Mizorama naupang hnathawkte dinhmun

¢ Vanlalremruata Tonson

Mi rilru hneh dan tur pawh hrethiam lo khawpa naupangin a pa damdawi man tur tuakin thil a zawrh tawh ngai che em? Dawrkai leh private office-a thawk thenkhat chuan hetiang hi an tawng leh nawlh thin. Hetih lai hian 2006 velah khan sorkar record-ah chuan Mizoramah hian naupang kum tling lo hnathawk an awm lo thung! Sorkar laipui dan siam - Child Labour (Prohibition and Regulation) Act chuan naupang kum tling lo hnathawka chhawr luih hi a khap tlat a, Supreme Court pawhin he dan hi hman tan tur, a ti bur mai.

SC thupek hi kenkawh tak tak tur a nih chuan state tam tak an buai ang. Mizoramah pawh naupang hnathawka chhawr luih chungchangah PIL thehlut awm ta se kan sorkar hi a him kher lo ang. Naupangte hmakhaw ngaia hnathawka inchhal tlawmngai pawlte chuan he SC thupek hi a taka zawm theih lohah an ngai a, chutih rual chuan sorkar laipui pawhin naupang hnathawkte chhanchhuahna tur programme mumal tak a la nei chuang lo. Dik chiah chuan naupang zawng zawngin lehkha an zir theihna tura ruahmanna, Sarva Shiksha Abhiyan Rajya Mission-ah pawh hmeichhia, chhungkaw harsatna avanga sikul pangngaia kal thei lo tan zirna ngaihtuah sak dan tura ruahmanna a awm a, mahse, hna an thawh lohna tura ruahmanna erawh a awm lo. Engpawhnise, SC chuan a thupek kenkawh han tum chhin sela, ruahmanna tha zawk pawh a la rawn piang mahna!

Naupang hian hna an thawk miah lo tur em ni ang? Naupang hnathawh khap tur ni se eng chin nge khap tur? Chhawr luih (forced labour) an nih loh chuan khap tur a ni ang em?

Naupang hnathawka chhawr luih hi hmasang atanga lo chin tawh a ni. India rama British-ho an luha textile industry lama hma an lak chiam lai pawh khan naupang chhawr luih a nasa hle tawh. Europe-a textile industry lama hmasawnna a thlen lai pawh khan chutiang chu a ni tho. Naupangte kut nem tak chu la khawih vel nan a tha a, industry neitute chuan an duh viau nia sawi a nih hi. Mahse, naupangin hna an thawk nasa chuan khawtlang nunah nghawng tha lo a nei nghal a, naupang hnathawh chungchangah dan hrang hrang a piangchhuak zui ta nghe nghe a nih kha.

Human Rights and Law Network te chuan September-October 2004 chhung khan Aizawl khawpui chhunga naupang lehkha zir lova hnathawkte dinhmun an zir a, Mizorama naupang hnathawkteah pawi a la thleng tam lo a, sikul an kal lo hi a pawi ber nia an hriat thu zirchiangtute chuan an report-ah an tarlang.

Naupang thenkhat chu hnathawhna hmun him tawk lova ngaih - lunglakna, thingpui dawr leh motor workshop-ah te an thawk. Hmeichhe naupang tan bik chuan thingpui dawr, vantlang punkhawmna ang chi-a thawh chu him lovah zirchiangtute chuan an ngai a ni. Retheih vang, nu leh pate thatchhiat vang leh nu leh pate ruihloa an inhnamhnawih vanga hnathawk te an ni a, chhungkaw rethei tak tak thenkkhata nu leh pate hian hmalak ngaihna thlawt an hre lo a, an fate chu hna an thawh tir thin. |henkhat chu chhungkaw kehchhia niin naupangte chu hna thawka chhawr an ni a, chutiang naupangte chuan an hlawh pawh an duh duhin an hmang a ni.

HRLN hian naupang hnathawkte zirchiang turin Juvenile Justice (Care and Protection) Act, 2000 an tlawhchhan thui hle. A kum bithliahnaah pawh kum 18 (la pumhlum lo) thleng an huam tir a ni. Naupang hnathawk mi 57 an hmu a, an zinga pakhat chu kum 6 tling lo a ni. Mi 18-te chu kum 6-14 inkar niin, kum 14-18 inkar mi 38 an awm bawk.

Naupang hnathawk zirchian zingah hian middle school thlenga lehkha zir (Class V-VII) an tam ber a, mi 31 an awm. Primary school (KG-ClassIV) thlenga lehkha zir 16 an awm a, high school (Class VIII-X) thleng zir 8 leh zir miah lo 2 an awm bawk.

Naupang tam zawk, mi 57 zinga 43-te chu Mizoram chhung ngeia piang an ni a, mahse, a tam zawk mi 30-te chu Aizawl khawpui pawna piang an ni.

Aizawl khaw pawna piang an tam ber laiin Aizawla hnathawka awm, mahse, nu leh pa emaw, nu emaw pa emaw bula awma hna thawk an tam ber. Chutiang chu mi 34 an ni. Chhungte hnena awm chu 16 an ni a, hnathawhnate ina awm nghal 7 an ni.

Naupang hnathawk tam ber chu an nu leh pate loneiha eizawng an ni a, chutiang nu leh pa nei chu 19 an ni. Thawmhnaw lakchhawn zuar fa 12 awmin, nitin inhlawhfa chawpte fa 9, chawhmeh zuar fa 8, dawr nei fa 5 leh sorkar hnathawk fa 4 an awm.

An nu emaw pa emaw ruihtheih thil ti 44 an ni a. Ti lo chu 13 chauh an ni. Pa ruih theih thil ti an tam ber a, 44 zinga 42 chu ruihtheih thil ti an ni. Nuah chuan 19 an ni thung. Mahse, ruihtheih thil tiah hian mei zial zu an tam ber a, 44-ah 37 an ni. Zu in mi chu 21 an ni bawk.

Hnathawk tam ber chu hmeichhe lehkhathiam lo fa an ni. Naupang hnathawk 34 chu an nute primary school thleng chauh lehkha zir an ni. Paah chuan 16 an ni thung. Nu, pawl sarih thleng zir 13 an ni a, pa 24 an ni. High school thleng zir nu 10 an awm a, pa chu 16 an awm. Hetih lai hian lehkha zir miah lo chu pa pakhat a awm bawk.

A tam ber chu inhlawhfa an ni a, mi 17 an ni. Workshop-a thawk 16 an ni a, bazar-a thil zuar leh dawra inhlawh 10 ve ve an ni. Mi ina thawk pakhat a awm a, hna thawhna hmun sawi theih loh 3 an awm. Mi 57 zinga 19-te chu thla khata an pawisa lakluh zat sawi mumal theih loh an ni a, 18 te chu thla khata Rs 100-300 la lut niin, Rs 300-500 la lut 7 awmin, Rs 500-700 la lut 22 an awm bawk.

Naupang hnathawk 25-te chuan an thawhchhuah zawng zawng an chhungte an pe vek a, a then pe 17 an awm a, pe mai lo 5 an awm. An pawisate hi a tam ber chuan ei tur lei nan an hmang thin. Chutianga hmang chu 38 an ni. Meizial lei nana hmang 14 an awm a, zu in nana hmang 2, infiamna thil lei nana hmang 4 leh thil danga hmang 38 an awm. Naupang thenkhat chuan an pawisa thawhchhuah hi ei tur lei nana an hman laiin thil dang dangah pawh an hmang ve tho a ni.

Hna an lo thawh rei tawh zawng hi - survey neih laia kum hnih lo thawk tawh an tam ber a, mi 17 an ni. Kum khat lo thawk tawh 14 an ni a, thla ruk aia rei thawk tawh 9 niin, thla ruk aia rei lo hna lo thawk tawh 2 an awm. Kum thum lo thawk tawh 8 leh kum nga aia rei lo thawk tawh 5 an awm. An thawh rei tawh dan sawi theih loh 2 an awm.

Hriselna chungchangah a tam zawk chuan harsatna an nei lo. Mi 57 zinga 38 chu hriselna tha an ni a, 19 erawh chuan lu na (7), mit (6), ashma (2), pum (4) leh malaria (2) vangin an hriselna an sawisel thung.

Zuk leh hmuam lakah mi 26 an fihlim a, 21 chu a changa mei zu thin niin, zu fo 8 awmin thil dang - (sahdah ilo fahran) ti thin 2 an awm.

Naupangte hian a tlem berah ni khatah darkar riat mutna hun an nei tur a ni, tiin mithiamte chuan an sawi thin. Chutiang a nih laiin an zinga 17 chuan darkar riat mutna hun an nei lo a, 26 te'n darkar 10 vel mutna hun an nei a, 14 te chuan darkar 12 chhung mutna hun an nei a ni.

A tam ber chuan ni khatah darkar 12 vel hna an thawk a, chutiang chu mi 24 an ni. Darkar 10 vel thawk 21 leh darkar 8 tling lo 10 an awm a, hnathawh hun chhung sawi theih loh 2 an awm.

Chaw ei chungchangah a tam ber chuan ni khatah chaw vawi hnih ei tur an nei a, mahse, vawi khat chauh ei tur hmu 5 an awm thung. Ni khata chaw vawi khat ei chu an dinhmun a chhe hle niah a ngaih theih.

Naupang tam ber chuan hunawl an neihin TV an en thin a, mi 25 te chu an hunawl hi TV en nan an hmang. Sekrek khawih nana hmang 16 leh thiante nena hun hmang 16 an awm a ni.

Inkhawm thin mi 39 an awm a, inkhawm ngai lo 18 an awm bawk. Hetih lai hian a tam zawk chu naupangin dan an bawhchhiatna langsar tak rukrukah an la inhnamhnawih lo. Naupang 57 zinga 38-te chuan ruk an la ru lo.

Naupang thil zuar emaw, hna thawk emaw thenkhat chuan an nu emaw pa emawte hrisel loh vanga hetiang ti hi niin an insawi thin. Mahse, survey-a a lan danah chuan naupang 47-te chu nu leh pa hriselna tha an ni a. nu leh pa thihsan vanga hna thawk an ni lem lo bawk. Survey-in naupang 57 a zir zinga 50 te nu leh pa la dam an ni.

Zirchiannaah hian a tawp lamah chuan naupang 50 chauh an ni tawh. Chung zinga 20 chu nu leh pa inthen an ni a, a tam zawk chu nu leh pa kara awm an ni.

Related Posts :