Monday, December 7, 2009

Khualbuk Vengtu Ka Lainat

¢ Lalmuanpuia Punte

Kan ti nek nek a, December thla kan lo thleng leh ta reng mai; khaw’nge u-a-ma lam hawiin thu leh hla han nei ve reng reng teh ang. Ei lo ngial ngial pawh an awm ngeiin ka ring a, a duh duhin min rawn chhang mai a ni ang chu.

Hman zan chu thenawm vela kan naute hovin Krismas hla an sa thap thap mai a, a lunglen thlak em avangin awmhmunah mahni tawk tawkin ka lo zawm ve vei rut rut a. An zai zel a, an hla sak pakhatin min deng dawt ta mai a; he article hi a lo pian phah ta a ni. Chu an hla sak chu hei hi a ni :

Hmanah Kaisar lal lian regpui,
Lal lai ni eng hnuaiah,
An sawi khuavel chhiarpui hmingthang,
Chhingkhual mipui pungkhawm zingah,
Mari’n riahrun a chang ve lo,
Bawng in runpui a bel.

Nazaret mi Josefa leh a nupui Mari, raipuar rit tak; nau hring lek lek tawhte chuan chhiarpuia an hming ziahtir turin Bethlehem khua an pan a. Thlenna tur khualbuk an lo hauh lawk si lo ni awm tak a nia, chhiarpuia hming ziahtir tur mikhual an tam si a; khualbukah an leng ve lo a, an riahna hmuh chhun ran inah riakin, chu ran inah chuan nau an hring ta a. Khulai ram Palestina velah khuan beram vulh an uar hle a, bawng an vulh ngai vak lo. Pathian fakna hla leh Bilbe-ah pawh hian beram hi a lang tam hle, chuvangin Josefa leh a nupui Mari te riahna leh nau an neih zui takna ran in pawh kha bawng in ni lovin beram in a nih hmel zawk. ‘….Bawng in runpui a bel…’ han tih ngawt mai hi chu pawm harsa ka ti. Bible leh Krismas hla tam takah pawh hian berampu an lar hle, bawngpu lanna hla erawh a awm lo niin ka hria; chuvangin bawng in ni lovin beram in a nih hmel zawk. Mahse Mizo rilruah hian bawng in ni tura ngaihna lian tak hi a awm a, Mizo phuah Krismas hla tam takah hian lal Isua kha bawng inah a piang a ni.

A chang hnihna ah chuan heti hian a ti a:

Khualbuk vengtu i ui lo’m ni?
Tlantu mual liam tur chu?
Amah vanga khuavel an damna kha,
Khualbuk vengtu suihlung mawlin,
Van Lal rengpui ka lung damna,
Puan ang a hnawl ta e.

Khualbuk vengtu khan a mawl vanga lo hnawl a ni lo a, khualbuk a khah tawh vangin thlenna tur a awm tawh lo a ni mai. He hle phuahtuin khualbuk vengtu a puh dan hi a fel lo hlein ka hria, he hla phuahtu hian mikhual an khah tawh avanga an thlen theih loh chungchangah khualbuk vengtu hi a dem hle a ni. Sawi tawh ang khan ani (khualbuk vengtu) ui leh ui loh thil a ni lo a, riahna a awm lo a ni. Khawvel tlantu tur naute paitu a nih phei chu khualbuk vengtu khan a hre lo tawp ang.

A chang tawp ber phei hi chuan a puh chhe khawp mai:

Khualbuk vengtu ang mai ka ni,
Sualin min bawm reng e…

He hlaphuahtu hian thil a ngaihtuah chiang lo nge a rilru-ah thil dang a awm ka hre lo a, khualbuk vengtu a hmuh dan erawh hi chu a mak ka tiin a puh dik lo hlein ka hria; khualbuk vengtu khan dik lohna han sawi tur a nei lo. Khualbuk vengtu kha misual tak, englai pawha sual lam ringawt ngaihtuah thin mi; sualin a bawm reng angin he hla hian a sawi a ni. Josefa leh Mari te pawh kha thlenna tur awm renga thlentir duh lo lui tlatah a ngai ni awm tak a ni. Keini mipui lah hian ngaihtuah chiang mang lovin kan sa tui nasa thin mai si a!

Ngaihtuah chiang lo tih takah chuan ‘Khawvel sual tungding leh tura, Lei mi zingah a lo chenin’ tih hla pawh hi ngaihtuah tham a awm. Pathian Fapa Lal Isua Krista kha sual tungding tura leimi zinga lo cheng ni lovin, sual rawn hneh a; sual ata hringfate min tlan/chhandam turin a ni lo’m ni leimi zingah a lo chen?

I lalthutthleng leh lallukhumi i rawn kalsan,
Khawvela ka tan i lo kalin;
Nimahsela, Bethlehem-ah hmun a awm lo,
Nang, Mi Thianghlim pianna atan.

He hla teh ngawt pawh hian a sawi thelh deuh lo maw? Bethlehem khuaa khualbukah khan thlenna tur hmun a awm lo a ni mai a, an thlenna ran in pawh kha Bethlehem tho a la ni a; Bethlehem-a hmun awm lo han tih ngawt hi chu a dik lo deuh a ni. Josefa leh a nupui Mari te tan khaulbukah thlenna tur hmun awm lo mah se Isua piannna hmun tho a ni a, chuvangin mi thianghlim pianna atan Bethlehem-ah hian hmun a awm. Bible-ah pawh, ‘Aw nang Bethlehem, Judai rama mi; Judai khawpuite zingah i te ber tawp love, i chhung atangin awptu a lo chhuak dawn si a’ tih te pawh kan hmuh hi. Bible nena inkalh tak tak hlate hi tui tak takin kan sa a, kan lam pui vak vak mai tthin zawng a nih hi.

Chu lo pawh, ‘Leiah a lo piang van lalbera chu’ tih hla pawh hi Kohhran doctrine-a trinity ringtute tan chuan sak ve chi pawh a ni emaw’n chu aw? A phuahtu pawh hi trinity ringlo tu Kohhran mi ni awm tak a ni. Trinity ring lotu tan chuan a lo pian lai pawh hian van Lalber chu a ni ngei a, trinity ringtu kohhran mite tan ve thung chuan a lo pian lai hian van Lalber ni lovin ‘Fapa’-in a ni a lo pian ni. Bible-ah pawh ‘Kan tan naute a lo piang a, fapa pekin kan awm ta….’ tih a nih kha. ‘Mihring zingah a lo kal, A Pa tirh Imanuel...’ tih hla te, ‘Ngaiteh, vawiin van Lal fapa, A ropuina ram pelin……..’ tih hlate leh ‘Ngaiteh, vawiin, Van Lalfa pianni……..’ tih hlate hi chuan Van lal fapa a nih zia chiang takin a ti lang a thung. ‘Ngai teh, van Lal Fa chu, Bethlehem bawng in tlawmah, Hringmi hraichawiin a lo piang a….’ tih hla pawh hi chu bawng in tih bak hi chu pawm a nuam thlap mai.

Related Posts :



No comments:

Post a Comment