Pan lai hun hlimawm

Naupan lai chuan puitling nih ve kan chak a, puitling nunzia kan 'copy' thin. Hmeichhe naupangte chuan an nu te pheikhawk keartui sang te an bun a, inkhualtelemnaah an kal bul ve lawi lawi thin a nih hi. Mipa naupang pawhin puitling awm dan tur ni-a hriain kutkawr te an bun a, meizial han pak khuk vang vang te an chak thin.

Mahse, mihring nun hi a mak khawp a, chuti khawpa puitling nih thuai thuai chak si chu, kan han puitling ta lem a, naupan lai mawlh kan ngai leh thin.

Puitlin hnu-ah chuan hun te hi a kal duak duak a, naupan laia dam rei nghah thila kan ngaih- Krismas te pawh kum bul kan tan chauh emaw tih laiin a lo thleng zung zung zel. Hun a liam zung zung a, kan tar mai ang tih kan hlau a, hun liam ta kan thlirkir vawng vawng zel zawng a nih hi. Naupan that leh hial kan chak a, engto nei lova kan awm lai, hlim leh engthawl taka khawvel mawi kan thlir lai, naupan lai mawlh kan ngai leh thin.

Naupan lai chu hun hlimawm sawi nan te, engthawlna sawi nan te leh zalenna sawi nan te kan hmang a, tin, thianghlimna sawi nan thlengin kan hmang thin. Kan tei kan tei a, a tawpah chuan naupan lai mawlh kan ngai leh thin.

Naupan lai ngaih thu-ah hian hnam tin kan lungrual a, mi tin kan lungrual bawk. Miin naupan lai a ngaihzia a sawina thuziak chu ngaihnawm ti em emin kan chhiar a, literature-ah pawh hmun pawimawh a chang. Hla-ah an chawi a nih pawhin kan hlut a, thawnthu-ah ni se chuti bawk. Poetry-ah te hian naupang chanchin hian hmun a chang sang teh e.

Lemziak lamah pawh chuti tho. Lemziak thiamin thiam taka naupang lem a ziah hian painting exhibition-ah thlirtu ngah ber pawl a ni deuh zel tiin sawi ila kan sawi zual tampui lo ang.

Photography-ah pawh chuti tho. Thlala thiamin naupang thla a la a, naupang chu hlim taka a awm lai emaw a tap lai emaw pawh ni se, eng pawh ti se, khawvel hian hmuhnawm a ti thin. Photography khawvelah hian naupang thlalak hi lawm ber pakhat a ni.

Chuti khawp chuan kan lawm a, pan lai hun hlimawm heti taka kan ngai pawh hi a mak lo.

Naupang chu an fel a, an rilru pawh a thianghlim. A nun a tlang a, puitlingte angin midang an er ve lo. William Wordsworth-a phei chuan van atanga an rawn chhukna a la rei loh avangin van rim an la nam bik niin a hria a, Pathian pawhin a venghim bik niin a hre hial.

Mahse, chu hun hlimawm leh duhawm chu mi thenkhat chuan an chan, naupang hnathawkte hian.

Khawvel hian Child Labor a hua a, he thil tha lo laka khawvel venhim tumin mi thahnemngai engemaw zatin rim takin an thawk thin. Child Labor-in thil tha lo a nghawngchhuah theih thilte sawiin mipui an zirtir a, sorkar pawh an kar thin.

Child Labor-in khawvel a tihbuai dan hi sawi tur a tam khawp; a nghawng tha lo hrang hrangte hi sawi sen a ni lo hial mai thei. Mahse, thil pakhat, sawi khat deuh mai kan nei- naupang inhlawhfate'n naupan lai hun hlimawm an chan thin hi.

Naupang hnathawk (child laborer) chu puitling zingah a khawsa a, a rualpuite bula a tal miau loh avangin naupang nun pawh a nei ve lo. Puitling nun danin a nung a, puitling khawsakin a khawsa thin. Ei a zawng a, eizawn pawh chu puitling nunzia a ni der tawh. Chutiang chu a khawvel a ni a, mi tam takte lung tilengtu, hun hlimawm leh hun thianghlim- naupan lai hun chu a chan ta thin a ni. 'Childhood memory' a nei ve ta lo tihna a nih chu. Chu chu a 'fair' lo a, a runthlak tak zet a ni!

Tu nu leh pa mah hian an fate hi naupan lai hun hlimawm chan turin an phal lo ang. Mahse, naupang engemaw zat chu 'childhood memory' pawh nei ve lo turin hnathawkin kan chhawr si!

Related Posts :