Hnathawktute him lohna ram

¢ Lalhruaitluanga Chawngte

February ni 29, 2008-a thil thleng kha kan la hre fur awm e; New Capital Complex panna kawngpui sir lungrem a chim a nih kha. Kha chhiatnaa nunna chan ta kha!

KTP General Conference-ah a kal ve chak tehlul nen, hnathawh a ngai si. A hnathawhna hmun chu hmun ralti a ni a, a thih phah ta a nih kha. New Capital Complex panna kawngpui lung rem turin hna a hmu hlimhlawt a ni, kalsan thei a ni lo. Amah Chhinga Veng-a mi a ni a, a hnathawhna hmunah lungrem a chim a, chu chuan a delhhlum ta a ni.

Khawpuia inhlawhna tur tam ber chu lehkhathiam lote pawhina an thawh theih chi a ni. Thil siamna hmunpui a awm loh avangin inhlawhna tur tam ber chu service industry-ah a ni. Thingpui dawra inhlawh an awm a, a then erawh thawmhnaw dawrah, a then in saknaah, a then lei laiin an inhlawh a, hmun hrang hrangah, a rem remah an inhlawh thin. An hah hle a, a hlawh erawh a tlem hle. Service security reng an nei lo. Thiamna hran nei lo pawhin an thawh theihah chuan construction work-a inhlawhte dinhmun hi an tha phian. Ni khatah Rs 100 te, chu aia tam te an hlawh thei. Mahse, an hnathawhna chu hna dang aiin chetsual a hlauhawm.

Hetianga a rem rem thawka inhlawhfa hi an tam sawt hle a, chhungkaw chawm nana hmang pawh an thahnem hle. Tin, hna te lo vang a, lehkha thiamte pawh hetianga hna remchang thawk hian an inhlawh a, chutiang chu an tam sawt khawp mai.

He'ng mite chungchang hian Mizoramah chuan ngaih pawimawh a hlawh lo a, a sorkar ber pawhin a ngaihsak lo. An hnathawhna hmun a hrehawmin an hlim lo a nih pawhin an chan tawk rengah ngaih a ni a, "Lehkha a zir tha duh lo vei a nih kha," tih te leh, "Rilru a nei lo em a ni," tih te chu an chan tawk a ni. Hna a van em avanga thalai lehkhathiamte'n labor hna an thawh pawhin ram hruaitute leh khawtlang hruaitute chuan engah mah an ngai lo a, "A thiam tan hna a vang lo," tih te chu an thu vuak thlak duh dan a ni. Mi zawng zawng hi mithiam an ni ngai dawn si lo. Chutiang chu thil theih a ni lo a, theih pawh ni se, mi zawng zawng mithiam an nihna society chu society nuam a ni thei lo ang.

Ram hruaitute leh pa rawnkaite chuan hetianga dinhmun hrehawm taka inhlawhfate hi an khawngaih lem lo. An khawngaih lo mai pawh a ni lo, hmasawnna lantirtu-ah an ngai emaw tih tur zawk a ni, relin min rawn luhchilh se, 'cheap labour' te hi tam se an duh mauh mai!

Midang chhawr thei khawpa pa inbengbelte chuan duhthlan tur ngah hi nuam an ti a, "Lehkhathiam chhawr tur an tam lutuk," tih te chu an sawi duh dan a ni. Chu chu an dinchhuah theihna tur pawh niin an hria. Mizoramah hian labor welfare awm lo se, an mi chhawrte chu an duh zat zat hlawh pe se, an duh duhin ban thei se tih chu an duhthusam ni hialin a lang. Lobour welfare reng reng, mi hnuaia inhlawhte leh sorkar hnuaia muster roll-a thawkte hamthatna leh an himna tur te chu thil tulah an ngai lo a, mihringah te, bungrua leh thlai tharchhuahah te pawh ram pawn atangin rawn lut nguah nguah se, duh thlan tur tam se tih chu an ngaihtuah dan ni te pawhin a lang. Chu chu khawvel kalphungah an ngai nghet thlap.

A inchhiar zau deuhte chuan an tanhmun sawhnghehnan 'Globalisation' te an sawi a, 'Tunlai khawvelah mahni inhung bik tur a ni lo,' tiin, Mizorama inhlawhfate dinhmun chu thil nihphung ve rengah an ngai a nih hi. Globalisation hlawhtlinpuitu ramte hi a inhung bing nasa sa, 'protectionism' kalpui nasa sa an ni tih an hre lo a ni.

Chutiang chu ram hruaitute leh khawtlang hruaitute thlir dan a ni a, Mizoram tan chuan labour welfare te chu hla te khuaa mi emaw tih tur khawpin a la hla. Inhlawhfate humtu tur an awm lo a, hmun him lova hnathawkte chhantu tur an awm hek lo. Tunah hian Mizoram hian labor officer a nei lo a, inspector a nei hek lo. Sorkar hnathawk let-a tam labourer an awm a, mahse, chu'ng mite tana thawk tur chu an awm lo.

Mizoram sorkar hnuaia department lian, minister te paw'n an inchuh thinte hi mi ramah chuan department te pawl a ni duh hle; Mizoramah department pawh a tlin loh laiin khawvel hmun dangah chuan labour deptt. chu department lian a ni thin thung. India sorkar hnuaiah pawh ministry hran nei ngat a ni. Mizoramah chuan labour & employment deptt. tih a ni a, labour chungchang leh employment chungchang hma tura tih an ni. He deptt. hnuaiah hian wing pathum - labour welfare, craftman training (ITI te hi) leh employment service (employment exchange tia hriat lar) te a awm. Khawi wing mah hi an indaih lo; indaih se chu unemployment problem hi a ziaawm ang a, labour welfare pawh a awm ve thei ang. Lungrem chimin a thawktute a delhhlum lo mai thei bawk.

Labour welfare buaipui turin labour inspector an awm ang a, hnathawktute dinhmun an thlithlai thin ang. Sorkarin lung a rem pawhin chu hmunah chuan hnathawktute an him em tih an enfiah ang a, an him loh chuan an chhan thin ang. Mahse, Mizoramah chutiang ti tur an awm si lo!

2007 kum chawhma lamah khan L&E deptt.-ah hian labour officer pakhat chu lak a ni ve a, chu bak chu labour welfare buaipuitu tur an awm lo. Vanduaithlak takin chu labour officer chu an ban a, tunah phei chuan inhlawhfate tana thawk tur Mizoram sorkar hian a nei lo hrim hrim! Kuthnathawktute thlavang hauhtu tur dan a awm neuh neuh a, lekkawh erawh a ni lo. A lekkawhtu tur an awm lo a ni.

Mizoramin labour officer a neih chhun hi a nungchang a that loh vanga ban a ni a, a chhan chu eng pawh ni se, labour officer nei lova Mizoram a awm hi, mi ram chu ni se news lian a tling ngei ang. Mizoram sorkar chuan labour officer pakhat lak a tum mek a, a lawmawm hle. Mahse, Mizoram puma inhlawhfa zawng zawng enkawl hi mi pakhat tan chuan a ngaihna a awm lo tih zawng mi pangngai chin chuan an hrethiam ang.

Mizoram sorkar hian labour rules 7 vel chu a nei ve. Rules 1-ah labour officer pakhat zel tal awm tura ngaih a ni, district leh hmun hrang hranga labourer-te viltu tur chu thuhran ni se, a rules lekkawh tur ringawt pawh hian rules pakhatah labour officer pakhat zel awm tura ngaih a ni a, Mizoram chuan chu chu a la hlat hle.

Ramin a mamawh tawk labour officer an awm ang a, chu'ng mite chuan mi hnuaia inhlawhte leh sorkar hnuaia inhlawhte dinhmun an thlithlai reng ang. An hnathawhna hmun a him leh him loh te, anmahni chhawrtute'n an tihduhdah leh tihduhdah loh te an en reng ang a, anmahni ruaitute'n Employment Provident Fund an tihsak leh tihsak loh te an en bawk ang.

Sorkar chu mipuite tana ding a ni a, mi tin tana thawktu tur a ni. Sorkar hnathawkte job security pek leh hnathawhna hmun him (workplace environment) ngaihtuahsak hi a tih tur a ni a, chutiang bawkin mi hnuaia inhlawhfate humhim leh work environment pek pawh a bat a ni. Sorkarin inhlawhfate an khawngaih ngang lo a nih pawhin, inhlawhfate an him loh hian ram a him lo tih a hriat avang tal pawhin inhlawhfate chu a enkawl tur a ni.

Kuthnathawka inhlawhte dinhmun chhiatzia chu tlang hriat a ni; tu pa mahin an fate thawh atan an duh ngai lo, thawk lo thei lo dinhmuna dingte chauhvin an thawk thin reng a ni ti ila kan tisual tam pui lo ang. Kuthnathawktute chang an ni lo, lehkhathiam, mi hnuaia inhlawhte ngei pawh an dinhmun a chhe hle a, private sikula thawk zingah ringawt pawh hian hreh chung chunga tuk tin-a mahni hnathawhna hmun pan thin an tam hle. Chutiang mite him lohna chu hlim lohnaah a chhuak ang a, lungawi lohnaah a inlet ang tih a hlauhawm khawp mai.

"Kan ramah thawh tur a tam lutuk. 'Thawh tur a awm lo' kan tih laiin ram pawn atanga lo kalte'n thawh tur an hmu reng. He'ng mite hian kan sum leh pai an phurchhuak thur thur a, thalaite hi inngaihtuah rawh u," tia thalaite fuihtute hian labour welfare an ngaihsak lo a, ngaihsak turin a awmzia an hre lo a ni. An tu leh fate hnathawhna hmun a him theihna tur leh hlawk zawka an thawh theihna tura hmalak a tulzia an hre lo a, sipai sorkar hlauva tlanchhiate leh mahni rama leng lo khawpa mihring an tamna hmun atanga nun ve tek tek theihna zawnga tlanchhiate dinhmun anga ding ve turin an tu leh fate an duhsak tihna ni berin a lang! Labour welfare ngaihtuah se, thalaite hi hnathawhna hmun him leh hrisel ngaihtuahsak phawt se, chumi hnu-ah taima turin fuih se, chutianga kalte chu a ni vawiina ram hmasawn kan tihte hi. Hnathawhna hmun him lo leh hlauhawm, hlawk bawk si lo, vawi khat hritlan hleka hlawh neih loh zelnaa thawk tura infuih chiam chiam hian kori a tu lo ang.

Workman's compensation a awm a, mahse, hnathawktu thil hre lo zawkte tan chuan hmalak ngaihna a vang hle. Remsiami te anga MZP meuh te'n an pui a nih ngawt loh chuan mi tam zawk tan a harsa lutuk. Compensation kher lo pawh, loneitute tan medical aid te pawh a awm a, kan ngaihsak si lo.

Ziak leh chhiar thiam tamna ram- Mizoram. Kristian ram- Mizoram. Hnathawktute him lohna ram pawh a ni, kuthnathawktute leh sorkar hnathawk ve lote him lohna ram chu. Chutiang dinhmuna ding chung chuan ramin hma a sawn thei a nih chuan, chu ram chu mihausate leh thil-ti-theite hmasawnna ram, a retheite retheih zual zelna ram tihna a ni tal ang. Chu chu a him lo a, inchimralna kawng a hawi vung mai!

Kei-a ngaihdan mawl tak maiah chuan, labour welfare kan la hlat em avang ringawt pawh hian, kan lehkhathiamte meuh pawhin labour welfare an la vei loh em avang ringawt pawh hian rel nei tur hian he ram hi a la inpeih lo a ni.

Related Posts :