Mizo Tlangval Pahnih Telna India Team Chu

¢ Hmingsanga

South Asia-a ram hrang hrang pariatte inchuh thin SAFF Cup chu tan a ni leh dawn ta. He tournaent-ah hian South Asia ram pariatte chuan football-a chungnung ber nih tumin an inkhel ang.

India pawhin he tournament khel tur hian U -23 team tirin, India team-ah hian Mizo tlangval pahnih Churchill Brothers a khel lai Robert Lalthlamuana leh Pune FC leh India U - 19 team captain Jeje Lalpekhlua te an tel.
Pic : Jeje
Kum 1993-a khelh tan South Asian Football Federation Cup, SAFF Cup tia sawi thin a ni. Kum hnih dana khelh thin he tournament hi khelh a nih tan tirh lamah kha chun SAFF Gold Cup tia sawi a ni. Kum 1995-ah a hming thlakin South Asian Gold Cup tih a ni leh a, chumi hnu-ah tuna a hming SAFF Cup tih hi a pu ta a ni.

SAFF hian heng ram- Afghanistan, Bangladesh, Bhutan, India, Maldives, Nepal, Pakistan, Sri Lanka te a huam.

SAFF Cup-ah hian India chu a chungnung hle a, kum 1993, 1997, 1999, 2005 ah te khan champion ni tawhin, champion ngun ber a ni a, Sri Lanka (1995), Bangladesh (2003), Maldives (2008) te chu vawi khat theuh an champion tawh.

Kuminah hian SAFF Cup hi Bangladesh khawpui Dhaka-ah khelh a ni ang. Champion lai chu Maldives an ni. India chuan U -23 team a tir. India hi Group A-ah defending champion Maldives, Nepal leh Afghanistan te nen an awmho. Group B-ah a thlengtu Bangladesh, Sri Lanka, Pakistan, Bhutan te an awm. Group pahnihte hi an inkhel kual ang a, point hmu sang pahnihte chuan semi final an khel ang. Champion team te hian $ 50,000 an hlawh dawn a ni.

India team-a tel tur hian a tirah chuan Mizo tlangval pathum koh an ni a, final selection neih a nih erawh chuan Lunglei tlangval, India U -19 team-a tel Lalrindika Ralte chu a tel v ta lo. Ani hi a kum lamah pawh a la naupan deuh vang leh experience a la neih tawk lo deuh avanga tel rih lo mai niin a ngaih theih awm e. Player panga an paih te chu Karanjit Singh, Subhash Singh, Lalrindika, Gurpreet Singh Sandhu, leh Raju te an ni a. Hetih rual hian Karanjit Singh leh Subhash Singh te erawh chu senior national camp zawm turin koh an nih chhunzawm nghal a ni.

SAFF Cup hi December ni 14-ah final khelh a ni ang. India team hi tunhnai lawka JCT Coach a nihna atanga bang ta Sukhwinder Singh chuan a kaihruai ang. Ani hi India senior team pawh lo enkawl tawh thin kha a ni.

India team-a tel Robert Lalthlamuana chuan, "Player thlanchhuahte an tha tlang a, champion ngei kan inbeisei," tiin Zozam Weekly a hrilh.
Pic : Robert
Mizo tlangval pahnih tel ve chungchang sawiin Robert-a chuan, "India camp-ah hian a tirah chuan Mizo pathum kan awm a, final selection neih a nih khan zin haw hlim leh kan zingah experiece la nei lo deuh ber nia an hriat Didika kha chu a tel ve ta lo a ni," a ti.

India team-ah hian Mizo tlangval pahnih tel te hi first XI-ah an tel phak dawn em? "Kei chu han tih chhin velah chuan ka la tel ve zel a, Jeje pawh a tel ve zauh zauh bawk a, eng tin nge coach-in min remkhawm dawn tih hriatthiam a har ang reng a, mahse kei chu ka lan phak ngei ka ring," Robert-a chuan a ti.

Related Posts :