Ka pu, tui chu min pe rawh

"Tui kan harsa rei tawh lutuk, Krismas lai paw'n kan nghei tawh a, vawiin thlengin kan la nghei. Chhungkaw khawsak a buai vek!" tiin nu pakhat chu a ang tan tan a, chutia a sawi lai chuan an in ral lehlama chengte tuizem erawh a liam huau huau thung.

"Sawtiang saw a nia, keini kan haw loh rei tawh em em laiin anni saw chu an haw huau huau reng a, Krismas lai pawh khan kan va chawi thin nghe nghe. A awmzia pawh ka hre lo e," nu chuan a ti a, tui hi an harsa kum tluan niin a sawi.

Chutih lai chuan PHE deptt-a thawk, Tlawng atanga Aizawla tui pump chhoh hna thawktu a lo thleng a, "Tui kan pump tha, kan tluang khawp mai," a rawn ti ve thung.

"A pump hi chu kan pump tha a, Tuikhuahtlang hi kan thlen hnem khawp mai. Mahse, keini chan hi chu a pump thlen chauh hi a nia, a bak kan hre lo," a ti.

Chu chu tun hnaia Aizawl veng pakhata thil thleng a ni.

PHE deptt.-in Tlawng atangin Dihmunzawl-ah Aizawl chawmna tur tui an pump chho a, chu chu Tuikhuahtlangah pump thleng lehin, Tuikhuahtlang atang chuan hmun hrang hrangah an sem ta thin. Chu chu sorkarin Aizawla chengte hnena tui a sem dan a ni.

Sorkar chuan kum tluanin tui sem hna thawk mah se tui a harsa reng tho. Aizawl chu tui harsatna hmun a ni a, 'khawpui tuihal' tia vuah hial tlak a ni.

Tlawng atanga Tuikhuahtlanga tui pump thlen hna thawkte erawh chuan tui an pump tha tih an sawi a, Tlawng-ah tui tlem hret hret mah se tun dinhmunah tui pump tur a awm reng tho tih an sawi bawk.

Tui hi electric motor leh diesel khawl hmangin an pump a, Greater Aizawl Water Supply Scheme Phase-I hnuaiah darkar khatah tui litre nuai 2.5 zel pump-in, ni khatah darkar 20 chuang an pump deuh zel niin a thawkte chuan an sawi. Greater Aizawl Water Supply Scheme Phase-II hnuaiah darkar khatah tui litre nuai 5 zel an pump a, ni khatah darkar 20 vel zel an pump thin niin an sawi.

Tui pump zat leh an pump hun chhung atanga chhut hian, a tlangpuia lakin ni khatah Tuikhuahtlanga tuikhuahah hian PHE deptt. hian tui litre maktaduai 16 vel an pump thleng thin tiin a chhut theih.

An chhinchhiah dan chuan, ni 5 chhungin darkar 112 te an pump a, ni 5-ah chuan darkar 120 a awm a, darkar 120-ah darkar 112 chhung an pump a nih chuan an pump tha hle tih a hriat theih.

Politics-a sawi hlawh tak, Greater Aizawl Water Supply Scheme Phase-II thawhnaa sum tichingpena inpuhna hi tak tak lo ni ta se, ruahman danin Phase-II hi ni khatah tui maktaduai 36 pump thleng theia puitlin pawh ni se a pump-na tur electric power-in a daih chuang lo ang. Tunah hian department lam chuan theihtawp chhuahin tui an pump a, an thawk tha hle tiin a sawi theih ang. Tuna tui an pump zat hi Aizawla mihring cheng zat atanga chhutin heti em ema tui hi harsa tur niin a lang lo tlat a ni.

"VIP an tam lutuk hi tui harsat chhan pakhat chu a ni," tiin tui sem pakhat chuan a sawi a, "Tui hi sem tur kan nei lo a ni lo, VIP an tam hian min tibuai a ni," tiin a thianpa chuan a lo sawi ve bawk.

Tui sem dang pakhat chuan, "Kan tui sem dan hi a inkhairual lo a, hei hi a buaithlak lai chu a ni. Veng pakhatah tui pe ila, veng thenawmah a haw thei lo a. A nih loh pawhin veng pakhatah rau rau pawh a haw that bikna leh haw that lohna a awm zel a," tiin tui sem chungchang a sawi.

"Veng tinah hian 'chu mite an haw laiin kan haw thei lo' ti hi an tam em em zel a, chhungkaw tin hi minute 45 zel tui pe ta ila, a then an haw pur pur ang a, a then an haw thei lo ang. Chutiang chuan vanneih vanga tui ngah leh vanduai vanga tui nei lo kha hmun tinah an awm ta a. Chu chu tihluih a ni lo a, vanneih leh vanduai thil mai a ni. Chutah VIP an lo awm leh a, tiang chuan tui hi inkhairual lo takin kan sem a, kan tui neih hi inkhairual taka sem ni ta se tun anga tui harsatna kan sawi reng hi a ni miah lo ang," tui sem pakhat chuan a ti.

Veng thenkhatah chuan zana tui haw ringawt a awm thin a, hetiang hi 'tui kawng bo" tite pawhin an sawi thin. Tui kawngbo dawngtute chuan an dawn theih dan an hre mai bik lo a, lo dah khawl tum erawh chuan an buai hle thin.

PHE chu Public Health Engineering tihna a ni a, mipui hriselna atana a 'engineering' zawnga thawk tur an ni tihna a ni awm e. Mizoramah chuan mipuite hnena tui sem hi he department-in hriat a hlawh dan ber a ni. Lui atangin khuaah tui an pump thleng a, an pump thlen dan hi a 'engineering' khawp mai. An sem dan erawh a 'engineering' lo hle tiin a sawi theih ang. Chu chu heti taka Aizawla tui a harsat chhan pawh hi niin a lang.

Vai ramah chuan hmun zawlah an cheng a, hmun zawlah pipe hmang thovin mipui hnenah hnianghnar takin tui an pe thei. Tui chu chhuk zawnga luang thin a ni a, zawlah an luan tir a nih chuan chu chu science thil, a 'engineering' lai chu a ni. Mizoramah chuan tlang chhip-ah tuikhuah a awm a, chuta tang chuan chhuk zawkin tui an sem ta a, chhung tinin an dawng inkhairual lo ta em em a ni ber mai. Hmun zawla semtute'n inkhairual taka chhung tin an pek theih chuan tlangramah pawh a theih ve tur a ni. Chu chu a 'engineering' lai pawh a ni.

Aizawl hian tui a tlachham a ni lo a, a sem dan a mumal tawk loh vangin mi engemaw zatin tui an harsa thin zawk a ni. Tuna an pump thlen zat chiah hi mumal takin, rualkhai takin sem sela tui neih loh vanga buaina hi a fel duak ngei ang.

Related Posts :