KUM ZEP!

¢ HC Vanlalruata

Kum 1977 kum tawp lam, Matric exam thei tura se lection test-a kan tling ve tih hriat tirha Synod High School-a kan Headmaster-in ka kum zat min zawh ruala ka pian ni leh thla leh kum engtinnge an ziah dawn tih min zawh khan a pawimawhzia tur ka hre pha reng reng lo. HSLC-a kan kum/kan pian kum kan ziah kha kan damchhung daih tur, Luka ziak tluka sorkar pawhin a pawm tawh tur a ni tih phei chu hre pha hauhlo ka ni. “Ka pian ni leh thla leh kum dik tak bak a dang a awm thei em ni?” tiin ka’n zawt he haw a, ani chuan ka pian ni, thla leh kum dik tak ziah chu a dik bera a tluk a awm lo tih min hrilh leh mai a. Chuti chuan November ni 8, 1960-a piang ta fam chuan ka pianni leh thla leh kum dik tak chu ka chhawm hlen ta poh a nih chu.

Sorkar hna thawk ve pha ta lo chu kan tei kan tei a, kum ziah naupan avanga pension hun a lo tlai pawimawhna leh hlawkna-te chu a taka tawng lovin kan Vai-ui-dum vah chho ve mai mai zel a. Sorkar hnathawkte’n an kum an zep then avanga thil pawi thleng tak tak hi hre chianglo mah ila, ka thinlung kil khatah hi chuan fello riauva hriatna chu ka pai reng thin. Hman deuh khan officer pakhat chuan a hnuaia thawk pakhat dinhmun min hrilh a - “Sipai-a a pension (short service a ni awm e) hian a la piang lo” a ti pek a. Chu aia nep deuh chu kum 2000 chho vel khan thingtlang khaw pakhata Police hotu lian vaklo pakhat chu a hmel a upat tawh em avangin an hotupa hriat lohin a kum tak tak leh service a la neih zat ka zawt a. Ani chuan, “Kum 4 hun ka la nei a, tunah hian kum 68 ka ni,” a ti chhek mai. Heilo pawh hi an chhang chiahte pension hnu fe-a hna la thawk a, kum 5 chuangte la thawk pawh kan sawi ta fo a nih hi.

Hmanni lawk khan kum zep then kan ti dawn nge, mahni kum dik tak aia inziah tlem, mahni pian kum aia tlai-a in pian tir chungchang an ziah kha ka lo chhiar ve a. Tunhma atanga ka vei, eirukna intanna tia puh theih hiala ka ngaih rawn ngai pawimawha a lang a pauva hemi chungchanga an ngaihdan rawn puangtu an awm takah chuan nghavawk hram ang mai-a ngawih reng chu ka thei ta bik lova. Kan sorkar leh kohhran-a thawk thleng hian kum zep then an tam ang em? Chu chuan Mizote hi eng anginnge min hruai ang? tihte hi ka rilru-ah a lo lut nasa ta mai a ni.

Kum zep then hi hmeichhe tih tawka ka ngaih thin a ni a, an tana a pawimawh em avangin pawm sak pawh ka huam tho mai. Ka tih chhan pawh sapho meuhvin, “Hmeichhia chuan a kum thuruk tih loh chu thuruk engmah a zep theilo,” an lo tih ka lo chhiar ve tawh vang a ni a. Court-ah meuh pawh nula senior kum 60 chuang kha ukil-in a kum diktak a zawh vaih chuan, “Nauva, i kuanglo i nawr tlat, ka hrilh phiangsen lovang che,” (My age is none of your business) an ti ngam sak nia.

Kum zep thena, diklo taka kan inziah naupan’ avang hian sorkar sum bawm (mipui sum)-in a tuar teh meuh mai a. Pension sum thlengin a in-kahpup-chaw chho zel.. Chu aia pawi zawk chu Mizo Hnam pawi kan khawih nasa lutuk hi a ni. Hnam rinawmlo, zep ruk theih theih chu kum thlenga zep ruk ching kan lo ni ta. Tunhma deuh atanga kan sel thin Cachar Bengali patla khai (buk) diklo kan sawi aia nasa pawi kan khawih mek a, kan khawih tanna pawh a rei tawh na rawh e.

Kei aia kum 5 vela upa ni ngeia ka hriat si, an department ‘inter-se-seniority’ bu ka en a, kei aia kum 5 dawna naupanga inziak leh si hi vawikhat chu ka hmu leh tlat pek a. ‘Ka u’ ka ti dawn nge ‘Ka nau’ ka ti dawn? ‘Nge ‘Thianpa’ tiin ka ko dawn tih pawh hi ka hre thiam tawh lo a nih hi. Chutih rual chuan High School hotu thenkhatin an sikul naupang HSLC exam turte hmakhaw ngaia dikna aia an sorkar hnathawh ‘career’ tur ngaihtuah sakna avanga sikul naupang hriat hauh lohva an kum an lo zep then sak pawh an kuh tul tih ka hre tho, Mahse, ka’n ti tlat teh ang, mahse, khawvela kan ngaihsan ber kan zirtirtute pawh diklo taka kan kum min ziah saktu an lo nih chuan eng hi nge maw thil dik ni ta ber ang le?:

Kum kan tih dik ngam loh vang hi em ni kan football khel thiam ‘Under chumi khami’ ho hi a naupang lama an tawn san’ viau lai a, a upa (senior team) lama India pum huapa hnehna kan chan theih hauhloh chhan hi? Kan chhehvel leh state dangte’n ‘India tihdan a nia,’ tia an inthiam chawp pawhin keini (a hming tal pawha Kristian ram inti) chuan a dikin thil kan ti ngam tawh dawn lo’m ni? Zu laka kan duh fir ang chen tal hian dikna dang hi kan duh fir ve thei lo’m ni? Nge zan lam duty-a man awl chi lo hi chu kan namnul mai mai zui zel zawk dawn?

Kan nula/tlangval zingah thil tak tak ngaisang, thil dik duh an kuh tul tawh tih ka hria a. Nupui/pasal neih dawn pawha HIV/AIDS vei leh vei loh enchhin ngei duh pawh an awm teuh tawh.

Camping/Crusade/Bethel ilo piantharna lem hnawl ngam, a taka kum dik puanga a taka nung ngam thalai kan tam viau hunah kan ram chu a kal dik ngei hi zu ring tlat i a. Thil diklo, a kohhran tawngkauchhehah chuan ‘zirtirna diklo kan tih emaw, zirtirna himlo kan tih emaw pawh nise, piahlama a taka buh lem leh tak thliar ngam hun hi kan va nghakhlel em!...

Related Posts :