Manual siam loh vangin information dil a ngaih phah

¢ PB Lalrammawia

Sorkar office hrang hrangin an hnathawh dan tarlanna Manual chu mipui hmuh theih turin an dah tur a nih laiin office tam takin an zawm lo a, harsa taka information dil a ngaih phah niin chief information commissioner chuan a sawi.

"Manual siam hi sorkar duty a ni na chungin department leh organisation tam tak hian an la siam lo a, Section 4 an la zawm lo tihna a ni. Manual-ah engkim dah a, mi tin hmuh theih tura dah tur a ni a, hei hi an tih loh avanga infomation dil ngai mai a ni," Robert Hrangdawla, CIC chuan a ti.

"Dil leh hranpa ngai lovin mipui hriat duh a awm tur a ni a, hei hi Section 4, sub section 2-ah a inziak a ni. Hei hi official tam takin an la man lo," a ti bawk.

"Kan fundatmental right a nih miau avangin, sorkarin a hnathawh dante chikimin manual anga siam turin sec 4-in a bituk a. Manual siamte pawh hian kum 2006-2007 vel khan an siam a, a khat tawka up-date reng tur a nih laiin tun thlenga up-date an awm tak kan hre lo. Manual an siam kha mipuiin an hmuh theih turin an dah tur a ni a, an publish ang a, an semchhuak (disseminate) tur a ni," tia sawiin Robert Hrangdawla chuan, "Manual publish ta pawh hi ka la hre lo a, disseminate phei chu a la hla hle," a ti.

"Tunah hian office 107 chuan manual hi an siam a, Raj Bhavan leh High Court chuan an la siam lo a. Assembly leh GAD manual chu a tha hle, mahse an up-date-na erawh kan la hmu lo," a ti.

"RTI hi fundamental right a ni a, right to freedom of expression hmanga information nei thei kan ni... A kengkawhtu erawh sorkar a ni," a ti bawk.

Right to Information (RTI) hi mipuiin an ngaihven vak lo nia a hriat thu CIC chuan a sawi a, hemi chungchangah hian 2007 January thla khan a hmahruai nan SPIO leh department appealate authority-te sawipui an tum laiin sorkar lamin an remti lo tih Robert Hrangdawla chuan a sawi a, "Tun thlengin SPIO hi an nihna hmun te an tih dan tur te hrilh lovin kan la awm phah a, a pawi ka ti hle a, hei hi mipuiin an tawrh phah dawn a ni," a ti.

RTI Act hmangin sorkar hnathawkte pawhin an ACR an en thei tih sawiin, "Hei hi khap a ni lo. Kan thanlenpui danah chuan ACR hi confidential niin kan sawi thin a, RTI-in a khap lo," a ti.

RTI Act amend a la nih loh thu a sawi a, "Sorkar lamin amend an duh a, notesheet te lak phal loh ni se tiin rawtna a awm a, Delhi lamah chuan NGO lamin an do nasa hle a ni," a ti.

Mizoram State Information Commission chu court ang deuh, quasi judicial body, developmental hna thawk ni lova, court anga hnathawk a nih thu a sawi a, "Officer emaw min ti thin a, officer kan ni lo a, contstitutional authority ringawt kan ni," a ti.

"Commission-a thuneihna zawng zawng commisioner-in a kengkawh vek a, information commissioner te hi chu a puitu mai an ni. Semi Govt office kan tih ang hi a ni a, state chhunga awm a ni lo, mipui leh state sorkar inkar thu inchuh a awm a, dan anga reltu mai a ni," a ti bawk.

Hetih lai hian information commissioner-te chu Delhi-a Supreme Court Judge te hlawh leh terms and conditions ang zawmtu an nih thu Hrangdawla chuan a sawi a, "Mizoramah chuan Supreme Court Judge te hlawh leh terms and conditions tawmpuitu awmchhun chu CIC hi a ni," a ti.

Protocol facilities pawh Supreme Court judge-te terms and conditions ang tho a ni a, an retired hnu-ah pawh airport leh function-a an kalin escort chu police kut a la ni," a ti.

January ni 29-a chanchinbumite a kawmnaah Robert Hrangdawl chuan chanchinbumite zawhna chhangin, tun hnaiah staff pali lakna tur order tihchhuahah buaina a awm lo niin a sawi.

Chanchinbumite zawhna chhangin, "MSIC hi autonomous body a ni a, hna laknaah DP&AR kaltlang a ngai lo a, a mamawh ang a ti mai, heta inrawlh (interfere) thin hian a buai thin a, inrawlh loh a tha," a ti bawk.

Kum thum leh thla sarih chhunga case 59 an khawih chungchangah chief information commissioner chuan state dang nen khaikhin chuan a beitham hle niin a sawi a, "Maharasthra state-ah chuan kum khat chhungin case nuai khat chuang a lut thin a, Mizorama kum thum leh thla sarih chhunga case lo lut zat ang hi chu kan ni khat hna vel a ni ang," a ti bawk.

"Information Commission hnen rawn thleng tur hian kawng hnih a awm a, miin commission-a duh a neiha a hmuh theih lohvin a complain thei a. Kan hnen lo thleng regular tura kan ngaih zawk, SPIO hnena information dil a, an lo pek duh loh, first appeal-a kala chuta an pek duh loh final order atan kan hnena lokal hi kan nei tlem a, hetiang ang second appeal hi 14 an awm a, complain hi 45 a rawn thleng. Case zawng zawng kan zo fai vek a, case pakhatmah nei lovin commission ka chhuahsan dawn a, central commission tiamin 100% case zo chu Mizoram chiah hi a nih ka ring," Robert Hrangdawla chuan a ti.

Commission chu Union Territory te reuh te ang a nih thu sawiin, "Autonomous body a ni a, kan day today affair-ah state sorkar a inrawlh lo tur a ni a, Mizoram sorkar chu a inrawlh lo reng a ni. Mahse officer thenkhat rilru-ah 'budget kan pe alawm, kan control ang chu' tihna rilru a awm ni awm tak a ni a, a takah kan finance deptt-in chutiang an ti ngai chuang lo a. Public tana Constitution hmanga body din a nih avangin public fund hmang lo thei a ni lo. Sorkarin budget a siamte pawh hi eng dang a ni lo a, mipuite pawisa a ni a, mipuiin kan insem hum hum thei lo a, mipui sum enkawltu tur Trustee kan neih a ngai a, chu chu sorkar hi a ni," a ti bawk.

Chanchinbumite zawhna chhangin CIC chuan Assembly-ah report pakhat an lay tawh niin a sawi a. "Kum tin prepare tur a ni a, pakhat chiah kan la lay a, a dang kan la peih hman lo, nil report han pek lah chu sorkar a hmingchhe lutuk ang tih kan hlau ve tho si a," a ti.

Assembly House-a RTI Act-in a huam loh turte lay a nih chungchanga chanchinbumite zawhna chhangin Robert-a chuan, RTI Act anga an thuneihna a thunun (curb) thu sawiin, "Mahse sorkar chuan khatiang tih theihna power kha a nei tlat si a ni. Sec 24 kan en chuan khatianga notify theihna kha state sorkarin a nei a, tul an tih chuan an notify mai ang a, an notify ho kha chu RTI Act-in a huam lo mai dawn a ni. Corruption chungchangah emaw inpuhmawhna a awm chuan RTI Act a hman theih tho," a ti.

February ni 2, 2010 atanga a hna a chawlhsan tur chungchangah a aiawh tur chu Selection Committee kuta awm a nih thu a sawi a, "Charge inhlan dan a awm lo a, CIC Post hi a ruak lo tura ngaih a ni. CIC awm loh chhung chuan complaint leh appeal an dawng thei chauh ang a, order siam theih a ni lovang," a ti.

"CIC ni turin qualification a awm lo tih a sawi a, "Eminent person tih a ni mai a, Delhi-ah chuan press mite pawh an hmang a, Nagaland-ah chuan Pastor te pawh an hmang a ni," a ti bawk.

Robert Hrangdawla hi February ni 1-ah pension-in a chhuak a ni. He thu buatsaih lai hi chuan a thlaktu tur hriat a ni lo.

Related Posts :