Mipui Sum Eitu Sorkar Hnathawkte

Kumin March, 2009 - Sept. 2009 inkarah sorkar hnaah mi 1287 appointment pek an ni. He'ng zingah hian regular-a lak chu mi 103 lai an ni a, contract-a thawk tura lak mi 40 awmin, co-terminus-a lak 23 lak an awm. A tam ber SSA hnuaiah mi 1205 lakte kha an ni.

SSA-a thawk tura lak mi 1205 te hi chu hun rei lo te chhung atana lak an ni a, SSA tel lovin sorkar hnathawk dang lak hi mi 166 zet an ni.

He'ng bakah hian dan lova lak mi 5 an awm. AH&Vety Deptt hnuaiah MPSC Regulation 3(f)-in doctor 3 lak an ni a, mahse, heng post ruak pathumte hi dan anga hnawhkhahsak a nh theihnan MPSC-ah dil a ni tawh thung.

School eucation deptt. hnuaiah erawh contract-a rawih mi 1595 an awm a, chung zinga mi 1363 te chu an contract a tawp tawh a, a dang mi 232 te chu 3.12.2009-ah an contract a tawp ang.

Home deptt. hnuaiah mi 66 (SI 1, ASI (M) 5, Constable 41 leh Group D 19 Advertisement tel lova lak an awm. Heng mi 66-te hi kum 2004-05-a lak te an ni. Kum hnih an service hnuah dan angin confirmed vek an ni a, deptt. chhunga action lak emaw appointment pek tawhte ban tumna emaw a awm hran lo.

Agriculture deptt. hnuaiah advertisment pawh chhuah lo leh DPC kal tlang si-a lak mi 31 an awm a, PHE hnuaiah mi 11 an awm bawk, Agriculture deptt. hnuaia lak mi 31-te hi dahngheh an ni tawh.

Heng bakah hian Gram Sevak -3, LDC-2 leh Telephone Operator-1 te chu court order vanga dah ngheh an ni.

NTUM leh sorkar inbiakremna angin LDC 1 leh driver 1 chu DPC kaltlanga lak an ni.

Heng bakah hian midang 20 (Gram Secak-12, JE-4, Welder-1, Lab Assistant-1, Asst. Tractor Operator-1 leh Power Pump Operator-1) te chu deptt.-a rei tak officiating-a lo thawk tawhte an ni a, DPC kaltlanga dah ngheh an ni. Heng mite hian eizawnnan leh chhungkaw chawmnan an lo hman tawh avangin han ban leh mai chu thil tha niin a lang lo a, ban turin engmah hmalak a ni lo. Heng bakah hian sorkar thupek angin PAMRA family atangin LDC-ah mi 3 lak an ni.

Mizoram sorkar hnuaia department hrang hrang 15-te chuan vawiin thlengin hnalak chungchangah Recruitment Rules an la nei lo cheu!

Budget Session neih zawh takah kha, October ni 28-ah DP&AR deptt minister H Liansailova chuan Aizawl South I bialtu K Liantlinga zawhna chhangin, Recruitment Rules la nei lo deptt 15 an awm thu a sawi.

Minister chuan a sawifiahnaah, “Recruitment Rules la nei lo department han tih hian, department hi chuan Recruitment Rules an nei deuh vek a. Department-ah khan Recruitment Rules nei lo post an awm a ni zawk a. Recruitment Rules neih loh chhan hi han sawi fak tur a vang hle. A tlangpuiin Recruitment Rules nei lo post-te hi, post siam thar an ni tlangpui a. Kha post kha siam thar a nih veleh a neitu department-in Draft Recruitment Rules an siam nghal tur a ni a. Chu draft chu DP&AR-ah an thehlut ang a, DP&AR-in law department an 'vet' tir leh ang a, chumi hnuah MPSC Comments lak a ni thin. MPSC Comments hnuah DP&AR-in draft chu a final ang a, chumi hnuah Printing & Stationery Department ah Gazette a chhuah tur in thawn a ni ang a, Gazette-a chhuah a nih hnuah hman theih a ni ang,” a ti.

“Recruitment Rules Process chhung hi rin aiin a rei duh phian zel a. Department lamin DP&AR-a an thehluh kha, siamthat ngai leh objection-te a lo awm thin avangin department-ah thawn kir leh a ni fo a. An rawn siamthata an rawn thehluh leh hnuah pawh, a chang chuan tum hnih tum thum thawn let leh te pawh a ngai thei a. DP&AR lam infelfai tawk a an hriat tawh, law department lam a an thawn hian, law department hian siamthat ngai leh objection an rawn nei ve leh thin a. Chung siamthat ngai laite chu DP&AR-ah tihfel mai theih a lo ni bik si lo a, siamthat turin department lamah te thawn a lo ngai leh thin bawk a. Department pali-a neitu department, DP&AR, law department leh MPSC- ah te hian case hi a kal kual nasat thin avang hian Recruitment Rules process chhung hi a rei lo thei lo a ni,” a ti bawk.

Sorkar hnathawk lalna ram
Mizorama thil chakawm ber pakhat chu sorkar hnathawk nghet nih hi a ni ngat ang. Chu chuan kawngro a su a, Kohhran, khawtlang nun thlengin a nghawng!

He state hian a phu loh sorkar hnathawk a nei a, population ang zawnga thlir phei chuan India ram puma sorkar hnathawk tamna ber a ni.

Mizoramah thil man a pung a, chu chu sorkar hnathawkte hlawh milin a kal thin. Vawksa, arsa te pawh a rate chu tunah hian control theih a ni miah lo a, a hralh theih tih a chian miau avangin a rate hi duh zat zat a chhiar theih tlat. Sorkar hnathawkte'n sum an lalut tam tih hi mipuiin an hre tlat. Chu chuan thil man a tipung a, mahse, lakluh pung kha chu sorkar hnathawkte chauh an ni si ang.

Nikumah khan sorkar sum hmuh zawng zawng atanga za zela 26.49% chu sorkar hnathawk hlawhah hian a kal a, kuminah hian a pung lehnghal. Chutah, budget pharh hnu, tun hnaiah Mizoram sorkar chuan a hnathawkte hlawh a'n tisang leh dawn a!

Kan budget sum heti zat hi sorkar hnathawk hlawhah a kal ral thin hi pui tham tak a ni. Office inrelbawlna te, lirthei enkawlna te leh thil dang dangah a liam teuh teuh bawk. A nihna takah chuan Mizoram budget za zela 50 vel lai hi sorkar hnathawk hlawh leh inenkawlna behbawm velah a liam zel a ni. Chu mai a ni lo, eiruk tam tak a awm kum tin bawk! Sorkar hnathawkte hi Mizoram population atanga chhut chuan 7.8% vel chauh an ni a, 93% vel chu sorkar hnathawk lo an ni si a, manganthlak tham a ni.

2007-2008 chhunga Mizoram mipui sum thawhchhuah/lakluh chu cheng vaibelchhe 3,287 leh nuai 89 nia chhut a ni a, heta sum lakluh zinga za zela 67.12 zet chu sorkar hnathawkte lakluh a ni. Thil siamchhuahna lama thawk (industrial sector)-te lakluh chu za zela 17.65 a ni. Kuthnathawktu - lo neih leh huan thlai bakah ran vulh, sangha dil siam leh ramngaw hausakna hmanga eizawngte lakluh erawh chu za zela 15.23 chauh a ni.

Kuthnathawktute hi Mizoram mihring tam ber an ni a, Mizoram mihring zawng zawng atanga chhutin zaa 70 vel an ni. Chumite lakluh chu zaa 15.23 a ni a, chutih laiin zaa 5 vel (sorkar hnathawkte lakluh) chu za zela 67.12 lawih a ni thung. Chu chuan Mizoram hi ram rethei leh rorelna that lohna hmun a ni tih a tarlang.

Nikum khan Mizoramah sorkar hnathawk 47717 an awm tih tarlan a ni a, 2001 chhiarpuia Mizoram mihring zat 8,88,573 atanga chhut chuan mi 1000 zelah sorkar hnathawk 53 vel an awm zel tihna a ni. Mizoram mihring zinga za zela 5 aiin an tam hret a nih chu.

Mizoram chu sorkar hnathawk tamna ram a ni a, Mizoram chu mi tlem tein sorkar budget an insem zawhna ram a ni bawk. Sorkar hnathawk tam zawngah chuan a ram mipui zat atanga chhuta za zela 5 chu a tam tham hle a, chutih rual chuan mipui thawhchhuah zawng zawng zaa 67.12 lawih thawkchhuaktuah chuan an tlem hle thung. Mizoram hi a buai tihna a ni ber.

Kum 2001 chhiarpui-a a lan dan chuan Mizoram puma hnathawktu zawng zawng zinga 60.6% chu agriculture-ah an inhmang a, leilet leh thingtlang loneiha eizawng chhungkua 88819 an awm bawk. Chutih laiin 2006-2007 khan agriculture and allied sector hian GSDP (Mizoram gross state domestic product)-ah 16.02% lek a thawh thung. 2007-2008 chhung phei chuan 14% chauh a thawh a ni.

2001 chhiarpuiin Mizoram hnathawktute dinhmun a tarlan dan chuan mihring 8,88,573 zinga 4,67,159 (52,57%) chu hnathawh nei (worker) an ni a, thingtlangah hnathawh nei tam zawkin 57.20% chu hnathawh nei (thawkchhuak) an ni a, khawpuiah chuan 47.87% chauh hnathawh nei an ni.

Mizoram mipui tam berte hnathawh chu a hlawk lo hle tihna a ni. Loneiha eizawng chu Mizoram mipui zinga a chanve aia tam ni mah se GSDP-ah chuan 14% vel chauh an thawkchhuak ve a, chu chuan he hna hi a hlawk lo hle tihna a ni.

Mizoram economy-ah hian hna penhleh zawk deuha ngaih tertiary sector (service) chu a thawhhlawk ber a ni reng a, GSDP-ah 2007-2008 khan 65% chu he sector thawh hi a ni.

State pum economy-ah hian secondary sector chu GSDP-a thawhhlawk lamah tertiary sector dawttu a ni a, 20% vel a thawh a ni. Secondary leh tertiary sector amiten GSDP-a an thawh chu 85% bawr tihna a lo ni a, chu chu hnathawhtu zinga 39.45 vel thawhchhuah a ni

Mizoram University-a economics ziritirtu, Professor Tlanglawma chuan Mizoram kalphung chu tha lo a tih thu sawiin, “Sum a awm a, sum chuan production a siam tur a nia. Kan pawisa dawn te'n production siam si lovin a thamral a, circulation of money a sang a. Thil man state dang zawng aiin a to lo thei lova, kan pawisa dawnin thil hlu engmah kan siam si lo, kan sum neih chu hmun dang atanga thil lakluh nan kan hman a ngai si a ni,” a ti.

Mizoram budget atanga sorkar hnathawk hlawha kal ral zat hi 50 leh 60% inkar vel a ni a, Budget atang a pension a kalral ringawt pawh 4% lai a ni.

Sorkar hnathawk hlawhah 50/60% vel a kal a nih chuan Mizoramah hian hmasawnna hna thawh ngaihna a awm lo tluk a ni a, Mizoram budget 50/60% vel chu sorkar hnathawkte hnenah direct-in a thleng tihna a ni.

Mizoram chu India ram state hrang hrang zingah mihring zat atanga chhuta sorkar hnathawk tam berna a ni a, sorkar hnathawkte hlawh leh a behbawmah mipui pawisa tam zawk chu a kal kum tin reng a ni.

Mizoram sorkar chuan 6th Pay Commission hman turin thu a titlu a, sorkar hnathawk hlawh hi a sang hle dawn a, sorkar hnathawk lal lutuk lem lo pawhin Rs 30000/40000 te chu an hlawh fur ang. Tun dinhmunah pawh budget atanga pawisa tam tak mi tlem tein an insem a nih chuan hlawh a pung a nih phei chuan Mizoram sum dinhmun chu a chhe lehzual ang tih a chiang a, thil man sang chu sang taka beisei tur chi a ni ang.

Mizoram sorkar-in kum 2007-08 a pension fund atana sum sen zat kha Rs. 97.14 crore a ni a, kum 2008-09 Revised Estimates-ah khan Rs. 106.01 a ni leh dawrh a, kum 2009-10-ah chuan Rs. 163.11 crore ni tura ngaih a ni. Hei bakah hian normal pension payment chu Rs. 148.41 crore a ni ang a, Voluntary Retirement of School Teachers avanga sum sen tur chu Rs 14.70 crore a ni bawk a, hetianga a san leh chhan hi sixth pay hman dawn vang tho a ni.

Budget pharh takah (2009-10) khan sum hmanna hlawm lian tur capital expenditure atan Rs 855.70 crore ni tura ngaih a ni. Capital expenditure han tih hian loan rulhnan te a hman tur a ni tel bawk.

Rotling siamna tur capital outlay atan Rs 393.88 crore dah a ni bawk. Capital outlay hi capital ssets siamna atana ruahmanna a ni a, infrastruture siamnan te leh nakin zela rotling thil siamna tura ruahmanna a ni.

Hetihlai hian hlawha kal ral tur zat chu 1240 crore daih a ni thung a, total expenditure atanga chhut phei chuan 32.7% daih a ni a, rolting tur siamna atana ruahmanna aiin a let daihin hlawha kal ral tur hi a tam zawk dawn a ni.

Finance minister budget speech-a a sawi pawimawh tak chu salary expenditure chungchang a ni. Capital investment siam nasat zawk theihnan salary expenditure chu tihtlem zel tum a ni tiin a sawi a, hetih lai hian salary expenditure-a sorkarin kum 2007-08-a a sen zat chu Rs 734.61 crore lai a ni a, chu chu total expenditure atanga chhutin 28.43% lai a ni. Kum 2009-2010 chhunga salary expenditure atana ruahman chu Rs. 1240.16 crore a ni vung a, chu chu total expenditure atang chhutin 32.07% lai a ni leh bawk a, sorkar hnathawk hlawha kal ral hi a tam lutuk a ni. Tichung chuan March- August chhunga Sorkar hnathawk lak chu mi 103 an la ni leh lawih bawk a. Mizoram hian a phu lovin hnathawk a chhar hnem lutuk mah mah a ni.

Salary expenditure a san chhan tur hi Mizoram sorkarin sixth pay man a tum vang a ni a, chuta tan chuan budget atanga pawhpen a ngai lehta zel a. Chutih laiin Mizoramin leiba a neih zat finance accounts-a a lan dan chuan Rs. 3062.46 crore lawih a ni. He'ng zingah hian internal debt chu Rs. 1468.86 crore, loans & advances, Central Government atanga puk Rs. 558.50 crore leh Public Accounts atanga loan lak Rs. 1035.10 crore a ni a, kum dang ang bawkin Mizoram chu Government based economy kan nihna a lang chiang leh ta.

Hetihlai hian Proffessor Tlanglawma chuan Mizoram Finance System chu tha lo viau niah a ngai. “Kan Finance System hi a tha lo. Nakina kan la buai theihna tur a ni. Kan manage that loh chuan hun reilote hnuah buaina nasa tak kan tawk ngei ang,” a ti.

“Sorkar hnathawk kan tam si a, sorkar hnathawk te hian an hlawh atangin GPF leh CPF te an dahtha a, tlema senior deuh tawhte phei chuan pawisa dahthat nan tiin sing chuang dahte pawh an awm. Sorkar hian a khawlsak kan ti thei ang a, mahse, hei hi an invest-in ka hre lo. An invest lo a nih chuan nakinah buaina nasa tak siam thei a ni,” a ti.

“Sorkar hnathawk pension an la tam lo a ni thei a, nakinah chuan pension dawna pawisa lak theihloh te pawh a la awm thei. Hei hi mut mawh hnar mawha neih ngei chi a ni,” tiin Zozam Weekly a hrilh.

Hnathar siam chungchangah pawh Prof Tlanglawma chuan, “Employment generation kan sawi ziah a, hnathawh tur awm silova post siam leh ringawt hi buaina siambelhna ang chauh a ni,” a ti .

“India ramah hian community wise in police ngah ber kan ni. IR police te pawh kan nei ngah khawp mai. A tirah chuan central sorkar-in min tumsak a ni mai a, mahse, min tumsak reng dawn lova nakinah Mizoram suma kan chawm leh tho an ngai dawn. State-ina kan tih hunah chuan buaina siam belhna ang mai a ni,” a ti a, “An hnathawh tur tak tak pawh a awm si lo, khawi hmunah nge an thawh a, eng hunah nge an thawh? Productive si lovin eng hna nge an thawh ang. Tun dinhmunah chuan IR batallion te hian hnathawh tur an nei lo kan ti thei ang. Hetiang hi a kawng hmang lo, nakina kan buaina tur hlir hi kan insiamchawp zel mai chauh a ni,” tiin a sawi.

Management lamah kan hlawhchham rih nia ngaiin, “Management lamah hian kan la hlawhchham rih a ni. Sorkar hnathawkte hi kan mamawh aia tam kan nei a, mi singnga chuang lai kan nei a, MR leh contract te nen kan awl del dul a,” a ti.

“Hna hi kan thawk tur a ni a, Mizoram-ah chuan kan ti mai mai deuh a ni. Kan indaih lutuk vang pawh a ni mahna le,” a ti bawk.

Sorkar hnathawk tam lutuk chu a vei thu sawiin, “Sorkar inrelbawl dan hi kan ngaihtuah chian deuh chu a ngai a ni. Mamawh aia tam daih an awm vang hian plan sum hi pawhpen a ngai lo thei lova, chumi tel lo chuan kan in-manage zo si lo,” a ti.

“Mizoram-ah hian sum a awm a, sum chuan production a siam tur a nia. Central atanga kan pawisa dawn te'n production siam si lovin a thamral a, circulation of money a sang a. Thil man state dang zawng aiin a to lo thei lova, kan pawisa dawnin thil hlu engmah kan siam si lo, kan sum neih chu hmun dang atanga thil lakluh nan kan hman a ngai si a ni,” a ti a, “Kan sum neihte lah sorkar hnathawk hlawhah a kal ral nasa si a, sawi tawh ang khan sorkar hian a hnathawkte hlawh a dah thatsak hi a invest si lo. Hei ringawt pawh hi hun lo la kal turah sorkar tan chuan buaina tham a la ni dawnin a lang,” a ti bawk.

########################

Recruitment Rules la nei lo Department 15 te chung changah a changtu minister Liansailova chuan tiang hian Budget Session liam taah khan House a hrilh.
(1) ATI: Computer Operator-cum-Technician post Recruitment Rules leh Head Faculty leh Associate Professor-te Recruitment Rules hi Process tawh a ni a. Tunah hian Sorkar-ah file a kal mek a ni.

(2) School Education Department hnuaia Recruitment Rules la nei lo Post Director, Joint Director leh Assistant Librarian te kha, Education Reforms Commission recommendation nghah a nih avangin la kalpui loh a ni.

(3) LAD hnuaia Recruitment Rules la nei lo post Chairman kha, an pay a hniam bik avangin pay upgrade Sorkar-ah dil mek a ni a. Sorkar thutlukna hmuh anih veleh Recruitment Rules buatsaih a ni ang.

(4) UD&PA hnuaia Technical post Executive Engineer, Assistant Engineer leh Assistant Architect Recruitment Rules process tawh a ni a. Fitment Committee Recommendation Sorkar in a pawmpui hunah final tur a dah a ni.

(5) PHE Department hnuaia Bacteriologist leh Analyst post-te Recruitment Rules peih fel a ni tawhin Gazette-ah chhuah an ni tawh.

(6) Minor Irrigation hnuaia post- JE, Section Assistant leh Draftsman-te Recruitment Rules kha process a ni tawhin DP&AR lam in an final tep tawh e.

(7) Fisheries Department a Director post Recruitment Rules nei lo kha, tunah chuan siam a ni tawhin Gazette-ah chhuah a ni tawh e.

(8) Taxation Department a Commissioner of Taxes Recruitment Rules hi Examine tawh a ni a. Law Department in an "vet" tawh a, MPSC comments pawh lak a ni tawh a. Gazette-a notify turin hma lak mek a ni.

(9) Disaster management & Rehabilitation Department hnuaia Recruitment Rules nei lo Data entry Operator kha, Department hrang hrang a Data Entry Operator post-te nen a hman tlan theih turin tunah hian Information & Communication Technology Department ah Recruitment Rules buatsaih mek a ni a. Peihfel a nih veleh DP & AR ah thehlut in a tul ang a kal pui zel a ni ang.

(10) Art & Culture Department a Recruitment Rules nei lo Music Instructor (Vocal) kha, DP & AR-ah Recruitment Rules thehluh tawh a niin examine a ni tawh a. Qualification leh thildang fel lote, a Department lam nen la indawr mek a ni a. Reilote ah peihfel beisei a ni.

(11) Home (Police) Department a Recruitment Rules nei lo post Computer Operator, Programming Assistant, Data Entry Operator-te Recruitment Rules chu Sl.No.9 a sawi ang khian Information & Communication Technology Department-ah buatsaih mek a ni.

(12) H & FW Department hnuai a Recruitment Rules nei lo post hrang hrang te dinhmun chu a hnuai a mi ang hiani.
(a) Principal, College of Nursing Recruitment Rules Directorate lam in an buatsaih a, a Department Secretariat lam ah thawn a ni tawh a. Tunah hian Department lam in an examine mek.
(b) Lecturer, .College of Nursing Recruitment Rules hi H & FW Department Secretariat-ah examine mek a ni.
(c) Radiologist Safety Officer Recruitment Rules hi, draft siam turin Directorate of Health Services hriattir an ni.
(d) Audiologist & Speech Therapist Recruitment Rules hi peihfel a ni tawh in Gazette-ah chhuah a ni tawh.
(e) Physiotherapist Technician Recruitment Rules hi, draft siam tur in Directorate office lam hriattir an ni.
(f) Dietician Recruitment Rules hi, draft siam turin Directorate office lam hriattir an ni.
(g) Principal Director hi, Mizoram Health Service Rules, 2009 ah dah tel ni a. Cabinet approval nghah mek a ni.

(13) Art & Culture Department hnuaia Recruitment Rules la neilo Music In-structor(Vocal) kha Recruitment Rules buatsaih mek a ni e.

(14) Revenue Department a Recruitment Rules neilo post-te kha, hetiang hian hma lak mek a ni.
(a) Head Cartographer -
Recruitment Rules siam a ni tawh in Gazette-ah chhuah ani tawh.
(b) Cartographer-II leh III te hi "Clubbed together" an ni a. Recruitment Rules hi DP & AR-ah examine a ni tawh a. Provision thenkhat siam that a ngaih avang in Department lam ah thawn let leh hrih a ni.
(c) Surveyor II leh III hi "Clubbed together" an ni a. Tunah hian Revenue Department-ah "Surveyor" leh "Surveyor-I" an awm a. Recruitment Rules hi siam a ni tawh in Gazette-ah notify a ni tawh.

Industries Department hnuaia post Recruitment Rules la nei lo zingah khan, a hnuaia post-te hi Deptt. dangte nen Common Recruitment Rules hman a ni a, Recruitment Rules hran Depttin a neih a ngai lo.
(a)Technical Assistant
(b)Draftman-II
(c)Production Assistant -cum -Technical Assistant
(d)Store Jugali
(e)Khalasi
(f) Junior Engineer

Deptt. dang Recruitment Rules hmangthei te.
(a)Mechanic -I,II&III
(b)Electrician cum Mechanic

Recruitment Rules neilo zingah khan hengte hian Recruitment Rules an nei tawh a.
(a)Auto Mechanic
(b)Field Assistant
(c) Weaving Instructor
(d)Skilled Weaver(Carpet)
(e)Semi skilled worker
(f)Unskilled worker/helper
Recruitment Rules la nei lote
(a)Carpentry Expert
(b)Supervisor
(c)Maize Operator
(d) Welder-III
(e)Section Cutter
(f)Addl. Director
(g)Assistant Director (Food)

Addl. Director Recruitment Rules hi process tawh a ni a, Law vetting leh MPSC comments pawh lak a ni tawh a. Rei loteah peih fel a ni ang. Recruitment Rules la neilo post-te hi, Recruitment Rules neih tumin hmalak mek a ni.

Recruitment Rules la nei lo post te hi, post siam thar an ni tlangpui a. Post Create a nih ve leh a Department neitu in draft-Recruitment Rules a buatsaih nghal tur a ni a. A Department chet ran leh ran lohah a innghat thui viau ang. Tin, Recruitment Rules ah hian Department hrang hrang in inrawlhna an neiu a, a process chhung a rei thin a ni. Revruitment Rules chung changa mawhphurtu Department te chu -
(a) A neitu Department
(b) DP&AR
(c) Law Department leh
(D) MPSC

Related Posts :