Bethlehem i pan ang

Vàn zaipáwl an tïn a, Lalpa ropuina ëng nasa tak pawh a chuai leh tâ! Chung lam arsi ëng fiah lo takin dai tharlam dawng thing hnah chi hrang hrang a chhun tlêt sep sep mai lo chu thil dang hmuh tùr a awm leh ta lo. Khua pawh a vawh ngaiin a vâwt leh var tawh a. Thilmak ropui tak a thleng hlim hlawt chungin, tunah erawh a thlen hmá ang mai a ni leh tâ. Chutih laiin berampute erawh chu an thil hmuh mak leh ropui tak avàng chuan an la khur zawih zawih a. Tawng chhuah nacháng hria pawh an awm lo. An beram vente ngei pawh chu hlauhlawp awm ngaihna hre lovin an innék täwlh täwlh a. Han inmuan tùr chuang an awm lo.

Engemaw chen hnûah zawng an zínga a upa ber chu a rawn tawng chhuak ta. Aw a’n thian të të a. Chutah, “Bethlehem i pan ang. Lalpa thu min hrilh lo thleng chu i en ang u,” a rawn ti chhuak ta a. An awmna atang chuan hmar thlang tlangdunga Davida khawpui, Bethlehem lo ëng de sep sep chu an thlir thap mai. Van lamah lah kawlrawn dâp dul khawpin arsi a de chuai bawk. Zan a thiang duhawm hlë a. Lal thar pianna atán pawh chu tluka hun duhawm a awm thei chuang lo vang. Ngawi rengin Bethlehem pan tùr chuan an insiam ta sawk sawk a. Ran chaw pêkna thlenga Lal thar lo piang, an zalènna tùra ram thar dinsaktu hmél chu an hmu châk tak zet a ni.

Chutia hmanhmawh taka an inbuatsaih lai chuan, an thian pakhat, Amos-a an tih erawh chu sir khatah a beram ven tianga khabe nghat meuhin a la ding ta reng a. Han insenghawi a tum ve der lo.

Pakhat chuan, “Amos, insiam thuai la, hmanhmawh teh. I kal thuai ang u,” a han ti a. Mahse, Amos-a chuan ngawi rengin a lu a lo thing ringawt a. A thianpa chuan mak ti deuh hian, “Engti zia nge ni ta mai! Lal thar chibai bûk tùrin i kal ve lo vang maw? Vàn zaipawlte kha i hmu ve lo em ni?,” a’n ti hlut a. Amos-a chuan, “Hmu ve tehmeuh mai; mahse, kei zawng hetah hian ka lo awm ang e,” a ti ta tlat mai. A thian dangte pawh chuan an rawn pan khâwm thuai a. An zínga a upa ber chuan, “Amos, Vantirhkohte thu min hrilh kha i hrethiam lo em ni? Lal thar chibai bûk tùr leh chawimawi tùr chuan kan kal ngei tùr a ni,” a han ti leh a. Amos-a chu a ngawi vung vung a, “Chuti záwngin ka thinlungah a ri ve lo,” a lo ti leh ta tlat mai. An hotu ber pawh a lungni ta lo, “I mit ngeiin vàn zaipawl i hmu a. Remna thu ropui an rawn thlen pawh tun maiah khán i bengin i hria a ni lo’m ni? Eng thil dang nge i la beisei cheu?,” awki sáng tak hian a han ti leh ta a.
A bula mite pawh chuan, “Tlángte leh leilungte hi an din ngai rengin an la ding a. Chung lam vàn arsite lah an rawn chim thla bawk si lo va. Amos-a tán zawng a la tâwk zo lo a ni ngei ang. Vàn zaipawlte thäwm aia ring zâwk a la mamawh cheu a ni mahna,” an lo ti ve bawk a. Amos-a lah chuan a tiang a kuah nghet sauh sauh a. Dam duai hian, “Kei zawngin thäwm nasa tak kárah khán aw zawi dam të a ni ka hriat ni,” a rawn ti leh boh a.

Nuih za lo pui chuan Amos-a chu an nuih ta chiam hlawm a, “Nang, beram za enkawltu putar hian eng thu danglam nge i lo dawn bîk? Eng bengin nge maw i lo ngaithlâk bîk le,” tiin nuihzat tak mai hian an zâwt hlawm a. Amos-a dawhtheihna pawhin a tlin ta meuh bîk lo, “Ka beram rualte hi en ta che u. Vantirhkoh inlár thäwm avàng leh Lalpa ropuina ëng avàng khán hlauhlawpa an awm hi. Lalpa Pathian chuan Bethlehem-ah hna ropui tak thawkin tih tùr a nei a. He lai beram zate hi a ngaihsak hman rih lo. Ka beramte tán hian kei hi chhandamtu ka ni a. Chuvàngin, kei chu hetah hian ka awm dáwn,” a ti ve ta khauh mai.

A thiante pawh chuan a thusawi chu a dik tih an hai hauh lo. An beramte an han en a, an la hläu hlë tih pawh a lang reng mai. Sawm luih an tum zui ta lo va, an kal hlàna an beramte a lo ven ngam dàn tùr an hrilh ta tliar tliar zâwk a.

Chumi hnûah chuan Amos-a thiante chu Bethlehem panin an inzui chhuak ta thliai thliai a. An zínga pahnih khat chu Amos-a tihel deuh tak hian an rawn hawi lêt leh a, “Keini zawngin Lalpa ropuina dang kan va hmu belh leh ang a. Nang zawng, beram bâk hmuh belh tùr i nei dáwn lo a nih kha,“ an la rawn ti ta hräm a.

Amos-a erawh chuan a uksak hauh lo. “Chuti angin ka thinlungah a ri ve lo,” a ti sup a. Nau piang a hmuh ve dáwn loh avànga han inngaihtuah buaina hun pawh a nei chhunzawm ta chuang lo.

A beramte a fang kual a. A hmui khawrin a’n tuk ri hlak hlak a. A beramte tán chuan chu thäwm zet chu van zaipawl thäwm ai chuan hriat a nuam ngei mai. Duat takin a chul vêl a, a khalh darh a. Eng emaw chen hnûah zawng an hlauh a reh a, dàn pangngaiin an tla tha ve leh ta.

Hun a liam zël. Khawvar lo thleng tùrin chung lam arsite pawh a rawn hnawt tiau zo ta. Khaw chhak lam káwl a rawn ëng sen phut a. Chutih lai chuan beramte pawhin ngaihthat lohna nei hauh lovin hnim an pet hmarh hmarh bawk. Amos-a chuan, ama hriat tâwk lek hian, “Van angel-te zawng an ëng lutuk a. Kei putar, beram véngtu lungmawl hi beramte tán chuan a tâwk chauh zâwk a ni,” a han ti a.

Rei vak lovah ní pawh a rawn chhuak ta. Boruak pawh a lum tan ta hlë.

Chutih lai chuan Bethlehem lam atang chuan a thianteho kha an rawn inzui thla leh ta thliai thliai a. A hnu rei lo tëah an rawn thleng ta. Ran chaw pêkna thlenga Lal thar piang an va hmuh thü te, anmahni mai ni lo, khawchhak mi fingte pawhin chibai an rawn bûk ve thü te, an thilpêk ken hlu tak takte chu an rawn sawi nak nak a. Pakhat chuan, “Amos, beram rual zíngah chuan eng thil ropui nge i lo chhar chhuah ve le?,” a han ti a. Amos-a chuan, hmél hlim tak mai hian, “Thiante u, tunah zawng ka beram zate kha za leh pakhat an ni ta asin!,” tiin khawvar hmá lawka piang, beram no pakhat chu a lo kawhhmuh hlawm a.

(The Shepherd who would not go, Heywood Broun-a ziak leh a ni. - C Lalawmpuia)

Related Posts :