a nih chuan sorkar hian lo nei lova eizawnna min ngaihtuahsak hi a ngai tihna a ni," a ti.

Nghalchawm khuaah hian chhungkaw 97 an awm a, ruahsur ni khan lo an hal hman lo.

"Mizo lo neih dan a awm a, Ramtuk thlaa lo min haltir hi chu loneitute min ngaihnepzia a lang hle a ni," Lengte khaw pa pakhat chuan a ti.

"Keini chuan sorkar thu a nih avangin kan zawm lo thei si lo. A darkar bi nen lam lo hal hun hi bituk lo se chuan khami ni khan khua kan en ang a, ni sat vanglai tak chawhma dar 10-12 inkar khan lo kan hal ang a, kan hal zo hman vek ang," a ti bawk.

Sorkar thuchhuahin Lengpui Airport-a thlawhna tum tur te'n harsatna an tawh loh theih nana lo hal hun ruahman a nih thu tarlan a nih chungchangah loneitu pakhat chuan, "Mipui tam zawk tawrhna aia thlawhnaa zin mite an ngai pawimawh zawk hi a mak kan ti a; lo hal hun ni hnih khat chhungte chu thlawhna thlawh hun tidanglam ve mai se, cancel te pawh cancel ve mai ang hmiang," a ti a ni.

Lengpui khua leh a chhehvela loneitu tam tak chuan sorkar ruahmanna chu mak an tih thu an sawi hlawm a, lo neih dan hrechiang bertu loneitute thurawn la mumal lova sorkarin ruahmanna a siam chu tha an tih loh thu an sawi bawk a ni.

Sorkar thupek ang chuan Lengpui, Sihhmui, Sakawrtuichhun, Tanhril, Sairang, Sairang Dinthar, Phunchawng leh Rangvamuala loneitute'n February ni 24,25&26 tlai dar 3-ah lo an hal tur a ni, tih a ni.

Ruah a sur tak avangin nimin February ni 26 khan lo hal chhunzawm theih a ni lo. Chap nghah ro chhung hi chawlhkar hnih tal a ngaih dawn avangin March ni 15 hma chuan lo hi hal ngam a nih loh tur thu an sawi. Chu chu kum danga lo hal hun pangngai niin an sawi bawk.

Lengpui khuaa lo haltu tam zawk chuan ruahsurin an lo hal a tibuai niin an sawi. Chhungkaw 400 ve ve awmna Rangvamual leh Phunchawngah chuan lo neia eizawng an awm meuh lo a, chhungkaw 20 vel chuan lo an vat ve niin khawtlang hruaitute chuan an sawi.

Related Posts :