Tanpuina ngaihven hman lova thawkrim

¢ Vanlalremruata Tonson

Tum khat chu tanpuina chu an dawng ngei a, mahse, khatiang tanpuina dawng tura buai ai chuan rim tak thawh an thlang zawk a ni. Cheng sing sarih vel a ni a, a dawng tur hian eng eng emaw tihfel tur a awm teuh mai a, dik taka sawi chuan an ti thiam lo niin alu leh balhla zai lepa kan ro lar tak Jemim Chips siamtute nupa Remthangpuia leh Vankungi te chuan an sawi. An hmuh ve tum chuan industry department -a thawkte chu belh bul berah an nei a, a hmuh pawh chu an hmu ngei a ni. Mahse, a hnuah chuan khatiang thil hmu tura hun khawhral a, office va dawr chu hlawk an ti ta lo thung.

Mi tute emaw tan chuan Central Transport Subsidy (CTS) hi hausakna bul a ni ang a, in leh lo ropui tak tak an din theihna chhan ber pawh a ni ang. "CTS te chu a dik taka lak dawn chuan a peih awm loh," ti tawkte awmin industry lama tui vengva deuh tan chuan sorkar industrial policy hian awmzia pawh nei viau thin mah se Jemim Chips siamtute nupa tan chuan eng mah a lem chuang lo. Chutiang tanpuina an awm thei tih an hriat vangin 'chip industry' hi an tan a ni lo a, a thlawna sum tam tak dawn theihna turin an siamchhuah aia tam siamchhuakah pawh an inchhiar hek lo. Mahse, an thil siam tam zawk chu state pawn lam atanga an lakluh chu a ni ve tho.

Bul an tan dan chu mawlmang tak a ni. A senso tur emaw a sum lakluh dan tur emaw chet chhiat pawha sorkar atanga tanpuina hmuh tho dan tur emaw hre sain eng mah an ti lo. "In ngaihsan loh zawng tak pawh a ni thei a, mahse, bul kan tan dan chu a ni ve miau si a," tia inngaitlawm leh inthlahrung hmel takin Vankungi chuan 'chip' siama bul an tan dan a sawi nghe nghe.

Kum 10 vel liam ta khan a ni a, an thiante nupa chuan Aizawla khawsak chu tlin tawh lova inhriain thingtlang lamah hna thawk tura let leh mai an tum a ni. Vankungi chuan a ngaingam ta ngang lo a, an thiante nen chuan inhmukhawmin thingtlanga haw tumte nupa ei zawnna tur dila tawngtai a rawt a; an han tawngtai hnuah chuan tun hma lama a lo ngaihven em em thin 'chip' siam chu a lang ta tlat mai a ni. Tichuan, an thiante ei zawnna tur chuan bul an han tan chhin ta a.

"Tun hmain Bangalore-ah ka awm thin a, chutih lai chuan ka dil chhut hian 'chips' an siam dan hi ka ngaihven em em mai a," tiin Vankungi chuan a sawi. Bangalore-ah chuan balhla 'chip' an siam thin a, Aizawlah erawh chuan balhla siam tur a awm ve loh avang leh remchang zawk dawna an hriat avangin alu 'chip' siamin bul an tan a ni.

Pawisa tlemte an nei a, chumi hmang chuan alu leiin chip chuan siam a ni. Vawiina an siam chu an hralh zo nghal a, a tuka an siam pawh an hralh zo leh bawk. An siam ang ang chu an hralh zo ve zel a ni. Siamchhuah pawh an siam chhuak tam ve hret hret thei a, mahse, Vankungi thawhchhuah loh ni chuan thil a kaltluang thei lo. A kan pawh a fuh tawk thei thin lo. Chuvangin Vankungi-te nupa tan pawh thil dang han tih vak hman a ni ta lo a, 'chip' siamah chuan hun pum law lawin an inpe ta a ni.

Pathian malsawmna an dawng a, ni khatah darkar 24 thawh ngaih chang a tam mai. Zanah Remthangpuia'n a thawk ngat ngat a, dar 12 bawr velah Vankungi a lo tho ang a, Remthangpuia chu a mu ve phawt ang. Chhunah an thawk dun leh ngat ngat dawn a ni. Chutianga an beih hnuah chuan hnathawk turin midang pawh an ruai ve thei a, darkar 24 chhunga chawlh awm miah loha hna thawhna hmun chu an ni tawh bik lo. Vankungi chuan darkar khat chhungin alu bag khat hi a vel zo hman a ni ber a, khawl hranpa tehchiam an nei lo. Vai rama alu vel leh zai lep nana nuhoin an hman thin pangngai kha an zuk chah teuh a, chutiang hmang chuan engkim an ti vek mai a ni. Khawl tehchiam pawh a awm lo, an zai lep hnuah tel-in an kang.

Hna thawktu chu tupawh ni rawh se, a felin a fel lo a ni thei a, ani berin a thawh duh chhung chuan an thawh tir ang a, hlawh pawh midang an pek ang tho pek turah an ngai a ni. Ei zawnna turin Pathianin 'chip' siam a pe a, midangte ei zawnna tur pawh a pek ve tho an ring. Chutiang bawkin Vankungi ang em em a alu vel chak tur chuan tumah an beisei hek lo. Mahse, Vankungi pawh a alu vel nasat lutuk avangin a kutphah khing hnih hian a hriatna thazam chu a chhe vek tawh a, eng mah hre tawh lo ang a ni, a hit ringawt.

Chhinga Veng leh Saron Veng inrina lai vel mi kawmkara luhthlak deuh ket ngaiah chuan an hna thawktute nen miin 'chip' zawrh tur an nei lo ang tih hlauin thahnem ngai em emin hna an thawk a, anni, an hna thawktute leh chip zuartuten eizawnna an neih chuan an lawmna tawk a tling em em a ni. Alu man hi a danglam fo a, a chang chuan 'chip' an siam hian an chawi belh hial thin. Chutiang hunah pawh alu man a tlakhniam hunah an hloh zawng zawng hmuh leh theih an inbeisei a, hna an chawlhsan ngai lo va, an thil siam man pawh an ti to ngai hek lo.

Ni khatah eng zah nge an siam chhuah sawi harsa an ti a, mahse, vai siam anga a funna chhah a ni loh avangin an siam zawh hnuah hian ei lohva dah rei chi a ni lo. "A zuar chhawngtute pawhin ni hnih khat chhunga an hralh zawh vek zel a ngai a; eng emaw ti zawng tak chuan a 'fresh' lo thei lo," tiin Remthangpuia chuan a sawi. Nipui laite hian an hralh tha deuh niin Remthangpuia te nupa chuan an sawi a, "Miin cold drink an in nasat lai hian hralh a kal ber," tiin Vankungi chuan a sawi.

Eng emaw ti lai atang khan alu 'chip' ringawt ti tawh lovin balhla chip pawh an siam a, "Thingtlanga balhla chingtuten hralhna tur an hmu ta hi kan lawmna tawk a tling ve a," tiin Remthangpuia chuan, "Aman an rawn chhiar pawh hi dawn hniam kan tum ngai lo," a ti.

An thiante nupa erawh chu nikum khan an pa ber a awm ta lo bawk an tawp ta mai a, Jemim Chips erawh chu a kal zel a ni. Remthangpuia kha a tir lamah chuan volunteer-a missionary-a chhuak a ni a, Bhutan leh vai ram hmun hrang hrangah a awm kual thin. Chutianga a awm vel lai chuan Champhaia ramthim vei pawl chuan an va chhar a, mamawh zualpui leina tur hlawh pein an ruai a; Vankungi chu chu pawlah chuan secretary thin a ni. Bangalore-a BD a zir laiin an ei zawnna atana Pathianin a pek a ni ang tih ngaihtuah pha miah lovin 'chip' siam dan a lo ngaihven em em thin a, a hmunahte a kal fo. Kum eng emaw zah vel a liam leh meuh chuan amah, a pasal leh an fate tan chauh ni loin midangte tan pawh eizawnna a lo tling hle tih a hre thiam ta a ni.

An rin angin Pathian pek pawh chu lo ni lo tehreng pawh ni se an hna thawh danah chuan hlawhchham theihna thil chi hrang hrang karah pawh hlawhtling awm tak zawng an ni. Hmanlaia kawla ni chhuak chhiara an feh a, zan mut hun thlenga awl lai nei mang reng reng loa hna an thawk nunphunga kha anmahniah chuan a bet tlat a, tawngkam thiama sum sawi chhuak tura hun sen ai chuan thawh tur a ni tih an hriat chu an thawk mial mial zawk a ni. Chu nunphung chu Jemim Chips hi a hmuh theihna awmchhun a ni hial tawh ang a, thangthar chuan hna hi thawh tur a ni tih chu an hria a, chu an hriatah chuan a tlem thei ang ber thawh a, a tam thei ang ber sawi chhuah chu thil nih dan turah ngaih a ni deuh fur tawh a, industry tih intarna tam tak chu 'dawt base consultancy service' tihna emaw a ni mai awm an nih laiin industry dintute tana sawi chhuaktu nih chu hnaa ngaih ni pawhin a lang leh meuh si lo.

Related Posts :