Naute Lem Leh Rose Par

Dawr pakhat ka thlen dawn laichuan a nghaktu nuin mipa naupang hnena, "A pawi ka ti hle mai, i pawisa hian he naute lem leina hi a daih lo tlat mai," tih paha pawisa a pe kir lai chu ka va hmu a. Chu naupang te lah chuan pitar hnenah chuan a ngaihna hriat loh hmel takin, "A-pi, ka pawisa hian a daih lo tak tak maw?" a la ti hehaw mai a. Mak a tih hmel ang reng hle a.

Chu pitar chuan tih vak ngaihna a hre lo tih a hmelah a lang a, awki san chuang loin, "Bawiha, i pawisa neih hian he naute lem leina hi a daih lo alawm, i hriat vek kha," tiin a chhang leh a. Lo kal sawn lo tur leh minute 5 chhung lo nghak tura a hrilh hnu chuan naupang chu a kalsan ta a.

Chu mipa naupang chuan naute lem chu a keng, a dinna ngaiah chuan ngawi rengin a ding a. A bulah chuan ka va kal a, chu naute lem chu tunge pek a tum tih ka zawt a. "He naute lem hi ka nau (farnu)in a duh ber a ni a, Krismas dawnah Mas-putarin a pek ngei a ring a."

Kei chuan, "Chuti chu i leisak a ngaih dawn loh chu, nakinah Mas-putar chuan a pe mai dawn alawm," tiin ka chhang a. Chu thu ka han sawi chuan a hmel lan dan chu a danglam nghal a, ngui takin a kun ta lap mai a.

"Chutiang a ni lo, tuna a awmnaah hi chuan Mas-putar in a pe thei dawn lo alawm. A-nu hnenah ka thawn ang a, chuan ka nau hnena a kal hunah a pe mai ang."

A thu sawi laia a mitmengah chuan a lungngaih hmel hle hian ka hria a. A sawi zawm leh a. "Ka nau chu Pathian hnenah a awm tawh a. A-pa sawi danin rei lo teah a-nu pawh Pathian hnenah a kal ve dawn a, chuvang chuan he naute lem hi lei thuai thuai a ka nau chu thawn ka duh a."

Chu naupang thusawi chuan ka thin a thawng dawt mai a. Chiang kel kawla min en chung chuan, "A-pa hnenah chuan a-nu chu lo la kaltir rih lo turin ka ti a. Tunah pawh hian min la nghak reng ang, dawr atanga ka let leh thleng min lo nghahtir turin ka ti a," a tih zawm a.

Chutah a ipte atang chuan thlalak hi a phawrh a. Ama thlalak, hlim hmel taka a nui lai thla hi a lo ni a. A tawng zui leh melh melh a.

"Ka nau chuan min theihnghilh lohna turin ka thlalak hi a-nu chu thawn ka tum bawk a."

"A-nu chu ka ngai thei si a, min kalsan lo se ka duh lutuk a. Mahse, a-pa'n ka nau awmpui turin a kal dawn tih min hrilh a."

A naute lem ken lai chu a han en leh vawng vawng a, engemaw tak a ngaihtuah tih hriat takin a mitmeng chu a ngui zual sawt nghe nghe a. A rukin ka pawisa purse chu ka dap nghal a, mipa naupang hnenah chuan, "Khawimaw i pawisa kha ilo chhiar nawn leh teh ang, naute lem man chu a lo daih reng maithei asin?" ka ti a. A pawisa min pek pah chuan,"Aw le. A leina daih pawisa neih ka va'n duh e," a ti vawng vawng a.

A hmuh loh tura, a ruka a pawisa kara ka pawisa ka dah hnu chuan ka chhiarpui ta a. Naute lem man daih bakah a chuang a awm tih a han hmuh chuan a hlim hle a.

"Lalpa, ka mamawh zat pawisa min pek avangin ka lawm e!" tiin a chiau ta hlut mai a. Ka lam chu a rawn hawi leh a. "Nizan ka mut dawnah ka tawngtai a. He naute lem hi ka nauin a awt si a, a-nu'n min kensak theihna turin Pathian hnenah a leina ka dil a. Ka tawngtaina a chhang a nih hi!"

A hlimzia chu a hmelah chuan a hmuh theih a. A sawi zawm zel a.

"A-nu ta tur Rose par var leina ka dil tel lek lek a, mahse Pathian hnena pawisa dil teuh chu ka ngam leh lo a. Mahse, en rawh! Hei naute lem leh rose var leina daih min pe tho a nih hi."

"A-nu hian rose par var chi hi a duh thei lutuk a."

Chumi hnu rei vak loah chuan dawr nghaktu pitar chu a lo kir leh a, kei pawh chu thil lei turin ka kalsawn ve nghal a.
Rilru a helhkam nei reng chung chuan ka duh ang te chu ka lei zo a. Chu mipa naupang chuan ka rilru a luah reng a, thil dang reng ka ngaihtuah thei lo.

Chutah, ni hnih kal ta a chanchinbu pakhat ka chhiar a zu rui chunga truck khalh mi pakhatin nu pakhat leh a fanu naupang te chuanna car a sut thu kha ka hre chhuak zawk a.
Hmeichhe naupang chu ka pawh chhawn loin a thi nghal a, a nu dinhmun pawh chu a tha lo hle a. Nikhaw hre loin a awm reng a, a dam chhuah leh a beiseiawm loh avangin a chhungte pawhin oxygen an pek chu phawi mai tur nge tih an ngaihtuah hial a ni.

Mipa naupang kha chumi te chhungkuaa mi chu a ni thei ang em? Mipa naupang te nena kan intawn atanga ni hnih hnuah chuan chanchinbuah nu pawh chu a thih tak thu ka chhiar leh a.

A vuinaah tel ve turin ka insiam a, rose par var bawr lian tak ka lei bawk a. An phum hma chuan a duh apiang en theih turin a ruang chu an lo dah a. Kuang chhungah an zalh a, a kutin Rose par var leh mipa naupang thlalak a hum a, a pum zawnah chuan naute lem an dah bawk a.

Mittui parawl kuang chunga ka kalsawn lai chuan ka nun hi a inthlak danglam vek ni ta ber hian ka hria. Mipa naupang te in a nu leh a farnu a hmangaihna nasat zia kha chhut thiampui phak rual a ni lo. Mahse, motor khalhtu zurui pakhatin mitkhap kar lekah a hmangaih em emte nunna chu a laksak ta si a.

(The Doll and the Rose tih lehlin a ni a, a ziaktu hriat loh
- Lalthlamuana Ralte)

Related Posts :