COMPLEXION CARE FOR WINTER

¢ Debbie Chawngthu

Taksaa mawm siamtu a thawh chak loh hun thlasik chu kan hmang mek a ni a, nidang zawng aiin vun pawh enkawl ngun a ngai tih kan hre theuhin a rinawm. Vun a han ro tak tak chuan vun a chuar hma bik a, phuhlip, thak, chat te pawh kan neih phah thin. Mahse, heng hi inenkawl ngun chan an pumpelh theih a. A hmasa berin sahbawn hman han ti tawp phawt la, a chhan chu sahbawn hian kan vuna mawm a la bo a, vun a ro zual thin. Sahbawn aiah bawnghnute khar, thei tui tlem sawr nena pawlh hi hmai tihfai nan hmang la, a tha zawk daih a ni. Tin, tunlaiah face wash tha tak tak a chhuak hnem tawh a, thlasik laia hman chi te pawh a awm tawh hi. Face wah ah chuan vun ro tana siam hman hunlai tak a ni a, i vun a mawm anih pawhin vun ro tana siam hmang zawk la a pawi lo. Zan mut hmain bawnghnute khar fiankhat, glycerine far thum, olive oil leh rosewater pawlh i hmai leh nghawngah hnawih ziah la, phih lovin mutpui ang che. Zingah tui lumin phihfai la, tui vawta tleuh lehin dim takin nem hul ang che.

I inbual hmain olive oil emaw coconut oil rosewater nen pawlh la, i taksaah nuai chhuak vekin minute 20 hnu velah inbual ang che. Hei hian i vun a tinemin i eng sawt mai ang. I vun ro vanga phuhlip i nei anih chuan vitamin A tamna ei hnem ang che. Thlasik laia vun natna langsar tak pakhat chu eczema, vun thak hi a ni a. A tirah chuan vun a sen ten a, a hnuah lo rovin a thap a, a phuhlip thin. He natna i nei anih chuan walnut rawt diak la, a hriak sawr chhuak la, a thak laiah chuan hnawih ang che. Chumi aiah pawh chuan coconut ro hi chaichehin chep la, meiah rawh/hem ang che. A dum vek hnuah a la sat laiin tin plate ah dah la, chhin rawh. Second reiloteah hawng la, hriak a lo awm ang a, chu chu i vun thak laiah chuan hnawih thin ang che.

Vun thak hrim hrim hi thlasik lai chuan a awm duh a. Hetianga i awm anih chuan sandalwood oil leh coconut oil inzat chiahin pawlh la, inhnawih thin ang che. Tulsi hnah tui pawh mi tam takin vun ro tih reh nan an hmang bawk thin. Thlasik lai hian mawmna nei lo mit bul vel hi enkawl ngun tur a ni a. I mut hmain mit hnuai val leh chuar ven nan eye cream hnawih thin ang che. Inbual nasat vanga i vun a ro zual i hlauh chuan i inbualna tur tuiah khan oil tlem far thin la, vun ro lutuk tur a veng thei ang. Hmui rep ven nan i mut dawnin petroleum jelly emaw vaseline inhnawih la, zankhuain chiah ang che. Hmui rep hi a buaipuiawm duh hle bawk a, a nasat phei chuan a thi hial thin. I hmui a rep viau anih chuan rose par la la, diak takin rawt sawm la, bawngnute khar nen chawh pawlhin chu chu zankhuain i hmui chiah nan hmang ang che. Hmui kam thak i nei chuan vitamin B ei ang che. Vun ro lutuk tur ven nan tuisa lutukin inbual lo la, wool i hak dawn pawhin taksa dep tur puan nem a hnuaiah ha ang che. Ke tlang char leh khi i nei anih chuan i inbual apiangin i ke tlang nawhlungin nawt la, i inbual zawhah hul taka hruin olive oil emaw coconut oil hnawih nghal ang che. Ke no nan tuilum leh sahbawnin i ke sil la, hul takin hru la, minute nga vel oil massage pe ang che. Chumi zawhah mawza lum bun nghal la, i ke i vawn lum pahin ke tlang khi leh ro tur i veng thei ang.

Sam hi khaw vawh leh ro lai chuan luphut a nasa thin a. Chuvangin, i suk hmain coconut oil chhuan lumin i lulei massage la, i massage hnuah towel tuisaah chiah la, sawrfu la, chu chuan i lu tuam ang che. Darkar chanve hnuah sufai la, i sam i tleuhin pawng leih puat puat lovin zawitein tui leih la, fai takin tleuh thin ang che. I tleuhfai loh chuan luphut a nasa ang a, i sam a tle thei lo bawk ang. Khaw vawh hian vun a ro duh avangin moisturised foundation hman a tha a. Lipstick pawh hi a mawm chi hman hun lai a ni. Khaw vawt leh rawng lar hi a inhmeh a, chuvangin lipstick pawh nidanga i hman aia lar deuh hmang la, i nalhpui zawk ang. Rawng dal hi chuan khaw vawh lai chuan min tilang dal a, rawng lar hman a mawi zawk mah a ni. Lipstick hnawih chungah lip gloss hnawih thin la, a mawiin hmui rep tur a veng bawk ang. I ei leh inah fimkhur la ,thlasik lai chuan hrileng neuh neuh a tam a, heng hrileng hneh thei turin i ei leh in lam fimkhur ang che. Hna i thawhnaah i kut a ro lutuk loh nan rubber gloves hmang thin la, zan i mut hmain sertui, glycerine leh rosewater chawhpawlh inhnawih thin ang che. I kut i silfai dawnin glycerine leh chini dip chawhpawlhin nuai la, i kut a nemin a no sawt ang. Toner leh astringent hmang lo thei lo i nih pawhin khaw vawh lai chuan a chak lo chi hmang hram hram ang che. Sensitive skin nei chunga vun ro i buaipui anih chuan vun tih mawm leh nem nan i theih ang tawka rei khawizu(honey) in i hmai chiah thin ang che.

Inenkawl dan kan han tarlan te hi taima taka i zawm anih chuan thlasikin a bawh buai loh che bakah nipui lo thleng leh tur atan pawhin vun mam leh nalh i lo nei lawk thei ang. Thlasik lai chuan sam a ro duh avangin conditioner hman a ngaih lehzual hunlai tak a ni a, mahni inkumah conditioner i siam duh anih chuan hetiang hian siam ang che ~~

HOME CONDITIONER: Home conditioner i siam dawn chuan heng te hi chawhpawlh phawt ang che ~~ a) 3 tablespoon castor oil b) 1/2 tablespoon coconut oil c) 1/2 cup water d) 1 teaspoon vinegar e) 1 teaspoon glycerine f) 1 teaspoon shampoo.

Bel dar pakhatah oil chhuang la, a dangah tui, chutah oil-ah khan tui chu chhung la, a dang zawng hi pawlh lehin a inchawhpawlh that thlengin chawk ang che. Hei hi fianlian hnih i samah tat la, i tah zawhah steam ang che. I theih chuan artui pum 2 telh la, a tha lehzual.
HONEY CONDITIONER: I mamawh tur te chu ~~ a) Artui pakhat b) 1 teaspoon honey(khawizu) c) 2 teaspoon coconut or olive oil.

Artui hi chawk phuan la, chutah chuan oil leh khawizu chu telh ang che. A inchawhpawlh that hnuah i luleiah tat la, tui hu-in i sam chu ur leh la, su ang che.
ALCOHOL CONDITIONER: Artui pakhat leh brandy tablespoon hnih chawhpawlh la, chu chu i luleiah tat chhuak ang che. Minute 20 i chiah hnuah sukfai leh mai tur a ni. Anih loh pawhin purun sen lian vaklo hi zai lep la, rum (zu) no chan ve telh la, darkar 24 chhung chiah ang che. Chumi hnuah purun sen chu la chhuak la, a tui khan i lulei chu massage ang che. Hei hian a bikin sam tla tur a veng thei a ni.

Related Posts :