Mizo Mizia Hi A Tha A Ni

¢ Rev Lalnghinglova

"India hmarchhaka tlang mite, Naga, Meitei, Kuki, Chakma, Garo, Mizo leh Karen-te zingah hian Mizote hi an chungnung ber," tiin vai len hmaa British sipai, Bengal rama 1894 laia awmte chuan an sawi.

Pu Buanga'n August ni 19, 1893-a a ziah dan chuan: "Mizote chu mi huaisen, tha tak an ni a, Kristian an nih hnu-ah phei huan heng laia Bengali thatchheho ang hi an ni dawn si lo a, Karen-ho anga taima, intodelh, Missionary hnathawk thei an ni ngei dawn si a," ("Mission Work hmang tha Lushai," Rev. G.O Newport, Harvest FIeld, July 1983-December 1894, p. 337).

Tunali thangtharte hian Mizote hi mize tha tak kan nih hi an hre ta lo em maw ni, kan sualzia ngawt hi kan sawi kan sawi ta mai a. "Lalpan thil ropui min tihsak," (Sam 126:3) te pawh hi kan theihnghilh ta em maw ni. Kan mize thatzia hi kan thalai duhawm leh chhuanawm tak takte hnenah hian sawi a chakawm a, Zoram chhan tur te, tithianghlim leh ti mawi zel tura fuih te, thahnem an ngaihna kawnga tichak leh tiphur tura cho phawk thei khawpa sawi thiam a va chakawm em!

'Kan Mizia' tih Thanpuii Pa-in a ziak kha a chhia hlir a ziakkhawm alawm tih mai tur a ni a, ka ngaihdan chuan 'Mizo mizia tak ai khan essay a ziak niin ka ngai mai a, a tum ang takin essay tha chungchuang a ziak niin ka hria. Ka ngaihdan ang bawkin Pu KC Lalvunga (RIP) khan, "Thanpuii pa 'Kan mizia' tluka thu controversial leh mithiamte rilru cho phawk thei hi awmin ka hre lo a, chuvangin, mihiamte chaiah awm reng se ka ti," tiin a sawi (Zikpuii pa hnuhma, st Ed. 2000, p. 168).

VAILEN HMAA KAN MIZIA
Mizo lehkha ziakmiten kan mizia an ziak dan tlangpui chu: Tlawmngai, thian chhan thih ngam, taima, intodelh, huaisen, pasaltha, aia upa zah thiam leh rinawm tih hi a ni. Khanglai huna Mizoram nawmzia kha miin ziak ta se a ngaihnawm ngawt ang. Kan nunze mawi leh tha te chu tawi te chauhvin han thleir thuak ila.

Lal leh upaten an thiam ang tawkin an khua leh tuite an enkawl a, chhhuanchham an awm an phal lo a; tlangval hnathawk lova an awm mai mai an phal lo a; chawimawi phu an chawimawi a, zilh tul an zilh a. Khaw khat kha chhungkhat ang maiin an khawsa a; a thlum a al an eiza a, bawnghnute pawh an inchingal dil mai a; sa kap se a khuain sa hrang an hleh a. An inhmangaih dial dial a, an thil neih kawmpui lovin an intawm tlang vek a.

Chapchar leh favang awllen laiin puan silh leh zawlpuan siamin an hmanhlel a, nNula leh tlangval an tangrualin an intawiawm tha a. Hnathawh kawngah a remchan angin an inlungrualin an inlawm thin. Chhiatni, thatni, sa tlak leh rik rum thilah te an tangrual em em a. Sechhun/khuangchawi hunah pawh khawtlang an tangrual a, naupangte pawh an hlim ve em em a ni. Zoram pum hi a nuamin a ralmuang em em a ni ber mai. Heng hun lai thu hi Ronalh Sapa Tlau pawhin heti hian a ziak :"Thlang thlak tirh atanga rambuai thleng khan Zoram a nuam em em a...Tumah kan awt lo...Kan hmasawn dan a rual tlangin rilru sukthlek pawh a inang pet pet a, hnathawh leh eizawnnaah rinawmna leh tlawmngaihna te...dikna te chuan kan rilru te a luah khat hneh hle..." (Zoram thar 1st Ed.1998 pp 41,42).

Heng nunze mawi takte an neih avang hian an hlimin a chhuan pawh an chhuang hle thin a nih kha. An la mawl vang alawm kan ti a ni thei e, la changkang lo mahse, khati taka thlakhlehawm nunze mawi an nei thei tak kha alawm an makna chu! Sapho kan tih te leh hnam changkangho tak pawh khuan an hmanlai nun kha a ni an ngaih an tia lawm.

Thil mak tak dang chu- Mizote hian Bible-a thupek sawm zinga palina- 'An uire ngai lo e, tual an that ngai lo e, ruk an ru ngai lo ve' tih te hi an lo nei ve reng mai. Bible-ah vek hian "Dan thupek chu an thinlungah a inziak tih a lang," (Rom 2:15) tih a awm. He dan tha pathumte hi engtia kan lo neih nge? Bible sawi ang hian Pathianin kan thinlungah min lo ziaksak ve a ni ang. Heng dan tha te hian kan hriat loh hlanin kan hnam pum hi min lo vawng tha a ni ang e.

HNAM DANGTE MIN SAWI DAN
Tom Lewin-a lehkhabu - "Wild races of Eastern India (Mizoram)" phek 38-ah chuan, "An hmel han enin mi rinawm an nihzia a lang a, an hlim hmel sarh a, an nih ang takin an inlanlir a, an nih dan leh an lan dan a inpersan lo. An hmelin an thinlung taka an rinawmna a lantir," tiin a ziak.

TH LEWIN (Thangliana), vai len laia chhim lam atanga lo lut, sipai hotu, Mizote hmangaih em emtu min hmuh dan chu, "Hlim reng thei, thil zir thiam thei lak, henglai tlang mite zinga chungnung ber an ni a. Anni hi tichangkang ila a dangte pawh hi an hruai thei vek ang. Henglaia British Missionary-te ai pawh hian Burma-a American Missionary-te pawh khi chah lut ila, ani'n zirtir sela. Leileh hlawkzia te hria sela, thil dang pawh zirtir ila a tha ang," tiin.

Rev Dr Judo Indonesia mi, khawvel Kohhran tangrual Pathian thu zirna lam ziaktu chuan, "India ram Kristian unaute zingah Mizo Kristiante hian an titak berin ka hria," a ti.

Rev. Lalthankhuma'n, "Delhi-a Mission lam committee-a kan kalin, zanriah ei laiin, USA mi pa lianpui hi a rawn inchawi phei tuih tuih a; 'Han sawi ta mai mai ila, India ram kan thawhpuite zingah nangni hi kan ring ber che u a ni' a ti a," a ti.

General Eva Barrow-in Zoram Gospel Centenary lai khan, "General zina zinin khawvel hi ka fang ehhuak tawh a, Mizote anga Chanchin |ha lawm hi tumah ka la hmu lo," a ti.

T Burland chuan, "Mizote chu hnam fing tak, taima tak, zaidam tak, ngilnei leh hmangaihna ngah tak, thenawm khawvengte hmangaih tak an ni a, indonaa an chet dan, mi lu lak hmang, ti-a rapthlak taka an sawi laiin, Europe rama hnam fing pui puite indonaa an hleilen dan hi a rapthlak zawk," tiin a sawi. ("Notes on my tours among the Lushai I&II)

TUNLAI HUNAH PAWHA HNAM DANGTE MIN FAK DAN
Kum 2004 Beihrual laia Mission Vengthlang Kohhran Ramthar Campaign hapta khat chhunga Missionary Training-te ruaia an testimony, report, sermon atanga lang chiang tak chu- India ram hmun hrang hranga an thawhnate'n an ngaina theuh a, an ngai em em hlawmin an fak hle tih a ni. An thawhnaa miten an duh chhan nia an sawi chu, "Mizote chuan rinhlelhna nen an chang lo a, thusawi an dawng tha thei a, Mizo Missionary-te chu tih tak zeta thawk an nih avangin an hlawhtling. India ram pawnah pawh kan Missionary-ten India ram pawna England, USA khawchhak lama tuifinriat thliarkarah te pawh mi fak an hlawh hle zel. An thawhpuite itsik khawpin an thawk.
Hmangaihna nei mi kan nih avangin min duh a ni," Upa C Rokhuma'n a ti.

KAN RAM CHHUNGAH
Rev BJ Soiwal: Ani hi Aizawl Theological College BD zirnaa hlankai theih a nih leh nih loh rawn thlithlaia rawn kal a ni. "|henawmte inah in duh duha in kal thei mai hi mak ka ti. Kristian inpawlhona hi a tak takin Mizo Kristiante zingah ka tem ve a ni. Mizo Kohhran an zai chhung chuan Kohhran a nung reng ang a, Mizo Kohhran a nun chhung chuan zai hi a reh lo vang," a ti ('Kristian Hla bu, thuhmahruai p. vi. 2005 Ed.).

Mahanty: Bihar mi, World Bank programme-in an zin vel a, lamlian sira dawr, nghaktu awm lo, a man dahna ringawt a'n hmuh chu mak tiin a pa a zuk bia a, ani'n a awih vak loh thu a rawn sawi chuan, "Lo kal ve la, ka entir ang che," a tih avangin a lo kal a, an en dun ta a ni. Tin, hnatlanga khawlai tihfai ni-a mahni in zawn pawh ni lo an phiat fai dual dual chu mak a tih thu hahipin a sawi (Mahanty hi Upa Lalrintluanga, Mission Vengthlang, in hnuai luah a ni).

Mahanty thianpa pawh, Mizote an duh hun huna mi ina an leng angin, mi inah an leng ve ta a, an lo lawm zel avangin in 10 laiah a leng a. Nuam a ti khawp a, a zawngchhang chuan K|P inkhawmnaah te a tel ve zel a, anni'n an lo sawm si a, nuam a tih dan chu hetiang hian a sawi: "Mi zawng zawng unau ang maia in khawsaho hi mak ka ti hle mai, Mizoram hi keini ang tan chuan vanram a ni ngawt e," tiin.

ATC zirlaite pawhin, "Meitei-ho leh vai dang zir vete khan, tlang mi tih vangin min han hmusit phawt a. An han awm rei deuh a, chini leh thil dang reng reng kan tlakchham te hian kan inbantawn vek a, mak an ti em em a, 'Unau vek em ni in nih?' te min ti a. Kan nun leh kan khawsakzia te an han hriat chian deuh deuh chuan an zawi raih raih mai a ni. Min ngaisang lulh tulh mai a ni," an ti.

Jobalpore-a zirlaite chu, "In pindan hi class kal lai te hian in kalh ngai lo a, in thingrem te pawh in kalh ngai lo a, in thil engmah hi a bo ve ngai si lo a, a mak mang e aw," tiin an thian vaiho-in an ti (Hetih laia zirte chu R Lalhmingthanga, Chawngsikril , Thankima. Pachhunga, Lalfakmawii te an ni).

An zinga R Lalhmingthanga hian Pastor a nih hnua Siliguri-a an awm lai chuan, "Vaiho chuan an in te chu keini luah hi an phal khawp mai a, 'hei kan in number leh phone number' tiin lehkha tein min rawn hrilh leh ringawt thin. Pawisa pawh kan puk hi an phal em em a, anniho chu an inpuktir phal hauh si lo a," a ti.

Tunlai kan zia te hian duhthu a sam ta lo deuh a ni thei e. He'ng kan ze duhawm lo deuh te hi politics awm hnua tu te zia emaw kan kai te a ni ang. Chu chu a nih chianzia chu, Vai len hmaa kan zia te, Zoram buai hmaa kan ram nawmzia te kha; khang hun nawmzia te kha kan la hre reng alawm. A nih, ram buai hmaa kan awm ang khan awm thei leh dawn ta ila kan duh ang em? Kan chak zek zek ang chu. Sawi tam a ngai lo e. He'ng ze tha lo te hi mi zia kan kai a nih avangin kan thing thla leh mai dawn a ni. Thlarau Thianghlim tanpuinain. Bible chuan, "Aw Jerusalem, vaivut i kai kha inthing rawh, tho la, thu rawh..." (Isaia 52:2) a ti. Tunlai hian thangtharte hi kan ze tha lo te hi thin thlak tumin, a tih dan tur te ngaihtuahin an inhlawmkhawm mek a, a lawmawm hle mai.

Pastor senior tak pakhat chuan, "Tunlai pawh hian Mizote chu tha tak kan la ni alawm, kan vel ram (state) dangte hi han en ila, an rama thil duhawm lo pui pui hi kan vei ve lo; buai laia thil rapthlak tak lak thlengte avanga phuba lak tum pawh pakhat mah kan awm loh hi," a ti. A dik khawp mai. India ram ril lam vaite pawhin, titi-a an sawi dan chuan, "Mizoho khi, an ram buai a reh hnu pawhin phuba lak turn an awm hauh lo nia," an tiin an sawi.

A tawi zawngin sawi ila; kan harhna chan te hi a sawt lo, kan camping te hi kan daih rei lo; kan tak lo, kan tih hi a dikna chen chu a awm ang. Thil mak tak chu, engati nge Pastor tur te, Ramthar Tirhkoh tur te lak sen loh kan la neih reng? Engatinge Missionary 500 aia tam kan neih reng theih? Engatinge ram thima kan thawhnate'n min la fak viau hi? Kan la mawl hle a, kan rethei hle bawk si.

A rawngbawl tur hian Mizote hi Pathianin min la hmang viau a ni ngei ang. Lalpan thil ropui tak min tihsak te, a rawngbawl tura min la duhzia te hi kan haider dawn em ni? Mihring zingah hian thil reng reng a tha zawnga thlir mi (optimist) leh a chhe zawng hlira thlir mi (pessimist) an awm an ti a. Lehkha ziak mi pakhat pawhin, 'thenkhat chuan Rose pangpar buk an han en a, en teh u, a hling zumte fer fur saw an ti a, midangte erawh chuan, en teh u, a parmawi zia saw, an ti ve leh thung a,' tiin a sawi. Sorkarin thalaiho enkawl hna thawhtir dawn ta ang che sela, Mizo thalaite zinga thawh nge i duh ang, Silchar vai thalaiho zingah? Pastor hnathawk dawn ta ang la Zorama thawh nge i duh ang Silchar Bengali-ho zingah? Engati nge vaiho hian Kohhranah pawh treasurer nih an chak em em a, Mizovin Kohhran tangka vawngtu nih kan chak loh? Aizawl-ah lirthci zawng zawng pawnah an dah vek a, Silchar leh vai ram dangah pawna an dah ngam ve loh? Kan ram chu mi dang ai ngawt chuan kan la tha viau a ni lo'm ni?

He tawngtaina hi i hmang thin ang u: "Aw Lalpa, Rose chu a par zinga a hling zum te ni lovin, a hling zum te zinga a par mawi tak tak te hmu thei fo turin min tanpui thin ang che," tih hi. n

(Rev Lalnghinglova hi kum 1940-1941 June, leh 1945 June - 1946 chhunga Boys ME School kal a ni a, 1946-a pawl ruk exam-naah pakhatna a ni).

Related Posts :